Posts tagged as "Environnement"

របាយការណ៍៖ វៀតណាម​«លាង​ឈើ​កខ្វក់»​ពី​កម្ពុជា ដើម្បី​កំណើន​សេដ្ឋកិច្ច​ខ្លួន

របាយការណ៍៖ វៀតណាម​«លាង​ឈើ​កខ្វក់»​ពី​កម្ពុជា ដើម្បី​កំណើន​សេដ្ឋកិច្ច​ខ្លួន

ចាប់​តាំង​ពី​ដើម​ខែ​វិច្ឆិកា ឆ្នាំ​២០១៦ មក ឈើ​ប្រមាណ ៣០​ម៉ឺន​ម៉ែត្រ​គូប ​ត្រូវ​បាន​ដឹក​ចេញ​ពី​ប្រទេស​កម្ពុជា ដោយ​ខុស​ច្បាប់ និង​ត្រូវ​អាជ្ញាធរ​វៀតណាម ប្ដូរក្រដាសស្នាម ឲ្យ​ក្លាយ​ជា​ឈើ​ស្រប​ច្បាប់ (ការលាងឈើកខ្វក់) ដែល​​មាន​តម្លៃ​ប្រមាណជាង ១៣​លាន​ដុល្លារ​សហរដ្ឋ​អាមេរិក។ នេះ បើតាមទិន្នន័យ នៅក្នុងរបាយការណ៍មួយ ចេញផ្សាយដោយអង្គការអន្តរជាតិ  «Environnement Investigation Agency» ហៅកាត់ថា «EIA» ដែលមានជំនាញ ខាងការស៊ើបអង្កេត រឿងរ៉ាវទាក់ទងនឹងបរិស្ថាន។

របាយការណ៍របស់អង្គការ «EIA» ចេញផ្សាយនៅថ្ងៃទី ៨ ខែឧសភា ឆ្នាំ២០១៧ ដែលមានកម្រាស់១០ទំព័រ និងដែលមានចំណងជើង «ជនល្មើសមុខដដែល៖ វៀតណាមលាងឈើកខ្វក់» បានចេញផ្សាយនៅប៉ុន្មាន​ថ្ងៃ ​មុនការចុះកិច្ចព្រមព្រៀងទិញឈើ ពីប្រទេសវៀតណាម ដោយសហភាពអ៊ឺរ៉ុប ក្នុងទំហំទឹកប្រាក់​តម្លៃ ៧០៥​លាន​ដុល្លារ​សហរដ្ឋ​អាមេរិក។

ក្នុងកិច្ចព្រមព្រៀង ជាមួយសហភាពអឺរ៉ុប ប្រទេសវៀតណាម មិនអាចនាំចូលឈើខុសច្បាប់ ពីក្រៅប្រទេសទៀតបានឡើយ ដែលផ្ទុយស្រឡះ ពីអ្វីដែលរបាយការណ៍នេះ បានរកឃើញទៅវិញ។ របាយការណ៍ បានសរសេរថា៖ «មន្ដ្រីសន្ដិសុខ និងមន្ត្រីរដ្ឋាភិបាលវៀតណាម នៅតែចេញកូតា ផ្ដល់ភាពស្របច្បាប់ ក្នុងសេដ្ឋកិច្ចវៀតណាម ដោយជួយសម្រួល ដល់ការលួចកាប់ឈើខុសច្បាប់ ដ៏ច្រើនសន្ធឹកសន្ធាប់នៅកម្ពុជា ទោះបីកម្ពុជា បានប្រកាសថាឈប់ធ្វើជំនួញឈើគ្រប់ប្រភេទ ជាមួយវៀតណាម នោះហើយក៏ដោយ»។

«លាងឈើកខ្វក់»

ការស៊ើបអង្កេត បានរកឃើញថា នៅតែមានសកម្មភាពលួចកាប់ និងនាំចូលឈើខុសច្បាប់ ទៅក្នុងប្រទេសវៀតណាម ដោយសារការឃុបឃិតគ្នា និងការសូកប៉ាន់ រវាងអាជ្ញាធរនៃប្រទេសទាំងពីរ។ ហើយដើម្បីទទួលបានឈើទាំងនេះ ក្រុមឈ្មួញវៀតណាមបានសូកប៉ាន់មន្ដ្រីខ្មែរ ក្នុងទឹកប្រាក់រាប់លានដុល្លារ ដើម្បីចូលកាប់ឈើ នៅក្នុងតំបន់អភិរក្ស និងតំបន់ការពារក្នុងទឹកដីកម្ពុជា។

តំបន់ដែលរងការកាប់ឈើយ៉ាងខ្លាំងក្លា និងដោយខុសច្បាប់ទាំងនោះ មានដូចជា តំបន់ការពារសហគមន៍ ក្នុងឧទ្យានវីរជ័យ ឧទ្យានជាតិអូយ៉ាដាវ និងតំបន់ជម្រកសត្វព្រៃលំផាត់ ដែលសុទ្ធសឹងជាតំបន់ការពារ ក្នុងខេត្តរតនគីរី រាប់ចាប់តាំង ពីដើមខែវិច្ឆិកា ឆ្នាំ២០១៦កន្លងមក។ ជាងនេះទៅទៀត ការស៊ើបអង្កេតបានបញ្ជាក់ថា គម្រោងមួយចំនួន ពីក្នុងចំណោម​តំបន់​ការពារ​ទាំងនេះ ​បានទទួលជំនួយថវិកា ពី​សហភាព​អឺរ៉ុបនោះផង។

របាយការណ៍បានអះអាងបន្តថា បន្ទាប់ពីដឹកឈើខុសច្បាប់ទាំងនេះ ចូលទៅដល់ទឹកដីវៀតណាមហើយ ក្រុមមន្ត្រីពុករលួយ របស់អាជ្ញាធរវៀតណាម បាន«លាងឈើកខ្វក់»ទាំងនោះ ឲ្យក្លាយជាឈើស្របច្បាប់។ ទង្វើនេះ បានជួយរកចំណូលយ៉ាងក្រាស់ក្រែល ទៅដល់មន្ត្រីវៀតណាម​ដែលពុករលួយ និងជួយផ្ដល់សន្ទុះ ឲ្យសេដ្ឋកិច្ចវៀតណាម។ ការ​ស៊ើប​អង្កេត បានស្រង់សំដីរបស់ឈ្មួញឈើវៀតណាម មកបញ្ជាក់ថា ពួក​គេ​បាន​សូក​ប្រាក់ ៤៥​ដុល្លារអាមេរិក ​សម្រាប់​ឈើ ១​ម៉ែត្រ​គូប ​ទៅ​ឲ្យ​អាជ្ញាធរ​វៀតណាម រួម​ទាំង​ប្រធាន​គណៈកម្មាធិការ​ នៃ​ខេត្ត​យ៉ាឡាយ (Gai Lai) ដើម្បីជា​ថ្នូរ ទៅ​នឹង​ការ​ទទួល​បាន​សិទ្ធិ​ដឹក​ជញ្ជូន​ឈើ ​ចូល​ក្នុង​ប្រទេស​វៀតណាម។

«បាញ់គ្រាប់រ៉ុក្កែត ចេញពីឧទ្ធម្ភាគចក្រ សំដៅកំទេចអ្នកលួចកាប់ឈើ»

នៅវេលានេះ មិនទាន់មានប្រតិកម្មណាមួយ ពីសំណាក់អាជ្ញាធរ និងរដ្ឋាភិបាលកម្ពុជានៅឡើយ ទាក់ទងនឹងរបាយការណ៍ របស់អង្គការខាងលើ។

លោកនាយករដ្ឋមន្រ្តី ហ៊ុន សែន ​​បានសម្រេចបង្កើត កាលពីដើមឆ្នាំ ២០១៦ គណៈកម្មាធិការចំរុះមួយ ដែលដឹកនាំដោយ លោក ​​​សៅ សុខា មេបញ្ជាការកងរាជអាវុធហត្ថជាតិ ដើម្បីទប់ស្កាត់បទល្មើសព្រៃឈើ និងការរត់ពន្ធឈើខុសច្បាប់ទាំងឡាយ ទៅកាន់ប្រទេសវៀតណាម។ លោក ហ៊ុន សែន នៅបានបញ្ជាទៅលោក សៅ សុខា នៅពេលនោះ ថាឲ្យបាញ់គ្រាប់រ៉ុក្កែត ចេញពីឧទ្ធម្ភាគចក្រ សំដៅកំទេចអ្នកលួចកាប់ឈើថែមទៀត។

បន្ទាប់ពីសំដីខ្លាំងៗ របស់លោក ហ៊ុន សែន រដ្ឋាភិបាលកម្ពុជា ក៏បានចេញលិខិតជាផ្លុវការដែរ នៅពាក់កណ្តាលខែមករា ឆ្នាំ២០១៦ ថាខ្លួនបានលុបបំបាត់ការកាប់ឈើខុសច្បាប់ នៅទូទាំងប្រទេស និងគ្មានការនាំឈើពីប្រទេសកម្ពុជា ទៅកាន់ប្រទេសវៀតណាមទៀតទេ៕

កូន​ប្រុស ឈុត វុទ្ធី បង្ហើប​ថា អ៊ិន រតនា និង​ឪពុក​លោក​ជា​មិត្តភ័ក្រ​គ្នា

កូន​ប្រុស ឈុត វុទ្ធី បង្ហើប​ថា អ៊ិន រតនា និង​ឪពុក​លោក​ជា​មិត្តភ័ក្រ​គ្នា

វាពិបាកនឹងយល់​ណាស់ ដែលមនុស្សពីរនាក់​រាប់អានគ្នា​ បែរជាឈ្លោះគ្នា រហូតឈានដល់ ការ​បាញ់សម្លាប់គ្នា។ ព្រោះ បើតាមរបាយការណ៍ចុងបញ្ចប់ របស់គណៈកម្មការចម្រុះ ដែលបង្កើតឡើងដោយលោកនាយករដ្ឋមន្ត្រី ហ៊ុន សែន នៅប៉ុន្មានថ្ងៃ ក្រោយឃាតកម្មបាញ់សម្លាប់លោក ឈុត វុទ្ធី (ឃាតកម្មនៅថ្ងៃទី២៦ ខែមេសា ឆ្នាំ២០១២) នោះ បានរកឃើញថា លោក ឈុត វុទ្ធី ត្រូវបានមន្ត្រីរាជអាវុធហត្ថ លោក អ៊ិន រតនា បាញ់សម្លាប់ ដោយសារទំនាស់ពាក្យសម្ដី និងភាពឆេវឆាវ ខណៈលោក អ៊ិន រតនា ត្រូវបានបាញ់សម្លាប់ ដោយ«រាកៃ» ដោយលោក រ៉ាន់ បូរ័ត្ន មន្ត្រីសន្តិសុខមួយរូបទៀត ក្នុងពេលក្រោយមក។

ប៉ុន្តែការរកឃើញនេះ មិនដែលផ្ដល់ការជឿជាក់ សម្រាប់ក្រុមគ្រួសារ របស់លោក ឈុត វុទ្ធី នោះទេ ហើយពួកគេនៅតែទាមទារ ឲ្យស្វែងរកយុត្តិធម៌ និងអ្នកដែលនៅពីក្រោយឃាតកម្មនេះ យកមកផ្ដន្ទាទោស។ ជាពិសេស កូនប្រុសលោក ឈុត វុទ្ធី បានទម្លាយ រឿងរ៉ាវថ្មីមួយទៀត ដែលកាត់តែឲ្យគ្រួសារ របស់ជនរងគ្រោះ សំដែងការសង្ស័យ​ច្រើនឡើង។

ថ្លែងក្នុងកិច្ចសម្ភាសមួយ កាលពីថ្ងៃខួបប្រាំឆ្នាំ នៃមរណភាពរបស់ឪពុកលោក ទៅកាន់វិទ្យុអាស៊ីសេរី លោក ឆឺយ ឧត្ដមរស្មី បានស្រង់សំដី ពីមិត្តភ័ក្រឪពុកលោក ដែលជាអ្នករស់នៅ ក្នុងតំបន់អូរសោម (ជាតំបន់មួយ នៅចន្លោះជួរភ្នំក្រវាញ ខេត្តពោធិសាត់ ទៅកាន់ខេត្តកោះកុង) មកបញ្ជាក់ថា លោក ឈុត វុទ្ធី និងលោក អ៊ិន រតនា បានស្គាល់រាបអានគ្នា។ លោក ឆឺយ ឧត្ដមរស្មី បានថ្លែងឡើងថា៖ «ឪពុកខ្ញុំបានបង្រៀន [លោក អ៊ិន រតនា] ពីច្បាប់យោធា ពីការប្រើប្រាស់អាវុធយោធាមួយចំនួន ទៅគាត់។ បើអញ្ចឹង ខ្ញុំគិតថា មិនមានរូបប្អូនណា មកលើកកាំភ្លើងបាញ់ រៀមច្បង ដែលជាគ្រូបង្រៀនបានទេ ព្រោះឪពុកខ្ញុំ ធ្លាប់ជាអតីតទាហាន និងធ្លាប់ទៅសិក្សា នៅប្រទេសរ៉ូស្ស៊ី រយៈពេល៧ឆ្នាំ ផ្នែកបណ្ឌិតយោធា។»។

» សាកសពស្ដូកស្ដឹង របស់លោក អ៊ិន រតនា នៅខាងមុខ រថយន្ដលោក ឈុត វុទ្ធី៖

លោក ឈុត វុទ្ធី និងលោក អ៊ិន រតនា ត្រូវបានបាញ់សម្លាប់ ដោយគ្រាប់កាំភ្លើង នៅពេលលោក ឈុត វុទ្ធី ធ្វើដំណើរទៅស៊ើបអង្កេត ជាមួយនឹងអ្នកសារព័ត៌មានពីរនាក់ របស់កាសែត «The Cambodia Daily» លើករណីកាប់ព្រៃឈើ ដ៏ប្រទាំងប្រទើសមួយ ស្ថិតក្នុងស្រុក​មណ្ឌល​សីមា ខេត្ត​កោះកុង ធ្វើឡើងដោយក្រុមហ៊ុន ធីមប៊ើរហ្គ្រីន (Timber Green) ដែល​មាន​អាជ្ញា​ប័ណ្ណ​ កាប់​រាន​អាងស្តុក​ទឹក ​នៃ​គម្រោង​ទំនប់​វារីអគ្គិសនី​ ឫស្សីជ្រំ​ក្រោម​ ស្ថិតនៅមិនឆ្ងាយប៉ុន្មាន ពីកន្លែងឃាតកម្ម។

សារព័ត៌មាន «The Cambodia Daily» បានសរសេរចុះផ្សាយ នៅប៉ុន្មានថ្ងៃក្រោយមកថា ហេតុការណ៍​បាន​ផ្តើមឡើង ​ដោយសារ​តែ​ការរារាំង​ មិន​ឲ្យ​អ្នកកាសែត និង​អ្នកការពារ​ព្រៃឈើ​ ថតរូប​គំនរ​ឈើ និង​វល្លិ​រមៀត ​ដែល​គេ​បានគរ​ទុក​ នៅ​ទីនោះ។ ការព្យាយាម​ថតរូប​ភាពនេះ បានធ្វើ​ឲ្យ​ក្រុម​ជនប្រដាប់អាវុធ​ ដែល​ឈរ​ការពារ​​ទីតាំង​នោះ​ខឹងសម្បា និង​ព្យាយាម ​ដកយក​ម៉ាស៊ីន​ថត​ ពី​ពួកគេ។ ទំនាស់​ បាន​ឈានដល់​ការជជែក​គ្នា​ យ៉ាង​តឹងសរសៃក និង​រហូតដល់ មានការប្រតាយប្រតប់គ្នា មុននឹងស្នូរផ្ទុះអាវុធច្រើនគ្រាប់ បានលាន់ឮឡើង។​ សារព័ត៌មាន មិនបានអះអាងថា នរណាជាអ្នកបាញ់ទេ។

នៅក្នុងភាពយន្ដឯកសារមួយ ដែលមានចំណងជើងថា «ខ្ញុំជា​ ឈុត វុទ្ធី» កញ្ញា អូឡេស៊ា ផ្លូកឃី (Olesia PLOKHII) អ្នកសារព័ត៌មានមួយរូប ក្នុងចំណោមអ្នកសារព័ត៌មាន ទាំងពីររូប របស់សារព័ត៌មានខាងលើ ដែលស្ថិតក្នុងហេតុការណ៍បាញ់ប្រហារនោះ ក៏បានត្រឡប់​​មក​រៀបរាប់​ ដោយ​ផ្ទាល់ឡើងវិញ ពីរឿងរ៉ាវនេះដែរ។ កញ្ញាបានបញ្ជាក់ នៅចុងបញ្ចប់ នៃ​ការ​រៀបរាប់​នោះ​ថា៖ «ខ្ញុំគិតថា ពួកគេបាន​សម្លាប់​ទាហាន​ម្នាក់ (លោក អ៊ិន រតនា) ដើម្បីលាក់ការពិត»។

» អានអត្ថបទទាក់ទង៖ «ខ្ញុំជា ឈុត វុទ្ធី» ចាក់​ផ្សាយ​ភាពយន្ដ​ឯកសារ​ទាំង​ស្រុង

ប៉ុន្តែរឿងរ៉ាវ ទំនងជាបានកើតឡើង តាំងពីច្រើនខែមកហើយ។ នេះ បើតាមការចុះផ្សាយ របស់សារព័ត៌មាន ភ្នំពេញប៉ុស្ដ៍ ដែលបានអះអាងថា អ្នកសារព័ត៌មានរបស់ខ្លួនពីររូប រួមនឹងលោក ឈុត វុទ្ធី នៅអំឡុងខែធ្នូ ឆ្នាំ២០១១ ត្រូវបានក្រុមជនប្រដាប់អាវុធមួយក្រុម ឃាត់ខ្លួនទុក បន្ទាប់ពីពួកគេ បានចុះទៅកាន់តំបន់​កណ្តាល​ភ្នំ​ក្រវាញ​ នៃ​តំបន់​ព្រៃ​ការពារ។ សារព័ត៌មានបានរៀបរាប់ថា ក្រុមជនប្រដាប់​អាវុធទាំងនោះ បាន​តម្រូវ​ឲ្យ​លោក ឈុត វុទ្ធី និយាយ​ទៅ​កាន់​មេ​បញ្ជាការ​ពួក​គេ ​តាម​ទូរស័ព្ទ ហើយ​បន្ទាប់​ពី​ការ​និយាយ​ឆ្លើយឆ្លង​គ្នា​ ដ៏ខ្លាំងៗ​នោះ​មក​ លោក ឈុត វុទ្ធី បាន​កំណត់​អត្តសញ្ញាណ ​របស់​«មេ​ម្នាក់»​នោះ​ថា​ ជា​ប្រធាន​សន្តិសុខរបស់​ក្រុមហ៊ុន «Timber Green»។

នៅក្នុងឯកសារចុះបញ្ជីរ នៅឯក្រសួងពាណិជ្ជកម្ម ក្រុមហ៊ុន «Timber Green» មានម្ចាស់ភាគហ៊ុនធំ ឈ្មោះអ្នកស្រី ខៀវ សស៊ីលាភ។ ប៉ុន្តែក្រុមហ៊ុននេះ នៅមានមន្ត្រីមានអំណាច ជាច្រើននាក់ទៀត នៅក្នុងជួររដ្ឋាភិបាល ជាអ្នកចូលរួមភាគហ៊ុន ជាមួយដែរ។ សារព័ត៌មាន ភ្នំពេញប៉ុស្តិ៍ បានរាយការណ៍បន្តថា៖ «ក្រុមហ៊ុន "Timber Green" ​ទទួល​បាន​អាជ្ញាប័ណ្ណ ធ្វើ​ការ​ឈូស​ឆាយ ​លើ​ផ្ទៃ​ដី​ទំហំ​ជិត ២​ពាន់​ហិកតា ​នៃ​ទំនប់​ស្ទឹង​តាតៃ ក្នុង​ស្រុក​ថ្មបាំង ហើយ​លោក​ ឈុត វុទ្ធី បាន​សង្ស័យ​ថា ក្រុមហ៊ុន​នេះ​​កំពុង​​កាប់​ឈើ​​ច្រើន​​ហួសហេតុ​ ពី​ក្នុង​តំបន់​ដែល គេ​ទទួល​បាន​អាជ្ញា​ប័ណ្ណ​ ពីរដ្ឋាភិបាល​កម្ពុជា»។

សម្រាប់កូនប្រុសលោក ឈុត វុទ្ធី បានសំដែង ការជឿជាក់ថា មន្ត្រីរដ្ឋាភិបាល ឬអ្នកមានអំណាចណាម្នាក់ ពិតជានៅពីក្រោយខ្នង នៃការបាញ់សម្លាប់ឪពុកលោក។ លោក ឆឺយ ឧត្ដមរស្មី បានថ្លែងឡើងថា៖ «ខ្ញុំមិនជឿថា លោក អ៊ិន រតនា ដែលជាមន្ត្រីកងរាជអាវុធហត្ថ ដែលមានថានៈតូចទាបនេះ ហ៊ានលើកកាំភ្លើងបាញ់ សម្លាប់ឪពុកខ្ញុំនោះទេ។ (...) ខ្ញុំចង់ឲ្យអន្តរជាតិ ទាំងរដ្ឋាភិបាល រកអ្នកបញ្ជានៅពីក្រោយខ្នង យកមកកាត់ទោស ព្រោះខ្ញុំគិតថា អ្នកបញ្ជានោះ គឺជាអ្នកធំ នៅក្នុងជួររដ្ឋាភិបាល។»៕

ដំរី​ព្រៃ​ទាំង​១១ក្បាល ត្រូវ​បាន​សង្គ្រោះ​ពី​រណ្ដៅ​គ្រាប់​បែក​ហើយ!

ដំរី​ព្រៃ​ទាំង​១១ក្បាល ត្រូវ​បាន​សង្គ្រោះ​ពី​រណ្ដៅ​គ្រាប់​បែក​ហើយ!

បន្ទាប់ពីបានជាប់ខ្លួន អស់រយៈពេលបួនថ្ងៃកន្លងមក ហ្វូងសត្វដំរីព្រៃទាំង១១ក្បាល រាប់​ទាំង​កូន​ដំរី​មួយ​ក្បាល​ផង ត្រូវ​បាន​ជួយ​សង្គ្រោះ ឲ្យងើបខ្លួន​ចេញពីរណ្ដៅគ្រាប់បែក ដែលបានបន្សល់ទុក តាំងពី​ចុង​ទសវត្សន៍​ឆ្នាំ​៦០​មក ហើយបាន​រត់ត្រឡប់ ចូលទៅក្នុងព្រៃ​ជ្រៅ​វិញ​អស់​ហើយ នៅរសៀល​ថ្ងៃសៅរ៍​នេះ។ នេះ បើ​តាម​លោក ​កែវ សុ​ភក៌ ប្រធាន​មន្ទីរ​បរិស្ថាន ខេត្ត​មណ្ឌលគិរី។

ហ្វូងសត្វដំរីព្រៃ ទាំង១១ក្បាល ត្រូវបានអ្នកស្រុករកឃើញ កំពុង​ជាប់​ខ្លួន នៅក្នុងរណ្ដៅ​គ្រាប់​បែក ជម្រៅ​ប្រមាណ​ជា៣ម៉ែត្រ ដែលដក់​ទៅ​ដោយ​ទឹកភក់ កាលពីថ្ងៃសុក្រ​ម្សិលម៉ិញ ក្នុងតំបន់​ព្រៃអភិរក្ស ស្ថិត​នៅ​ភូមិ អូរអាម ឃុំស្រែខ្ទម ស្រុក​​កែវសីមា ខេត្តមណ្ឌលគិរី។ ប៉ុន្តែបើតាមមើលសភាពជាប់គាំង នៅក្នុង​ទឹក​ភក់ របស់​សត្វដំរីព្រៃ​ទាំង​នោះ បាន​ធ្វើឲ្យ​គេ​គិតថា ពួកវាបាន​ជាប់ខ្លួន នៅទីនោះ មិន​តិច​ជាង បីថ្ងៃ​មកហើយ​នោះទេ (រាប់​ទាំងថ្ងៃ​នេះ ត្រូវជា​បួនថ្ងៃ)។

លោក ​កែវ សុ​ភក៌ បានពន្យល់​ថា ក្នុងរយៈកាល​កន្លងមក រណ្ដៅគ្រាប់បែក​ខាងលើ ត្រូវបានអ្នកស្រុក​ជីក​ពង្រីក​ ឲ្យ​ធំ​និង​ជ្រៅ​ជាង​មុន ដើម្បីផ្ទុកទឹក។ លោក​បន្ត​ឲ្យ​ដឹងថា សត្វដំរីព្រៃទាំង១១ក្បាល បានចុះ​ក្នុង​រណ្ដាៅ​នោះ​ ដើម្បី​ផឹក​ទឹក ប៉ុន្តែពួកវា​មិន​អាច​ឡើង មកលើវិញបានទេ។ លោកថា៖ «ពួកវាអាច​នឹងងាប់ ប្រសិនណា​ជា​គ្មាន​អ្នក​ស្រុក បាន​មើល​ឃើញ​ទាន់​ពេល​ទេនោះ»។

ដើម្បីសម្រួលដល់ការកម្រើកខ្លួន របស់សត្វដំរីទាំងនេះ ក្រុមអ្នកជួយសង្គ្រោះ ដែលមាន​ការ​ចូល​រួម​ ពី​មន្ត្រី​មន្ទីរ​​បរិស្ថាន​​​ខេត្ត​​មណ្ឌល​គិរី មន្ដ្រី​អង្គការ​អភិរក្ស​សត្វ​ព្រៃ ឧទ្យានុរក្ស និង​ប្រជាពលរដ្ឋ​មួយ​ចំនួន​ទៀត​ បាន​បូម​ទឹក​​យក​ទៅ​បាញ់​​ស្រោច ​ពី​លើ​ពួកវា។ បន្ទាប់មក ពួកអ្នក​ជួយសង្គ្រោះ បានជីកមាត់​រណ្ដៅ​​ដោយ​​ចប​កាប់ ធ្វើ​យ៉ាង​​ណា ឲ្យ​មាត់​​រណ្ដៅ​​មាន​​ជម្រាល ដើម្បីអាច​ឲ្យ​សត្វ​ដំរី តោងឡើង​មកខាង​លើវិញ​បាន។

សត្វដំរីព្រៃ នៅកម្ពុជា ត្រូវបានក្រុមអ្នកការពារ​បរិស្ថាន ចាត់ទុកជា ពូជសត្វព្រៃដ៏កម្រ និង​កំពុង​រងការ​គម្រាម​កំហែង នូវ​ការ​រលត់​ផុតពូជ មិនខុសគ្នា​ប៉ុន្មាន ពីប្រភេទសត្វដំរី នៅក្នុងទ្វីបអាហ្វ្រិក​នោះឡើយ។ ក្រុម​អ្នក​ការពារ​បរិស្ថាន បាន​គិត​ថា មកដល់ថ្ងៃនេះ សត្វដំរីព្រៃទាំងនោះ នៅសេសសល់ ប្រមាណ​ជាង១០០ក្បាល​ប៉ុណ្ណោះ ​នៅ​ទូទាំង​ប្រទេសកម្ពុជា។ ការគម្រាម​កំហែង ពីការផុតពូជ​របស់​ពពួកសត្វព្រៃ​ទាំងនោះ មាន​មូលហេតុ​បណ្ដាល​មក​ពី​ការកាប់​បំផ្លាញ​ព្រៃឈើ និង​ការ​ប្រមាញ់ ដើម្បីយក​ភ្លុក៕

អតីត​ប្រមុខ​រដ្ឋ​សូវៀត ព្រមាន​ពី​សង្គ្រាម​លោក​ទី៣ កំពុង​ហៀប​ផ្ទុះ

អតីត​ប្រមុខ​រដ្ឋ​សូវៀត ព្រមាន​ពី​សង្គ្រាម​លោក​ទី៣ កំពុង​ហៀប​ផ្ទុះ

លោក មីខាអ៊ីល ហ្គោរបាឆូវ (Mikhaïl Gorbatchev) អតីតប្រមុខរដ្ឋចុងក្រោយ​ នៃអតីតសហភាពសូវៀត ដែល​ធ្លាប់​ជា​​មហា​អំណាច​កុម្មុយនីស​ធំជាងគេ បានសំដែងក្ដីបារម្ភរបស់លោក នៅចំពោះសភាពការណ៍​បច្ចុបន្ន ដោយ​បាន​ថ្លែង​ឡើងថា៖ «វាកាន់​តែ​ច្បាស់​ហើយ ថាពិភពលោកយើងសព្វថ្ងៃ កំពុងត្រៀមខ្លួន ដើម្បី​ធ្វើស​ង្គ្រាម​លោក​​ជា​ថ្មី​ទៀត»។

លោក ហ្គោរបាឆូវ បាន​ថ្លែងដូច្នេះ កាលពីថ្ងៃទី២៦ ខែមករានេះ នៅលើទំព័រអត្ថបទមួយ របស់ទស្សនាវដ្ដី «Time» អាមេរិក។ លោក​បាន​សង្កត់​ធ្ងន់​ថា៖ «បច្ចុប្បន្ន ពិភពលោកបានពេញប្រៀប ទៅដោយបញ្ហា (...) ហើយរាល់​អ្នក​នយោបាយ ទំនងជាលែង​មាន​​ទិសដៅ​​ពិត​ប្រាកដ និង​កំពុង​​វង្វេង​វង្វាន់»។

អតីមេដឹកនាំដ៏មានឥទ្ធិពល ដែលសព្វថ្ងៃមានអាយុ ៨៥ឆ្នាំនោះ បាន​ថ្លែងស្នើទៅ មេដឹកនាំ​នៅលើ​ពិភពលោក​ទាំង​អស់ ឲ្យធ្វើការ​ថ្កោល​ទោស «យោធានីយកម្ម នៅក្នុងការធ្វើនយោបាយ និងការប្រឡងប្រណាំង ផ្នែក​សព្វាវុធ» ដោយ​ហេតុ​ថា «ស្ថានភាព​បែបនេះ មាន​​​គ្រោះថ្នាក់​បំផុត»។ លោក​ថា បណ្ដា​រដ្ឋ​មួយ​ចំនួន បាន​បង្កើន​ការ​ចំណាយ ទៅ​លើ​វិស័យ​យោធា​របស់​ពួកគេ តែ​បែរ​ជាផ្អាប់​ទុក នូវថវិកា​​ដ៏សំខាន់ ដែលមាន​ទិសដៅ​​សម្រាប់​សង្គម​ទៅ​វិញ។

ក្នុង​ទសវត្សន៍ឆ្នាំ៨០ លោក មីខាអ៊ីល ហ្គោរបាឆូវ ធ្លាប់បានជជែកចរចា ជាមួយសហរដ្ឋអាមេរិក ជុំវិញដំណើរការ​កាត់​​បន្ថយ​​អាវុធ​នុយក្លេអ៊ែរ របស់​ពិភពលោក។ លោកបានបារម្ភ នៅក្នុងអត្ថបទរបស់ទស្សនាវដ្ដី ដោយ​ខ្លាច​ក្រែង​ស្ថានភាព​នៅ​ពេលនោះ អាចនឹង​វិល​​ត្រឡប់​មកវិញ។ លោក​បាន​ថ្លែង​ថា៖ «នៅថ្ងៃនេះ ការ​គម្រាម​ដោយ​អាវុធ​នុយក្លេអ៊ែរ ទំនង​ជា​កំពុង​ពន្លេច​ខ្លួន​​ឡើង​សារ​ជា​ថ្មី»។

លោក ហ្គោរបាឆូវ បានពញ៉ាក់អារម្មណ៍ ពីទំនាក់ទំនងរបស់ក្រុមប្រទេសមហាអំណាច ដែលមានសភាព​កាន់​តែ​អាក្រក់ តាំង​ពី​ច្រើន​ឆ្នាំ​កន្លង​មក។ លោកបានទាមទារឲ្យ​ក្រុម​ប្រទេសទាំងនោះ ត្រូវបញ្ចប់ស្ថានភាព​បែប​នេះ កុំ​ឲ្យ​មាន​តទៅ​ទៀត ខណៈ​សង្គ្រាម​ប្រឆាំង​នឹង​ភេរវកម្ម មាន​ភាព​ចាំបាច់​ណាស់ និងមិនមែន​​គ្រាន់​តែ​​ជា «កិច្ចការ​ល្មមៗ» នោះ​ទេ។ អតីតមេដឹកនាំរូបនេះ បានថ្លែងឡើង ដោយ​សម្លឹង​​មើល​​វែង​ឆ្ងាយ​ថា៖ «គោល​បំណង​ដ៏​សំខាន់ និង​ជា​ថ្មី​ម្ដង​ទៀត គឺត្រូវ​បញ្ជៀស​សង្គ្រាម»៕

អតីតមេដឹកនាំ នៃអតីតសហភាពសូវៀតរូបនេះ បានពន្យល់ថា៖ «នឹងគ្មានបញ្ហាណាមួយ ត្រូវបានដោះ​ស្រាយ​ចេញ ដោយប្រើ​មធ្យោបាយ នៃការធ្វើសង្គ្រាមនោះឡើយ»។ បញ្ហាទាំងនោះ ដែលរួមមាន «ភាពក្រីក្រ បរិស្ថាន ជន​អន្តោប្រវេសន៍ កំណើនប្រជាជន​នៅ​លើ​ផែនដី និង​ភាព​រីងរៃ​នៃ​ធនធានធម្មជាតិ» សុទ្ធសឹងជារឿង​ចំពោះ​មុខ ដែល​អតីត​ប្រមុខ​រដ្ឋវ័យដ៏ចំណាស់ ចង់លើកឡើង បញ្ជាក់​ទៅ​កាន់​​មេដឹកនាំ​​ពិភពលោក មាន​ទាំង​​ប្រធានាធិបតី​រ៉ូស្ស៊ី លោក វ្លាឌីមៀរ ពូទីន (Vladimir Poutine) ប្រធានាធិបតីអាមេរិក លោក ដូណាល់ ត្រាំ (Donald Trump) និង​ជា​ពិសេស​អង្គការ​សហប្រជាជាតិ។

លោកថា៖ «វាល្មមដល់ពេល ដែលត្រូវធ្វើប្រតិកម្មហើយ»៕

ក្រសួង​បរិស្ថាន​ថា NASA យក​ទិន្នន័យ​«ចាស់»​មក​ផ្សាយ

ក្រសួង​បរិស្ថាន​ថា NASA យក​ទិន្នន័យ​«ចាស់»​មក​ផ្សាយ

នៅព្រលប់ ថ្ងៃទី១៣ ខែមករា ឆ្នាំ២០១៧នេះ ក្រសួងបរិស្ថានកម្ពុជា បានចេញសេចក្តីបំភ្លឺមួយ សម្តែងការ​សោក​ស្តាយ ចំពោះទិន្នន័យ ប្រើប្រាស់នៅក្នុង​របាយការណ៍ដ៏ខ្លី របស់អង្គការណាសា (NASA) ដែល​ក្រសួង​ហៅ​ថា ជា​ទិន្នន័យ«ចាស់»។ ក្នុងសេចក្ដីបំភ្លឺ ដែលទស្សនាវដ្ដីទទួលបាន នៅមុននេះបន្តិច បានឲ្យដឹងថា ទន្និន័យ ដែលកម្មវិធីឃ្លាំមើលផែនដី របស់អង្គការ ណាសា បានយកមកសរសេរ នៅក្នុងរបាយការណ៍នោះ ជា​«អាត្រា​មធ្យម​​ប្រចាំឆ្នាំ នៃការបាត់បង់​គម្រប​ព្រៃឈើ» តែមិនមែនជា «អត្រា​បាត់បង់​គម្រប​ព្រៃឈើ មធ្យម​ប្រចាំ​ឆ្នាំ» ដូច​ការ​ផ្សាយ របស់សារព័ត៌មានមួយចំនួននោះទេ។

តើ«អាត្រាមធ្យម​ប្រចាំ​ឆ្នាំ នៃការបាត់បង់គម្របព្រៃឈើ» ខុសពី«អត្រាបាត់បង់​គម្របព្រៃឈើ មធ្យម​ប្រចាំ​ឆ្នាំ» យ៉ាងដូចម្ដេច?

បន្ថែមពីលើនេះ ក្រសួងមិនបានបកស្រាយទេ ពីរូបភាពថតពីផ្កាយរណប ក្នុងចុងឆ្នាំ២០១៥ ​របស់​អង្គការ​ណាសា បង្ហាញពីក្រឡាជាច្រើន ដែលនោះ​ជាគម្រោងផ្លូវ និងគម្រោងចំការកៅស៊ូ នៅនឹងតំបន់នោះ។ របាយ​ការណ៍​បានរំពឹងថា ព្រៃឈើដែលនៅសេសសល់ នៅក្នុងតំបន់ក្រឡាៗ ដែលជា​គម្រោង​ចំការ​​កៅស៊ូ​ទាំងនោះ នឹង​ត្រូវ​កាប់​បំផ្លាញ​បន្ថែមទៀត។

» អត្ថបទដែលទាក់ទង៖ កម្មវិធី​ឃ្លាំ​មើល​ផែនដី​របស់​ណាសា ថា​«ព្រៃឈើ​នៅ​កម្ពុជា​កំពុង​បន្ត​អន្តរាយ»

» ខាងក្រោមនេះ ជារបាយការណ៍ ស្ដីពីអាត្រាបាត់បង់ព្រៃឈើ របស់វិទ្យាស្ថានធនធានពិភពលោក (World Resources Institute)៖

» ខាងក្រោមនេះ ជាសេចក្ដីបំភ្លឺទាំងស្រុង របស់ក្រសួងបរិស្ថាន៖