យង់ គឹមអេង៖ គ.ជ.ប មិន​​គួរ​ច្រាន​ចោល សំណើរ​សង្គម​ស៊ីវិល

គ.ជ.ប បានចេញនូវសេចក្តីប្រកាសព័ត៌មាន ជាផ្លូវការមួយ ច្រានចោលនូវសំណើរ របស់សង្គមស៊ីវិល ដែលស្នើរសុំឲ្យមានការ«បិទផ្សាយបញ្ជីឈ្មោះបោះឆ្នោតនៅតាមភូមិ» កាលពីថ្ងៃទី៦ ខែមេសា ម្សិលម៉ិញនេះ។ សេចក្តីប្រកាសព័ត៌មាន បានលើកឡើងថា ការបិទផ្សាយបញ្ជីឈ្មោះបោះឆ្នោត នៅតាមភូមិ មិនអាចធ្វើបានទេ ព្រោះច្បាប់ បទបញ្ជា និងនីតិវិធី មិនបានចែងពីការបិទផ្សាយបញ្ជីឈ្មោះបោះឆ្នោតនៅតាមភូមិនោះទេ។
Loading...
  • ដោយ: អ៊ុម វ៉ារី
  • កែប្រែចុងក្រោយ: May 07, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ភ្នំពេញ៖ គ.ជ.ប បានចេញនូវសេចក្តីប្រកាសព័ត៌មាន ជាផ្លូវការមួយ ច្រានចោលនូវសំណើរ របស់សង្គមស៊ីវិល ដែលស្នើរ​សុំឲ្យមានការ«បិទផ្សាយបញ្ជីឈ្មោះបោះឆ្នោតនៅតាមភូមិ» កាលពីថ្ងៃទី៦ ខែមេសា ម្សិលម៉ិញនេះ។ សេចក្តីប្រកាស​ព័ត៌មាន បានលើកឡើងថា ការបិទផ្សាយបញ្ជីឈ្មោះបោះឆ្នោត នៅតាមភូមិ មិនអាចធ្វើបានទេ ព្រោះច្បាប់ បទបញ្ជា និង​នីតិវិធី មិនបានចែងពីការបិទផ្សាយបញ្ជីឈ្មោះបោះឆ្នោតនៅតាមភូមិនោះទេ។


រូបចម្លងពីអេក្រង់របស់គេហទំព័រគ.ជ.ប.។

ចំពោះបញ្ហាដែលគ.ជ.ប លើកឡើងខាងលើនេះ ប្រធានមជ្ឈមណ្ឌល ប្រជាពលរដ្ឋដើម្បីអភិវឌ្ឍន៍ និងសន្តិភាព(PDP) លោក យង់ គឹមអេង បានបញ្ជាក់មកវិញថា ទាំងនេះមិនមែន ជាមួលហេតុនោះទេ តែអ្វីដែលសំខាន់នោះ « តើគ.ជ.ប ចង់​ធ្វើឬអត់?»។ លោកបន្តថា គ.ជ.ប ចង់បង្ហាញខ្លួនឯងថា៖ « មានអំណាច បដិសេធ ចេះតែបដិសេធ តែគាត់មិនបាន យល់ ពីអ្វីដែលជាមូលហេតុពិត អ្វីជាការទាមទារពិត»។ លោកពន្យល់ថា នៅតាមទីក្រុងប្រជាជនងាយស្រួល ក្នុងការបន្លាស់ទី ដើម្បីពិនិត្យបញ្ជីឈ្មោះបោះឆ្នោត តែនៅតាមជនបទ វិញ ប្រជាជនត្រូវធ្វើដំណើរឆ្ងាយ ដើម្បីទៅសាលាឃុំ។

លោកក៏បានបង្ហាញថា ការបិទបញ្ជីឈ្មោះនៅតាមភូមិ ជាការសម្រួលដល់ការចំណាយក្នុងការទៅមក ជួយឲ្យប្រជាពលរដ្ឋ​ភាគច្រើនបានពិនិត្យមើលបញ្ជីឈ្មោះ និងអាចបង្កើនចំនួន អ្នកបោះឆ្នោតកាន់ តែច្រើនឡើង។ លោកព្រមានថា អត្រានៃ​អ្នកទៅបោះឆ្នោតកាន់តែតិចទៅ ឯអ្នកបាត់ឈ្មោះក៏កាន់តែច្រើន និង ការថ្គោលទោស គ.ជ.ប នៅបន្តមានតទៅទៀត បើ​គ.ជ.ប នៅតែបន្តយន្តការ ដោយមិនទទួលយក នូវអនុសាសន៍របស់សង្គមស៊ីវិលទេ ។

សេចក្តីប្រកាសព័ត៌មានដដែលក៏បានបង្ហាញថា ប្រជាពលរដ្ឋមួយភូមិ អាចមានឈ្មោះ ក្នុងការិយាល័យបោះឆ្នោតផ្សេង​គ្នា​ក្នុងឃុំសង្កាត់។ ដូច្នេះបើបិទបញ្ជីបោះឆ្នោតនៅ តាមភូមិ នីមួយៗ ត្រូវយកបញ្ជីបោះឆ្នោតគ្រប់ការិយាល័យ​បោះឆ្នោត​ក្នុង​ឃុំសង្កាត់ទៅបិទផ្សាយ។ លោក យង់ គឹមអេង បានបញ្ជាក់ករណីនេះថា នេះជាសមត្ថកិច្ចរបស់គ.ជ.ប ដែលនឹងអាច ធ្វើ​រឿងហ្នឹង វាមិនមែនជាឧបសគ្គទេ ហើយក៏មិនមែនជាមួលហេតុសម្រាប់ធ្វើការបដិសេធនោះដែរ។

គ.ជ.ប បានអះអាងថា ខ្លួនមានដំណោះស្រាយផ្សេងពីនេះ ក្នុងការផ្សព្វផ្សាយបញ្ជីឈ្មោះបោះឆ្នោត មានច្រើនដំណាក់​កាល ដោយមានពេលគ្រប់គ្រាន់ ស្របតាមច្បាប់ បទបញ្ជា និងនីតិវិធី។ ដូចជាការផ្សព្វផ្សាយបញ្ជីឈ្មោះនៅលើគេហទំព័រ គ.ជ.ប (www.voterlist.org.kh) ដើម្បីឲ្យអ្នកមានលទ្ធភាពបើកមើល និងជួយផ្សាយបន្តជាដើម។ តែចំពោះ សង្គមសុីវិល វិញយល់ថា ចំនួនអ្នកដែលចេះប្រើប្រាស់បណ្តាញគេហទំព័រ នៅមានកម្រិតទាបនៅឡើយ។

នៅក្នុងសេចក្តីប្រកាសព័ត៌មាននេះ គ.ជ.ប ក៏បានច្រានចោលផងដែរ នូវការបញ្ចូលតំណាងគណបក្ស ដែលមានអសនៈ​នៅរដ្ឋសភា ធ្វើជាសមាសភាពនៅក្នុង គណៈកម្មការ ជ្រើសរើស និងតែងតាំង គឃ/សប និងគកប/គករ។ បើតាមច្បាប់ គឺតម្រូវឲ្យមាន ការជ្រើសរើសប្រជាពលរដ្ឋ ក្នុងឃុំ សង្កាត់ ធ្វើជាគណៈកម្មការឃុំ សង្កាត់ រៀបចំការបោះឆ្នោត ឬ​ការិយាល័យបោះឆ្នោត។ សង្គមសុីវិល យល់ថានៅក្នុងស្ថាប័ន គ.ជ.ប ភាគច្រើនពីលើដល់ក្រោម ត្រូវបានគេរិះគន់​ជា​ញឹកញាប់ពីបក្សដែលមិនកាន់អំណាច ថាមានភាពលំអៀង។ បើសមាសភាពក្នុងនោះមានសមាជិកបក្សកាន់អំណាច គួតែ​បញ្ចូលបក្សដទែទៀត ដើម្បីឲ្យបានចម្រុះបក្ស ទើបប្រសើរ តួយ៉ាងធ្វើដូចជាប្រទេសឥណ្ឌូនេស៊ីជាដើម។

ជារួម លោក យ៉ង គឹមអេង បានលើកឡើងថា អ្វីដែលគ.ជ.ប បានរៀបចំ អាចជាឧបសគ្គមួយ ក្នុងការចូលរួម របស់​ប្រជា-​ពលរដ្ឋនៅតាមទីជនបទ ក្នុងការពិនិត្យឈ្មោះបោះឆ្នោត ក៏ដូចជា ការទៅចូលរួមបោះឆ្នោតដែរ ជាពិសេសធ្វើឲ្យភាព​មិន​ទុកចិត្តលើគ.ជ.ប នៅតែបន្តមាន និងអាចមានការតវ៉ាមិនទទួលស្គាល់លទ្ធផល។ លោកបន្តថាទោះជាយ៉ាងណា ក៏ដោយ បើគ.ជ.ប គ្មានឆន្ទៈក្នុងការកែទម្រង់ទេ មិនអាចមានប្រពន្ធ័បោះឆ្នោតមួយ ដែលមានភាពប្រសើរឡើងនោះទេ។

សង្គមស៊ីវិលមានអំណាចត្រឹមតែការទាមទារ ការតវ៉ា និងការជម្រុញឲ្យរដ្ឋភិបាល ក៏ដូចជា គ.ជ.ប ផ្ទាល់ ទទួលយក​អនុសាសន៍ បើគាត់មិនទទួលយកមិនដឹងថា នឹងត្រូវធ្វើយ៉ាងណា នោះទេ។ តែទោះជាយ៉ាងណាក្តី ការចូលរួមក្នុងការ​សង្កេតការណ៍ ត្រូវតែមាន សម្រាប់គណបក្សនយោបាយ សង្គមស៊ីវិលជាតិ និងអន្តរជាតិ។ ទាំងនោះ ធ្វើឲ្យភាពស្រប​ច្បាប់មាន កម្រិតខ្ពស់ និងក៏ជាមុខមាត់ កិត្តិយស របស់ស្ថាប័នដែលរៀបចំនោះដែរ។ ជាចុងក្រោយលោក ក៏បានទទួល​ស្គាល់ថា គ.ជ.ប បានកែទម្រង់ តែបន្តិចបន្តួចប៉ុណ្ណោះ ដូចជាការសម្គាល់ អន្តសញ្ញាណ អ្នកបោះឆ្នោត ជំនួសដោយការ​ដាក់លេខកូដជាដើម៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៧ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...