ការរញ្ជួយដីដ៏ខ្លាំងមួយ បានវាយប្រហារជាទម្ងន់ខេត្ត ស៊ីឈ័ន (Sichuan) របស់ចិន បានសម្លាប់មនុស្សយ៉ាងហោច ណាស់៥៦នាក់ និងច្រើនជាង៦០០នាក់ទៀតរងរបួស។ គ្រោះធម្មជាតិ បានបន្ថែមទម្ងន់ទុក្ខ ទៅលើតំបន់នេះ ដែលល្បី​ថាជាតំបន់ក្រីក្រជាងគេ ហើយទើបនឹងរងនូវការរញ្ជួយដី កាលពីប្រាំឆ្នាំមុនមកហើយនោះ។

អាគារលំនៅដ្ឋានបានបាក់ស្រុត ដោយសារគ្រោះរញ្ជួយដី ក្នុងខេត្តស៊ីឈ័ន។

ប្រព័ន្ធផ្សព្វផ្សាយជាតិ បានអោយដំណឹងពីតុល្យភាព នៃជនរងគ្រោះ ដែលចេះតែកើនឡើង ជាលំដាប់។ ការិយាល័យ​ឧត្តុនិយមចិន និងទូរទស្សន៍រដ្ឋ បាននិយាយថា គ្រោះថ្នាក់នេះ បានកើតឡើងនៅក្រោយម៉ោង៨ ព្រឹកថ្ងៃ​សៅរ៍ទី២០​ខែ​មេសានេះ ហើយបានផ្ដួលអាគារទាំងឡាយ ដែលភាគច្រើនសង់ពីឥតថ្មនោះ។ តាមរូបថត និងវីដេអូ ដែលបានផ្សាយ​នៅតាម​គេហទំព័រ មនុស្សជាច្រើន បានរត់នៅតាមផ្លូវ មួយចំនួនគ្របដណ្ដប់ខ្លួនជាមួយភួយ និងខ្លះទៀតមានតែខោអាវ​ក្នុងប៉ុណ្ណោះ។

សូមទស្សនាវីដេអូ នៃការរញ្ជួយដីនេះ៖

ការិយាល័យឧត្តុនិយម បានវាយតម្លៃជាលើកដំបូងថា កម្លាំងនៃការរញ្ជួយ មានកម្រិត៧ ខណៈពេលដែលការិយាល័យ​ឧត្តុនិយមរបស់អាមេរិក បានបង្ហាញតួលេខតិចជាង ៦,៦ តែនៅតែជាកម្រិតមួយដ៏ខ្លាំង អាចធ្វើអោយមានការ​ខូតខាត​ខ្លាំង ទៅដល់អាយុជីវិត និងផ្ទះសម្បែង។

តាមទីភ្នាកងារព័ត៌មានចិន ស៊ីនហួ (Xinhua) បានអោយដឹងថា ការរញ្ជួយដីនេះ បានធ្វើអោយរង្គើ នូវអាគារទាំងឡាយ ចាប់ពីទីក្រុងឆេងឌូ (Chengdu) រហូតមកដល់១១៥គីឡូម៉ែត្រទិសខាងកើត។ ការរញ្ជួយនេះ បានបង្ខំអោយព្រលាន​យន្ដហោះអន្តរជាតិ បិតទ្វាជាបណ្ដោះអាសន្ន មុននឹងបើកឡើងវិញ ក្នុងរយៈពេលមួយម៉ោងក្រោយមក។

សូមរំលឹកថា គ្រោះរញ្ជួយដីក្នុងកម្រិត ៧,៩ នៅក្នុងខេត្តដដែលកាលពី ខែឧសភាឆ្នាំ២០០៨កន្លងទៅ បានធ្វើអោយ​មនុស្ស៩០ពាន់នាក់ ស្លាប់ បាត់ខ្លួន ឬចាត់ទុកថាស្លាប់៕

-----------------------------------------------
ដោយ ៖ កេសរកូល - ភ្នំពេញ ថ្ងៃទី២០ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ