ប្រទេសកូរ៉េខាងជើង ទំនងកំពុងរៀបចំសម្រាប់ថ្ងៃខាងមុខ ការបាញ់សាកល្បង កាំជ្រួចបញ្ជាពីចម្ងាយ និងការសាកល្បង​នុយក្លេអ៊ែរជាលើកទីបួន។ ទីក្រុងសេអ៊ូល បានផ្សាយដំណឹង ពីការសាកល្បងនេះ ថាប្រហែលជានឹងត្រូវធ្វើ ក្នុងរវាង​តែ​ពីរខែក្រោយការសាកល្បង ធ្វើកាលពីខែកុម្ភះកន្លងទៅ ដែលបង្កអោយមាន ការដាក់ទណ្ឌកម្ម ពីសហគមន៍អន្តរជាតិ ទៅ​លើប្រទេសកុម្មុយនីស។

ទីតាំង UNHA សម្រាប់បាញ់សាកល្បង នូវកាំជ្រួចទាំងឡាយ របស់កូរ៉េខាងជើង។

រដ្ឋមន្ត្រីក្រសួងបង្រួបបង្រួមកូរ៉េ របស់ប្រទេសកូរ៉េខាងត្បូង លោក រីយ៉ូ គីល-ជេ (Ryoo Kihl-Jae) បានលើកពី«សញ្ញា» នៃសកម្មភាពខុសប្លែកពីធម្មតា នៅជុំវិញតំបន់សាកល្បងនុយក្លេអ៊ែរ របស់កូរ៉េខាងជើង។ តែលោកបានបដិសេធ មិន​និយាយអ្វីផ្សេង ច្រើនជាងនេះឡើយ។

កាសែតប្រចាំថ្ងៃ ចុង អាង អ៊ីលប៊ូ (JoongAng Ilbo) បានសរសេរថា ចលនាទាំងនេះ នៅលើតំបន់ ពូនជី-រី (Punggye-ri) មានលក្ខណៈដូចគ្នាទាំងស្រុង ទៅនឹងចលនាដែលបានធ្វើ នៅមុនការសាកល្បងនុយក្លេអ៊ែរ លើកទីបី ដែលបានធ្វើ​កាល​ពីថ្ងៃទី ១២ខែកុម្ភះកន្លងមក។ ការសាកល្បងនៅពេលនោះ បានបង្កអោយកូរ៉េខាងជើង រងនូវទណ្ឌកម្មកំណត់ដោយ ក្រុមប្រឹក្សាសន្តិសុខ នៃអង្គការសហប្រជាជាតិ និងក៏ជាប្រភព នៃស្ថានភាពតានតឹង សព្វថ្ងៃនេះដែរ។

ប្រភពផ្លូវការ ដកស្រង់ដោយកាសែតប្រចាំថ្ងៃដដែល បានបញ្ជាក់ថា «យើងកំពុងរងចាំមើល តើនោះជាការត្រៀម​រៀបចំ​ពិតប្រាកដ ដើម្បីការសាកល្បងនុយក្លេអ៊ែរ ឬជាយុទ្ធសាស្ត្រថ្មី ដើម្បីគម្រាម មកលើកូរ៉េខាងត្បូង និងសហរដ្ឋអាមេរិក?»

កាំជ្រួចអន្តរទ្វីបរយៈមធ្យមទាំងពីរដើម ដែលកូរ៉េខាងជើង បានចល័តយកទៅដាក់ នៅតំបន់ឆ្នេរខាងកើតនៃប្រទេស ក៏​ប្រហែលជានឹងត្រូវបាញ់សាកល្បង ក្នុងពេលខាងមុខនេះដែរ។ ការបាញ់សាកល្បងទាំងនេះ ទំនងជាចង់​បង្ខំអោយ​អាមេរិក ធ្វើការសម្រុះសម្រួល ដើម្បីឈានទៅរកការចរចារណាមួយ ជាពិសេស ការដាក់អោយដំណើរការឡើងវិញ នូវ​គម្រោងនុយក្លេអ៊ែរស៊ីវិល។

ក្នុងបំណងអោយស្ងប់ស្ងៀម និងចង់អោយទីក្រុងព្យុងយ៉ាង ទទួលខុសត្រូវតែម្នាក់ឯង ក្នុងការតតាំងគ្នានេះ ទីក្រុង​វ៉ាស៊ីនតោន បានប្រកាស«លើកថ្ងៃ»បាញ់សាកល្បង កាំជ្រួចអន្តរទ្វីបរបស់ខ្លួន ដែលបានគ្រោងធ្វើ ក្នុងសប្ដាហ៍នេះ ពី​មូលដ្ឋានយោធាអាកាសរបស់ខ្លួន ក្នុងរដ្ឋកាលីហ្វ័រនីរ។

កាលពីថ្ងៃអាទិត្យទី៧ខែមេសានេះ ទីក្រុងប៉េកាំងដែលជាសម្ព័ន្ធមិត្តតែមួយ របស់កូរ៉េខាងជើង បាននិយាយ​ដោយ​បញ្ឆិត​បញ្ឆៀង បង្ហាញនូវការឃ្លាំមើលយ៉ាងម៉ត់ចត់មួយ ទៅលើប្រទេសជាប់ភូមិផងរបងជាមួយនេះ។ សូមបញ្ជាក់ថា សេដ្ឋកិច្ច​របស់កូរ៉េខាងជើង រស់បាន ដោយការផ្តក់ដង្ហើមអោយ របស់ចិន។

ប្រធានាធិបតីចិនថ្មី លោក ស្សី ជីងភីង (Xi Jinping) បានថ្លែង ដោយមិនចំជាកូរ៉េខាងជើង ឬសហរដ្ឋអាមេរិកថា «គ្មាន​នរណាម្នាក់ ត្រូវបានអនុញ្ញត អោយធ្វើភ្លាមៗ ដោយភាពអាត្មានិយម នូវភាពក្រឡាប់ចាក់ នៅក្នុងតំបន់ និងយ៉ាងខ្លាំង​នៅលើពិភពលោកនោះទេ»។

«មិនមានសញ្ញា ពីសង្គ្រាមក្នុងទ្រង់ទ្រាយធំទេ»

ទីប្រឹក្សាប្រធានាធិបតីកូរ៉េខាងត្បូង ទទួលបន្ទុកខាងសន្តិសុខ លោក គីម ជៀង-ស៊ូ (Kim Jang-Soo) បានអោយដឹងថា «ទីក្រុងព្យុងយ៉ាងអាចនឹង សាកល្បងការបាញ់នេះ នៅអំឡុងថ្ងៃទី១០ខែមេសាខាងមុខ ជាថ្ងៃដែលរបបកុម្មុយនីស បាន​ប្រកាសថាមិនធានាសុវត្ថិភាព អោយក្រុមអ្នកការទូតបរទេស តទៅទៀតនោះ»។

លោកទីប្រឹក្សាបានបន្តទៀតថា «មិនមានសញ្ញា ឬការត្រៀមបម្រុងណាមួយ សម្រាប់ធ្វើសង្គ្រាម ក្នុងទ្រង់ទ្រាយធំ នោះទេ ក្នុងពេលនេះ តែកូរ៉េខាងជើង រងចាំទប់ទល់ ក្នុងករណីមានសង្គ្រាមផ្ទុះឡើង នៅទីណាមួយ»។

ការសាកល្បងទាំងពីរខាងលើ អាចនឹងធ្វើនៅថ្ងៃទី១៥ខែមេសាខាងមុខ ដែលជាថ្ងៃ«បុណ្យខួប»កំណើត របស់ស្ថាបនិកនៃ​របបព្យុងយ៉ាង លោក គីម អ៊ីល-ស៊ុង (Kim Il-Sung) និងត្រូវជាជីតារបស់អគ្គមគ្គុទេសវ័យក្មេងសព្វថ្ងៃនេះ។

ជប៉ុនពង្រាយប្រព័ន្ធចាប់កាំជ្រួច

ដោយឡែកប្រទេសជប៉ុន បានបញ្ជាទៅកងទ័ពរបស់ខ្លួន អោយបាញ់ទម្លាក់ចោល នូវរាល់កាំជ្រួចម៊ីលស៊ីល របស់​ប្រទេស​កូរ៉េខាងជើង ទាំងឡាយណា ដែលបាញ់ឆ្ពោះមកកោះជប៉ុន។ នេះជាការប្រកាសអោយដឹង របស់អ្នកនាំពាក្យក្រសួង​ការពារជាតិជប៉ុន។ បទបញ្ជានេះ មានន័យស្មើនឹងការដាក់ពង្រាយ ប្រព័ន្ធចាប់កាំជ្រួច នៅតាមបណ្ដោយសមុទ្រជប៉ុន ដើម្បីត្រៀមទប់ស្កាត់ ការបំពារបំពានជាយថាហេតុណាមួយ ពីប្រទេសកុម្មុយនីស។

ទីភ្នាក់ងារព័ត៌មានជប៉ុនឃីយ៉ូដូ បានស្រង់សម្ដីមន្ត្រីរដ្ឋាភិបាលទីក្រុងតូក្យូ មកនិយាយថា «មិនទាន់មាន ការប៉ុនប៉ងធំដុំ​ណាមួយ ដែលបញ្ជាក់ថា កាំជ្រួចនោះ នឹងបាញ់មកកោះជប៉ុននោះនៅឡើយ តែយើងបានសម្រេចចិត្ត នឹងត្រៀម​ទប់ទល់ នូវហេតុការណ៍ជាយថាហេតុណាមួយ»៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី០៨ ខែមេសា ឆ្នាំ២០១៣
ប្រភពយោង៖ AFP
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ