នៅក្នុងវីដេអូមួយ ដាក់តាមបណ្ដាញអាំងធើណែត នៅថ្ងៃអង្គារទី០៧ខែឧសភា មេដឹកនាំបណ្ដាញភេវរនិយម អាល់កៃដា (Al-Qaida) ប្រចាំនៅទ្វីបអាហ្វ្រិកខាងជើង បានអំពាវនាវទៅសមាជិកទាំងអស់ នៅក្នុងពិភពលោក ឲ្យធ្វើការវាយប្រហារ​ទៅលើផលប្រយោជន៍​បារាំង ទោះ​នៅទីណាក៏ដោយ។ ជាការគម្រាមមួយ ដែលប្រធានាធិបតីបារាំង ថាយក​ជាការ​បាន។

កងកម្លាំងប្រដាប់អាវុធរបស់បណ្ដាញ អាកមី នៅប្រទេសម៉ាលី។

បណ្ដាញភេវរនិយម អាល់កៃដា ប្រចាំនៅទ្វីបអាហ្វ្រិកខាងជើង ដែលមានឈ្មោះថា អាកមី (Aqmi) មិនបានទម្លាក់អាវុធចុះ ប្រឆាំងនឹងប្រទេសបារាំងនោះទេ។ មេដឹកនាំរបស់បណ្ដាញអ៊ីស្លាមនិយមនេះ បានធ្វើការអំពាវនាវនៅក្នុងវីដេអូមួយ ដែល​បានដាក់នៅលើបណ្ដាញអាំងធើណែតនៅថ្ងៃអង្គារ ឲ្យវាយប្រហារទៅលើបណ្ដាផលប្រយោជន៍បារាំង នៅទីកន្លែងណា​ក៏​ដោយនៅក្នុងពិភពលោក។

សេចក្ដីអំពាវនាវនេះ បានធ្វើឡើងដោយមេដឹកនាំបណ្ដាញភេវរនិយមម្នាក់ឈ្មោះ អាប៊ូ អូប៊ីដា យូសែហ្វ អាល អាណាប៊ី (Abou Obeida Youssef Al-Annabi) នៅរយៈពេល៤ខែក្រោយអន្តរាគមន៍យោធា នៅប្រទេសម៉ាលី របស់ប្រទេសបារាំង។ អាប៊ូ អូប៊ីដា បានបរិហារ ពី«ចម្បាំងរបស់ពួកគ្រឹស្ដ៍ ដែលដឹកនាំដោយប្រទេសបារាំង ប្រឆាំងនឹងអ្នកកាន់សាសនាអ៊ីស្លាម» និងឃ្លាមួយទៀត មានន័យថា «ការដណ្ដើមមកកាន់កាប់ របស់ប្រទេសបារាំង នូវទឹកដីនៃអ៊ីស្លាម»។

សម្រាប់ប្រធានាធិបតីបារាំង ជាការ«បន្តប្រយុទ្ធប្រឆាំងនឹងភេវរនិយម»

នៅក្នុងការថ្លែងសារមួយទៀត ដែលបានធ្វើកាលពីថ្ងៃទី២៥ខែមេសា មេដឹកនាំបណ្ដាញភេវរនិយមដដែល បានអំពាវនាវ​ទៅអ្នកកាន់សាសនាអ៊ីស្លាមទាំងអស់ នៅក្នុងលោក ឲ្យចូលធ្វើសង្គ្រាមសាសនា ដ្យីហាដ (djihad) និងធ្វើការវាយ​ប្រហារ ទៅលើផលប្រយោជន៍បារាំងនៅគ្រប់ទីកន្លែង ក្រោយហេតុផលមួយថា វាបានក្លាយរឿងសមហេតុផល ដើម្បី​ឆ្លើយតប​នឹងការ«រំលោភឈ្លានពាន» របស់ប្រទេសនេះទៅក្នុងពិភពអ៊ីស្លាម តាំងពីថ្ងៃទីមួយមក។

នៅក្នុងសន្និសិតកាសែត ជាមួយនឹងប្រធានាធិបតីនៃប្រទេសប៉ូឡូញ នៅវិមានប្រធានាធិបតីអេលីហ្សេបារាំង លោក​ប្រធានាធិបតី ហ្វ្រង់ស័រ ហូឡង់ (François Hollande) បានបញ្ចេញប្រតិកម្ម ថាយកជាបានការ នូវការគម្រាម​ទាំងឡាយ​នេះរបស់បណ្ដាញភេវរនិយម «អាកមី»។ «យើងបានធ្វើឲ្យមានការខាតបង់ដ៏ធ្ងន់ធ្ងរ ទៅលើបណ្ដាញភេវរនិយម អាកមី ដោយសារអន្តរាគមន៍យោធាបារាំង នៅប្រទេសម៉ាលី»។ លោកហូឡង់បានបញ្ចាក់ថា «យើងចាត់ទុក ថានឹងបន្តកិច្ចការ និងកិច្ចអន្តរាគមន៍យោធានៅប្រទេសម៉ាលី នៅក្នុងរយៈពេលចាំបាច់មួយ បើទោះជាយើងបានបន្ថយចំនួនកម្លាំងក៏ដោយ និងព្រមទាំងបង្កើនការឃ្លាំមើលនៅជុំវិញម៉ាលី ដើម្បីបន្តប្រយុទ្ធប្រឆាំងនឹងភេវរនិយម»៕

---------------------------------------------------
ដោយ សេក មនោរកុមារ - ប៉ារីស​ ថ្ងៃទី៧ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ