Posts tagged as "ISIS"

វាយ​ប្រហារ​មុខ​ព្រះ​វិហារ​កាតូលីក (ប៉ារីស)៖ ជន​សង្ស័យ​ស្រែក​ថា «ដើម្បី​ប្រទេស​ស៊ីរី»

វាយ​ប្រហារ​មុខ​ព្រះ​វិហារ​កាតូលីក (ប៉ារីស)៖ ជន​សង្ស័យ​ស្រែក​ថា «ដើម្បី​ប្រទេស​ស៊ីរី»

រូបភាពនៃការវាយប្រហារ ដោយ«ញញួរ» ត្រូវបានទូរទស្សន៍បារាំង «CNews» ទទួលបាន និងយកមកផ្សាយ នៅមុននេះបន្តិច។ ហេតុការណ៍បានកើតឡើង កាលពីល្ងាចម្សិលម៉ិញ នៅលើទីលានខាងមុខ ព្រះវិហារ​កាតូលីក «Notre-Dame» ដ៏ល្បីល្បាញ នៃរដ្ឋធានីប៉ារីស ដែលសម្បូរពោរពាស ដោយទេសចរណ៍។ ជនសង្ស័យ មានអាយុ ៤០ឆ្នាំ បានប្រកាសដោយខ្លួនឯងថា ជា«យុទ្ធជនម្នាក់ នៃទឹកដីព្រះជាម្ចាស់» ដែលជាភាសាមួយ តែងតែត្រូវបានយកមកប្រើ ដោយបណ្ដាភេរវជន របស់អង្គការភេរវនិយម ក្រុមរដ្ឋអ៊ីស្លាម។

ជនសង្ស័យ ដែលកាន់អត្តសញ្ញាណបណ្ណ ជានិស្សិតមកពីប្រទេសអាល់ហ្សេរី បានស្រែកឡើង នៅពេលធ្វើសកម្មភាពនោះថា «ដើម្បីប្រទេសស៊ីរី»។ នេះ បើតាមការលើកឡើង របស់រដ្ឋមន្ត្រីមហាផ្ទៃបារាំង លោក ហ្សេរ៉ា កូឡំ (Gérard Collomb) បន្ទាប់ពីលោកបានមកដល់ផ្ទាល់ នឹងកន្លែងកើតហេតុ កាលពីយប់ម្សិលម៉ិញ។ លោករដ្ឋមន្ត្រី បានថ្លែងឡើងថា៖ «បើតាមការសង្កេត ជាជំហានដំបូង ជននេះបានធ្វើសកម្មភាព តែម្នាក់ឯង»។

សាក្សីនៅនឹងកន្លែង បានថ្លែងឲ្យដឹងថា ជនសង្ស័យបានដក«ញញួរ»ចេញ ហើយរត់សំដៅ ទៅវាយភ្នាក់ងារនគរបាលម្នាក់ ពីខាងក្រោយខ្នង។ តែភ្នាក់ងារនគរបាលម្នាក់ទៀត បានដកកាំភ្លើងបាញ់តបវិញ បណ្ដាលឲ្យជននេះរបួស ដេកដួលនៅលើដី។ ប្រភពពីអាជ្ញាធរបានបញ្ជាក់ថា ជនសង្ស័យ និងនគរបាលរងគ្រោះ (រងរបួសស្រាល នៅត្រង់ក្បាល) ត្រូវបានបញ្ជូនទៅមន្ទីរពេទ្យ។

ទូរទស្សន៍ «CNews» ដែលមានជំនាញខាងព័ត៌មាន ផ្សាយបន្តផ្ទាល់ បានទទួលបានរូបភាព (ខាងក្រោម) ដែលត្រូវបានថតជាប់ ដោយកាម៉េរ៉ាសុវត្ថិភាព ហើយមិនខុសពីការលើកឡើង របស់សាក្សីខាងលើនោះទេ។ ប៉ុន្តែទិដ្ឋភាពនៃការវាយប្រហារ ដោយ«ញញួរ» មានសភាពហិង្សាខ្លាំង ជាងអ្វីដែលគេគិតមិនដល់។

បើតាមអ្នកនាំពាក្យ​រដ្ឋាភិបាលបារាំង លោក គ្រីស្ដូហ្វ៍ កាស្តាណេ (Christophe Castaner) បានអះអាងថា ជនសង្ស័យមិនត្រូវបានជាប់ នៅក្នុងបញ្ជីនៃក្រុមអ៊ីស្លាមនិយមជ្រុលនោះទេ ហើយគ្រប់ចំណុចទាំងអស់ ដែលអាជ្ញាធរទទួលបាន នៅក្នុងពេលនេះ បានឈានទៅដល់ សេចក្ដីសន្និដ្ឋានមួយថា ជននេះ ទំនងជាធ្វើ«សកម្មភាព ដោយឯកឯង»៕

បង្ក្រាប​ជន​ម្នាក់​ដែល​វាយប្រហារ​លើ​នគរបាល នៅ​មុខព្រះវិហារកាតូលីក នៃរដ្ឋធានីប៉ារីស

បង្ក្រាប​ជន​ម្នាក់​ដែល​វាយប្រហារ​លើ​នគរបាល នៅ​មុខព្រះវិហារកាតូលីក នៃរដ្ឋធានីប៉ារីស

សាក្សីជាច្រើននាក់ បានឃើញបុរសម្នាក់ ដកញញួរចេញ ហើយរត់សំដៅ ទៅវាយលើភ្នាក់ងារនគរបាលមួយរូប នៅលើទីលាន ខាងមុខព្រះវិហារកាតូលីកដ៏ល្បី ឈ្មោះ «Notre-Dame» នៃរដ្ឋធានីប៉ារីស។ បើតាមស្នងការនគរបាលនៃរដ្ឋធានី ប៉ារីស បានបញ្ជាក់បន្ថែមថា បុសរូបនោះ ត្រូវបានជនរងគ្រោះ (ដែលជានគរបាល) ផ្ទុះអាវុធការពារខ្លួន បាញ់សដៅវិញ បណ្ដាលឲ្យរបួសដេកដួល នៅលើដី។

សាក្សីម្នាក់ទៀត បានអះអាង បានឮសូរសម្លេងស្រែកដ៏ខ្លាំងមួយ និងបន្ទាប់មកបានឃើញ​មនុស្សផ្អើលឈូឆរ នៅខាងមុខព្រះវិហារ ដែលសម្បូរទៅដោយទេសចរណ៍ ក្នុងមួយឆ្នាំៗ។ សាក្សីដដែលបានបន្តថា៖ «មនុស្សម្នានាំគ្នាជ្រួលច្របល់ ហើយខ្ញុំបានឭសូរសម្លេងផ្ទុះអាវុធ ចំនួនពីរគ្រាប់ និងបន្ទាប់មក ឃើញបុរសម្នាក់ ដេកដួលនៅលើដី។ ខ្ញុំឃើញមានស្លាកស្នាមឈាម នៅពាសពេញទីកន្លែងនោះ។»។

ប្រភពពីអាជ្ញាធរ បា​នឲ្យដឹងថា ភ្នាក់ងារនគរបាល ដែលរងគ្រោះពីការវាយប្រហារនោះ បានរងរបួសស្រាល។ ស្នងការនគរបាល នៃរដ្ឋធានីប៉ារីស បានស្នើសុំឲ្យបណ្ដាជនទាំងឡាយ បញ្ជៀសការធ្វើដំណើរទៅក្បែរទីនោះ ខណៈសង្កាត់នៅជុំវិញព្រះវិហារទាំងមូល ត្រូវបានឡោមព័ទ្ធជុំជិត ដោយកងកម្លាំងពិសេស បង្ក្រាបភេរវកម្ម និងកងកម្លាំងសង្គ្រោះ។

ការិយាល័យស៊ើបអង្កេត ប្រឆាំងភេរវកម្ម របស់រដ្ឋអាជ្ញានៃសាធារណរដ្ឋ ប្រចាំរដ្ឋធានីប៉ារីស បានប្រកាសថា សំនុំរឿងភេរវនិយមមួយ កំពុងត្រូវបានបើក ដើម្បីធ្វើការស្រាវជ្រាវ និងស៊ើបអង្កេត ទាក់ទងនឹងហេតុការណ៍នេះ។

ហេតុការណ៍វាយប្រហារខាងលើ បានកើតឡើង នៅ៣ថ្ងៃក្រោយការវាយប្រហារ កាលពីយប់ថ្ងៃសៅរ៍កន្លងទៅ នៅរាជធានី ឡុងដ៍ នៃចក្រភពអង់គ្លេស ដែលត្រូវបានអង្គការភេរវនិយម ក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ចេញមុខប្រកាសទទួលស្គាល់ នៅពេលក្រោយមក។ ភេរវកម្មដែលធ្វើឡើង នៅពីរកន្លែងកណ្ដាលរាជធានី ឡុងដ៍ នោះ បានសម្លាប់មនុស្ស៧នាក់ និងធ្វើឲ្យរបួស ច្រើនសិបនាក់ទៀត។

រាប់ចាប់តាំងពីខែមករា ឆ្នាំ២០១៥មក ប្រទេសបារាំង​បានរងអំពើ​ភេរវកម្មជាច្រើន នៅលើទឹកដីរបស់ខ្លួន រាប់ទាំងនៅក្នុងរដ្ឋធានីប៉ារីស ទីក្រុងនីស (Nice - ទីក្រុងមាត់សមុត្រភាគខាងត្បូង) និងតំបន់មួយចំនួនទៀត។ ភេរវកម្មទាំងនោះ បានសម្លាប់មនុស្សសរុបចំនួន ២៣៩នាក់ និងរបួសច្រើនរយនាក់។

ភេរវកម្មចុងក្រោយ (មុនលើកនេះ) បានកើតឡើង កាលពីថ្ងៃទី២០ ខែមេសាកន្លងទៅ នៅលើមហាវិថី «Champs Elysées» ដ៏ល្បីនៃរដ្ឋធានី បង្កឡើងដោយជនម្នាក់ ជាតិបារាំង ដែលបានបើកការបាញ់រះ សម្លាប់ភ្នាក់ងារនគរបាលមួយរូប និងធ្វើឲ្យរបួសភ្នាក់ងារនគរបាលពីររូបទៀត។ ជនម្នាក់នេះ ត្រូវបានកងកម្លាំងអាជ្ញាធរបាញ់សម្លាប់ និងបន្ទាប់មក ត្រូវបានក្រុមរដ្ឋអ៊ីស្លាម ចេញមុខមកទទួលស្គាល់ថា ជា«យុទ្ធជនស្ម័គ្រប្រយុទ្ធ»មួយរូប របស់ខ្លួន៕

ISIS ប្រកាស​ទទួល​ស្គាល់​ភេរវកម្ម​បំផ្ទុះ​គ្រាប់​បែក​នៅ មេនឆេស្ទ័រ

ISIS ប្រកាស​ទទួល​ស្គាល់​ភេរវកម្ម​បំផ្ទុះ​គ្រាប់​បែក​នៅ មេនឆេស្ទ័រ

ក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ពិតជាបានចេញមុខ ប្រកាសសង្គ្រាម​ដោយចំហរ ទល់នឹងក្រុមប្រទេស នៅបស្ចឹមលោក។ នៅក្នុងសេចក្ដីប្រកាសព័ត៌មានមួយ របស់អង្គការភេរវនិយម ដែលត្រូវបានបង្ហោះជាបន្តបន្ទាប់ នៅពាសពេញបណ្ដាញសង្គម បានអះអាងថា «យុទ្ធជនមួយរួប នៃបណ្ដាយុទ្ធជនទាំងឡាយ របស់ទឹកដីព្រះជាម្ចាស់ បានដាក់បំផ្ទុះគ្រាប់បែកមួយគ្រាប់ នៅក្នុងចំណោមហ្វូងមនុស្ស» ក្នុងពេលប្រគុំតន្ត្រីដ៏ធំមួយ កណ្ដាលក្រុង មេនឆេស្ទ័រ (Manchester) នៃចក្រភពអង់គ្លេស។

ក្នុងសេចក្ដីប្រកាសព័ត៌មានដដែល ក្រុមភេរវនិយមបានគម្រាម ពីការវាយប្រហារផ្សេងទៀត តែមិនបានបញ្ជាក់នៅទីណាមួយទេ។ ចំពោះទីភ្នាក់ងារព័ត៌មាន «Amaq» ផ្លូវការរ បស់អង្គការភេរវនិយមនេះវិញ បានអះអាងថា ការវាយប្រហារខាងលើ ត្រូវបានរៀបចំធ្វើ ដោយ«យុទ្ធជនមួយក្រុម» នៃទឹកដីព្រះជាម្ចាស់។

» សេចក្ដីប្រកាសព័ត៌មាន របស់ក្រុមរដ្ឋអ៊ីស្លាម៖

គ្រាប់បែក ដែលមានកម្លាំងដ៏ខ្លាំងមួយ ត្រូវបានបំផ្ទុះ នៅនឹងច្រកចូលមួយ នៃសាលប្រគុំតន្ត្រី «Manchester Arena» នៅខណៈពេលចុងបញ្ចប់ នៃការប្រគុំតន្ត្រី «PoP» របស់តារាចម្រៀងអាមេរិក «Ariana Grande» វ័យ២៣ឆ្នាំ។ សាលដ៏ធំនោះ មានលទ្ធភាពអាចទទួលទស្សនិកជន ឲ្យចូលទស្សនាបានចំនួន ដល់ទៅ ២១ ០០០នាក់។

តុល្យភាពចុងក្រោយ ដែលទើបធ្លាក់មកដល់ បានឲ្យដឹងថា មនុស្ស ២២នាក់ បានស្លាប់ និង៥៩នាក់ បានរងរបួស ក្នុងនោះមានទាំងកុមារច្រើននាក់ផង។

បើតាមនគរបាលអង់គ្លេស បានបញ្ជាក់ថា ភេរវជនអត្តឃាតបានស្លាប់ ក្នុងការបំផ្ទុះគ្រាប់បែក នៅនឹងកន្លែង។ នៅព្រឹកម៉ិញនេះ បុរសម្នាក់អាយុ២៣នាក់ ដែលសង្ស័យជាប់ទាក់ទង នឹងភេរវកម្មនេះ ត្រូវបានឃាត់ខ្លួន។ តុល្យភាពដែលបានឲ្យដឹងខាងលើ បានធ្វើឲ្យភេរវកម្មនេះ ក្លាយជាវិនាសកម្ម ដែលមានចំនួនជនរងគ្រោះច្រើនជាងគេ នៅក្នុងប្រវត្តិសាស្ត្រ នៃចក្រភពអង៉គ្លេស។

ព័ត៌ំមានបន្ថែម នឹងជម្រាបជូន នៅពេលក្រោយ៕

ទេ ​លោក​​មេទ័ព! ក្នុង​​ប្រទេស​​អ៊ីរ៉ាក់ គ្មាន​​«បដិវត្តន៍​​ពណ៌»​​ទេ!

ទេ ​លោក​​មេទ័ព! ក្នុង​​ប្រទេស​​អ៊ីរ៉ាក់ គ្មាន​​«បដិវត្តន៍​​ពណ៌»​​ទេ!

ថ្លែងក្នុងពិធីត្រួតពិនិត្យកម្លាំង និងមធ្យោបាយគ្រឿងបំពាក់ សម្ភារៈរបស់កងពលតូចថ្មើរជើងលេខ៧០ កាល​ពី​ម្សិល​ម៉ិញ អគ្គមេបញ្ជាការកងយោធពលខេមរភូមិន្ទ លោក​នាយឧត្តមសេនីយ៍ ប៉ុល សារឿន បាន​ប្រកាស​ឲ្យ​កង​ទ័ព ត្រូវ​ប្រឆាំង​ដាច់​ខាត នូវ​«បដិវត្តន៍ពណ៌» មិនឱ្យកើតមាន នៅលើទឹកដីកម្ពុជានោះឡើយ។ នៅ​ក្នុង​ការ​ថ្លែង​ដដែល​នោះ លោកមេទ័ពថែមទាំងបានពន្យល់ថា បដិវត្តន៏ពណ៌ បានបំផ្លាញ​ប្រទេស​ជាច្រើន ដែល​កំពុង​ទទួល​រង នូវ​មហន្តរាយ ដូច​ជា ប្រទេសអ៊ីរ៉ាក់ ស៊ីរី និង​ប្រទេស​ជាច្រើន​ទៀត។

តែការសិក្សាពីប្រវត្តិសាស្ត្រ ទាក់ទងនឹងការធ្វើបដិវត្តន៍ពណ៌ មិនបង្ហាញដូចការលើកឡើង របស់លោក ប៉ុល សារឿន នោះទេ។

អ្វីទៅបដិវត្តន៍ពណ៌?

«បដិវត្តន៍»ណាក៏ដោយ សុទ្ធតែមាន​លក្ខណៈ​​​ជា​ការ​ងើបឈរ​ឡើង ពីសំណាក់​​ប្រជាពលរដ្ឋ​នៅក្នុង​ប្រទេស​នោះ ដើម្បីផ្ដួល​រំលំ​មេដឹកនាំ​ផ្ដាច់ការ កាន់​អំណាច​​ដុះ​ស្លែ ដែល​យក​​ប្រទេស​​ជាតិ ទឹកដី និងប្រជាជន​ទាំង​មូល ជា​ទ្រព្យ​ផ្ទាល់​ខ្លួន ឬជារបស់​គ្នីគ្នា​​បក្ខពួក​​របស់​ខ្លួន ថ្វីត្បិតតែមេដឹកនាំនោះ កើតចេញពីរដ្ឋាភិបាល ស្របច្បាប់ ឬ​បែប​ណា​ក៏​ដោយ។

ដោយឡែក សម្រាប់ពាក្យ «បដិវត្តន៍ពណ៌» ពីរបីម៉ាត់នេះ តែងត្រូវបាន​លោក​នាយក​រដ្ឋមន្ត្រី ហ៊ុន សែន និង​សមាជិក​រដ្ឋាភិបាល​របស់​លោក យកមកប្រើ​ជាញឹកញាប់​ណាស់​ ដើម្បីរំលឹក​ទៅដល់​បដិវត្តន៍ នៅក្នុង​ប្រទេសលីប៊ី ស៊ីរី ឬ​ប្រទេស​មួយ​ចំនួន​ទៀត។ តែក្រុមប្រទេសទាំងនោះ មិនបានធ្វើបដិវត្តន៍ពណ៌ទេ តែ​ជាការធ្វើ​​បដិវត្តន៍​ផ្កា​ម្លឹះ ឬ​បដិវត្តន៍​​ នៃរដូវផ្ការីក​អារ៉ាប់ (Arab Spring) នៅប៉ុន្មានឆ្នាំចុង​ក្រោយ​នេះ។

ពាក្យ«បដិវត្តន៍ពណ៌» របស់រដ្ឋាភិបាលរបស់លោក ហ៊ុន សែន ទំនង​ជាចង់​សំដៅ​ ទៅ​បដិវត្តន៍​មួយ​​បែប​​ទៀត (Colour revolution) ដែលបាន​កើត​ឡើង នៅបណ្ដាប្រទេសអ៊ឺរ៉ុបខាងកើត ឬប្រទេស​អាស៊ី​​ខាង​លិច ដោយ​​មាន​​ការ​ជួយ​គាំទ្រ ពីសំណាក់​បស្ចឹម​លោក។ ផ្ទុយទៅវិញ ក្រុមប្រទេស​​ដែលបានធ្វើ​​បដិវត្តន៍​ពណ៌​ទាំងនោះ មិន​មាន​សង្គ្រាម​រាំងជល់​​ខ្ទេចខ្ទាំ​អ្វីឡើយ ដែល​ខុស​​ពីក្រុម​ប្រទេស​មួយចំនួន ដែលបាន​ធ្វើបដិវត្តន៍​ផ្កាម្លឹះ ខណៈ​ប្រទេស​ទុយនេស៊ី កំពុងស្ថិត​ក្នុង​ជំហាន​ទៅ​មុខ បន្ទាប់ពី​ធ្វើ​បដិវត្តន៍​ផ្កាម្លឹះ​មុន​គេ ទម្លាក់​ប្រធានាធិបតី​ផ្ដាច់ការ របស់​ខ្លួន​រួច។

ចុះប្រទេសអ៊ីរ៉ាក់?

ប្រទេសអ៊ីរ៉ាក់ ដែលរងគ្រោះ​ព្រោះសង្គ្រាម និងជម្លោះនយោបាយ ក្នុងពេលកន្លងមក គ្មានប្រវត្តិ​នៃការធ្វើ​បដិវត្តន៍​ពណ៌ ឬបដិវត្តន៍​ផ្កាម្លឹះ​ទេ។

ប៉ុន្តែគេត្រូវនិយាយថា ប្រទេសនេះមានសង្គ្រាម ជាមួយនឹងប្រទេសអ៊ីរ៉ង់ នៅជាប់​ព្រំដែន សឹងតែពេញ​មួយ​ទសវត្សន៍​ឆ្នាំ​៨០ មុននឹងលើកទ័ព​ចូលឈ្លានពាន ប្រទេស​កូវែត នៅដើមទសវត្សន៍ឆ្នាំ៩០ បង្កឲ្យមានប្រតិកម្ម​យោធា ពី​កងទ័ព​សម្ព័ន្ធមិត្ត ដឹកនាំ​ដោយ​សហរដ្ឋ​អាមេរិក (ក្រោមភ្លើងខៀវ របស់អង្គការសហប្រជាជាតិ)។

បន្ទាប់មកនៅចុងខែមីនា ឆ្នាំ២០០៣ ប្រទេសនេះ​ត្រូវបានវាយ​ប្រហារ​ជាថ្មី ពីសំណាក់​កងទ័ព​អាមេរិក និង​ក្រុម​សម្ព័ន្ធមិត្ត​មួយ​ចំនួន​តូច ក្រោមប្រតិបត្តិការ​យោធា​ដ៏ធំមួយ ដាក់ឈ្មោះ​ថា «រំដោះ​ប្រជាជន​​អ៊ីរ៉ាក់»។ សង្គ្រាម​មួយ​នេះ បាន​បញ្ចប់​ជាផ្លូវ​ការ នៅដើម​ខែឧសភា ឆ្នាំ​ដដែល ពោល​គឺសង្គ្រាម​នោះ មានរយៈពេល​ប្រមាណ​តែ​ជាង ២ខែ​ប៉ុណ្ណោះ។

សហរដ្ឋអាមេរិក បានលើកពីមូលហេតុ​មួយចំនួន ក្នុងការវាយលុក ចូលក្នុង​រដ្ឋអធិបតេយ្យ​នេះ ដូចជា ប្រឆាំង​ភេរវកម្ម កំទេច​អាវុធ​​ប្រល័យ​​លោក (Weapon of mass destruction) និងចាប់ខ្លួន​ប្រធានាធិបតីផ្ដាច់ការ លោក សាដាម ហ៊ូសេន (Saddam Hussein) ដើម្បី​ផ្ដល់​ជូន​ទៅ​ប្រជាជនអ៊ីរ៉ាក់ នូវលិទ្ធិ​ប្រជាធិបតេយ្យ​ជាដើម។ ប៉ុន្តែ​មូលហេតុ​ខាង​លើ ត្រូវ​បាន​ច្រាន​ចោល ដោយ​ប្រទេស​សម្ព័ន្ធមិត្ត​របស់​អាមេរិក​មួយ​ចំនួន រួម​នឹង​សាធារណមតិ​អាមេរិក​ខ្លួន​ឯង​ផង និង​បន្ទាប់​មក​ត្រូវ​បាន​រក​ឃើញថា ជាការប្រឌិតឡើង ដើម្បីមាន​«លេស» ក្នុងការវាយលុក​ចូលប្រទេសអ៊ីរ៉ាក់។

» សូមអានអត្ថបទបន្ថែម ជាភាសាអង់គ្លេស របស់គេហទំព័រវីគីផេឌៀរ ដែលនិយាយយ៉ាងលំអិត ពីប្រវត្តិប្រទេសអ៊ីរ៉ាក់

យ៉ាងណា​ក៏ដោយ មកដល់ថ្ងៃនេះ ប្រទេសអ៊ីរ៉ាក់ មានរដ្ឋាភិបាល​ប្រជាធិបតេយ្យ ដែលចេញ​ពីការ​បោះ​ឆ្នោត ​និង​កំពុង​ដឹកនាំ​ការប្រយុទ្ធ ប្រឆាំងនឹង​ក្រុម​ភេរវនិយម រដ្ឋអ៊ីស្លាម នៅភាគខាងជើង​ប្រទេស ដោយ​ដណ្ដើម​យក​ទឹកដី មកកាន់កាប់វិញ​បាន​ជាបណ្ដើរៗ។ ជាពិសេស​បំផុតនោះ គឺប្រទេស​អ៊ីរ៉ាក់ គ្មាន​ប្រវត្តិនៃការធ្វើ​បដិវត្តន៍​​ពណ៌ ឬ​បដិវត្តន៍​ផ្កា​ម្លឹះ​ទេ៕​

អង្គរក្ស​​ប្រធានាធិបតី​​តួកគី​​បញ្ចេញ​​ក្បាច់​​គុន នៅ​វ៉ាស៊ីនតោន

អង្គរក្ស​​ប្រធានាធិបតី​​តួកគី​​បញ្ចេញ​​ក្បាច់​​គុន នៅ​វ៉ាស៊ីនតោន

រូបភាពនៅក្នុងវីដេអូ អាចបង្កការប៉ះពាល់ ទៅដល់អារម្មណ៍អ្នកទស្សនា។ ហេតុការណ៍ នៃអំពើហិង្សា បានកើតឡើង កាលពីថ្ងៃអង្គារទី ១៦ ខែឧសភានេះ រវាងក្រុមបាតុករ ដែលមានដើមកំណើត គួដ និងកងរក្សាសន្តិសុខ របស់ប្រធានាធិបតី តួកគី នៅខាងមុខលំនៅដ្ឋាន របស់ឯកអគ្គរដ្ឋទូត តួកគី ប្រចាំនៅរដ្ឋធានី វ៉ាស៊ីនតោន សហរដ្ឋអាមេរិក។

លោក «Recep Tayyip Erdogan» និងលោក ដូណាល់ ត្រាំ (Donald Trump) បានជួបគ្នាជាលើកដំបូង បន្ទាប់ពីលោក ត្រាំ បានចូលកាន់តំណែង ជាប្រធានាធិបតីអាមេរិក។ ជំនួបនេះ មានបំណងដើម្បីកាត់បន្ថយភាពតានតឹង ដែលបានកើតឡើង តាំងពីច្រើនថ្ងៃមកហើយ ជុំវិញការបំពាក់អាវុធ ពីសំណាក់ក្រុង វ៉ាស៊ីនតោន ទៅឲ្យក្រុមយុទ្ធជនជាតិ គួដ ដែលកំពុងវាយប្រយុទ្ធ ប្រឆាំងនឹងក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ក្នុងប្រទេសស៊ីរី។

ជាលទ្ធផល បាតុករ៩នាក់ ត្រូវបានដឹកបញ្ជូន ទៅកាន់មន្ទីរពេទ្យ ក្នុងនោះ បាតុករម្នាក់ បានស្ថិតក្នុងសភាពធ្ងន់ធ្ងរ។ នេះ បើតាមទិន្នន័យ ដែលផ្ដល់ដោយក្រុមអ្នកជួយសង្គ្រោះ។ ក្នុងពេលភ្លាមៗ កម្លាំងនគរបាល បានគ្រប់គ្រងស្ថានការណ៍បានវិញ ហើយបានចាប់ខ្លួនមនុស្សពីរនាក់ ពីក្នុងហេតុការណ៍​ខាងលើ។

សាក្សីនៅនឹងកន្លែង បាននិយាយថា គឺក្រុមអង្គរក្ស ថែរក្សាសន្តិសុខឲ្យប្រធានាធិបតី តួកគី ជាអ្នកបញ្ចេញ «ក្បាច់គុណ រន្ទះដៃជើងឥតមេត្តា» ទៅលើក្រុមបាតុករ ដែលបានមកប្រមូលផ្ដុំគ្នា នៅទីនោះ ដើម្បីបញ្ចេញសម្លេងទាមទារ របស់ពួកគេ។ ភស្ដុតាងជាវីដេអូមួយចំនួន ដូចខាងក្រោម៖