ការបាញ់រះមួយបានកើតឡើងនៅថ្ងៃអាទិត្យនេះ នៅពីមុខវិមានរដ្ឋាភិបាល ខណៈពេលរដ្ឋាភិបាលថ្មី ដឹកនាំដោយលោក អង់រីកូ ឡេតា (Enrico Letta) កើតចេញពីគណបក្សនិយមឆ្វេង និងស្ដាំ កំពុងស្បថចូលកាន់តំណែង។

ជនរងគ្រោះ ដោយការបាញ់រះរបស់ជន«អស់សង្ឃឹមម្នាក់»។ (រូបថត AP)

គ្រាប់កាំភ្លើងជាច្រើនគ្រាប់ បាញ់ចេញពីកាំភ្លើងរបស់មនុស្សម្នាក់ ដែលចាត់ទុកជាមនុស្សអស់សង្ឃឹម និងឯកោនោះ ត្រូវ​បានវាយតម្លៃដោយរដ្ឋមន្ត្រីមហាផ្ទៃថ្មី លោកអង់ជឺលីណូ អាហ្វាណូ (Angelino Alfano) យ៉ាងដូច្នេះថា «សកម្មភាព​ឧក្រិដ្ឋកម្មយ៉ាងរន្ទត់ កើតចេញពីមនុស្សគ្មានការងារធ្វើម្នាក់ ដែលចង់សម្លាប់ខ្លួន»។ លោក អាហ្វាណូ បានបញ្ជាក់នៅមុខ​អ្នកសារព័ត៌មានថា «ស្ថានភាពទូទៅនៃសុវត្ថិភាពសាធារណៈ មិនគួរអោយមានការព្រួយបារម្ភទេ បើទោះជានៅក្រោយ ហេតុការណ៍នេះក៏ដោយ»។ ប៉ុន្តែលោកសង្កតធ្ងន់ថា «ការត្រួតពិនិត្យទៅលើករណី ដែលអាចបង្កជាគ្រោះថ្នាក់ ត្រូវបាន​ពង្រឹកទ្វេឡើង»។

ខណៈពេលដែលលោកនាយករដ្ឋមន្ត្រីអង់រីកូ ឡេតា ចេញពីគណបក្សប្រជាធិបតេយ្យ (ឆ្វេងនិយមកណ្ដាល) និងសមាជិក​រដ្ឋាភិបាលទាំង២១នាក់ កំពុងស្បថចូលកាន់តំណែង នៅចំពោះរដ្ឋធម្មនុញ្ញអ៊ីតាលីនោះ នៅចម្ងាយ១​គីឡូម៉ែត្រ​ពីទី​នោះ និងវេលាម៉ោងប្រមាណជា៩និង៤០នាទីព្រឹកដដែល ជនម្នាក់បានបាញ់រះជាច្រើនគ្រាប់ ធ្វើអោយរបួសនគរបាលពីរនាក់ ដែលកំពុងឈរយាម នៅមុខវិមានរដ្ឋាភិបាលឈីជី (Chigi) របស់អ៊ីតាលី។

នៅតាមស្ថានីយ៍ទូរទស្សន៍ គេឃើញបញ្ចាំងរូបភាពពីការស្បថចូលកាន់តំណែង របស់នាយករដ្ឋមន្ត្រី និងរដ្ឋមន្ត្រី ម្នាក់ម្ដងៗ ប្រកបដោយទឹកមុខរីករាយ និងធូរស្បើយពីវិបត្តិនយោបាយ ជាប់គាំងជាងពីរខែមកហើយ។ តែរំពេចនោះ ពួកអ្នកធ្វើ​អត្ថាធិប្បាយតាមទូរទស្សន៍ បានរាយការណ៍ពីការបាញ់រះនេះ ដែលធ្វើអោយមានជនរងគ្រោះយ៉ាងហោច​ពីរនាក់ នៅមុខ​វិមានរដ្ឋាភិបាល។

តាមសាក្សីនៅនឹងកន្លែង ជនខ្មាន់កាំភ្លើងឈ្មោះ ល្វីជី ព្រីយ៉េទី (Luigi Prieti) មានអាយុ៤៩ឆ្នាំ បានស្លៀកពាក់ក្រវាត់ករ និង​អាវធំស្អាតបាត ហើយដើរចូលមកពីមុខវិមានរដ្ឋាភិបាល រូចចាប់ផ្ដើមបាញ់រះ ទៅលើភ្នាក់ងារការពារសន្តិសុខ ដែលស្ថិត​នៅចម្ងាយពីខ្លួន តែប្រាំម៉ែត្រប៉ុណ្ណោះ។ អភិបាលក្រុងរ៉ូម លោក ជីយ៉ានី អាឡឺម៉ាណូ (Gianni Alemanno) បាននិយាយថា ជាសកម្មភាពរបស់ជនមានសតិមិនគ្រប់ម្នាក់ ហើយបានបញ្ជាក់ថា ជនរងគ្រោះ មិនស្ថិតនៅក្នុងស្ថានភាពធ្ងន់ធ្ងរនោះទេ។ អ្នកកាសែតអ៊ីតាលីម្នាក់ បានពន្យល់នៅក្នុងអត្ថបទរបស់ខ្លួនថា «ប៉ុន្តែវាជារឿងគួរអោយព្រួយបារម្ភ។ គេត្រូវមើលថា តើជន​នេះជានរណា ហើយថាតើហេតុអ្វីបានជាបុរសនេះ បានជ្រើសរើសយកវេលានេះ និងទីកន្លែងនេះដើម្បីធ្វើសកម្មភាព? វា​មិនមែន ជារឿងមួយចៃដន្យនោះទេ។»

បងប្អូនប្រុសម្នាក់ របស់ជនខ្មាន់កាំភ្លើង បានបញ្ជាក់ប្រាប់អ្នកកាសែតក្នុងស្រុកមួយថា ល្វីជី ព្រីយ៉េទី មិនមានបញ្ហា​ខាង​រោគផ្លូវចិត្តនោះទេ ហើយក៏មិនមែនជាភេវរជនដែរ។ កាសែតក្នុងស្រុកបានរាយការណ៍ថា ជននេះជាជាងកំបោរម្នាក់ ដែល​បានបាត់បង់ការងាររបស់ខ្លួន ហើយបានវិលមករស់នៅតែម្នាក់ឯង ក្នុងក្រុងកាឡាប្រ៍ (Calabre ផ្នែកខាងត្បូងនៃអ៊ីតាលី)  បន្ទាប់ពីបានចាកចេញពីភរិយាខ្លួន និងកូនប្រុសម្នាក់អាយុ១០ឆ្នាំ នៅក្នុងទីក្រុងមួយទៀតផ្នែកខាងជើងនៃប្រទេស៕

ខាងក្រោមនេះ ជារូបភាពមួយចំនួន ជុំវិញព្រឹត្តិការណ៍បាញ់រះនេះ៖

នៅចម្ងាយ១គីឡូម៉ែត្រ ពីកន្លែងកើតហេតុ នាយករដ្ឋមន្ត្រីកំពុងស្បថចូលកាន់តំណែង។ (រូបថត AP)

ជនរងគ្រោះនឹងការបាញ់រះ ជានគរបាលម្នាក់ ពីចំណោមនគរបាលពីររូប កំពុងឈរយាមនៅមុខវិមានរដ្ឋាភិបាលអ៊ីតាលី។ (រូបថត AP)

ជនខ្មាន់កាំភ្លើង ដែលត្រូវបានបង្ក្រាបដោយ សមត្ថកិច្ចភ្លាមៗនោះ។ (រូបថត AP)

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៨ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ