យុទ្ធនាការអាវខ្មៅ៖ មេដឹកនាំសង្គមស៊ីវិល២នាក់ និងស្ត្រីសកម្មជន៤នាក់ ត្រូវបានចាប់ខ្លួន
មើលទៅ រដ្ឋាភិបាលកម្ពុជាទំនងជាកំពុងប្រើកណ្ដាប់ដៃដែក កាន់តែខ្លាំងឡើងហើយ។ ក្នុងព្រឹកថ្ងៃទី៩ ខែឧសភា ឆ្នាំ២០១៦នេះ ដែលជាថ្ងៃទីមួយ នៃយុទ្ធនាការ«ថ្ងៃចន្ទ ពណ៌ខ្មៅ» មន្ត្រីមេដឹកនាំអង្គការសង្គមស៊ីវិល ចំនួនពីរនាក់ និងស្ត្រីសកម្មជនខាងសិទ្ធិលំនៅដ្ឋាន ចំនួន៤នាក់ ត្រូវបានអាជ្ញាធរចាប់ខ្លួន និងបញ្ជូនទៅធ្វើការសាកសួរ។
មន្ត្រីមេដឹកនាំអង្គការសង្គមស៊ីវិលនោះ គឺលោក អ៊ី សារ៉ុម នាយកប្រតិបត្តិសមាគមធាងត្នោត និងលោក ថាវ គឹមសាន នាយករងទទួលបន្ទុកផ្នែកតស៊ូមតិ របស់អង្គការការពារសិទ្ធិមនុស្ស លីកាដូ។ ស្ត្រីសកម្មជនខាងសិទ្ធលំនៅដ្ឋានទាំង៤នាក់ មានម្នាក់ គឺអ្នកស្រី ស ស៊ន មកពីសហគមន៍បូរីកីឡា និងបីនាក់ មានអ្នកស្រី បូវ សោភា អ្នកស្រី គង់ ចន្ថា និងកញ្ញា សុង ស្រីលាភ មកពីសហគមន៍បឹងកក់។
លោក សារុំ លោក គឹមសាន និងអ្នកស្រី ស ស៊ន ត្រូវបានអាជ្ញាធរខណ្ឌដង្កោចាប់ខ្លួន នៅវេលាម៉ោង៨ និង២០នាទី [...]
