Posts tagged as "Hosni Moubarak"

រដ្ឋ​ប្រហារ​នៅ​អេហ្សីប៖ ការ​ជួប​ប្រយុទ្ធ​គ្នា​ធ្វើ​ឲ្យ​ស្លាប់​៣០​នាក់

រដ្ឋ​ប្រហារ​នៅ​អេហ្សីប៖ ការ​ជួប​ប្រយុទ្ធ​គ្នា​ធ្វើ​ឲ្យ​ស្លាប់​៣០​នាក់

ក្រុមនិយមឥស្លាម បានងើបឡើងតបតរវិញនៅថ្ងៃសុក្រទី៥ខែកក្កដានេះ ប្រឆាំងនឹងរដ្ឋប្រហារយោធា ទម្លាក់ប្រធានាធិបតី​ជាប់ឆ្នោត លោកមហាមេដ ម៉ូស្សី (Mohamed Morsi) ខណៈមនុស្សរាប់ពាន់នាក់ ដែលមានសមានចិត្តនឹង​ប្រធានាធិបតី​ម៉ូស្សី នៅកំពុងធ្វើបាតុកម្មនៅកណ្ដាលទីក្រុងកែរ ដើម្បីសុំឲ្យប្រធានាធិបតីរូបនេះត្រឡប់មកកាន់អំណាចវិញ។


អំពើហឹង្សាបានផ្ទុះឡើងខ្លាំង នៅពេលមានការប្រឈមរវាងពួកអ្នកស្រប និងអ្នកប្រឆាំង។ (រូបថត EPA)

ក្រុមអ្នកស្និតនឹងលោកម៉ូស្សី បានវាយបកលើក្រុមអ្នកប្រឆាំងនឹងប្រធានាធិបតីម៉ូស្សី ដែលស្ថិតនៅលើទីលានតារៀរ (Tahrir) តាំងពីច្រើនថ្ងៃមកហើយ។ ការប៉ះទង្គិចគ្នារវាងក្រុមទាំងពីរ បានកើតឡើងនៅយប់ថ្ងៃសុក្រនេះ និងបាន​ជម្រុញ​ឲ្យកងទ័ពបញ្ជូនរថក្រោះ និងរថយន្ដពាសដែកជាច្រើន ទៅកាន់ទីប្រឈមគ្នានោះ ដើម្បីបណ្ដេញក្រុមអ្នកស្និតនឹង​ប្រធានាធិបតី។

ភាពរន្ធត់ញាប់ញ័រនៃការប៉ះទង្គិចគ្នានេះ បានបង្កឲ្យមានមនុស្សស្លាប់យ៉ាងហោច ៣០នាក់ និង២១០នាក់ផ្សេងទៀត​រង​របួស នៅពេញផ្ទៃប្រទេសអេហ្សីប។ ក្រុមនិយមឥស្លាមបានបើកការវាយលុកទៅលើអាគាររដ្ឋាភិបាលជាច្រើន និងបាន​ស្បថថានឹងផ្ដួលរំលំការសម្រេចចិត្តរបស់កងទ័ព ព្រមទាំងដាក់មកវិញនូវប្រធានាធិបតីជាប់ឆ្នោត តាមលិទ្ធិ​ប្រជាធិបតេយ្យ​នេះមកវិញ។ ជនរងគ្រោះបួននាក់បានស្លាប់បាត់បង់ជីវិត ដោយសារកងទ័ពបានផ្ទុះអាវុធ ខណៈពេលដែលពួកស្និត​នឹង​ប្រធានាធិបតី បានព្យាយាមដើរចូលទៅក្នុង សង្កាត់កងកម្លាំងរក្សាសន្តិសុខសារធារណរដ្ឋ។

នៅក្នុងការបង្ហាញខ្លួន ជាលើកដំបូងតាំងពីរដ្ឋប្រហារនោះមក មគ្គុទេសនៃក្រុមបងប្អូនម៉ូស្លីម បានសន្យានឹងដាក់​ប្រធានាធិបតីមកក្នុងអំណាចវិញ។ ថ្លែងក្នុងសុន្ទរកថាមួយនៅពីមុខព្រះវិហារឥស្លាម ក្នុងទីក្រុងកែរ លោក មហាមេដ បាឌី (Mohammed Badie) បានប្រកាសថា ព្រះបានយល់ព្រមជ័យជំនះទៅឲ្យលោកម៉ូស្សី និងបានដឹកដៃលោកឲ្យ​ឆ្ពោះទៅ​កាន់​វិមានប្រធានាធិបតី។ លោកបាឌី បានបន្ថែមថា អ្នកស្មោះស្ម័គ្រនិងលោកសុទ្ធសឹងជាទាហានរបស់លោក ហើយពួកគេនឹង​ប្ដូរជីវិតការពារលោក។

តែស្ថានការណ៍ដែលគេពិបាកនឹងជឿ នៅជុំវិញសម្ដីរបស់លោក បាឌី។ កងកម្លាំងការពារសន្តិសុខបានអះអាង​មុននេះ​បន្តិចថា បានចាប់ខ្លួនមេដឹកនាំជាន់ខ្ពស់នៃក្រុមបងប្អូនម៉ូស្លីម យ៉ាងហោចណាស់ប្រាំនាក់ ក្នុងនោះមានលោកបាឌីផងដែរ ពីក្នុងភូមិមួយនៅជាប់សមុទ្រមេឌីទែរ៉ានេ និងបានបញ្ជូនពួកគេតាមយន្ដហោះ ទៅកាន់ទីក្រុងកែររួចហើយ។

នៅមុនសុន្ទរកថាតែប៉ុន្មាននាទីប៉ុណ្ណោះ គណបក្សដែលជាបក្សពួករបស់ក្រុមបងប្អូនម៉ូស្លីម បានឲ្យដឹងនៅលើ​គេហទំព័រ​របស់ខ្លួនថា លោកមហាមេដ បាឌីត្រូវបានដោះលែងវិញហើយ។ ផ្ទុយទៅវិញនៅពេលធ្វើសុន្ទរកថា លោកបាឌី បាន​បញ្ជាក់ថា មិនដែលត្រូវបានចាប់ខ្លួនម្ដងណាឡើយ។ ចំណែកអាជ្ញាធរវិញ ក៏មិនបានបញ្ជាក់អ្វីឲ្យច្បាស់លើបញ្ហានេះដែរ។

បន្ទាប់ពីសុន្ទរកថានវភ្លាម ក្រុមនិយមឥស្លាមជាច្រើននាក់ បានសម្រុកឆ្លងស្ពាន «៦តុលា» ដែលនៅពីលើទន្លេនីល ហើយ​ធ្វើដំណើរទៅកាន់ទីលានតារៀរ ដែលពេញប្រៀបដោយក្រុមអ្នកប្រឆាំងនឹងលោកប្រធានាធិបតី។ បន្ទាប់មកទាំងក្រុមអ្នក​ប្រឆាំងនិងអ្នកស្រប បានចាប់ផ្ដើមប្រយុទ្ធគ្នា នៅជិតអាគារនៃស្ថានីយទូរទស្សន៍ជាតិ ដោយប្រើកាំភ្លើង និងដុំថ្ម។

កងទ័ពដែលស្ថិតនៅស្ពានមួយទៀត ដើម្បីឃាំងមិនឲ្យមានការឆ្លងកាត់ បានដាក់ពង្រាយរថយន្ដពាសដែក និងរថក្រោះ​ជាច្រើនគ្រឿងផ្សេងទៀត ដើម្បីបណ្ដេញក្រុមអ្នកស្មោះស្ម័គ្រនឹងលោកម៉ូស្សី។

ក្រុមនិយមឥស្លាមបានស្បថថា នឹងបង្ហាញឲ្យកងទ័ពឃើញពីកំហុសមួយដ៏ធំ ដែលបានដកលោកម៉ូស្សី​ពីអំណាច​កាល​ពី​ថ្ងៃពុធទី០៣ខែកក្កដា។ សូមបញ្ជាក់ថា អ្នកប្រឆាំងនឹងលោកម៉ូស្សី បានធ្វើបាតុកម្មចុះនៅតាមដងផ្លូវ និងជួបប្រជុំគ្នា​នៅ​លើទីលានតារៀរ តាំងពីច្រើនថ្ងៃមកហើយ ដើម្បីទាមទារឲ្យលោកម៉ូស្សីចាកចេញពីតំណែង តែលោកម៉ូស្សីខ្លួនឯងបាន​បដិសេធនៅយប់ថ្ងៃអង្គារ៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី០៥ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

វិភាគ​ពី​រដ្ឋ​ប្រហារ​នៅ​អេហ្សីប៖ មូលហេតុ និង​ជំហាន​ទៅ​រក​សង្គ្រាម​ស៊ីវិល

វិភាគ​ពី​រដ្ឋ​ប្រហារ​នៅ​អេហ្សីប៖ មូលហេតុ និង​ជំហាន​ទៅ​រក​សង្គ្រាម​ស៊ីវិល

កណ្ដាប់ដៃដែករបស់កងទ័ព ដែលបានទម្លាក់លោកប្រធានាធិបតីជាប់ឆ្នោត មហាមេដ ម៉ូស្សី (Mohamed Morsi) ពីអំណាច​កាលពីថ្ងៃពុធទី០៣ខែកក្កដា បានផ្លាស់ប្ដូរទិដ្ឋភាពនយោបាយទាំងស្រុងនៃប្រទេសអេហ្សីប ហើយអាចនឹងឈានទៅរក​ការកើតឡើងវិញ នូវអំពើហឹង្សាជាថ្មីនោះទៀតផង។ មនោរម្យព័ងអាំងហ្វូ សូមធ្វើការបកស្រាយជូន ជុំវិញបញ្ហានេះ។


ក្រុមអ្នកប្រឆាំងនឹងលោក មហាមេដ ម៉ូស្សី។ (រូបថត GIANLUIGI GUERCIA / AFP)

ហេតុអ្វីបានជាកងទ័ពចូលធ្វើអន្តរាគមន៍?

នៅចំពោះមុខកណ្ដាប់ដៃដែក របស់លោកប្រធានាធិបតី មហាមេដ ម៉ូស្សី និងក្រុមអ្នកប្រឆាំងដែលទាមទារឲ្យ​លោកម៉ូស្សី​ចាកចេញ កងទ័ពនៃប្រទេសអេហ្សីប បានធ្វើការសម្រេចចិត្តកាលពីថ្ងៃច័ន្ទ ផ្អៀកទៅរកក្រុមអ្នកប្រឆាំង ដោយកំណត់​ឱសានវាទ ឲ្យប្រធានាធិបតីម៉ូស្សីជួបជជែកគ្នា ក្នុងរយៈពេល៤៨ម៉ោង ដើម្បីបំពេញចិត្តប្រជាជន។ ប៉ុន្តែការសម្រេចចិត្ត​របស់កងទ័ពនេះ មានគោលដៅចង់ការពារប្រយោជន៍របស់ខ្លួនច្រើនជាង។ ព្រោះលោក មហាមេដ ម៉ូស្សី ជាប្រធានាធិបតី​ស៊ីវិល លើកដំបូងគេបង្អស់របស់ប្រទេស បន្ទាប់ពីការរំលំរបបរាជានិយមអេហ្សីប ក្នុងឆ្នាំ១៩៥២ ហើយបានដកសិទ្ធិរបស់​ពួកកងទ័ព ចេញពីឆាកនយោបាយ។

ជាការដកហូតសិទ្ធមួយ ដែលពួកកងទ័ពដ៏មានឥទ្ធិពលទាំងក្នុងនយោបាយ និងសេដ្ឋកិច្ច ពិបាកនឹងទ្រាំទ្រ។​ ជាមួយនឹង​សកម្មភាពនេះ កងទ័ពចង់បង្ហាញទៅដល់ក្រុមបងប្អូនម៉ូស្លីម ដែលជាក្រុមរបស់ប្រធានាធិបតី ថាពួកខ្លួននៅតែមាន​តួនាទី​សំខាន់ ក្នុងការដឹកនាំប្រទេស។ បើទោះជារដ្ឋប្រហារនេះ ត្រូវបានបាតុករជាច្រើនអបអរសាទរក៏ដោយ ប៉ុន្តែសម្រាប់អ្នក​វិភាគស្ថានការណ៍នៅអេហ្សីប សកម្មភាពរបស់យោធាបានបង្កឲ្យមានមន្ទិល និងការព្រួយបារម្ភជាច្រើន។

តើអ្នកណាជាមេដឹកនាំអេហ្សីប ក្នុងពេលបច្ចុប្បន្ន?

បន្ទាប់ពីដកលោក ម៉ូស្សីពីអំណាចជាប្រធានាធិបតី កងទ័ពបានប្រកាសនៅថ្ងៃពុធ ពីការផ្ទេរអំណាចនយោបាយទៅឲ្យ​ប្រធានក្រុមប្រឹក្សាធម្មនុញ្ញ លោក អាដលី ម៉ានសួរ (Adly Mansour) រហូតដល់ការបោះឆ្នោតជ្រើសរើសប្រធានាធិបតី​មុនកាលកំណត់មួយ ត្រូវបានធ្វើ ប៉ុន្តែមិនបានកំណត់ពេលវេលានៅពេលណានៅឡើយ។ ដូច្នេះលោកអាដលី ម៉ានសួរ បានក្លាយជាប្រធានាធិបតីបណ្ដោះអាសន្ននៃប្រទេសអេហ្សីប កាលពីថ្ងៃព្រហស្បត្តិកន្លងទៅ។

លោកម៉ានសួរ ដែលជាចៅក្រមមួយរូបផងនេះ នឹងធានានូវប្រយោជន៍របស់ប្រជាជនអេហ្សីប។ ប៉ុន្តែក្រមប្រតិបត្តិ ដែល​ត្រូវបានតាក់តែងឡើងដោយយោធា សម្រាប់ការរៀបចំរបត់នយោបាយរបស់អេហ្សីប ទំនងជាត្រូវបានទទួល​ជជែក​ពិភាក្សាយ៉ាងតឹងតែង ជាមួយក្រុមប្រឆាំង និងមេដឹកនាំសាសនានានា ក្នុងប្រទេស។

តើនឹងអាចមានសង្គ្រាមស៊ីវិលដែរទេ?

ជារឿងដ៏អាក្រក់មួយ ដែលនឹងអាចកើតមាន បើប្រៀបធៀបនឹងប្រទេសអាល់ហ្សេរី ក្នុងឆ្នាំ១៩៩០ ដែលមានរដ្ឋប្រហារមួយ ត្រូវបានធ្វើដើម្បីដាក់បញ្ចប់នូវនិតិវិធីបោះឆ្នោត និងលប់ចោលនូវជ័យជំនះគណបក្សនិយមឥស្លាមមួយ។ សង្គ្រាម​ស៊ីវិល​ក្នុងប្រទេសអាល់ហ្សេរី បានសម្លាប់មនុស្សប្រមាណជា ២០០ ០០០នាក់។

ប៉ុន្តែរឿងដ៏អាក្រក់នេះ ទំនងជាមិនទាន់មាននរណាម្នាក់ គិតដល់នៅឡើយ សម្រាប់ប្រទេសអេហ្សីបក្នុងពេលនេះ ព្រោះថា គ្រប់ភាគីទាំងអស់មិនបានមើលឃើញពីហេតុផល ដែលឈានទៅរកសង្គ្រាមនោះឡើយ។ តែគេត្រូវរងចាំមើល ប្រតិកម្ម​តបរបស់ក្រុមបងប្អូនម៉ូស្លីម ដែលជាកម្លាំងនយោបាយដ៏សំខាន់មួយនៅក្នុងប្រទេស នោះជាមុនសិន។

ក្រុមបងប្អូនម៉ូស្លីម ដែលជាប្រភពដើមនៃប្រធានាធិបតី ម៉ូស្សី នេះ មកទល់នឹងបច្ចុប្បន្ន បានអំពាវនាវ​ឲ្យ​ប្រជាពលរដ្ឋ​អេហ្សីប ងើបប្រឆាំងនឹងរដ្ឋប្រហារនេះ ដោយ«អហឹង្សា» ដូចពួកខ្លួនកំពុងតែធ្វើ និងមានគម្រោងនឹងធ្វើ។ ប៉ុន្តែការឃុំខ្លួន និងការតាមប្រម៉ាញ់តាមចាប់ខ្លួន សមាជិកសំខាន់ៗនៃចលនានិយមឥស្លាមនេះ ពីសំណាក់កងទ័ព ទំនងជាអាច​ចាក់​«សាំង»បន្ថែមពីលើភ្លើង។ ដីការតាមចាប់ខ្លួន ប្រមាណជា៣០០ដីការ បានចេញដោយអាជ្ញាធរ ដើម្បីស្វែងរកចាប់ខ្លួន​ក្រុមបងប្អូនម៉ូស្លីម។

មានបណ្ដាជនរងគ្រោះចំនួន៥៧នាក់រួចមកហើយ រាប់តាំងពីថ្ងៃទី២៦ខែមិថុនាមកនេះ ក្នុងនោះ១០នាក់បានស្លាប់ នៅក្នុង​ការប្រឈមមុខគ្នារវាងកងកម្លាំងការពារសុវត្ថិភាព ជាមួយបាតុករ និងរវាងអ្នកគាំទ្រជាមួយអ្នកប្រឆាំង​លោកប្រធានាធិបតី​ម៉ូស្សី កាលពីយប់ថ្ងៃពុធទី០៣ខែកក្កដា៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី០៤ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

រដ្ឋ​ប្រហារ​នៅ​អេហ្សីប៖ ប្រធានាធិបតី​ជាប់​ឆ្នោត​និង​បក្សពួក ត្រូវ​បាន​ឃាត់​ខ្លួន

រដ្ឋ​ប្រហារ​នៅ​អេហ្សីប៖ ប្រធានាធិបតី​ជាប់​ឆ្នោត​និង​បក្សពួក ត្រូវ​បាន​ឃាត់​ខ្លួន

ប្រធានាធិបតីជាប់ឆ្នោតថ្មី នៃប្រទេសអេហ្សីប មហាមេដ ម៉ូស្សី (Mohamed Morsi) ត្រូវបានផ្ដួលរំលំដោយកងទ័ពនៅ​ថ្ងៃ​ពុធ និងត្រូវបានដឹកមកឃុំខ្លួន នៅថ្ងៃព្រហស្បត្តិទី០៤ខែកក្កដានេះ ក្នុងក្រសួងការពារជាតិរបស់ប្រទេស។ បក្សពួក​មួយ​ចំនួនរបស់លោកប្រធានាធិបតី កំពុងជាប់ឃុំនៅក្នុងអាគាររបស់កងទ័ព និងមួយចំនួនទៀត កំពុងត្រូវបានគេស្វែងរក​ចាប់​ខ្លួន។


ក្រុមអ្នកប្រឆាំងនឹងលោក ម៉ូស្សី។ (រូបថត Spencer Platt/Getty)

ប្រធានាធិបតីជាប់ឆ្នោតទីមួយ បន្ទាប់ពីរបបផ្ដាច់ការមុនត្រូវបានរំលំ ដោយកម្លាំងប្រជាជននោះមក ត្រូវបានចាប់ឃាត់ខ្លួន នៅក្នុងវិធានការពង្រឹកសន្តិសុខមួយ ដែលបានរឹតបន្តឹងតែប៉ុន្មានម៉ោងប៉ុណ្ណោះ ដាក់ទៅលើក្រុមបងប្អូនម៉ូស្លីម (Frères musulmans)។ ប្រធានាធិបតីរូបនេះ មានប្រភពចេញពីក្រុមបងប្អូនម៉ូស្លីម (កាន់សាសនាឥស្លាមនិយមតឹង) នេះ ដែលជា​កម្លាំងនយោបាយមួយយ៉ាងរឹងមាំ និងចេះតែរីកដុះដាលទៅ នៅក្នុងប្រទេសអេហ្សីប។ កងទ័ពបានចេញ ដីការឃាត់ខ្លួន​ចំនួនជាង ៣០០ដីការ ដើម្បីតាមប្រម៉ាញ់រកក្រុមមេដឹកនាំជាន់ខ្ពស់ និងអ្នកជិតដិតមួយចំនួនទៀត របស់ប្រធានាធិបតី​ម៉ូស្សី។

ប្រតិកម្មរបស់បរទេស

រដ្ឋធម្មនុញ្ញរបស់ប្រទេស ត្រូវបានផ្អាកដោយកងទ័ព ដោយក្រុមយោធាបានជ្រើសរើសមនុស្សថ្មី មកជំនួសលោក ម. ម៉ូស្សី មានឈ្មោះ​ថា អាដលី ម៉ានសួរ (Adly Mansour)។ សកម្មភាពទាំងអស់នេះ បានជម្រុញឲ្យមានការព្រួយបារម្ភយ៉ាងខ្លាំង ពី​សំណាក់សហគមន៍អន្តរជាតិ។ លោកប្រធានាធិបតីអាមេរិក បារ៉ាក់ អូបាម៉ា (Barack Obama) បានស្នើឲ្យពិនិត្យមើល​ឡើង​វិញ ពីជំនួយដ៏សំខាន់ទៅឲ្យកងទ័ពអេហ្សីប ខណៈពេលដែលសហគមន៍អឺរ៉ុប បានទាមទារឲ្យមានប្រធានាធិបតីថ្មីមួយ មកជំនួសជាបន្ទាន់។

លោកអូបាម៉ា បានសម្ដែងការព្រួយបារម្ភរបស់លោក ហើយបានអំពាវនាវឲ្យមានការបោះឆ្នោតយ៉ាងលឿនជាទីបំផុត ដើម្បី​បង្កើតនូវរដ្ឋាភិបាលស៊ីវិលថ្មីមួយ។ អគ្គលេខាធិការអង្គការសហប្រជាជាតិ លោក​បាន គីម៉ូន (Ban Ki-moon) បានវាយតម្លៃ​ថា ជា«អន្តរាគមន៍»របស់កងទ័ព ដ៏គួរឲ្យខ្វាយខ្វល់។

ទីក្រុងប៉ារីស បានយល់ពីព្រឹត្តិការណ៍នេះ ហើយស្នើសុំឲ្យមានការបោះឆ្នោតថ្មីមួយ និងរក្សាឲ្យបាននូវសន្តិភាព។ រីឯទីក្រុង​ឡុងដ៍ឯណោះវិញ បានអំពាវនាវឲ្យមានភាពស្ងប់ស្ងៀម ហើយបាននិយាយថា ខ្លួនប្រឆាំងនឹងអន្តរាគមន៍យោធា ដើម្បី​ផ្លាស់ប្ដូរ​របបដឹកនាំ។

តែផ្ទុយទៅវិញ ព្រះមហាក្សត្រប្រទេសអារ៉ាប៊ី សាអ៊ូឌីត អាបដាឡាស (Abdallah) ជាមេដឹកនាំដំបូងគេ ដែលបានស្វាគមន៍​លោក ម៉ានសួរ ដែលជាប្រធានាធិបតីថ្មីលើកឲ្យកាន់អំណាចដោយក្រុមយោធា។

«ម៉ូស្សី ត្រូវបានគេក្បត់»

រដ្ឋប្រហារយោធានេះ បានកើតឡើងនៅក្រោយពេលការប្រកាសរបស់លោកប្រធានាធិបតីម៉ូស្សី ដែលបានធ្វើកាល​ពីរាត្រី​ថ្ងៃអង្គារ ពីភាពស្របច្បាប់របស់លោកនៅក្នុងការកាន់អំណាចជាបន្ត។ តែជាការប្រកាសមួយ ដែលបង្កឲ្យមានការ​ព្រួយ​បារម្ភ ថាអំពើហឹង្សាអាចនឹងកើតមានឡើង នៅក្នុងផ្ទៃប្រទេសកាន់តែខ្លាំង ខណៈដែលព្រឹត្តិការណ៍ប៉ះទង្គិច​បង្ហូរឈាម​មួយ​ចំនួន បានកើតមានរួចមកហើយ។ អ្នកធ្វើបាតុកម្មម្នាក់ នៅទីលាន តាអៀរ (Tahrir) កណ្ដាលទីក្រុងកែរ ដែលពេញ​ប្រៀប​ដោយហ្វូងបាតុករប្រជាជន តាំងពី​ច្រើនថ្ងៃមកហើយនោះ បានថ្លែងថា «ជាព្រឹត្តិការណ៍ប្រវត្តិសាស្ត្រមួយ ព្រោះយើងបាន​បោសសំអាត ប្រធានាធិបតីម៉ូស្សី និងក្រុមបងប្អូនម៉ូស្លីមចេញ»។ ក្រុមបាតុករបានផ្ទុះប្រមូលគ្នារាប់សិបម៉ឺននាក់ មកជួប​ជុំ​គ្នានៅកណ្ដាលក្រុង ក្រោយ​ពី​ព្រឹត្តិការណ៍វាយបង្ក្រាបនៅថ្ងៃទី២៦ខែមិថុនា ដែលបានធ្វើឲ្យមនុស្ស៤៧នាក់ស្លាប់។

មនុស្សរាប់ពាន់នាក់ផ្សេងទៀត ដែលមានសមានចិត្ត នឹងប្រធានាធិបតីម៉ូស្សី ក៏បានមកជួបជុំគ្នាដែរ នៅទីលានមួយទៀត​កណ្ដាលទីក្រុង ហើយបានស្រែកថា «ម៉ូស្សីត្រូវបានក្បត់។ ជារដ្ឋប្រហារមួយ ប្រឆាំងនឹងប្រធានាធិបតីជាប់ឆ្នោត (ស្រប​ច្បាប់)»។

ការឃាត់ខ្លួនប្រធានាធិបតី

អ្នកទទួលខុសត្រូវម្នាក់របស់កងទ័ព ស្រង់សម្ដីដោយទីភ្នាក់ងារបារាំង អាអេហ្វប៉េ (AFP) បាននិយាយថា កងទ័ពបានចាប់​«អតីត»ប្រមុខរដ្ឋ ជាការត្រៀមការពារមួយ ហើយថាតាមទំនង អតីតប្រធានាធិបតីរូបនេះ នឹងអាចត្រូវបានជាប់​ពាក្យ​បណ្ដឹងទៅតុលាការ ជាមួយនឹងមេដឹកនាំស្និតនឹងលោកមួយចំនួនទៀត។ កងទ័ពបាដាក់កម្រិត ឲ្យមានការហាមឃាត់ក្រុម​មនុស្សទាំងនេះ មិនឲ្យធ្វើដំណើរចេញក្រៅប្រទេស ដើម្បីទុកឲ្យមានការស៊ើបអង្កេត រួមជាមួយនឹងសមាជិក​ក្រុម​បងប្អូន​ម៉ូស្លីម ៣៣នាក់ផ្សេងទៀត។

ប្រភពស្និតនឹងសន្តិសុខជាតិ បានបង្ហើបឲ្យដឹងដែរថា ប្រធានគណបក្សនយោបាយមួយ ដែលបង្កើតឡើងដោយ​ក្រុមបង​ប្អូនម៉ូស្លីម ក៏ត្រូវបានឃាត់ខ្លួនដែរ។ ក្រុមមេដឹកនាំនៃសារព័ត៌មានរបស់រដ្ឋាភិបាលមួយ ក៏សុទ្ធសឹង​ជាមនុស្សក្នុង​ចំណោម​ដីការទាំង ៣០០ ដែលត្រូវស្វែងរកចាប់ខ្លួនដែរ។

រដ្ឋប្រហារនេះ បានកើតឡើងតែ១៦ខែប៉ុណ្ណោះ បន្ទាប់ពីកម្លាំងប្រជាជនអេហ្សីប បានបណ្ដេញអតីតប្រធានាធិបតី ហ៊ូស្នី ម៉ូបារ៉ាក់ (Hosni Moubarak) ដែលរងការចោទប្រកាន់ថាបានបង្កើតនូវរបបផ្ដាច់ការ ជាច្រើនសិបឆ្នាំនៅអេហ្សីប។ អ្នក​ដឹក​នាំក្នុងយុទ្ធនាការរដ្ឋប្រហារនេះ គឺឧត្តមសេនីយ៍ អាបដែល ហ្វាតា អាល់ស៊ីស៊ី (Abdel Fattah al-Sissi) ដែលក្នុងពេលនេះ បានក្លាយជាបុរសខ្លាំងមួយរូប នៃប្រទេស។ លោកឧត្តមសេនីយ៍ បានចេញមកថ្លែងបង្ហាញពី«ក្រមប្រតិបត្តិ»មួយ ដែល​បើតាមមេដឹកនាំក្រុមប្រឆាំងនៅអេហ្សីបលោក មហាម៉េដ អេលបារ៉ាដី (Mohamed ElBaradei) ថា ក្រមប្រតិបត្តិនេះបាន​ឆ្លើយតបទាំងស្រុង ទៅនឹងការចង់បានរបស់ប្រជាជន៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី០៤ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ