ប្រធានាធិបតីឆេកឆិន ឡើង«ដាល់»ជាមួយ រដ្ឋមន្ត្រីរបស់គាត់ (VDO)
ប្រធានាធិបតីនៃប្រទេសឆេកឆិនី លោក រ៉ាមហ្សាន កាឌីរ៉ូវ (Ramzan Kadyrov) ចូលចិត្តការបង្ហាញសាច់ដុំ ក្នុងការដឹកនាំជៀសជាង ការនិយាយរកហេតុផល និងច្បាប់ទម្លាប់។ ក្នុងពេលដែលលោកបានរិះគន់ សមាជិកម្នាក់នៃរដ្ឋាភិបាល ដែលបានធ្វើកំហុសមួយមិនត្រូវចិត្ត លោកបានកែលម្អសមជិកម្នាក់នោះ ដោយបានហៅឡើងលើ«រិញប្រដាល់» វាយជាមួយលោក។
ប្រធានាធិបតីនៃប្រទេសឆេកឆិនី លោក រ៉ាមហ្សាន កាឌីរ៉ូវ។
កាលពីដើមសប្ដាហ៍នេះ ប្រធានាធិបតីនៃប្រទេសឆេកឆិនី លោក រ៉ាមហ្សាន កាឌីរ៉ូវ បានបន្ធូរអារម្មណ៍មួម៉ៅលោក ដោយបានអញ្ជើញ លោក សាលាបេក អ៊ីស្មៃឡូវ (Salambek Ismaïlov) រដ្ឋមន្ត្រីមួយរូបរបស់គាត់ ឲ្យឡើងលើលានប្រដាល់ ដើម្បីជាការពិន័យទៅនឹងការធ្វើខុស របស់រដ្ឋមន្ត្រីរូបនេះ។ ប្រធានាធិបតីរូបនេះ បានសរសេរនៅក្នុងបណ្ដាញសង្គមថា លោកបានធ្វើកម្មវិធីប្រដាល់មួយ ជាមួយមន្ត្រីជាន់ខ្ពស់ទទួលខុសត្រូវខាងកីឡា និងវប្បធម៌របស់ប្រទេស ដោយសារតែមន្ត្រីនោះ មិនបានជួសជុលអាគារមួយ ដែលជាទីស្ដីការក្រសួងរបស់ខ្លួន។
«ជាមួយនឹងមួយដៃខាងឆ្វេង និងមួយដៃទៀតខាងស្ដាំ ខ្ញុំបានពន្យល់គាត់ ថាត្រូវប្រើខួរក្បាលរបស់ខ្លួនឯងខ្លះ» លោកកាឌីរ៉ូវ បានបន្ថែម។ រូបភាពប្រដាល់ បានផ្សាយនៅលើកញ្ចក់ទូរទស្សន៍ អ៊ិនធីវី (NTV) របស់រ៉ូស្សី ដែលមានលក្ខណៈជារូបភាពឯកជនមួយ។
ការប្រកួតនេះ បានប្រព្រឹត្តទៅចំនួនពីរទឹក ហើយមានអាជ្ញាកណ្ដាលម្នាក់ផង។ ទោះបីជាយ៉ាងណាក៏ដោយ ក៏រដ្ឋមន្ត្រីរូបនេះ ត្រូវបានអនុញ្ញាតអោយពាក់ក្បាំងការពារក្បាល ព្រោះ«គាត់ត្រូវចេញទៅធ្វើការស្អែក»។ នេះជាការបញ្ជាក់របស់លោកប្រធានាធិបតី ដែលជាបុរសខ្លាំងមួយរូប បន្តុបតំណែងដោយទីក្រុងម៉ូស្គូ នៅក្នុងប្រទេសមួយ ដែលធ្លាប់ជាអតីតរដ្ឋរបស់សហភាពសូវៀត។ នៅក្នុងរូបភាពវីដេអូនោះ គេឃើញរដ្ឋមន្ត្រីការងាររបស់ប្រទេសរ៉ូស្សី ក៏មានវត្ថមាននៅក្នុងពេលប្រកួតដែរ ហើយកំពុងតែឈរសើចយ៉ាងគ្រហាញៗ នោះទៀតផង។
ប្រធានាធិបតីមហាអស្ចារ្យ បានពន្យល់នៅក្នុងអត្ថបទនៃបណ្ដាញសង្គមនោះទៀតថា «វាមានប្រសិទ្ធិភាពណាស់ ដែលគាត់ត្រូវទទួលពិន័យតាមវិធីរបៀបនេះ ទាក់ទងនឹងកង្វះការទទួលខុសត្រូវជាផ្លូវការ របស់គាត់។ ខ្ញុំគិតថា គាត់អាចជម្រុះការក្ដៅក្រហាយរបស់គាត់មកឲ្យខ្ញុំ នៅលើលានប្រដាល់ វាប្រសើរជាងយករឿងនេះ ទៅរករឿងអ្នកផ្ទះរបស់គាត់៕»
សូមទស្សនាវីដេអូនេះ ធ្វើអត្ថាធិប្បាយជាភាសាបារាំង៖
-------------------------------------------------
ដោយ ឈូករ័ត្ន - ប៉ារីស ថ្ងៃទី២៧ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ