គណបក្សប្រឆាំងរបស់ប្រទេសវេណេស៊ុយអេឡា បានចោទរដ្ឋាភិបាលរបស់លោកប្រធានាធិបតីជាប់ឆ្នោតថ្មី លោក នីកូឡា ម៉ាឌូរ៉ូ (Nicolas Maduro) ថាបានចាប់ឃាត់ខ្លួនយ៉ាងសន្ធឹកសន្ធាប់ បាតុករ ដែលបានចុះតាមដងផ្លូវប្រឆាំង នឹង​លទ្ធផល​នៃការបោះឆ្នោត ដែលពួកគេយល់ថា នៅប្រកបដោយមន្ទិលនោះ។

មេបក្សប្រឆាំង លោក ហេនរីក កាព្រីលេស ក្នុងពេលធ្វើការឃោសនាបោះឆ្នោតកន្លងមក។

តំណាងរាស្ត្រមួយរូបរបស់គណបក្សប្រឆាំង លោកស្រី ដែលសា សូឡូហ្សាណូ (Delsa Solorzano) បានអោយដឹងថា បាតុករចំនួន ២៤២នាក់ ត្រូវបានចាប់ខ្លួន តាំងពីថ្ងៃច័ន្ទទី១៥ខែមេសាមនេះ ដោយសារតែពួកគេបានគោះខ្ទះឆា និងឆ្នាំងស្ល នៅក្នុងពេលជួបជុំគ្នាដើម្បីធ្វើបាតុកម្មតវ៉ានោះ។

នៅក្នុងសន្និសិតកាសែត នៅថ្ងៃសៅរទី២០ខែមេសានេះ លោកស្រីបាននិយាយថា «យើងមិនដឹងទេ ថាកាន់ខ្ទះឆា ឬកាន់​ឆ្នាំងសម្រាប់ស្ល វាជាអំពើឧក្រិដ្ឋកម្ម ឬភេវរកម្ម»។ តែលោកស្រី ក៏បាននិយាយដែរ បាតុករមួយចំនួនធំ ដែលបន្ទាប់ពីបាន​ឃាត់ខ្លួន ត្រូវបានដោះលែងអោយមានសេរីភាពវិញហើយ។ លោកស្រីបានបន្ថែមថា បាតុករដែលត្រូវបានឃាត់ខ្លួន នៅ​រដ្ឋឡារ៉ា (ផ្នែកពាយ័ព្យនៃប្រទេស) បានរងនូវទារុណកម្ម ហើយថាពួកគេទាំងនោះ ត្រូវបានចាប់ខ្លួន នៅក្រោយបទចោទ​ប្រកាន់មួយចំនួន ដូចជា«មានខ្ទះឆានៅនឹងដៃ» «បង្កើតសមាគមខុសច្បាប់» «បំបះបំបោរ» «ធ្វើរំខានដល់ចរាចរណ៍​សាធារណៈ» និង «ធ្វើភេវរកម្ម»។

លោកស្រីបានបញ្ជាក់ថា មន្ត្រីរដ្ឋការជាច្រើននាក់ បានត្អូញត្អែរពីការសង្កត់សង្កិន នៅនឹងកន្លែងធ្វើការរបស់ពួកគេ ដោយ​មកពីពួកគេត្រូវបានសង្ស័យថា មិនបានបោះឆ្នោតអោយនីកូឡា ម៉ាឌូរ៉ូ។

លោក នីកូឡា ម៉ាឌូរ៉ូ ដែលធ្លាប់ជាអ្នកជំនិតរបស់អតីតប្រធានាធិបតី លោកហ៊ុយហ្គោ ឆាវ៉េស (Hugo Chavez) ស្លាប់ដោយ​ជម្ងឺមហារីកនោះ បានប្រកាសដោយខ្លួនឯងថា លោកបានឈ្នះឆ្នោតកាលពីថ្ងៃទី១៤ខែមេសា ដោយទទួលសម្លេង​លើស​តែបន្តិចបន្តួចប៉ុណ្ណោះ (១,៨%) ពីបេក្ខជនគណបក្សប្រឆាំង។ នៅចំពោះហេតុការណ៍នេះ គណបក្សប្រឆាំងបានទាមទារ អោយមានការរាប់សន្លឹកឆ្នោតឡើងវិញ ហើយបណ្ដាជនដែលមានសមាណចិត្ត ជាមួយនឹងគណបក្សប្រឆាំង បានជួបជុំ​គ្នា​ធ្វើបាតុកម្មដើម្បីគាំទ្រការទាមទារនេះ។ បាតុកម្មនោះ បានក្លាយក្នុងពេលបន្ទាប់មក ជាកុបកម្មដ៏ហឹង្សា ហើយបានរងនូវ​ការបង្ក្រាបពីរដ្ឋាភិបាល បង្កអោយមនុស្ស៨នាក់ស្លាប់។

រដ្ឋាភិបាលបានចោទប្រកាន់ មេបក្សប្រឆាំង លោក ហេនរីក កាព្រីលេស (Henrique Capriles) ដែលបានចាញ់ឆ្នោតនោះ ថាជាអ្នកទទួលខុសត្រូវនឹងអំពើហឹង្សាទាំងនេះ ហើយថាគណបក្សប្រឆាំងមានបំណង ចង់ធ្វើ«រដ្ឋប្រហារ»។

ក្នុងថ្ងៃសៅរ៍នេះដដែល ប្រធានាធិបតីថ្មីរបស់ប្រទេសវេណេស៊ុយអេឡា លោកនីកូឡា ម៉ាឌូរូ បានអមដំណើរ​ប្រធានាធិបតី​របស់ប្រទេសអាហ្សង់ទីន លោកស្រីគ្រីស្ទីណា គៀស្ន័រ (Cristina Kirchner) ដើម្បីធ្វើដំណើរទៅរំលឹកវិញ្ញាណខ័ន នៅ​ចំពោះផ្នូរសពលោកហ៊ុយហ្គោ ឆាវ៉េស ដែលបានស្លាប់កាលពីថ្ងៃ៥មិនា បន្ទាប់ពីបានកាន់ជាប្រមុខរដ្ឋ អស់រយៈពេល​១៤​ឆ្នាំកន្លងមក៕

--------------------------------------------------------
ដោយ សេក មនោរកុមារ - ប៉ារីស​ ថ្ងៃទី២០ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ