Posts tagged as "Silvio Berlusconi"

អតីត​នាយក​រដ្ឋមន្ត្រី​អ៊ីតាលី ហៅ​ភរិយា ម៉ាក្រុង ថា​ជា​ម្ដាយ

អតីត​នាយក​រដ្ឋមន្ត្រី​អ៊ីតាលី ហៅ​ភរិយា ម៉ាក្រុង ថា​ជា​ម្ដាយ

«អេម៉ានុយអែល ម៉ាក្រុង (Emmanuel Macron) ជាក្មេងប្រុសអាយុ៣៩ឆ្នាំម្នាក់ មានពោរពេញទៅដោយបទពិសោធន៍ ក្នុងការងារ និងមានម្ដាយដ៏ស្អាតម្នាក់ ដែលបានថែរក្សាក្មេងប្រុសម្នាក់នេះ នៅក្នុងស្លាបរបស់ខ្លួន នៅពេលដែល ម៉ាក្រុង នៅមានវ័យក្មេងនៅឡើយ» នេះជាឃ្លា ដែលអតីតនាយករដ្ឋមន្ត្រីអ៊ីតាលី លោក ស៊ីវីយ៉ូ ប៊ែរលូស្កូនី (Silvio Berlusconi) បានថ្លែងឡើង នៅក្នុងអង្គប្រជុំមួយ ក្នុងក្រុង «Monza» ភាគខាងជើងប្រទេសអ៊ីតាលី ហាក់ចង់ដៀមដាម ឌឺដងឲ្យប្រធានាធិបតីបារាំង ដែលទើបចូលកាន់អំណាចថ្មីថ្មោង។

លោក អេម៉ានុយអែល ម៉ាក្រុង ប្រធានាធិបតីបារាំង ដែលទើបនឹងជាប់ឆ្នោត និងទើបានចូលកាន់តំណែង ជាប្រធានាធិបតី ដែលមានវ័យក្មេងបំផុត រាប់ចាប់តាំងពីអធិរាជ ណាប៉ូឡេអុង (Napoléon) មក។ លោក ម៉ាក្រុង បានរៀបអាពាហ៍ពិពាហ៍ ជាមួយនឹងអ្នកស្រី ប្រឺស៊ីត ម៉ាក្រុង (Brigitte Macron) ដែលមានវ័យចាស់ជាង ដល់ទៅ២៤ឆ្នាំ (ខ្មែរហៅថា បងពីរជួរ)។ បានសេចក្ដីថា អ្នកស្រី ប្រឺស៊ីត មានអាយុនៅ៦៤ឆ្នាំ នៅថ្ងៃនេះ ខណៈលោក ម់ាក្រុង ទើបមានអាយុ៣៩ឆ្នាំ ចូល៤០ឆ្នាំប៉ុណ្ណោះ។

ដោយឡែក ចំពោះអតីតនាយករដ្ឋមន្ត្រី នៃប្រទេសអ៊ីតាលីវិញ តែងមានឈ្មោះល្បីល្បាញណាស់ ទាក់ទងនឹងស្ត្រីក្មេងៗ ដែលបានចេញចូល ក្នុងគេហដ្ឋានរបស់លោក។ នៅថ្ងៃនេះ លោក ប៊ែរលូស្កូនី ដែលមានអាយុ៨០ឆ្នាំ កំពុងរស់នៅជាមួយគូកំណាន់ម្នាក់ នាង ហ្វ្រង់សេស្កា ប៉ាស្កាល់ (Francesca Pascale) ដែលទើបតែមានអាយុ... ៣១ឆ្នាំប៉ុណ្ណោះ។

ការថ្លែងចអក ឬការភ្លាត់សំដីរបស់លោក ប៊ែរលូស្កូនី មិនមែនទើបតែមានជាលើកទីមួយទេ។ កាលពីខែវិច្ឆិកា ឆ្នាំ២០០៨ អតីតប្រមុខរដ្ឋាភិបាលអ៊ីតាលីរូបនេះ ក៏បាននិយាយហៅលោក ប៉ារ៉ាក់ អូបាម៉ា (Barack Obama) ដែលកាលនោះទើបនឹងជាប់ ជាប្រធានាធិបតីអាមេរិក សម្រាប់អាណត្តិទី២ ថាមានសម្បុរ«ប្រផេះ»។ លោកបានថ្លែងនៅពេលនោះថា៖ «អូបាម៉ា សង្ហាណាស់ ក្មេងវ័យ និងថែមទាំងមានសម្បុរប្រផេះថែមទៀត។»៕

រឿង​អាស្រូវ​នៃ​អតីត​នាយក​រដ្ឋ​មន្ត្រី​អ៊ីតាលី នៅ​តុលាការ​មិន​ទាន់​ចប់

រឿង​អាស្រូវ​នៃ​អតីត​នាយក​រដ្ឋ​មន្ត្រី​អ៊ីតាលី នៅ​តុលាការ​មិន​ទាន់​ចប់

អ្នកជិតដិតនឹងលោក ស៊ីវីយ៉ូ ប៊ែរលូស្កូនី (Silvio Berlusconi) ចំនួនបីរូប ត្រូវបានតុលាការផ្ដន្ទាទោស កាលពីថ្ងៃសុក្រ​ទី១៩​ខែកក្កដា ពីបទ«នាំពេស្យាចារ»អោយលោក ខណៈពេលដែលអតីតនាយករដ្ឋមន្ត្រីអ៊ីតាលីរូបនេះ នៅជាប់សំនុំរឿងក្ដី​ទាក់​ទង់អំពើពុករលួយ នៃព្រឹទ្ធសមាជិកមួយរូបពីគណបក្សប្រឆាំង។


នាងរូប៊ី (ខាងឆ្វេង) និងលោកប៊ែរលូស្កូនី។ (រូបថត AP)

រឿងអាស្រូវដែលទាក់ទង់នឹង«ស្រី» របស់អតីតនាយករដ្ឋមន្ត្រីអ៊ីតាលី លោក ស៊ីវីយ៉ូ ប៊ែរលូស្កូនី នៅជាប់រយីងរយោង ដូច​សម្លកំពឹស ជាពិសេសនៅឯតុលាការ។ កាលពីថ្ងៃសុក្រ អ្នកជិតដិតនឹងលោកបីនាក់ បានត្រូវប្រព័ន្ធយុត្តិធម៌របស់ប្រទេស កាត់ក្ដីឲ្យជាប់ពន្ធនាគារ ពីបទដឹក«ញ៉ី»ទៅបន្ស៊ី«ឈ្មោល» ជាពិសេសស្រីលក់ខ្លួនមិនទាន់គ្រប់អាយុមួយនាក់ នៅក្នុង​ពិធី​ជប់លៀងមួយនាគេហដ្ឋានដ៏ប្រណិត របស់លោក ឯទីក្រុងអាក័រ (Arcore)។

សូមបញ្ជាក់ថា នៅបស្ចឹមលោក ការដឹកញីទៅបន្ស៊ីឈ្មោល ដូចជា«មេបន» ឬការហៅស្រីមកឲ្យ ឬដឹកនាងៗទៅផ្គាប់​នរណាម្នាក់នេះ សុទ្ធសឹងជា«សញ្ចារកម្ម» ដែលមានទោសតាមផ្លូវច្បាប់យ៉ាងធ្ងន់ធ្ងរ។

កាលពីចុងខែឧសភាកន្លងទៅ តុលាការក្រុងមីឡង់ (Milan) បានផ្ដន្ទាទោសរួចហើយ ដាក់ពន្ធនាគារប្រាំពីរឆ្នាំ និងហាម​ឃាត់ក្នុងការងាររដ្ឋ នូវមនុស្សបីនាក់ផ្សេងទៀត ដែលសុទ្ធសឹងជាអ្នកមានមុខមាត់ក្នុងប្រទេស។ នៅក្នុងសេចក្ដី​សម្រេច​នោះ តុលាការបានចាត់ទុកថាបុរសទាំងបី ជាអ្នក«ភ្លក្ស»មុន ហើយទំនងជាទទួលប្រាក់ជាច្រើន ពីលោក ប៊ែរលូស្កូនី។ ប៉ុន្តែលោកទាំងបីបានច្រានចោលនូវបទចោទប្រកាន់នោះ ដោយនិយាយថារាត្រីជប់លៀងនៅក្រុងអាក័រ ជារាត្រីដែល​សមសួនត្រឹមត្រូវជាងគេបង្អស់។

នេះជាសំនុំរឿងក្ដីលើកទីពីរហើយរបស់លោក ប៊ែរលូស្កូនី ដែលលើកទីមួយ លោក ត្រូវបានតុលាការផ្ដន្ទាទោស កាល​ពី​ថ្ងៃទី២៤ខែកក្កដា ដាក់ពន្ធនាគារ៧ឆ្នាំ និងហាមឃាត់ក្នុងការងាររដ្ឋមួយជីវិត ពីបទ«ប្រើប្រាស់»អំណាចខុសទំនង។ សំនុំ​រឿងទីមួយនោះ គេបានចោទលោក ថាបានប្រើប្រាស់ថានៈរបស់ខ្លួនដើម្បីដោះលែងនាង រូប៊ី (Ruby) ដែលត្រូវបាន​សមត្ថកិច្ចចាប់សួរចម្លើយនៅទីក្រុងមីឡង់ ទាក់ទងនឹងពេស្យាកម្មមិនទាន់គ្រប់អាយុ។

តែឥឡូវនេះ សំនុំរឿងពុករលួយ និងបន្លំការបង់ពន្ធ

សំនុំរឿងបានកើតឡើងនៅអំឡុងឆ្នាំ២០០៦ នៅពេលដែលគណបក្សប្រឆាំងឆ្វេងនិយមរបស់លោករ៉ូម៉ាណូ ប្រូឌី (Romano Prodi) បាននាំមុខគណបក្សស្ដាំនិយមរបស់លោក ប៊ែលូស្កូនី តែ«មួយសម្លេង»ប៉ុណ្ណោះ នៅក្នុងព្រឹទ្ធសភា។ ប៉ុន្មានខែ​ក្រោយមក ព្រឹទ្ទសមាជិកឆ្វេងនិយម លោក ស៊ែជីយ៉ូ ឌី ហ្គ្រេហ្គូរីយ៉ូ (Sergio De Gregorio) បានចាកចេញពីក្រុមរបស់ខ្លួន ដើម្បីទៅចុះចូលនឹងក្រុមរបស់លោក ប៊ែរលូស្កូនី ហើយបានបង្កឲ្យមានវិបត្តិនយោបាយកើតមានឡើង សម្រាប់ក្រុមលោក រ៉ូម៉ាណូ ប្រូឌី ហើយឈានទៅដល់ការរលំរលាយនៃរដ្ឋាភិបាលនេះ នៅឆ្នាំ២០០៨។

ក្រុមអ្នកស៊ើបអង្កេតនៃប្រព័ន្ធតុលាការអ៊ីតាលី បានរកឃើញថា ប៊ែរលូស្កូនី បានប្រគល់លុយ៣លានអ៊ឺរ៉ូ ក្នុងនោះ២លាន​ជាលុយសុទ្ធ ទៅឲ្យស៊ែជីយ៉ូ ឌី ហ្គ្រេហ្គូរីយ៉ូ ដើម្បីកំទេចដៃគូរប្រឆាំងរបស់លោក ប៊ែរលូស្កូនី។ លោក ហ្គ្រេហ្គូរីយ៉ូ ខ្លួនឯង​ក៏​បានសារភាពរួចហើយដែរ នៅចំពោះចៅក្រមស៊ើបអង្កេត​ និងចំពោះអ្នកសារព៏ត៌មាន។

ក្នុងពេលនេះ អ្វីដែលលោកប៊ែរលូស្កូនី អាចការពារខ្លួនបាន គឺច្រានចោលសមត្ថកិច្ចរបស់តុលាការ ដែលកំពុងកាន់​សំនុំ​រឿងនេះ ហើយថាបញ្ហានេះគួរត្រូវបានធ្វើនៅទីក្រុងរ៉ូមទៅវិញ។

រឿងមួយទៀតដែលបន្ថែមបន្ទុក លើអតីតនាយករដ្ឋមន្ត្រីរូបនេះ៖ តុលាការកំពូលរបស់ប្រទេសអ៊ីតាលី នៅថ្ងៃទី៣០ខែ​កក្កដាខាងមុខ នឹងត្រូវសម្រេចតម្កល់ជាបានការ ឬមិនបានការ នូវសាលក្រមដែលបានដាក់ទោសលើលោក ប៊ែរលូស្កូនី ទាក់ទងនឹងសំនុំរឿងបន្លំការបង់ពន្ធ។ ប្រសិនបើតុលាការសម្រេចតម្កល់សាលក្រមនេះទុកជាបានការ ជីវិតនយោបាយ​របស់លោក ស៊ីវិយ៉ូ ប៊ែរលូស្កូនី នឹងត្រូវបានបញ្ចប់ជាស្ថាពរ៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២១ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

អ៊ីតាលី៖ ព្រឹទ្ធ​សមាជិក​មួយ​រូប ប្រៀប​ធៀប​រដ្ឋ​មន្ត្រី​សម្បុរ​ខ្មៅម្នាក់ ទៅ​នឹង​«ស្វា»

អ៊ីតាលី៖ ព្រឹទ្ធ​សមាជិក​មួយ​រូប ប្រៀប​ធៀប​រដ្ឋ​មន្ត្រី​សម្បុរ​ខ្មៅម្នាក់ ទៅ​នឹង​«ស្វា»

ព្រឹទ្ធសមាជិកមួយរូប ដែលមកពីគណបក្សមិនចូលចិត្តជនធ្វើចំណាកស្រុក មានឈ្មោះថា «សម្ព័ន្ធភាពខាងជើង» បាន​ប្រៀបធៀបលោកស្រី សេស៊ីល គេនហ្ស៍ (Cecile Kyenge) រដ្ឋមន្ត្រីសម្បុរខ្មៅលើកទីមួយ នៅក្នុងរដ្ឋាភិបាលអ៊ីតាលី ទៅនឹង​សត្វស្វា​អូរ៉ង់-អ៊ូតង់ (orang-outan)។ ជាពាក្យសម្ដីប្រៀបធៀប ដែលប្រមុខរដ្ឋាភិបាលអ៊ីតាលី លោក អង់រីកូ ឡេតា (Enrico Letta) បានចាត់ទុកកាលពីថ្ងៃអាទិត្យទី១៤ខែកក្កដា ថា«ទទួលយកមិនបាន»។


លោកស្រី សេស៊ីល គេនហ្ស៍ រដ្ឋមន្ត្រីក្រសួងរួមបញ្ចូល (ក្នុងសង្គម)។ (រូបថត FILIPPO MONTEFORTE/AFP)

នៅថ្ងៃសៅរ៍ ទី១៣ខែកក្កដា ក្នុងកិច្ចប្រជុំនៃគណបក្សរបស់គាត់ នៅក្នុងទីក្រុងមួយភាគខាងជើងនៃប្រទេសអ៊ីតាលី លោក រ៉ូប៊ែតូ កាដឺរ៉ូលី (Roberto Calderoli) សមាជិកព្រឹទ្ធសភា ដែលគេស្គាល់ថាជាអ្នកពូកែបង្កឲ្យមានការជជែកគ្នាកន្លងមកនោះ បានធ្វើ​សេចក្ដីប្រកាសមួយទាក់ទងនឹងលោកស្រីរដ្ឋមន្ត្រី ដែលមានដើមកំណើតពីប្រទេសកុងហ្គូ យ៉ាងដូច្នេះថា «សេស៊ីល គេនហ្ស៍ អាចធ្វើជារដ្ឋមន្ត្រី តែជារដ្ឋមន្ត្រីនៅក្នុងប្រទេសរបស់គាត់ (...) ខ្ញុំខំប្រឹងទប់ខ្លួនណាស់ នៅពេលខ្ញុំចុចចូល​ទៅ​អាំងធើណែត ហើយឃើញរូបថត​រដ្ឋាភិបាលសព្វថ្ងៃ។ ខ្ញុំស្រឡាញ់សត្វ (...) តែនៅពេលខ្ញុំឃើញ រូបភាពរបស់លោកស្រី សេស៊ីល គេនហ្ស៍ ខ្ញុំមិនអាចឃាត់ខ្លួនមិនឲ្យគិតថា មានភាពប្រហាក់ប្រហែលទៅនឹងសត្វស្វាអូរ៉ង់-អ៊ូតង់។»

សេចក្ដីប្រកាសនេះបាន ចែកផ្សាយនៅតាមបណ្ដាញផ្សព្វផ្សាយ ហើយបានបង្កឲ្យមានប្រតិកម្មក្ដៅក្រហាយ ឆាបឆេះឡើង​យ៉ាងសន្ធោសន្ធៅ នៅលើបណ្ដាញសង្គម។ នៅព្រឹកថ្ងៃអាទិត្យ នៅក្នុងសេចក្ដីប្រកាសព័ត៌មានជាផ្លូវការមួយ របស់នាយក​រដ្ឋមន្ត្រីអ៊ីតាលី លោក អង់រីតា ឡេតា បានបញ្ចេញកំហឹងក្រេវក្រោបខ្លាំងៗថា «ពាក្យសម្ដីដែលរាយការណ៍នៅថ្ងៃនេះ ដោយ​បណ្ដាញផ្សព្វផ្សាយ និងបាននិយាយចេញពីព្រឹទ្ធសមាជិក កាដឺរ៉ូលី ទាក់ទងលោកស្រី សេស៊ីល គេនហ្ស៍ មិនអាចអោយ​ទទួល​យកបានទេ និងបានទៅហួសជ្រុលពីព្រំដែន»។ នៅក្នុងសេចក្ដីប្រកាសព័ត៌មាន​នោះដដែល លោកនាយករដ្ឋមន្ត្រី​បានបញ្ជាក់ ពីសាមគ្គីភាព និងផ្ដល់ការគាំទ្រទាំងស្រុង ទៅលោកស្រី សេស៊ីល។

ប្រធានព្រឺទ្ធសភាអ៊ីតាលី លោក ភីអេត្រូ ហ្គ្រាសូ (Pietro Grass) បានទាមទារឲ្យលោក កាដឺរ៉ូលី ធ្វើការសុំទោសលោកស្រី សេស៊ីល គេនហ្ស៍ ដូចគ្នានឹងប្រធានសភាជាតិ លោកស្រី ល័រ៉ា ប៊ូឌ្រីនី (Laura Boldrini) ក៏បានសម្ដែងសាមគ្គីភាព ជាមួយ​លោកស្រី​រដ្ឋមន្ត្រីដែរ ដោយថែមទាំងបានថ្កោលទោស ពីពាក្សសម្ដីនេះ ថាគ្រោកគ្រាត និងប្រាសចាកពីច្បាប់។

ចំណែកឯលោកស្រី សេស៊ីល គេនហ្ស៍ វិញ បានប្រកាសនៅថ្ងៃអាទិត្យដដែល ទៅកាន់ភ្នាក់ងារអាន់សា (Ansa) របស់​ប្រទេស​អ៊ីតាលីថា «ខ្ញុំមិនចាត់ទុកពាក្យសម្ដីរបស់លោក កាដឺរ៉ូលី នេះ ជារឿងផ្ទាល់ខ្លួននោះទេ តែវាបានធ្វើឲ្យខ្ញុំមានកង្វល់ ទាក់ទង​នឹង​រូបភាពរបស់ប្រទេសអ៊ីតាលីទាំងមូល»។ លោកស្រីបន្ថែមថា «ខ្ញុំជឿជាក់ថា គ្រប់កម្លាំងនយោបាយទាំងអស់ ត្រូវត្រិះរិះ​ពិចារណា ពីពាក្យសម្ដីដែលត្រូវនិយាយ»។

លោក កាដឺរ៉ូលី ធ្លាប់បង្កើតបញ្ហាម្ដងហើយ កាលពីឆ្នាំ២០០៦ ដែលនៅពេលនោះ លោកបានលាលែងចេញពីរដ្ឋាភិបាល របស់​លោក ស៊ីលវីយ៉ូ ប៊ែរលូស្កូនី (Silvio Berlusconi) នៅបន្ទាប់ពីរឿងអាស្រូវពាក់អាវយឺតមួយ ដែលមានចរិក​ប្រឆាំង​អ៊ីស្លាម។

គួរបញ្ជាក់ថា នៅក្រោយមានការតែងតាំងជាសមាជិក នៅក្នុងរដ្ឋាភិបាលនោះមក លោកស្រី សេស៊ីល គេនហ្ស៍ តែង​បានរង​ជា​រឿយៗ នូវការប្រមាថកាតទាន ពីសំណាក់គណបក្សសម្ព័ន្ធភាពខាងជើងដែលជាគណបក្សប្រឆាំងសព្វថ្ងៃ។ នៅក្នុងទំព័រ​ផ្លូវ​ការរបស់លោកស្រី នៅលើបណ្ដាញហ្វេសប៊ុក លោកស្រី គេនហ្ស៍ ថែមទាំងបានរងដោយពាក្យសម្ដី នូវការស្អប់ខ្ពើម​ប្រកាន់ពូជសាសន៍ និងការគម្រាមដល់អាយុជីវិតនោះផងទៀត៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៤ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

អីតាលី៖ អង់រីកូ លេតា ទទួល​ជោគជ័យ ក្នុង​ការ​រៀបចំ​រដ្ឋាភិបាល​មួយ​ឡើង

អីតាលី៖ អង់រីកូ លេតា ទទួល​ជោគជ័យ ក្នុង​ការ​រៀបចំ​រដ្ឋាភិបាល​មួយ​ឡើង

មនុស្សសំខាន់ទីពីរនៃគណបក្សប្រជាធិបតេយ្យ បានវាយសម្រុក ក្នុងរយៈពេលពីរថ្ងៃចុងក្រោយនេះ ដើម្បីរៀបចំ​រដ្ឋាភិបាលមួយ ដែលមានប្រធានគណបក្សប្រជាជននិងសេរីភាព លោកស៊ីលវីយ៉ូ ប៊ែលូស្កូនី (Silvio Berlusconi) នឹងក្លាយជាឧបនាយករដ្ឋមន្ត្រី។


លោកប្រធានាធិបតី ហ្សកហ្សីយ៉ូ ណាប៉ូលីតាណូ (ខាងឆ្វេង) និងលោកអង់រីកូ លេតា នាយករដ្ឋមន្ត្រីអ៊ីតាលីថ្មី។

ប្រធានាធិបតីរបស់ប្រទេស​ ដែលទើបនឹងមកកាន់តំណែងសារជាថ្មីកាលពីសប្ដាហ៍ដែរនោះ បានថ្លែងថា «រដ្ឋាភិបាលនេះ ជារដ្ឋាភិបាលនយោបាយមួយ ដែលមានតែផ្លូវនេះមួយប៉ុណ្ណោះ»។ សមាជិកទាំងអស់នៃរដ្ឋាភិបាល នឹងត្រូវចូលស្បថ​កាន់តំណែង នៅព្រឹកថ្ងៃអាទិត្យនេះ ហើយប្រធានក្រុមប្រឹក្សាថ្មីនេះ នឹងត្រូវដាក់ទៅសុំការទទួលទុកចិត្ត ពីរដ្ឋសភា នៅថ្ងៃ​ច័ន្ទខាងមុខនេះ។

រដ្ឋាភិបាល ដែលសម្បូរទៅដោយសមាជិកជាស្ត្រី

លោក អង់ជឺលីណូ អាហ្វាណូ (Angelino Alfano) អគ្គលេខានៃគណបក្សប្រជាជននិងសេរីភាព (គណបក្សរបស់លោក ប៊ែលូស្កូនី) ដែលជាអនុប្រធានក្រុមប្រឹក្សា នឹងក្លាយជារដ្ឋមន្ត្រីក្រសួងមហាផ្ទៃ។

ក្រសួងសេដ្ឋកិច្ច ត្រូវបានធ្លាក់ទៅលើ លោកអគ្គនាយកធនាគារជាតិអ៊ីតាលី លោក ហ្វាប្រ៊ីស៊ីយ៉ូ សាកូម៉ានី (Fabrizzio Saccomanni)។ រីឯលោកស្រី អ៊ែលម៉ា បូនីណូ (Emma Bonino) អតីតស្នងការអ៊ឺរ៉ុប បានទទួលគ្រប់គ្រង​ផ្នែកការបរទេស​របស់ប្រទេស។ អតីតរដ្ឋមន្ត្រីមហាផ្ទៃក្នុងសម័យ ម៉ារីយ៉ូ ម៉ុងទី លោកស្រី អាណាម៉ារីយ៉ា កងសែលីយ៉េរី (Annamaria Cancellieri) ត្រូវបានតែងតាំងជាថ្មី ជារដ្ឋមន្ត្រីក្រសួងយុត្តិធម៌។

ពីរខែនៅក្នុងភាពជាប់គាំង

លោកអង់រីកូ លេតា (Enrico Letta) ដែលជាមនុស្សសំខាន់ទីពីរ នៃគណបក្សប្រជាធិបតេយ្យ ត្រូវបានជ្រើសតាំង​ដោយ​លោក ហ្សកហ្សីយ៉ូ ណាប៉ូលីតាណូ (Giorgio Napolitano) ដើម្បីទទួលភារកិច្ចជាអ្នករៀបចំរដ្ឋាភិបាល និងដាក់បញ្ចប់​នូវ​ភាពជាប់គាំងនយោបាយ បន្ទាប់ពីការបោះឆ្នោតជ្រើសរើសតំណាងរាស្ត្រកាលពីខែកុម្ភះមុននេះ។ លោកជាប្រធានក្រុម​ប្រឹក្សារដ្ឋ ដែលអាចនិយាយម្យ៉ាងទៀត នាយករដ្ឋមន្ត្រីអ៊ីតាលី។ អ្នកសង្កេតការណ៍មើលឃើញ កតព្វកិច្ចនៅចំពោះមុខ​របស់រដ្ឋាភិបាលនេះ ដែលត្រូវដោះស្រាយ ជាពិសេសបញ្ហាវិបត្តិនៅក្នុងតំបន់ចាយលុយអ៊ឺរ៉ូ និងនយោបាយត្បិតត្បៀត សន្សំសំចៃ ដែលរដ្ឋាភិបាលមុនបានកំណត់រួចមកហើយ៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៨ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

អ៊ីតាលី៖ ប្រធានាធិបតី​បង្ខំ​ ក្រុម​នយោបាយ​ធំ​ទាំង​ពីរ​ អោយ​រក​ដំណោះ​ស្រាយ

អ៊ីតាលី៖ ប្រធានាធិបតី​បង្ខំ​ ក្រុម​នយោបាយ​ធំ​ទាំង​ពីរ​ អោយ​រក​ដំណោះ​ស្រាយ

ប្រមុខរដ្ឋរបស់ប្រទេសអ៊ីតាលី បានច្រានចោលនូវគ្រប់ការលាលែងចេញពីដំណែង នៅមុនអាណត្តិរបស់គាត់ ដែលនឹង​បញ្ចប់ នៅថ្ងៃទី១៥ឧសភាក្រោយនេះ។


ប្រធានាធិបតីអ៊ីតាលី លោកហ្សកហ្សីយ៉ូ ណាប៉ូលីតាណូ។

ប្រធានាធិបតីអ៊ីតាលី លោកហ្សកហ្សីយ៉ូ ណាប៉ូលីតាណូ (Giorgio Napolitano) បានប្រកាសនៅថ្ងៃសៅរ៍ទី៣០ខែមិនា ពី​ការសម្រេចចិត្តរបស់លោក ក្នុងការបង្ខំឲ្យ ក្រុមនយោបាយសំខាន់ទាំងពីរ រកដំណោះស្រាយ និងផ្ដល់អោយ​ប្រទេស​អ៊ីតាលី នូវរដ្ឋាភិបាលមួយ បន្ទាប់ពីការបោះឆ្នោតសកល កាលពីមួយខែមុន។ លោកប្រមុខរដ្ឋ បានច្រានចោល នូវ​គ្រប់​លទ្ធភាពនៃការលាលែងចេញពីដំណែង នៅមុនការបញ្ចប់អាណត្តិរបស់គាត់ នៅថ្ងៃទី១៥ខែឧសភាខាងមុខ ដោយបាន​គិតរួចជាស្រេច ថានឹងរិះរកគ្រប់មធ្យោបាយ ដើម្បីទម្លាយភាពទាល់ច្រក ដែលបានធ្វើអោយប្រទេស មានការជាប់គាំង​ខាងនយោបាយរហូតមក។

សេចក្ដីប្រកាសនេះ បានដាក់បញ្ចប់នូវបេសកកម្ម តាំងពីមួយសប្ដាហ៍មុន របស់ប្រធានគណបក្ស​កណ្ដាលនិយម​ឆ្វេង​ឈ្នះ​ឆ្នោត លោក ពីយ៉េ ល្វីជី ប៊េសានី ដែលបានខិតខំស្វែងរក ដំណោះស្រាយ ជាមួយកម្លាំងនយោបាយផ្សេងទៀត ដើម្បី​បង្កើតរដ្ឋាភិបាលមួយឡើងនោះ។

ក្នុងការជួបនិយាយជាមួយ នឹងដៃគូរអន្តរជាតិ លោកប្រធានាធិបតី ណាប៉ូលីតាណូ បានគូសបញ្ជាក់ថា ប្រទេសលោក មិន​មែនគ្មានរដ្ឋាភិបាល ហើយក៏មិនមានទិសដៅច្បាស់លាស់នោះដែរ។ «រដ្ឋាភិបាលមុន បើទោះជាបានលាលែង​ពី​ដំណែង​ក៏ដោយ នៅតែកាន់ការរបស់ខ្លួន ហើយរដ្ឋាភិបាលនេះ មិនត្រូវបានទទួលសម្លេងភាគតិច នៅក្នុងសភាឡើយ» លោក​ណាប៉ូលីតាណូ ដែលមានអាយុ៨៦ឆ្នាំរូបនេះ មានគេគោរពយ៉ាងខ្លាំង នៅប្រទេសអ៊ីតាលី។ លោកបានអះអាងថា អំណាច​និតិប្រតិបត្តិ របស់អតីតស្នងការអ៊ឺរ៉ុប ម៉ារីយ៉ូ ម៉ុងទី (Mario Monti) កំពុងស្ថិតនៅចំណុចនៃការរៀបរៀង នូវវិធានការ​បន្ទាន់​មួយ សម្រាប់សេដ្ឋកិច្ច ដោយមានការយល់ព្រមពីសហគមន៍អ៊ឺរ៉ុប និងមានជ្រោមជ្រែងយ៉ាងសំខាន់ពីសភាថ្មី។

ប្រភពស្និតនឹងប្រធានាធិបតីបាននិយាយថា សមាជិកក្រុមប្រឹក្សាព្រឹទ្ធបុរសជាតិ នឹងត្រូវជ្រើសតាំងដោយប្រធានាធិបតី ហើយនឹងធ្វើការងាររបស់ខ្លួន ក្នុងរយះពេលមិនកំណត់មួយ ដើម្បីស្នើសុំគម្រោងមួយ ឈានទៅរកការបង្កើតរដ្ឋាភិបាលថ្មី ដែលចេញពីលទ្ធផលបោះឆ្នោតផង ការធ្វើវិសោធនកម្មលើច្បាប់បោះឆ្នោតផង និងដោះស្រាយលើបញ្ហា​សង្គម​សេដ្ឋកិច្ច​ផង។ គេនៅមិនទាន់ដឹងថា សមាជិកព្រឹទ្ធបុរសទាំងនោះ នឹងចេញពីស្ថាប័នជាន់ខ្ពស់របស់ប្រទេស ឬជាថ្នាក់ដឹកនាំ​គណបក្សនយោបាយសព្វថ្ងៃ ឬយ៉ាងណានោះនៅឡើយ។

សូមបញ្ជាក់ថា អ៊ីតាលីបានស្ថិតក្នុងភាពជាប់គាំងនយោបាយមួយ តាំងពីការបោះឆ្នោតជ្រើសរើសតំណាងរាស្ត្រ ថ្ងៃទី២៤-២៥ខែកុម្ភះនោះមក។ លទ្ធផលនៃការបោះឆ្នោត បានអនុញ្ញាតអោយគណបក្សកណ្ដាលនិយមឆ្វេង ឈ្នះយ៉ាង​លើល-​លប់នៅសភាជាន់ទាប តែបានឈ្នះយ៉ាងប្រផិតប្រផើយ នៅឯព្រឹទ្ធសភា ដែលជាហេតុធ្វើអោយការបង្កើតរដ្ឋាភិបាល ស្ថិតនៅជាការប្រទាញប្រទង់គ្នា រហូតមកដល់សប្ដាហ៍មុននេះ៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី៣១ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ