កូរ៉េខាងជើងបានបញ្ចូននូវលក្ខខ័ណ្ឌមួយចំនួន មុននឹងខ្លួនចូលទៅជជែកជាមួយនឹងកូរ៉េខាងត្បូង និងសហរដ្ឋអាមេរិក ដែលក្នុងនោះមានការដកចេញ នូវទណ្ឌកម្មរបស់អង្គការសហប្រជាជាតិ និងបញ្ឈប់លែងឲ្យមាន កិច្ចសហប្រតិបត្តិការ​យោធារួមគ្នា រវាងកូរ៉េខាងត្បូង និងសហរដ្ឋអាមេរិក។

ទាហានកូរ៉េខាងជើង កំពុងហ្វឹកហាត់ក្បួនយុទ្ធសាស្ត្រ។

«ប្រសិនជាខ្មាំងសត្រូវ ដែលមានសហរដ្ឋអាមេរិក និងកូរ៉េខាងត្បូង ពិតជាចង់ឲ្យមាន នូវកិច្ចពិភាក្សានិងការចរចារ​មែន​នោះ ពួកគេត្រូវចាត់ចែងទទួលយកនូវវិធានការនេះ» នេះជាការប្រកាសជាសាធារណៈ របស់គណកម្មាធិការការពារជាតិ​កូរ៉េខាងជើង។

លក្ខខ័ណ្ឌទាំងនេះ ទំនងជានឹងត្រូវទាត់ចោលដោយទីក្រុងសេអ៊ូល និងទីក្រុងវ៉ាស៊ីនតោន ដែលទាមទារអោយកូរ៉េ​ខាង​ជើង ធ្វើកាយវិការមួយ ដែលឈានទៅរកការរំសាយអាវុធនុយក្លេអ៊ែរជាមុនសិន។

តាំងពីការសាកល្បងនុយក្លេអ៊ែរលើកទីបី នៅថ្ងែទី១២កុម្ភះ របស់កូរ៉េខាងជើងនោះមក ទណ្ឌកម្មរបស់អ.ស.ប. ត្រូវបាន​អនុម័ត្រចេញជាបន្តបន្ទាប់ ដាក់ប្រឆាំងនឹងទីក្រុងព្យុងយ៉ាង ហើយក៏បានធ្វើអោយសភាពតានតឹង នៅក្នុងឧបទ្វីបកូរ៉េ មានកម្រិតកាន់តែខ្លាំងឡើងដែរ។

លក្ខខ័ណ្ឌដើម្បីដើរចូលតុចរចា ជាប្រធានបទដ៏ក្ដៅគគុក នៅបន្ទាប់ពីកង្វល់អស់ជាច្រើនថ្ងៃ របស់សហគមន៍អន្តរជាតិ ពីការបាញ់កាំជ្រួចរបស់កូរ៉េខាងជើង ជាពិសេសនៅថ្ងៃទី១៥ខែមេសា ដែលជាថ្ងៃខួបកំណើតរបស់ស្ថាបនិកនៃរបបនេះ និងជាជីតារបស់មេដឹកនាំវ័យក្មេងសព្វថ្ងៃ។

កងទ័ពកូរ៉េខាងជើង ក៏ទើបតែនឹងដាក់ឱសានវាទមួយ អោយទៅកូរ៉េខាងត្បូងដែរ ដោយបានបញ្ជាក់ថា «បើប្រទេសកូរ៉េ​ខាងត្បូង ចង់បានអោយមានការជជែកគ្នាមែន ប្រទេសនេះត្រូវសម្ដែងការសុំទោស ពីរាល់សកម្មភាពអមិត្ត​ប្រឆាំងកូរ៉េ​ខាងជើង»។

ប្រធានាធិបតីកូរ៉េខាងត្បូងថ្មី លោកស្រីប៉ាក ជនហេ (Park Geun-Hye) និងរដ្ឋមន្ត្រីការបរទេសអាមេរិក លោកចន ឃែរី (John Kerry) បានបញ្ជាក់ច្បាស់ៗ ក្នុងដំណើរទស្សនកិច្ចរបស់ប្រមុខការទូតអាមេរិក នៅអាស៊ីកាលពីអាទិត្យមុនថា ការចូលតុចរចារណាមួយ អាចធ្វើទៅកើត លុះត្រាតែកូរ៉េខាងជើង«ផ្លាស់ប្ដូរ»ឥរិយាបថ និងគោរពកតព្វកិច្ចអន្តរជាតិ​របស់ខ្លួន ជាពិសេសទាក់ទងនឹងគម្រោងការនុយក្លេអ៊ែរ ជាមុនសិន៕

-----------------------------------------------
ដោយ ៖ កេសរកូល - ភ្នំពេញ ថ្ងៃទី១៨ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ