Posts tagged as "Attentat"

វាយ​ប្រហារ​មុខ​ព្រះ​វិហារ​កាតូលីក (ប៉ារីស)៖ ជន​សង្ស័យ​ស្រែក​ថា «ដើម្បី​ប្រទេស​ស៊ីរី»

វាយ​ប្រហារ​មុខ​ព្រះ​វិហារ​កាតូលីក (ប៉ារីស)៖ ជន​សង្ស័យ​ស្រែក​ថា «ដើម្បី​ប្រទេស​ស៊ីរី»

រូបភាពនៃការវាយប្រហារ ដោយ«ញញួរ» ត្រូវបានទូរទស្សន៍បារាំង «CNews» ទទួលបាន និងយកមកផ្សាយ នៅមុននេះបន្តិច។ ហេតុការណ៍បានកើតឡើង កាលពីល្ងាចម្សិលម៉ិញ នៅលើទីលានខាងមុខ ព្រះវិហារ​កាតូលីក «Notre-Dame» ដ៏ល្បីល្បាញ នៃរដ្ឋធានីប៉ារីស ដែលសម្បូរពោរពាស ដោយទេសចរណ៍។ ជនសង្ស័យ មានអាយុ ៤០ឆ្នាំ បានប្រកាសដោយខ្លួនឯងថា ជា«យុទ្ធជនម្នាក់ នៃទឹកដីព្រះជាម្ចាស់» ដែលជាភាសាមួយ តែងតែត្រូវបានយកមកប្រើ ដោយបណ្ដាភេរវជន របស់អង្គការភេរវនិយម ក្រុមរដ្ឋអ៊ីស្លាម។

ជនសង្ស័យ ដែលកាន់អត្តសញ្ញាណបណ្ណ ជានិស្សិតមកពីប្រទេសអាល់ហ្សេរី បានស្រែកឡើង នៅពេលធ្វើសកម្មភាពនោះថា «ដើម្បីប្រទេសស៊ីរី»។ នេះ បើតាមការលើកឡើង របស់រដ្ឋមន្ត្រីមហាផ្ទៃបារាំង លោក ហ្សេរ៉ា កូឡំ (Gérard Collomb) បន្ទាប់ពីលោកបានមកដល់ផ្ទាល់ នឹងកន្លែងកើតហេតុ កាលពីយប់ម្សិលម៉ិញ។ លោករដ្ឋមន្ត្រី បានថ្លែងឡើងថា៖ «បើតាមការសង្កេត ជាជំហានដំបូង ជននេះបានធ្វើសកម្មភាព តែម្នាក់ឯង»។

សាក្សីនៅនឹងកន្លែង បានថ្លែងឲ្យដឹងថា ជនសង្ស័យបានដក«ញញួរ»ចេញ ហើយរត់សំដៅ ទៅវាយភ្នាក់ងារនគរបាលម្នាក់ ពីខាងក្រោយខ្នង។ តែភ្នាក់ងារនគរបាលម្នាក់ទៀត បានដកកាំភ្លើងបាញ់តបវិញ បណ្ដាលឲ្យជននេះរបួស ដេកដួលនៅលើដី។ ប្រភពពីអាជ្ញាធរបានបញ្ជាក់ថា ជនសង្ស័យ និងនគរបាលរងគ្រោះ (រងរបួសស្រាល នៅត្រង់ក្បាល) ត្រូវបានបញ្ជូនទៅមន្ទីរពេទ្យ។

ទូរទស្សន៍ «CNews» ដែលមានជំនាញខាងព័ត៌មាន ផ្សាយបន្តផ្ទាល់ បានទទួលបានរូបភាព (ខាងក្រោម) ដែលត្រូវបានថតជាប់ ដោយកាម៉េរ៉ាសុវត្ថិភាព ហើយមិនខុសពីការលើកឡើង របស់សាក្សីខាងលើនោះទេ។ ប៉ុន្តែទិដ្ឋភាពនៃការវាយប្រហារ ដោយ«ញញួរ» មានសភាពហិង្សាខ្លាំង ជាងអ្វីដែលគេគិតមិនដល់។

បើតាមអ្នកនាំពាក្យ​រដ្ឋាភិបាលបារាំង លោក គ្រីស្ដូហ្វ៍ កាស្តាណេ (Christophe Castaner) បានអះអាងថា ជនសង្ស័យមិនត្រូវបានជាប់ នៅក្នុងបញ្ជីនៃក្រុមអ៊ីស្លាមនិយមជ្រុលនោះទេ ហើយគ្រប់ចំណុចទាំងអស់ ដែលអាជ្ញាធរទទួលបាន នៅក្នុងពេលនេះ បានឈានទៅដល់ សេចក្ដីសន្និដ្ឋានមួយថា ជននេះ ទំនងជាធ្វើ«សកម្មភាព ដោយឯកឯង»៕

បង្ក្រាប​ជន​ម្នាក់​ដែល​វាយប្រហារ​លើ​នគរបាល នៅ​មុខព្រះវិហារកាតូលីក នៃរដ្ឋធានីប៉ារីស

បង្ក្រាប​ជន​ម្នាក់​ដែល​វាយប្រហារ​លើ​នគរបាល នៅ​មុខព្រះវិហារកាតូលីក នៃរដ្ឋធានីប៉ារីស

សាក្សីជាច្រើននាក់ បានឃើញបុរសម្នាក់ ដកញញួរចេញ ហើយរត់សំដៅ ទៅវាយលើភ្នាក់ងារនគរបាលមួយរូប នៅលើទីលាន ខាងមុខព្រះវិហារកាតូលីកដ៏ល្បី ឈ្មោះ «Notre-Dame» នៃរដ្ឋធានីប៉ារីស។ បើតាមស្នងការនគរបាលនៃរដ្ឋធានី ប៉ារីស បានបញ្ជាក់បន្ថែមថា បុសរូបនោះ ត្រូវបានជនរងគ្រោះ (ដែលជានគរបាល) ផ្ទុះអាវុធការពារខ្លួន បាញ់សដៅវិញ បណ្ដាលឲ្យរបួសដេកដួល នៅលើដី។

សាក្សីម្នាក់ទៀត បានអះអាង បានឮសូរសម្លេងស្រែកដ៏ខ្លាំងមួយ និងបន្ទាប់មកបានឃើញ​មនុស្សផ្អើលឈូឆរ នៅខាងមុខព្រះវិហារ ដែលសម្បូរទៅដោយទេសចរណ៍ ក្នុងមួយឆ្នាំៗ។ សាក្សីដដែលបានបន្តថា៖ «មនុស្សម្នានាំគ្នាជ្រួលច្របល់ ហើយខ្ញុំបានឭសូរសម្លេងផ្ទុះអាវុធ ចំនួនពីរគ្រាប់ និងបន្ទាប់មក ឃើញបុរសម្នាក់ ដេកដួលនៅលើដី។ ខ្ញុំឃើញមានស្លាកស្នាមឈាម នៅពាសពេញទីកន្លែងនោះ។»។

ប្រភពពីអាជ្ញាធរ បា​នឲ្យដឹងថា ភ្នាក់ងារនគរបាល ដែលរងគ្រោះពីការវាយប្រហារនោះ បានរងរបួសស្រាល។ ស្នងការនគរបាល នៃរដ្ឋធានីប៉ារីស បានស្នើសុំឲ្យបណ្ដាជនទាំងឡាយ បញ្ជៀសការធ្វើដំណើរទៅក្បែរទីនោះ ខណៈសង្កាត់នៅជុំវិញព្រះវិហារទាំងមូល ត្រូវបានឡោមព័ទ្ធជុំជិត ដោយកងកម្លាំងពិសេស បង្ក្រាបភេរវកម្ម និងកងកម្លាំងសង្គ្រោះ។

ការិយាល័យស៊ើបអង្កេត ប្រឆាំងភេរវកម្ម របស់រដ្ឋអាជ្ញានៃសាធារណរដ្ឋ ប្រចាំរដ្ឋធានីប៉ារីស បានប្រកាសថា សំនុំរឿងភេរវនិយមមួយ កំពុងត្រូវបានបើក ដើម្បីធ្វើការស្រាវជ្រាវ និងស៊ើបអង្កេត ទាក់ទងនឹងហេតុការណ៍នេះ។

ហេតុការណ៍វាយប្រហារខាងលើ បានកើតឡើង នៅ៣ថ្ងៃក្រោយការវាយប្រហារ កាលពីយប់ថ្ងៃសៅរ៍កន្លងទៅ នៅរាជធានី ឡុងដ៍ នៃចក្រភពអង់គ្លេស ដែលត្រូវបានអង្គការភេរវនិយម ក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ចេញមុខប្រកាសទទួលស្គាល់ នៅពេលក្រោយមក។ ភេរវកម្មដែលធ្វើឡើង នៅពីរកន្លែងកណ្ដាលរាជធានី ឡុងដ៍ នោះ បានសម្លាប់មនុស្ស៧នាក់ និងធ្វើឲ្យរបួស ច្រើនសិបនាក់ទៀត។

រាប់ចាប់តាំងពីខែមករា ឆ្នាំ២០១៥មក ប្រទេសបារាំង​បានរងអំពើ​ភេរវកម្មជាច្រើន នៅលើទឹកដីរបស់ខ្លួន រាប់ទាំងនៅក្នុងរដ្ឋធានីប៉ារីស ទីក្រុងនីស (Nice - ទីក្រុងមាត់សមុត្រភាគខាងត្បូង) និងតំបន់មួយចំនួនទៀត។ ភេរវកម្មទាំងនោះ បានសម្លាប់មនុស្សសរុបចំនួន ២៣៩នាក់ និងរបួសច្រើនរយនាក់។

ភេរវកម្មចុងក្រោយ (មុនលើកនេះ) បានកើតឡើង កាលពីថ្ងៃទី២០ ខែមេសាកន្លងទៅ នៅលើមហាវិថី «Champs Elysées» ដ៏ល្បីនៃរដ្ឋធានី បង្កឡើងដោយជនម្នាក់ ជាតិបារាំង ដែលបានបើកការបាញ់រះ សម្លាប់ភ្នាក់ងារនគរបាលមួយរូប និងធ្វើឲ្យរបួសភ្នាក់ងារនគរបាលពីររូបទៀត។ ជនម្នាក់នេះ ត្រូវបានកងកម្លាំងអាជ្ញាធរបាញ់សម្លាប់ និងបន្ទាប់មក ត្រូវបានក្រុមរដ្ឋអ៊ីស្លាម ចេញមុខមកទទួលស្គាល់ថា ជា«យុទ្ធជនស្ម័គ្រប្រយុទ្ធ»មួយរូប របស់ខ្លួន៕

បំផ្ទុះ​គ្រាប់​បែក​ស្វាគមន៍​ខួប​បីឆ្នាំ នៃ​រដ្ឋប្រហារ​នៅ​ថៃ

បំផ្ទុះ​គ្រាប់​បែក​ស្វាគមន៍​ខួប​បីឆ្នាំ នៃ​រដ្ឋប្រហារ​នៅ​ថៃ

ការបំផ្ទុះគ្រាប់បែក នៅថ្ងៃទី២២ ខែឧសភា នៅក្នុងមន្ទីរពេទ្យយោធាមួយ នៃរាជធានីបាងកកង ប្រទេសថៃ បាន​ធ្វើឲ្យមនុស្ស២៥នាក់រងរបួស ក្នុងនោះមានម្នាក់របួសធ្ងន់ធ្ងរ។ មេបញ្ជាការកងទ័ពថៃ លោក «Chalermchai Sitthisat» បាន​ថ្លែង​តាម​សារព័ត៌មាន «Bangkok Post» ថា៖ «បើទោះជា នៅក្នុងពេល​សង្គ្រាម​ក៏ដោយ ក៏​បណ្ដា​មន្ទីរ​ពេទ្យ មិនត្រូវបាន​យក​ជា​ទិសដៅ នៃការ​វាយ​ប្រហារ​នោះ​ទេ»។

សារព័ត៌មានដដែល បានសរសេរបន្តថា៖ «ការសង្ស័យពី ហេតុផល​នយោបាយ ឬជា​ប្រតិបត្តិការ នៃ​ក្រុម​និយមបំបែក​ទឹកដី នៅផ្នែក​ខាងត្បូង នៃប្រទេសថៃ គឺជាការសង្ស័យ​ដ៏ខ្លាំង​ជាង​គេ របស់ក្រុម​អាជ្ញាធរ»។

ការវាយប្រហារនេះ បានធ្វើឡើង ចំថ្ងៃខួបបីឆ្នាំ នៃការធ្វើរដ្ឋប្រហាររបស់ក្រុមយោធាន ដើម្បី​ទម្លាក់​រដ្ឋាភិបាល​ថៃ ដែល​កើត​ចេញ​ពីការបោះឆ្នោត កាលពីខែឧសភា ឆ្នាំ២០១៤។ ចាប់ពីពេលនោះមក ក្រុម​យោធា​បាន​កាន់​អំណាច​នៅ​ថៃ បាន​ប្ដូររដ្ឋធម្មនុញ្ញ ហើយ​បាន​សន្យា ពីការបោះឆ្នោត​ជា​សាកល​មួយ នៅឆ្នាំខាងមុខ។

បើតាមក្រុម​អ្នកស៊ើប​អង្កេត បានឲ្យដឹងថា ការបំផ្ទុះគ្រាប់បែក ទំនងជាមានជាប់​ទាក់ទង នឹង​ភេរវកម្ម​ថ្ងៃទី១៥ ​ខែ​ឧសភា និង​ថ្ងៃទី៥ ខែ​មេសា​កន្លងមក។ ពួកគេ​បានរក​ឃើញថា សម្ភារៈ​សម្រាប់​ធ្វើការ​បំផ្ទុះទាំង​នោះ ជា​សម្ភារៈ​តែ​មួយ ឬ​ដូចគ្នា​ទាំង​ស្រុង។ ដែកគោលជាច្រើន ត្រូវបានដាក់​ជាមួយ នឹង​គ្រាប់បែក​នោះ ដើម្បីបង្កឲ្យមាន​​ជន​​រង​គ្រោះ​ច្រើន​បំផុត។ លោក «Chalermchai Sitthisat» បានថ្លែងឲ្យដឹងទៀតថា ការវាយ​ប្រហារ​ មាន​ទិសដៅ​ចង់​ឲ្យ​រដ្ឋាភិបាល​[យោធា]​ថៃ មាន​ភាព​រង្គោះ​រង្គើ។

ក្រុមប្រឆាំងទល់នឹងក្រុមយោធាថៃ ដែលមានឈ្មោះ «រណសិរ្យរួបរួម ដើម្បីប្រជាធិបតេយ្យ ប្រឆាំង​នឹង​របប​ផ្ដាច់​ការ» បានច្រានចោល​រាល់​ការជាប់ទាក់ទង នៅក្នុងការវាយប្រហារ។ អ្នកនាំពាក្យ​របស់​ចលនា​នេះ បាន​ថ្លែង​ប្រាប់​សារព័ត៌មាន​ដដែល​ថា៖ «ការបំផ្ទុះគ្រាប់បែកនេះ មានលក្ខណៈ​សាហាវ​យង់ឃ្នង​ណាស់។ យើង​មិន​មាន​ជាប់​ទាក់ទង​អ្វី ជាមួយ​ការ​បំផ្ទុះ​គ្រាប់​នេះ​ឡើយ។»។

អ្នកនាំពាក្យក្រុមប្រឆាំង បានបញ្ជាក់ទៀតថា អំពើភេរវកម្មណាក៏ដោយ នឹងបង្កឲ្យមាន​រូបភាព​អាក្រក់ សម្រាប់​ប្រទេស​ថៃ ហើយលោក​បាន​ទាមទារ ឲ្យចាប់ខ្លួន​អ្នកទទួល​ខុសត្រូវ ក្នុងការវាយ​ប្រហារ​នេះ និងយក​ពួកគេ ទៅ​កាត់​ទោស​តាម​ច្បាប់៕

ISIS ប្រកាស​ទទួល​ស្គាល់​ភេរវកម្ម​បំផ្ទុះ​គ្រាប់​បែក​នៅ មេនឆេស្ទ័រ

ISIS ប្រកាស​ទទួល​ស្គាល់​ភេរវកម្ម​បំផ្ទុះ​គ្រាប់​បែក​នៅ មេនឆេស្ទ័រ

ក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ពិតជាបានចេញមុខ ប្រកាសសង្គ្រាម​ដោយចំហរ ទល់នឹងក្រុមប្រទេស នៅបស្ចឹមលោក។ នៅក្នុងសេចក្ដីប្រកាសព័ត៌មានមួយ របស់អង្គការភេរវនិយម ដែលត្រូវបានបង្ហោះជាបន្តបន្ទាប់ នៅពាសពេញបណ្ដាញសង្គម បានអះអាងថា «យុទ្ធជនមួយរួប នៃបណ្ដាយុទ្ធជនទាំងឡាយ របស់ទឹកដីព្រះជាម្ចាស់ បានដាក់បំផ្ទុះគ្រាប់បែកមួយគ្រាប់ នៅក្នុងចំណោមហ្វូងមនុស្ស» ក្នុងពេលប្រគុំតន្ត្រីដ៏ធំមួយ កណ្ដាលក្រុង មេនឆេស្ទ័រ (Manchester) នៃចក្រភពអង់គ្លេស។

ក្នុងសេចក្ដីប្រកាសព័ត៌មានដដែល ក្រុមភេរវនិយមបានគម្រាម ពីការវាយប្រហារផ្សេងទៀត តែមិនបានបញ្ជាក់នៅទីណាមួយទេ។ ចំពោះទីភ្នាក់ងារព័ត៌មាន «Amaq» ផ្លូវការរ បស់អង្គការភេរវនិយមនេះវិញ បានអះអាងថា ការវាយប្រហារខាងលើ ត្រូវបានរៀបចំធ្វើ ដោយ«យុទ្ធជនមួយក្រុម» នៃទឹកដីព្រះជាម្ចាស់។

» សេចក្ដីប្រកាសព័ត៌មាន របស់ក្រុមរដ្ឋអ៊ីស្លាម៖

គ្រាប់បែក ដែលមានកម្លាំងដ៏ខ្លាំងមួយ ត្រូវបានបំផ្ទុះ នៅនឹងច្រកចូលមួយ នៃសាលប្រគុំតន្ត្រី «Manchester Arena» នៅខណៈពេលចុងបញ្ចប់ នៃការប្រគុំតន្ត្រី «PoP» របស់តារាចម្រៀងអាមេរិក «Ariana Grande» វ័យ២៣ឆ្នាំ។ សាលដ៏ធំនោះ មានលទ្ធភាពអាចទទួលទស្សនិកជន ឲ្យចូលទស្សនាបានចំនួន ដល់ទៅ ២១ ០០០នាក់។

តុល្យភាពចុងក្រោយ ដែលទើបធ្លាក់មកដល់ បានឲ្យដឹងថា មនុស្ស ២២នាក់ បានស្លាប់ និង៥៩នាក់ បានរងរបួស ក្នុងនោះមានទាំងកុមារច្រើននាក់ផង។

បើតាមនគរបាលអង់គ្លេស បានបញ្ជាក់ថា ភេរវជនអត្តឃាតបានស្លាប់ ក្នុងការបំផ្ទុះគ្រាប់បែក នៅនឹងកន្លែង។ នៅព្រឹកម៉ិញនេះ បុរសម្នាក់អាយុ២៣នាក់ ដែលសង្ស័យជាប់ទាក់ទង នឹងភេរវកម្មនេះ ត្រូវបានឃាត់ខ្លួន។ តុល្យភាពដែលបានឲ្យដឹងខាងលើ បានធ្វើឲ្យភេរវកម្មនេះ ក្លាយជាវិនាសកម្ម ដែលមានចំនួនជនរងគ្រោះច្រើនជាងគេ នៅក្នុងប្រវត្តិសាស្ត្រ នៃចក្រភពអង៉គ្លេស។

ព័ត៌ំមានបន្ថែម នឹងជម្រាបជូន នៅពេលក្រោយ៕

ISIS ប្រកាស​ទទួល​ស្គាល់​ការ​ផ្ទុះ​អាវុធ​កណ្ដាល ប៉ារីស មុន​នេះ

ISIS ប្រកាស​ទទួល​ស្គាល់​ការ​ផ្ទុះ​អាវុធ​កណ្ដាល ប៉ារីស មុន​នេះ

នគរបាលបារាំងម្នាក់ បានស្លាប់ និងពីរនាក់ផ្សេងទៀត បានរងរបួស នៅក្នុងហេតុការណ៍ផ្ទុះអាវុធមួយ កាលពីវេលាម៉ោង ២១យប់ ថ្ងៃព្រហស្បត្តិ៍នេះ​ នៅលើមហាវិថីដ៏ល្បីឈ្មោះ «Champs-Elysées» នៃរដ្ឋធានីប៉ារីស ដែលសម្បូរដោយអ្នកទេសចរណ៍ និងហាងលក់ទំនិញ ដ៏ប្រណិតៗ។ ខ្មាន់កាំភ្លើង ត្រូវបាន«បង្ក្រាប» ដើម្បីការពារខ្លួន ពីសំណាក់កងកម្លាំង នៅនឹងកន្លែង។ នេះ បើតាមការប្រកាសឲ្យដឹង របស់ក្រសួងមហាផ្ទៃបារាំង នៅមុននេះបន្តិច។ ប្រភពពីនគរបាល​យុត្តិធម៌​បារាំង បានអះអាង​បន្ថែមថា ជនខ្មាន់កាំភ្លើងបានស្លាប់ហើយ។

ប្រភពដដែលនោះ បានឲ្យដឹងបន្តថា៖ «ជនបង្ក​បានមកដល់ទីកន្លែង​កើតហេតុ ដោយជិះរថយន្ដ។ នៅពេលចុះពីរថយន្ដ ជននេះបានបើកការបាញ់រះ ទៅលើរថយន្ដនគរបាល ដែលមានដឹកនគរបាល ដោយប្រើកាំភ្លើងស្វ័យប្រវត្តិ បណ្ដាលឲ្យនគរបាលម្នាក់ បានបាត់បង់ជីវិត ហើយបាន​បន្តការបាញ់​សម្រុក ទៅ​លើ​កងកម្លាំង​នគរបាល​ដទៃ​ទៀត មុននឹងត្រូវបានបង្ក្រាប។»។

សង្កាត់ជុំវិញមហាវិថី ត្រូវបានហ៊ំព័ទ្ធ...

សង្កាត់ទាំងមូល ដែលស្ថិតនៅជុំវិញ នៃមហាវិថី «Champs-Elysées» ត្រូវបានហ៊ំព័ទ្ធជុំជិត ដោយកងកម្លាំងនគរបាល និងកងកម្លាំងអន្តរាគមន៍ពិសេស របស់អាជ្ញាធរបារាំង ដែលត្រូវបានបញ្ជូន ទៅដល់ភ្លាមៗ។ សេចក្ដីប្រកាសព័ត៌មាន របស់ក្រសួងមហាផ្ទៃបារាំង បានឲ្យដឹងទៀតថា៖ «ការត្រួតពិនិត្យ កំពុងប្រព្រឹត្តិទៅ ក្នុងនោះ មានទាំងប្រតិបត្តិការ ដោះគ្រាប់បែក ដែលអាជ្ញាធរសង្ស័យថា ទំនងជាមាន​នៅក្នុងរថយន្ដ របស់ខ្មាន់កាំភ្លើង»។ ប្រភពផ្សេងទៀត​​ពីនគរបាល បានអះអាងថា ខ្មាន់កាំភ្លើង​ទំនងជា​មាន​គ្នា​ម្នាក់ទៀត ហើយការតាមប្រម៉ាញ់​ជនម្នាក់នេះ កំពុងធ្វើទៅ យ៉ាងស្វិតស្វាញ។

នេះជាការវាយប្រហារ ដែលបានកើតឡើង នៅបីថ្ងៃមុនការបោះឆ្នោត​ប្រធានាធិបតី​បារាំង ក្នុងថ្ងៃអាទិត្យ ទី២៣ ខែមេសា ខាងមុខនេះ។ ការផ្ទុះអាវុធ បានបង្កឲ្យមានការភ័យរន្ធត់ ជាទូទៅ សម្រាប់បណ្ដាអ្នកទេសចរណ៍ ដែលតែងមកដើរកំសាន្ដ នៅលើមហាវិថីនេះ ដែលពោរពេញ ដោយការតុបតែងរចនា ដោយ​ភ្លើងភ្លឺចិញ្ចាចចិញ្ចែង។ ភោជនីយដ្ឋាន​មួយចំនួន បានជម្លៀស​អតិថិជន​របស់ខ្លួន ទៅលាក់ខ្លួន នៅក្នុងបន្ទប់ក្រោមដី បន្ទាប់ពីបានឮស្នូរ គ្រាប់កាំភ្លើង។

ក្រុមរដ្ឋអ៊ីស្លាម ចេញមុខទទួលស្គាល់...

ការវាយប្រហាវនេះ ក៏មិនចាំបាច់ប្រើពេលច្រើន ដើម្បីដឹង ពីអ្នកទទួលខុសត្រូវនោះដែរ។ នៅប៉ុន្មានម៉ោង​ក្រោយ​ការ​កើត​ហេតុ ទីភ្នាក់ងារ «Amaq» ដែលជាអង្គភាពឃោសនា របស់អង្គការភេរវនិយម រដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) បានចេញមុខ មកប្រកាសទទួល​ស្គាល់ ថា​ជាទង្វើ​របស់ក្រុមខ្លួន និងបានបង្ហាញ ពីអត្តសញ្ញាណ នៃខ្មាន់កាំភ្លើង ថាមានឈ្មោះ «Abu Youssef al Belgiki» មកពីប្រទេសប៊ែលហ្សិក។

ប៉ុន្តែការប្រកាសទទួលស្គាល់នេះ នៅមិនទាន់ត្រូវបានបញ្ជាក់ ដោយអាជ្ញាធរបារាំងនៅឡើយ ខណៈការស៊ើបអង្កេត ទៅលើហេតុការណ៍ខាងលើ ត្រូវបាន​ចាត់​ឲ្យការិយាល័យ​ប្រឆាំង​ភេរវកម្ម នៃរដ្ឋធានីប៉ារីស ជាអ្នកទទួលបន្ទុក៕