Posts tagged as "Khem Veasna"

DJ អាចារ្យ​ធំ ប្រាប់ ខឹម វាសនា ឲ្យ​សុំ​ទោស​ពលរដ្ឋ​ខ្មែរ​ជា​មុន

DJ អាចារ្យ​ធំ ប្រាប់ ខឹម វាសនា ឲ្យ​សុំ​ទោស​ពលរដ្ឋ​ខ្មែរ​ជា​មុន

«បើលេងកុំខឹង បើខឹងកុំលេង» នេះជាប្រតិកម្មភ្លាមៗ របស់យុវជនម្នាក់ កាលពីប៉ុន្មានថ្ងៃមុន បន្ទាប់ពីយុវជនរូបនេះ ត្រូវបាន«ប្រមុខបក្សជួង» ព្រមាន ថានឹងប្ដឹងឡើងទៅតុលាការ ទាក់ទងនឹងការថ្លែងរបស់យុវជន នៅក្នុងវីដេអូផ្សាយផ្ទាល់មួយ អះអាងថាលោក ខឹម វាសនា បានលើកដៃគាំទ្រច្បាប់ ស្ដីពីសន្ធិសញ្ញាបំពេញបន្ថែម ដែលអនុញ្ញាត​ឲ្យមានការកាត់ទឹកដីកោះត្រល់ ទៅឲ្យវៀតណាម។ ការព្រមាននេះ ត្រូវបានប្រធានគណបក្សមួយនេះ បន្តធ្វើជាហូហែ ក្នុងប៉ុន្មានថ្ងៃចុងក្រោយ ទៅកាន់មនុស្សដទៃទៀត ដោយថែមទាំងបានទាមទារ ឲ្យអ្នកទាំងនោះ ធ្វើការ«សុំទោស»មកខ្លួននោះផង។

ប៉ុន្តែនៅថ្ងៃនេះ យុវជនដដែល ដែលដាក់រហស្សនាម «អាចារ្យធំ» បានសម្រេចរក្សាជំហររបស់ខ្លួន ជាសាធារណៈ និងជាផ្លូវការថា លោកនឹងមិនសុំទោសលោក ខឹម វាសនា ជាដាច់ខាត ដរាបណា«ប្រមុខបក្សជួង»រូបនេះ មិនសុំទោសប្រជាពលរដ្ឋខ្មែរ ជាមុនទេនោះ។ លោក អាចារ្យធំ បានទាមទារ«យ៉ាងដាច់អហង្ការ» ឲ្យប្រធានគណបក្សសម្ព័ន្ធដើម្បីប្រជាធិបតេយ្យ ត្រូវចេញមុខសុំទោសជាផ្លូវការ ចំពោះ«ពាក្យសម្ដី»របស់ខ្លួន ដែលយុវជនរូបនេះ វាយតម្លៃថា ជា«ពាក្យសម្ដី ដ៏សែនថោកទាប»។

យុវជនដដែល ដែលសរសេររហស្សនាមរបស់ខ្លួន នៅលើបណ្ដាញសង្គម ដាក់ថា «អាចារ្យធំ នគររាជ» បានប្រកាសថា៖ «មកដល់ម៉ោងនេះ ខ្ញុំនៅតែបន្តរក្សាជំហរដាច់ខាត គឺមិនសុំទោសលោក ហើយក៏មិនមានហេតុផលអ្វី ដែលខ្ញុំត្រូវសុំទោសលោកដែរ ព្រោះខ្ញុំអត់មានបានធ្វើអ្វីខុស ពីការពិតនោះឡើយ»។

ឌីជេ អាចារ្យធំ បានពន្យល់ថា៖ «ប្រសិនបើលោក ខឹម វាសនា គ្រាន់តែចង់បានការសុំទោសពីខ្ញុំ ជាថ្នូរនឹងកាមិនប្ដឹង លើរូបខ្ញុំមែននោះ ខ្ញុំ អាចារ្យធំ ក៏មិនរុញរានឹងព្រមធ្វើតាម នូវអ្វីដែលលោកចង់បានដែរ។ កុំថាឡើយ ត្រឹមលិខិតសុំទោសមួយច្បាប់នោះ ទោះថែម បង្អត់អាហារ៧ថ្ងៃ និងលុតជង្គង់ហាលថ្ងៃ មុខប្រាសាទអង្គរវត្តដូនតាខ្មែរ ៧ម៉ោងថែមទៀត ក៏ខ្ញុំព្រមដែរ។»។

យុវជនសំដីបានរូបនេះ បានវាយបកត្រឡប់ទៅ«ប្រមុខទ័ពជួង» ថា៖ «តែ... ខ្ញុំតំណាងឲ្យប្រជាពលរដ្ឋខ្មែរម្នាក់ ក៏សូមស្នើរយ៉ាងដាច់អហង្ការ ឲ្យលោក ខឹម វាសនា ខ្លួនឯង ត្រូវតែចេញមុខ សុំទោសជាផ្លូវការ ចំពោះពាក្យសម្ដី ដ៏សែនថោកទាបរបស់ខ្លួន ដែលតែងតែបាន ប្រមាថ មាក់ងាយ ជាតិខ្មែរ របស់ប្រជាជនខ្មែរទាំងមូល ធៀបទៅនឹងសត្វឆ្កែ, ដៀលព្រះសង្ឃ ថាអាចោរថង់យាម (ប្រមាថដល់សាសនាព្រះពុទ្ធ ដែលជាសាសនារបស់រដ្ឋ) រំលោភរដ្ឋធម្មនុញ្ញ ដែលជាច្បាប់កំពូលរបស់ជាតិ ហ៊ានប៉ះពាល់ ដល់អង្គព្រះមហាក្សត្រខ្មែរ ដោយសម្ដីប្រមាថ មាក់ងាយផ្សេងៗ ដែលមិនអាចទទួលយកបាន និងចោទអតីតព្រះមហាក្សត្រខ្មែរ ព្រះបរមរតនកោដិ សម្ដេចតានៃយើង ថាបានធ្វើនយោបាយ ចូលដៃជាមួយយួន លាក់ទាហានយួនយៀកកុង ២០ម៉ឺននាក់ បំផ្លាញជាតិខ្មែរ ចោទសម្ដចយាយ ថាជាយួននៅក្នុងវាំងខ្មែរ ។ល។ និង។ល។»។

កាលពីថ្ងៃទី២ ខែកក្កដាកន្លងមកថ្មីៗ លោក ខឹម វាសនា បានសម្រេចចិត្ត ឲ្យគណបក្សលោកដាក់ពាក្យបណ្ដឹង ដើម្បីប្ដឹងលោក DJ «អាចារ្យធំ» ទៅកាន់តុលាការ តែមិនបានបញ្ជាក់ថា តើការប្ដឹងនោះ នឹងធ្វើនៅពេលណាឡើយ។ ប៉ុន្តែប្រធានគណបក្សរូបនេះ បានហៅការលើកឡើង របស់លោក អាចារ្យធំ ទាក់ទង នឹងការលើកដៃរបស់លោក គាំទ្រច្បាប់​ស្ដីពីសន្ធិសញ្ញា​បំពេញ​បន្ថែមនោះ ថា«ជាការគ្មានដឹងអ្វី» និងគ្រាន់តែជា«ការឆ្កាដៃឆ្កាជើង»ប៉ុណ្ណោះ។

លោក ខឹម វាសនា បានពន្យល់ឡើងថា៖ «ក្មួយគ្មានដឹងអ្វីបន្តិចសោះ ពីរឿងសន្ធិសញ្ញាព្រំដែននេះ​ តែក្មួយឆ្កាដៃឆ្កាជើង​ ដូចក្មួយដឹងណាស់​ ក្មួយស្នេហាជាតិណាស់។​ ដើម្បីទប់ស្កាត់​ ការបង្កភាពច្រឡំបល់​ រកមុខរកបាតមិនឃើញ ក្នុងការចោទពូរឿងលើកដៃ គាំទ្រសន្ធិសញ្ញាបំពេញបន្ថែមនេះ​ ចាំទៅជួបគ្នា នៅតុលាកាចុះណាក្មួយ។»។

» អានអត្ថបទដែលទាក់ទង៖ ខឹម វាសនា ​ឲ្យ​គណបក្ស​ដាក់​ពាក្យ​បណ្ដឹង ប្ដឹង​ឌីជេ​អាចារ្យ​ធំ

តែនៅរសៀលថ្ងៃដដែលនោះ លោក ខឹម វាសនា បានទាមទារឲ្យមនុស្សទាំងឡាយ ដែលបានក្លាយជា «មុខសញ្ញាចុងចោទ» នៃពាក្យបណ្ដឹងរបស់គណបក្សលោក ក្នុងករណីនេះ (ឬករណីប្រហាក់ប្រហែល) ឲ្យធ្វើការ«សុំទោស»ជាផ្លូវការ និងជាលាយលក្ខណអក្សរ មកកាន់លោក និងគណបក្ស។

ការព្រមាន និងការទាមទារនោះ ក៏បានធ្វើឡើងស្របពេល ទៅនឹងយុទ្ធនាការ របស់ក្រុមអ្នកគាំទ្រលោក ដែលខិតខំបកស្រាយបញ្ជាក់ នៅលើបណ្ដាញសង្គមថា រឿងរ៉ាវពាក់ព័ន្ធ នឹងច្បាប់ ស្ដីពីសន្ធិសញ្ញាបំពេញបន្ថែម ក្នុងឆ្នាំ២០០៥ គឺជារឿងរបស់គណបក្សប្រជាជនកម្ពុជា និងរដ្ឋាភិបាល របស់លោកនាយករដ្ឋមន្ត្រី ហ៊ុន សែន ខណៈការលើកដៃរបស់លោក ខឹម វាសនា ក្នុងរដ្ឋសភានៅពេលនោះ មិនមានឥទ្ធិពលអ្វីឡើយ។

អ្នកប្រើប្រាស់បណ្ដាញសង្គម ដ៏ល្បីឈ្មោះមួយរូប លោក «William Guang» បានហៅហេតុការណ៍ បន្តបន្ទាប់ទាំងនេះ ថាជាការព្យាយាម ឲ្យចូលក្នុងបញ្ហានយោបាយ និងបានអំពាវនាវ ឲ្យយុវជន «អាចារ្យធំ» ដកថយ ដែលមានន័យស្មើ នឹង«ការសុំទោស»។ លោក «William Guang» បានសរសេរផ្ដល់យោបល់ថា៖ «ករណីនេះ គេអូសឲ្យចូលនយោបាយហេីយ ប្ដឹងមិនឈ្នះគេទេ ព្រោះករណីនេះ វាប៉ះចំណុចក្ដៅ ទាក់ទិននឹងរឿងបាត់បង់ទឹកដី ដែលប៉ះពាល់ដល់បុគ្គលមានអំណាចភាគច្រេីន»។

ប៉ុន្តែលោក «អាចារ្យធំ» មិនបានដកថយ ដូចការអំពាវនាវនេះទេ។ យុវជនបានបញ្ជាក់បន្ថែម នៅថ្ងៃនេះថា៖ «ក្នុងករណីដែលបុគ្គល ខឹម វាសនា មិនព្រមថ្លែងការសុំទោស ចំពោះទោសកំហុស របស់ខ្លួនជាផ្លូវការទេ ហើយនៅតែបន្តប្ដឹងទៀត ខ្ញុំក៏មិនខ្លាច នឹងដើរចូលគុកដែរ (ព្រោះខ្ញុំគ្មានលុយឲ្យលោកទេ) ប្រសិនបើចំណាត់ការតុលាការ សម្រេចឲ្យរូបខ្ញុំចាញ់ក្ដី។ បើខ្ញុំ អាចារ្យធំ ជាខ្មែរម្នាក់ដែលបានចាញ់ក្ដីលោក ខឹម វាសនា គឺប្រៀបដូចជា ជនរួមឈាមខ្មែរទូទាំងពិភពលោក ដែលបានទទួលរងការប្រមាថ ពីសំណាក់លោក ខឹម វាសនា ក៏ចាញ់ក្ដីទាំងអស់គ្នាដែរ។»៕

ខឹម វាសនា ព្រមាន​ចាត់​វិធានការ​ប្រឆាំង​វិទ្យុ «VOD»

ខឹម វាសនា ព្រមាន​ចាត់​វិធានការ​ប្រឆាំង​វិទ្យុ «VOD»

បន្ទាប់ពីក្រុមអ្នកប្រើប្រាស់​បណ្ដាញសង្គម ដែលនិយាយ ពីការលើកដៃ របស់លោក ខឹម វាសនា គាំទ្រច្បាប់ស្ដីពីសន្ធិសញ្ញាបំពេញបន្ថែម ក្នុងរដ្ឋសភា កាលពីឆ្នាំ២០០៥នោះ នៅថ្ងៃនេះ លោក«ប្រមុខបក្សជួង» បានងាកទៅព្រមាន ចាត់វិធានការ​ប្រឆាំងប្រព័ន្ធផ្សព្វផ្សាយម្ដង។ ប្រព័ន្ធផ្សព្វផ្សាយមុនគេ ដែលអាចរងគ្រោះ ទល់នឹង​ចំណាត់ការ​នោះ គឺវិទ្យុសម្លេងប្រជាធិបតេយ្យ ហៅកាត់ «VOD» ដែលមានលោក ប៉ា ងួនទៀង ជានាយកការផ្សាយ។

ការព្រមាននោះ ក៏មិនមែនធ្វើឡើងសម្រាប់តែ ការចេញផ្សាយមួយលើក ឬក្នុងថ្ងៃនេះ របស់វិទ្យុសម្លេង «VOD» នោះដែរ តែទំនងជាគំនុំ ដែលកើតមាន នៅក្នុងចិត្តរបស់លោក ខឹម វាសនា ជាយូរមកហើយ។ លោក«ប្រមុខ» បានសរសេរឡើងថា៖ «យើងអត់អោនឲ្យអ្នកយូរពេក និងច្រើនហួសពេកហើយ កន្លងមកនេះ»។

ប្រធានគណបក្ស«ជួង» បានសរសេរព្រមានដូច្នេះ នៅប៉ុន្មានម៉ោង​មុននេះ នៅលើគណនេយ្យ​ហ្វេសប៊ុក​របស់​លោក បន្ទាប់​ពីការចុះផ្សាយមួយ របស់ស្ថាប័នព័ត៌មាននេះ ដែលមានចំណងជើងថា "លោក ខឹម វាសនា អះអាងថាប្តឹងតែអ្នក «លាបពណ៌មួលបង្កាច់»" និងដែលធ្វើឡើង ក្រោយលិខិតទាមទារ របស់គណបក្ស«ជួង» ស្នើសុំឲ្យកែតម្រូវព័ត៌មានចុះផ្សាយមុន ដែលគណបក្សនេះចាត់ទុកថា ជាព័ត៌មានមិនពិត។

លោក ខឹម វាសនា បានហៅអត្ថបទ ដែលចេញផ្សាយ កាលពីព្រឹកម៉ិញ ថាមាន«ចេតនាច្បាស់ណាស់» មិនទទួលកំហុស។ លោក«ប្រមុខទ័ពជួង» បានសរសេរថា៖ «កុំព្យាយាមគេចវេស ឲ្យសោះ។​ បើយើងយល់ថា ត្រូវហើយ បានធ្វើ​ កុំខ្លាច នឹងការពារអំពើត្រឹមត្រូវ​របស់ខ្លួន​ ហើយបើខុស ឲ្យដឹងខុស​ កុំរកសីុបែបបន្លំ មិនឲ្យគេយល់បានថា ខ្លួនបានធ្វើខុសអីចឹង​។​ ប្រាប់ឲ្យច្បាស់ថា មិនចប់រឿងទេ​ បើមិនសរសេរឲ្យស្រួលបួល ថាខ្លួនបានចុះផ្សាយខុស​ ហើយសូមកែតម្រូវទេ​ នោះរឿងមិនចប់ដាច់ខាត។​»។

នៅក្នុងអត្ថបទនោះ អ្នកសារព័ត៌មានឈ្មោះ «អុឹង ប៊ុនថន​​» បានសរសេរនៅវាក្យខណ្ឌដំបូងថា៖ «លោក ខឹម វាសនា អះអាងថា ខ្លួនប្តឹងតែអ្នក ដែលគាត់ចោទថា "លាបពណ៌មួលបង្កាច់" គឺមិនប្តឹង "អ្នករិះគន់" ដូចអ្វីដែលព័ត៌មានចុះផ្សាយ នោះទេ។ នេះ ជាការឆ្លើយតបក្នុងលិខិតមួយ របស់គណបក្សសម្ព័ន្ធដើម្បីប្រជាធិបតេយ្យ នៅថ្ងៃអង្គារនេះ បន្ទាប់ពី VOD បានផ្សាយអត្ថបទមួយ កាលពីថ្ងៃចន្ទ ក្រោមចំណងជើងថា "លោក ​ខឹម វាសនា បើកយុទ្ធនាការទ្រង់ទ្រាយធំ ប្តឹងអ្នករិះគន់"។»។

លិខិតស្នើសុំកែតម្រូវ ដែលគណបក្សសម្ព័ន្ធដើម្បីប្រជាធិបតេយ្យ បានបង្ហោះនៅលើបណ្ដាញសង្គម មានសរសេរប្រដៅអ្នកសារព័ត៌មាន ឲ្យ«ធ្វើការបែងចែក ឲ្យបានច្បាស់លាស់ រវាងពាក្យថា "រិះគន់" និង"លាភពណ៌មួលបង្កាច់"»។ លិខិតនោះបានបញ្ជាក់ទៀតថា គណបក្ស«ជួង» នឹងមិនប្តឹងអ្នករិះគន់ឡើយ ព្រោះវាជា«សិទ្ធិបញ្ចេញមតិ ដែល​ត្រូវបានធានាដោយច្បាប់» ប៉ុន្តែការលាបពណ៌មួលបង្កាច់ ត្រូវបានគណបក្សនេះសរសេរថា ជា«បទល្មើស ដែលច្បាប់បានហាមឃាត់»។

សាកសួរសុំប្រតិកម្មនៅមុននេះ តាមរយៈទូរសារ ក្នុងបណ្ដាញសង្គម លោក ប៉ា ងួនទៀង នាយកវិទ្យុ «VOD» បានថ្លែងឲ្យទស្សនាវដ្ដីមនោរម្យ.អាំងហ្វូ ដឹងយ៉ាងខ្លីថា លោកមិនចាប់អារម្មណ៍ឡើយ ទៅនឹងការព្រមានខាងលើ របស់គណបក្សសម្ព័ន្ធដើម្បីប្រជាធិបតេយ្យ និងប្រធានគណបក្សនេះ៕

ខឹម វាសនា ​ឲ្យ​គណបក្ស​ដាក់​ពាក្យ​បណ្ដឹង ប្ដឹង​ឌីជេ​អាចារ្យ​ធំ

ខឹម វាសនា ​ឲ្យ​គណបក្ស​ដាក់​ពាក្យ​បណ្ដឹង ប្ដឹង​ឌីជេ​អាចារ្យ​ធំ

ប្រសិនបើលោក ខឹម វាសនា បានលើកឡើងក្នុងពេលកន្លងមក ទាក់ទងនឹងឯករាជ្យភាព ដែលពោរពេញដោយមន្ទិល របស់តុលាការកម្ពុជានោះ នៅថ្ងៃនេះ លោកប្រធានគណបក្ស«ជួង»រូបនេះ បានសម្រេចចិត្តថា នឹងត្រូវពឹងពាក់ប្រព័ន្ធយុត្តិធម៌មួយនេះ ដើម្បីរក«ស-ខ្មៅ»ជូនលោក។

ប្រមុខគណបក្សសម្ព័ន្ធដើម្បីប្រជាធិបតេយ្យ បានប្រកាសនៅមុននេះថា លោកបានសម្រេចចិត្ត ឲ្យគណបក្សលោកដាក់ពាក្យបណ្ដឹង ទៅកាន់តុលាការ ដើម្បីប្ដឹងយុវជនមួយរូប ដាក់រហស្សនាម DJ «អាចារ្យធំ» ទាក់ទងនឹងការលើកឡើង របស់យុវជនរូបនេះ កាលពីពេលកន្លងមក ចោទលោក ខឹម វាសនា ថាបានលើកដៃក្នុងរដ្ឋសភា កាលពីឆ្នាំ២០០៥ ដើម្បីចូលរួម​អនុម័ត្រច្បាប់ ស្ដីពីសន្ធិសញ្ញាបំពេញបន្ថែម ដ៏ប្រទាំងប្រទើស ដែលអនុញ្ញាឲ្យមាន «ការកាត់កោះត្រល់ ឲ្យយួន»។

លោក ខឹម វាសនា បានសរសេរនៅលើបណ្ដាញសង្គម នៅមុននេះបន្តិចថា៖ «ពូបានសំរេចចិត្តឲ្យ​ បក្សដាក់ពាក្យបណ្តឹង [ប្ដឹង]អាចារ្យធំទៅតុលាការ រឿងអាចារ្យធំចោទពូថា លើកដៃកាត់កោះត្រល់ឲ្យយួននេះហើយ»។​

ប្រមុខបក្សរូបនេះ បានលើកឡើងបន្ត ដើម្បីបង្ហាញឲ្យឃើញ ពី«ក្ដីសណ្ដោស»របស់លោកដូច្នេះថា៖ «ឲ្យពូសុំទោស ក្មួយអាចារ្យធំផងចុះ​ ពូធ្វើនយោបាយដើម្បីជួយខ្មែរ​ បេះដូងពូពិតជាសណ្តោសណាស់​ ពូអត់អោនណាស់​។ បើត្រឹមតែប៉ះពាល់មុខមាត់​ កេរ្ត៍ឈ្មោះរបស់ពូ​ ពូមិនប្តឹងក្មួយទេ​ តែនេះ​ ក្មួយបានបំពុលបរិយាកាសសង្គម ហួសដែនកំណត់ហើយ។​»។

លោក ខឹម វាសនា បានពន្យល់ឡើងថា៖ «ក្មួយគ្មានដឹងអ្វីបន្តិចសោះ ពីរឿងសន្ធិសញ្ញាព្រំដែននេះ​ តែក្មួយឆ្កាដៃឆ្កាជើង​ ដូចក្មួយដឹងណាស់​ ក្មួយស្នេហាជាតិណាស់។​ ដើម្បីទប់ស្កាត់​ ការបង្កភាពច្រឡំបល់​ រកមុខរកបាតមិនឃើញ ក្នុងការចោទពូរឿងលើកដៃ គាំទ្រសន្ធិសញ្ញាបំពេញបន្ថែមនេះ​ ចាំទៅជួបគ្នា នៅតុលាកាចុះណាក្មួយ»។

យុវជន ឌីជេ អាចារ្យធំ នៅមិនទាន់ឃើញប្រតិកម្មអ្វីមកវិញនៅឡើយ ក្នុងពេលភ្លាមៗ។ ប៉ុន្តែការលើកឡើងរបស់យុវជនរូបនេះ ត្រូវបានធ្វើឡើង នៅក្នុងវីដេអូផ្សាយផ្ទាល់មួយ ដែលត្រូវបានលប់ចេញទៅវិញ នៅពេលក្រោយមក។ ជាការលប់ចោលទៅវិញ ដែលហាក់ដូចជាយឺតពេលបន្តិច ព្រោះផ្នែកមួយនៃសំដីរបស់ ឌីជេអាចារ្យធំ ទាក់ទងនឹងការលើកឡើងនេះ ត្រូវបានថតទុក និងយកមកចែករំលែកវិញ នៅពាសពេញបណ្ដាញសង្គម។

យ៉ាងណាចំពោះការលើកដៃ អនុម័ត្រច្បាប់ស្ដីពីសន្ធិសញ្ញាបំពេញបន្ថែម ត្រូវបានលោក ខឹម វាសនា ខ្លួនលោកទទួលស្គាល់ ថាពិតជាបានធ្វើមែន តែថាការលើកដៃមួយសម្លេងរបស់លោក មិនមានឥទ្ធិពលអ្វី ទៅលើការអនុម័ត្រច្បាប់នេះ នៅពេលនោះទេ។ ប៉ុន្តែចង់មិនចង់ក៏ដោយ ក៏ពាក្យបណ្ដឹងរបស់លោក​ អាចនឹងគាស់កកាយ រឿងដ៏រសើបនេះត្រឡប់មកវិញ ខណៈរដ្ឋាភិបាលលោក ហ៊ុន សែន ធ្លាប់បានព្រមាន ថានឹងធ្វើការបង្ក្រាប ទៅលើនរណា ឬក្រុមណា​ក៏ដោយ ដែលនៅតែបន្តនិយាយ​វែកញែក អំពីរឿងព្រំដែន ខ្មែរ-យួន៕

ខឹម វាសនា ថា​ខ្លួន​«អស្ចារ្យ»​ដោយ​ត្រូវ​គេ​ហៅ​«ឆ្កួត»​និង​«រោគ​ចិត្ត»

ខឹម វាសនា ថា​ខ្លួន​«អស្ចារ្យ»​ដោយ​ត្រូវ​គេ​ហៅ​«ឆ្កួត»​និង​«រោគ​ចិត្ត»

ប្រធានគណបក្សសម្ព័ន្ធ ដើម្បីប្រជាធិបតេយ្យ បានជ្រើសរើសយកឃ្លា «គ្មានមនុស្សអស្ចារ្យ លើលោកណាម្នាក់ ដែល​មិនត្រូវបានមនុស្សរយ ហៅថាជាមនុស្សឆ្កួត ឬមនុស្សសសៃប្រសាទនោះទេ» ដើម្បីឆ្លើយទៅនឹងការលើកឡើង របស់លោក អ៊ូ វីរ: អ្នកវិភាគផ្នែកសង្គម-នយោបាយ ដែលបានហៅលោក កាលពីប៉ុន្មានថ្ងៃមុន ថា«មានបញ្ហាផ្លូវចិត្ត» ដោយសារ​បណ្ដាលមកពី «កំហឹង និងការតឹងទ្រូង»។

លោក ខឹម វាសនា នៅបានទ្រគោះ ដោយហៅលោក អ៊ូ វីរៈ វិញ ថាជាប្រភេទមនុស្សរកបាន តាមចិញ្ចើមថ្នល់​ គ្មានតំលៃអ្វី​ មកអារកាត់ចំពោះមនុស្ស ដូចរូបលោកបានទេ។​ ប្រធានបក្ស«ជួង» បាននិយាយថា៖ «មនុស្សធុន អ៊ូ វីរ: នេះកើតមក សំរាប់តែអោយខ្ញុំមើលងាយ តែប៉ុណ្ណោះ។​ ហាហាហា​ ត្រកូលអ៊ូទាំងអស់ សុទ្ធតែអត់កំណើត។»។

ប៉ុន្តែមិនមែនតែលោក អ៊ូ វីរៈ ម្នាក់ទេ តែគ្រប់អ្នកសារព័ត៌មាន អ្នកវិភាគ អ្នកនយោបាយទាំងឡាយ រួមនឹងព្រះសង្ឃផ្សេងទៀតផង ដែលបាននិយាយពីលោក ឬពីគណបក្សសម្ព័ន្ធ ដើម្បីប្រជាធិបតេយ្យ​ សុទ្ធតែត្រូវលោក​ ខឹម វាសនា វាយបកមកវិញ ថានោះគឺដោយ​សារតែគណបក្សរបស់លោក«ខ្លាំង»។

លោកប្រមុខទ័ពជួង បានថ្លែងថា៖ «គ្មានកៅអីមួយក្នុងរដ្ឋសភាផង​ ផ្អើលទូទាំងប្រទេសទៅហើយ។​ បើមិនជាចលនាបដិវត្តន៍ តើជាស្អីទៅវិញ?​ ពួកសារពត៌មាន ដែលចុកចាប់ដោយសារ LDP វាខំយកបណ្តឹងមនុស្សម្នាក់ ដែលរកមូលដ្ឋានច្បាប់​មកចោទប្រកាន់​មិនឃើញទុកជារឿងសំខាន់​ សម្ភាសន៍​ តាមដាន​ បំផ្លោងព័ត៌មាន​ ដែលនាំឲ្យយើងមើលឃើញ ចេតនាពួកថោកទាប លាក់ក្នុងស្រោមថ្លៃថ្នូរទាំងនោះ យ៉ាងច្បាស់ណាស់។​ ដល់ដំណាក់កាល​ សត្រូវផ្គុំគ្នាព្រួតវាយ LDP ជុំទិសហើយតើ។​ ខំទៅអាអូនៗ​ តែហួសឱកាសនេះ​ ពួកឯងអាចហួសរហូត ក៏មិនដឹងដែរអាអូន។»។

តែនៅត្រង់ពាក្យថា «សត្រូវផ្ដុំគ្នាព្រួតវាយ LDP ជុំទិស»​ ដូចជាត្រូវលោក«ប្រមុខ» និយាយតាំងពីច្រើនឆ្នាំមុន និងច្រើនដងពេកទេដឹង? ​ យ៉ាងណា លោក ខឹម វាសនា បានបន្តរំលឹក ពីភាពអស្ចារ្យរបស់លោក និងគណបក្សលោកទៀតថា៖ «ចំណាំចុះ​ កំណើតនៃមនុស្សអស្ចារ្យ ឬចលនាអស្ចារ្យ ទាំងអស់ក្នុងលោក​ សំគាល់បានដោយសារមនុស្សថោកទាប ស្ទើរកន្លះនគរព័ទ្ធវាយ។​ ហ្នុងហើយ ដែលអាចសំគាល់បានថា ជាកំណើតមនុស្សអស្ចារ្យ ឬចលនាដ៏អស្ចារ្យ ក្នុងលោក។​»។

នរណាខ្លះ ចង់ក្លាយជាមនុស្សដ៏អស្ចារ្យ ដូចរូបលោក និងចង់ចូលរួមក្នុងចលនាដ៏អស្ចារ្យ ដូចចលនារបស់លោក? សូម​ប្រញាប់ឡើង ព្រោះកន្លែងមានកំណត់! ដូចពាក្យសំដីរបស់លោក ខឹម វាសនា បានបញ្ជាក់ដូច្នេះ៖ «ជីវិតជាជនបដិវត្តន៍មិនសាមញ្ញ ដូចមនុស្សរកបានតាមចិញ្ចើមថ្នល់ ដែលក្នុងមួយវិនាទី មិនដឹងកើតប៉ុន្មានសែននាក់ទេ លើផែនដីនេះ»៕

ខឹម វាសនា៖ ខ្មែរ​អាត្មា​និយម​និង​ខ្មែរ​ល្ងង់​ខ្លៅ គ្មាន​តម្លៃ​រស់​ទេ

ខឹម វាសនា៖ ខ្មែរ​អាត្មា​និយម​និង​ខ្មែរ​ល្ងង់​ខ្លៅ គ្មាន​តម្លៃ​រស់​ទេ

នៅទីនេះ ចូរកុំនិយាយពីសិទ្ធិមនុស្ស ឬសិទ្ធិនៃការរស់នៅអ្វីឲ្យសោះ! ព្រោះបើមនុស្ស«ខ្មែរ»ដ៏ច្រើនទាំងនោះ រស់នៅ​ក្នុងភាពជាមនុស្ស«អាត្មានិយម» ឬរស់នៅក្នុង«ភាពល្ងង់ខ្លៅ» ដែលក្លាយទៅជាបន្ទុក របស់អ្នកដទៃ នោះ​មនុស្ស​«ខ្មែរ»ប្រភេទនេះ គ្មានតម្លៃជាមនុស្សទេ ហើយក៏គ្មានតម្លៃសមរស់នៅ លើលោកានេះដែរ។ 

លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (ហៅខ្លួនឯងថា បក្សជួង) បានបង្ហាញ​ពី​ទស្សនៈ​របស់លោក ខាងលើនេះ កាលពីយប់​ម្សិលម៉ិញ ហើយបានសង្កត់​ន័យ​បន្ថែមទៀតថា ពួក«គេ (មនុស្ស​ប្រភេទខាងលើ) មិនគួរបានទទួល​នូវជំនួយណាមួយ ពីអ្នកដទៃ ក្នុងន័យគ្រាន់តែដើម្បី​បន្ថយ​ភាព​អាក្រក់ របស់​ពួក​គេ នៅលើ​ផែនដីនេះ អោយកាន់តែយូរនោះទេ»។ 

ហើយមនុស្សខ្មែរជំពូកខាងលើ មានច្រើនណាស់ រហូតក្លាយជាចំណោទមួយ ដែលប្រធានបក្សជួង សួរឡើង​ជា​ឃ្លា​សរុប​សម្រាប់​ខ្មែរ​ទូទៅថា «អ្វីជាការ​សង្គ្រោះខ្មែរពិតប្រាកដ?»។

ប្រមុខទ័ពជួង បានពន្យល់ទៀតថា៖ «មនុស្សល្អ និងបរិស្ថានធម្មជាតិរងការឈឺចាប់ និងរងការបំផ្លាញ ឲ្យ​វិនាស​ហិនហោច​ដោយស្នាដៃ​មនុស្ស​ប្រភេទ​(ខាងលើ)នេះ ច្រើនរហូតពណ៌នាមិនអស់។ មនសិការ​ជាមនុស្ស ប្រាប់​យើង​ថា ពួកមនុស្សប្រភេទនេះ មិនមានតម្លៃដើម្បីរស់នៅទេ។ ជួយឲ្យ​មនុស្ស​បែប​នេះ​មានហូបចុក មាន​ស្លៀក​ពាក់ មានជំរកស្នាក់នៅ និយាយ​រួមថា ជួយអ្វីក៏ដោយ ឲ្យតែក្នុងន័យ ដើម្បីផ្ដល់ភាពងាយស្រួល និង​បន្ថយ​ការ​រស់នៅ ឲ្យ​មនុស្ស​ធុននេះ សុទ្ធតែជារឿងមិនគួរធ្វើទាំងអស់ ឬអាច​និយាយ​បានថា ជាការជួយ​បំផ្លាញ​សុខ​សន្តិភាព ​របស់មនុស្ស សត្វ និងបរិស្ថាន​ធម្មជាតិ​ទាំង​អស់។»។

អញ្ចឹងធ្វើម៉េចទៅ?

គេគួរ​អរគុណ​លោក ខឹម វាសនា ដែលផ្ដល់នូវ​ដំណោះស្រាយ ឲ្យប្រភេទមនុស្សខ្មែរខាងលើនេះ អាចនៅរស់ និងទទួលបានការអប់រំ មក​វិញ​ដែរ។ លោក​ថា៖ «មានរបស់តែមួយគត់ ដែលយើងគួរផ្ដល់ឲ្យ​ដល់់មនុស្ស​ប្រភេទ​នេះ គឺការអប់រំ​ឲ្យ​មនុស្សប្រភេទនេះ ក្លាយទៅជាមនុស្ស ដែលរស់នៅមា​នប្រយោជន៍ ដល់​​ពិភពលោក មុននឹងពួកគេ​ទទួលបាន​​ជំនួយផ្សេងៗទៀត ដែលជាធាតុចាំបាច់ សម្រាប់ការរស់នៅ​សុខ​ស្រួល និង​យូរ​អង្វែង​របស់​ពួកគេ»៕