៧៣ពាន់ដុល្លា ដើម្បីបានផឹកកាហ្វេជាមួយ«ថៅកែ»អៀផល ក្នុងការដេញថ្លៃមួយ
តើមាននរណាខ្លះ អាចមានសំណាងអាចទៅអង្គុយផឹកកាហ្វេ ជាមួយនឹងនាយកមហាក្រុមហ៊ុនកំព្យូទ័រដ៏ធំជាងគេ របស់ពិភពលោក ឈ្មោះអៀបផល (Apple) នោះ? កម្មវិធីដេញថ្លៃនេះ ត្រូវបានបង្កើតឡើង នៅតាមបណ្ដាញអាំងធើណែត ដើម្បីប្រមូលមូលិធិ ទៅជួយទ្រទ្រង់អង្គការមួយ ដែលធ្វើការងារ ការពារសិទ្ធិមនុស្ស។
លោក ធីម ឃូក អគ្គនាយកក្រុមហ៊ុន អៀផល ក្នុងពេលបង្ហាញផលិតផលទូរស័ព្ទដៃចុងក្រោយគេ។
ចុះអ្នកវិញ យល់ថា គួរត្រូវរាប់ថាជាសំណាង ឬជាបំណងយ៉ាងមុតមាំ ក្នុងការជួបផឹកកាហ្វេមួយពែងតូច ជាមួយអគ្គនាយកក្រុមហ៊ុនអៀផល លោក ធីម ឃូក (Tim Cook) ឬយ៉ាងណា? «សំណាង ឬបំណង»នេះ ត្រូវបានគេដាក់ឲ្យដេញថ្លៃ នៅតាមបណ្ដាញអាំងធើណែត ដើម្បីស្វែងរកមូលិធិជួយដល់ អង្គកាការពារសិទ្ធិមនុស្សមួយ។ កាលពីថ្ងៃពុធកន្លងមក គេត្រូវមានប្រាក់យ៉ាងហោចណាស់ ៧៣ពាន់ដុល្លា ដើម្បីមានសង្ឃឹមថាអាចឈ្នះការដេញថ្លៃ ហើយឆក់យកសំណាង ឬបំណងនេះបាន។
ឆារីធីប៊ូស (Charitybuzz) ក្រុមអ្នករៀបចំការដេញថ្លៃនេះ បានអោយដឹងថា អ្នកប្រើប្រាស់អាំងធើណែតម្នាក់ មានឈ្មោះជាអក្សរកាត់ rory.oneill3 បានឈ្នះដាច់គេ ដើម្បីបានឱកាសទៅផឹកកាហ្វេ ដែលមានរយៈពេលពី៣០នាទី រហូតដល់មួយម៉ោង ជាមួយនឹងលោក ធីម ឃូក អគ្គនាយកអៀផល និងជាអ្នកបន្តវេនពីអតីតស្ថាបនិកក្រុមហ៊ុននេះ លោក ស្ទេវ ចប (Steve Jobs)។
អ្នកបានឈ្នះការដេញថ្លៃ ឈ្មោះ rory.oneill3 រូបនោះ បានហ៊ានអោយតម្លៃខ្ពស់ជាងគេបង្អស់ មានកម្រិតដល់ទៅ ៧២ ៧៧៧ដុល្លា។ ការណាត់ជួបទទួលទានកាហ្វេនេះ នឹងត្រូវធ្វើនៅក្នុងការិយាល័យ របស់អគ្គនាយកក្រុមហ៊ុនអៀផលស្ថិតនៅក្រុងខូភើធីណូ (Cupertino) ក្នុងរដ្ឋកាលីហ្វ័នី (Californie) សហរដ្ឋអាមេរិក ហើយអ្នកឈ្នះការដេញថ្លៃ មានសិទ្ធិនាំមនុស្សម្នាក់ទៀត មកអង្គុយ«ទទួលទានកាហ្វេ»ជាមួយ។
ជាលើកដំបូងបង្អស់ ដែលធីម ឃូក បានសាកល្បងស្ថាបនារូបភាពរបស់លោក ចាប់តាំងពីលោកបានមកជំនួស អតីតស្ថាបនិក លោកស្ទេវ ចប ក្នុងតំណែងជាមេដឹកនាំកំពូល របស់ក្រុមហ៊ុននោះមក។ លោកបានចំណាយពេលរបស់លោក ដែលមិនសូវជាមានច្រើននេះ ប្រគល់ទៅឲ្យព្រឹត្តិការណ៍ប្រចាំឆ្នាំ ដើម្បីប្រមូលប្រាក់ ទៅជួយអង្គការអាមេរិកាំងមួយ ដើម្បីការពារសិទ្ធិមនុស្ស ដែលមានឈ្មោះថា មជ្ឈមណ្ឌល រ៉ូប៊ែរហ្វ្រង់កេណេឌី (Robert F. Kennedy Center)៕
-------------------------------------------------
ដោយ ឈូករ័ត្ន - ប៉ារីស ថ្ងៃទី២៨ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ