Posts tagged as "Infrastructure"

ម្ចាស់​គម្រោង​«ឡាន​​ក្រុង​​យក្ស​​រត់​​កន្លង​​លើ​​ថ្នល់​​ធំ» រង​ការ​អង្កេត​ពី​បទ​ប្រមូល​លុយ​ខុស​ច្បាប់

ម្ចាស់​គម្រោង​«ឡាន​​ក្រុង​​យក្ស​​រត់​​កន្លង​​លើ​​ថ្នល់​​ធំ» រង​ការ​អង្កេត​ពី​បទ​ប្រមូល​លុយ​ខុស​ច្បាប់

តំបូងឡើយ គម្រោង«ឡាន​ក្រុង​យក្ស ​រត់​កន្លង​លើ​ថ្នល់​ធំ» ដែលហៅជាភាសាអង់គ្លេស «Transit Elevated Bus» ឬតាមអក្សរកាត់ «TEB» ដ៏ទាក់ទាញ បានបង្កឲ្យមានភាពភ្ញាក់ផ្អើល នៅជុំវិញពិភពលោក។ នៅខែកញ្ញា ឆ្នាំទៅម៉ិញ គម្រោងនេះត្រូវបានគេរកឃើញ ថាវាគ្រាន់តែជាការផ្សាយពាណិជ្ជកម្មមួយ ដើម្បីប្រមូលប្រាក់ ពីក្រុមអ្នកមានចំណាប់អារម្មណ៍ និងចង់វិនិយោគ លើគម្រោងនេះប៉ុណ្ណោះ។

» អត្ថបទដែលទាក់ទង៖ «ឡាន​ក្រុង​យក្ស​រត់​កន្លង​លើ​ថ្នល់​ធំ» ជា​រឿង​បោក​ប្រាស់

ប៉ុន្តែគេត្រូវរង់ចាំ រហូតដល់ថ្ងៃទី២ ខែកក្កដា ថ្មីៗនេះ ទើបអាជ្ញាធរចិន បានប្រកាសជាផ្លូវការ ថាក្រុមហ៊ុន «Huaying Kailai» ដែលជាម្ចាស់គម្រោងខាងលើ កំពុងរងការជាប់សង្ស័យ ពីការប្រមូលប្រាក់ ដោយខុសច្បាប់។ នេះ បើតាមការផ្សាយ របស់ទីភ្នាក់ងារព័ត៌មានផ្លូវការ «Xinhua» របស់ចិន។ ទីភ្នាក់ងារ បានរាយការណ៍ថា រាប់ចាប់តាំងពីថ្ងៃ ដែលអាជ្ញាធរទទួលបានដំណឹង រហូតមកដល់ថ្ងៃនេះ ជនសង្ស័យចំនួន៣២នាក់ ត្រូវបានឃាត់ខ្លួុន និងឃុំខ្លួន។

ការស៊ើបអង្កេតដ៏ស៊ីជម្រៅមួយ កំពុងត្រូវអាជ្ញាធរបើកធ្វើ ហើយលទ្ធផលយ៉ាងណានោះ នឹងត្រូវប្រកាសឲ្យដឹង នៅពេលខាងមុខ។

គម្រោង«ឡាន​ក្រុងយក្ស​​» ដែលមានឈ្មោះម្យ៉ាងទៀត «Bus Batie» ត្រូវបានបានដាក់សាកល្បង កាលពីដើមសីហាកន្លងមក នៅ​ក្នុង​ក្រុង «Qinhuangdao» ខេត្ត«Hebei» នៃប្រទេសចិន។ បើតាមរូបរាង និងគំនិតដើមរបស់គម្រោងនេះ បានធ្វើឲ្យជឿថា វាជាជា​រថយន្ដក្រុង​ប្រភេទថ្មីមួយ ដែលមាន​បណ្ដោយ២២ម៉ែត្រ ទទឺង ៨ម៉ែត្រ កំពស់ ៥ម៉ែត្រ និងផ្ទុកមនុស្សបាន ៣០០នាក់ ក្នុងចំងាយផ្លូវ ៦៥​គីឡូម៉ែត្រ ពីលើ​ផ្លូវថ្នល់​ធំៗនានា នៃ​ទីក្រុង។

» វីដេអូបង្ហាញ ពីពេលដាក់រថយន្ដក្រុងយក្ស សាកល្បងឲ្យរត់នៅលើផ្លូវ៖

ប៉ុន្តែទន្ទឹមនឹងនោះ មានការលើកឡើងជាច្រើន បានសំដែងការសង្ស័យ ទាក់ទងនឹងការប្រមូលថវិកា (ឬហៅការដាក់ទុនវិនិយោគ) ចូលទៅក្នុងគម្រោងនេះ។ មនុស្សជាច្រើននាក់ ដែលជាអ្នក​ដាក់ទុន ប្រមាណជាង ២៦លានដុល្លារ (២៤លានអ៊ឺរ៉ូ) ចូលក្នុងគម្រោងនេះ បានប្ដឹងទាមទារ​ប្រាក់របស់ពួកគេ ត្រឡប់មកវិញ៕

ស្ពាន​អាកាស​ចែក​ផ្លូវ​ធំ​ជាង​គេ​នៅ​ចិន ទើប​នឹង​ដាក់​ឲ្យ​ប្រើ​ប្រាស

ស្ពាន​អាកាស​ចែក​ផ្លូវ​ធំ​ជាង​គេ​នៅ​ចិន ទើប​នឹង​ដាក់​ឲ្យ​ប្រើ​ប្រាស

ក្រុមអ្នកបើកបរ បានហៅបណ្ដាញស្ពានអាកាស ចែកផ្លូវថ្មី កំពស់៥ជាន់ នៅក្នុងតំបន់ជាយក្រុង​ ចុងគីន (Chongqing) ភាគកណ្ដាលនៃប្រទេសចិន ថាជា«នំបញ្ចុក» ដែលមិនទាន់ចាប់ចង្វាយ។ ស្ពានអាកាសចែកផ្លូវនេះ មានឈ្មោះរួមថា «Huangjuewan» ហើយត្រូវបានសម្ពោធ ដាក់ឲ្យប្រើប្រាស់ កាលពីសប្ដាហ៍កន្លងទៅ បន្ទាប់ពីបានស្ថិតក្នុងការសាងសង់ តាំងពី៨ឆ្នាំមកហើយ។

ស្ពានអាកាសដែលខ្ពស់ជាងគេ មានកំពស់ដល់ទៅ ៣៧ម៉ែត្រ ខណៈស្ពាននីមួយៗ ត្រូវបានសង់បែកផ្លូវ ជាខ្នែងទៅកាន់ទិសដៅ មិនតិចជាង១៥ទិសដៅ ដោយមិនទាន់រាប់ពីទិសដៅ ទាំងទៅទាំងមក។

ប៉ុន្តែស្ពានអាកាសដ៏រវាមទាំងនេះ នៅមិនទាន់ជួយ ផ្ដល់ភាពងាយស្រួល ឲ្យអ្នកបើកបរយានទាំងឡាយនោះទេ បើសូម្បីអ្នកទាំងនោះ មានប្រព័ន្ធនាំផ្លូវ «GPS» ហើយក៏ដោយ។ ក្រុមអ្នកបើកបរ បានសរសេរព្រមាន បែបចំអក ដាក់នៅលើបណ្ដាញសង្គមចិន «Weibo» ថា៖ «បើអ្នកឯងបើកបរច្រឡំ យកផ្លូវចេញណាមួយនោះ អ្នកនឹងមកដល់ក្រុង ចុងគីន យឺតពេលជាង១ថ្ងៃ ពោលទាល់តែស្អែកឡើង ទើបអ្នកឯងមកដល់»។

អ្នកបើកបរមួយរូបផ្សេង បានសរសេរបែបកំប្លែងឡើងថា៖ «ម៉ាស៊ីននាំផ្លូវ "GPS" បាននិយាយឡើងថាៈ អ្នកឯងចង់ទៅណាទៅទៅ តែសូមកុំមករំខានខ្ញុំ»។ ខណៈប្រិយមិត្តម្នាក់ទៀត បានឲ្យនិយមន័យក្រុង ចុងគីន ជាមួយនឹងបណ្ដាញចែកផ្លូវថ្មី របស់ទីក្រុងនេះ ដូច្នេះថា៖ «ក្រុង ចុងគីន ទីក្រុង​ដ៏​អាថ៌កំបាំង ដែលគេមិន​អាច​រក​ច្រក​ចាក​ចេញ​បាន»។

យ៉ាងណា បញ្ហាខាងលើនេះ ទំនងជាបានកើតឡើង ដោយសារទម្លាប់ចាស់ របស់ក្រុមអ្នកបើកបរ ព្រោះមានអ្នកបើកបរខ្លះ ក៏បានថ្លែងសរសើរពីគម្រោងថ្មី ដែលទើបនឹងដាក់ ឲ្យប្រើប្រាស់នេះដែរ។ អ្នកបើកបរម្នាក់នោះ បានសរសេរអួត ពីសមិទ្ធិផលថ្មី របស់ក្រុង ចុងគីន ថា៖ «Huangjuewan ស្ពានអាកាសដែលមានតែមួយ កំពស់៥ជាន់ៈ ខ្ញុំបានឆ្លងកាត់ទីនោះ ដោយគ្មានចាំបាច់ប្រើម៉ាស៊ីន "GPS" ហើយខ្ញុំក៏មិនបានវង្វេងអ្វីដែរ»៕

«លោក​យាយ​ត្រៀម​ឲ្យ​កូន​ចៅ​សង​បំណុល ដែល ហ៊ុន សែន ដើរ​ជំពាក់​គេ​ទៅ»

«លោក​យាយ​ត្រៀម​ឲ្យ​កូន​ចៅ​សង​បំណុល ដែល ហ៊ុន សែន ដើរ​ជំពាក់​គេ​ទៅ»

ជាមួយនឹងកម្មវិធីដ៏ពិសេស ដែលដូនចាស់ត្រូវបានគេនាំ ឲ្យចូលទៅជួបលោក ហ៊ុន សែន ដល់គេហដ្ឋានរបស់លោកនោះ លោកយាយ យិត សាមុត បានមានឱកាស ថតរូបអោបថើប ជាមួយលោក ហ៊ុន សែន យ៉ាងស្និតស្នាល និងត្រូវបានលោកនាយករដ្ឋមន្ត្រី ហៅលោកយាយថា «អ្នកម៉ែ»។ លោក ហ៊ុន សែន បានសរសេរ នៅលើទំព័រហ្វេសប៊ុក​របស់​លោក​ថា៖ «ម្សិលមុិញ ខ្ញុំបានបំពេញបំណង របស់អ្នកម៉ែ យិត សាមុត ដែលមានបំណងជួបខ្ញុំ មុនពេលគាត់ចែកឋាន។ ពេលជួប ខ្ញុំសង្កេតឃើញចំណុចខ្លះ ដូចម្តាយរបស់ខ្ញុំ នៅត្រង់អ្នកណានិយាយអីនិយាយទៅ តែមិនភ្លេចម្លូរស្លា និងចុកថ្នាំនោះឡើយ។»។

ពិតមែនហើយ លោកយាយ យិត សាមុត ដែលអង្គុយ នៅក្នុងរថយន្ដដ៏ទំនើបមួយ បានចុកថ្នាំម្លូរស្លារ និងបានឆ្លើយតប ទៅនឹងការសាកសួរ របស់អ្នកថតវីដេអូថា៖ «ត្រូវតែចាឡាញ់ (ស្រឡាញ់) បងសែន (លោក ហ៊ុន សែន)! អត់ចាឡាញ់ អាយូសខ្លី! ចាឡាញ់បងសែនកាលណា អាយូសវែងកាលហ្នឹង។ (...) មានតាំងពីមន្ទីរពេទ្យ មានតាំងផ្លូវថ្នល់ តាំងពីស្ពាន មើលចុះលោកអ៊ើយ ស្ពានកោះធំ ស្ពានអ្នកលឿង មហាសែនស្អាត [ស្នាដៃ]អ្នកណា? ជាចាណាដៃ (ស្នាដៃ) លោក ហ៊ុន សែន។ (...) ទៅឈរលើហ្នឹង ស្អាតអីស្អាតម្លេះ បងសែនអូនអ៊ើយ!»។


ការលើកឡើង របស់លោកយាយ យិត សាមុត ក៏មិនសូវជាខុសគ្នាប៉ុន្មាន ពីប្រសាសន៍របស់ដូនចាស់មួយរូបទៀត ដែលត្រូវបាននាំឲ្យជួបលោក ហ៊ុន សែន និងបានថ្លែងប្រហាក់ប្រហែលគ្នា ពីការសាងសង់ស្ពាន ថ្នល់ សាលារៀន មន្ទីរពេទ្យ សាលាឆាន់... នៅក្រោមការដឹកនាំរបស់លោក ហ៊ុន សែន និងរដ្ឋាភិបាលគណបក្សប្រជាជនកម្ពុជា តាំងពីច្រើនទសវត្សន៍មកហើយ។

តែតបនឹងការលើកឡើង របស់ដូនចាស់ទាំងពីរខាងលើ ដូនជី លី ពីវត្តធម្មរង្ស៊ី ក្រុងបាញ៉ើ (Bagneux) ខាងត្បូងរដ្ឋប៉ារីស ប្រទេសបារាំង បានថ្លែងថា ប្រសាសន៍របស់លោកយាយទាំងពីរនាក់ មិនបានមើល​ ពីអនាគតរបស់ប្រទេសជាតិ និងរបស់កូនចៅ ទៅមុខវែងឆ្ងាយនោះទេ។ លោកយាយ លី បានថ្លែងនៅក្នុងវីដេអូមួយ ដោយពន្យល់ឡើងថា៖ «លោក ហ៊ុន សែន សព្វថ្ងៃជំពាក់គេ មួយលាន មានមួយម៉ឺនដង មួយលានៗ ម៉ាលានដុល្លារហ្នឹង មានម៉ាម៉ឺនដង លោកយាយរាប់ទៅ។ [ហើយ]សងគេហ្នឹង កូនចៅថ្ងៃក្រោយ សងគេម្នាក់ ៥០០ [ព្រោះ]ជំពាក់គេ។ (...) កូនចៅលោកយាយ រកលុយទុកសងគេ ឲ្យហើយទៅ។»។

ដូនជី លី ដែលជាព្រឹទ្ធាចារ្យ​ល្បីមួយរូប នៅក្នុងចំណោម​សហគមន៍ខ្មែរ នៅប្រទេសបារាំង បានបន្តថ្លែងឡើងថា៖ «ជំពាក់គេ ម៉ាលានម៉ាម៉ឺនដង តើយកទៅធ្វើអីខ្លះ? កសាងស្ពាន កសាងស្អីហ្នឹង លុយរបស់យើងឬ? សុទ្ធតែលុយ យកពីគេមកណ្ន៎! ហើយចំណាយ យកមកកសាងហ្នឹង វាមិនគ្រប់ទៀតណា។ ម៉ាលាន ម៉ាម្មឺនដងនេះ [ត្រូវបាន]យកមកកសាង តែពាក់កណ្ដាលទេ តែពាក់កណ្ដាលទៀត មិនដឹងយកទៅណាទេ? ឯងខ្លាចតែធ្លាក់ ទៅស្រុកយួនណា!»។


សូមរំលឹកដែរថា របាយការណ៍​ស្តីពីស្ថិតិ​បំណុល​អន្តរជាតិ ចេញ​ផ្សាយ​ថ្ងៃ​ទី​១៤ ខែ​ធ្នូ​ ឆ្នាំ២០១៦ ដោយធនាគារ​ពិ​ភព​លោ​ក ​បាន​ឲ្យ​ដឹងថា កម្ពុជា​ជំពាក់​បំណុល​បរទេស ​មាន​ចំនួន ​៩៣១៨ លាន​ដុល្លារ (ជិត​មួយ​ម៉ឺនលាន​​ដុល្លា) គិតត្រឹមចុង​ឆ្នាំ​២០១៥ ដោយ​ចំនួន​នេះ​គឺ​កើន​ឡើង​ ៣៧៨% បើធៀប​ទៅ​ឆ្នាំ​ ២០០០ ដែល​ពេល​នោះ​ កម្ពុជា​ជំពាក់​បរទេស ​ត្រឹម​តែ​ ១៩៤៦ លាន​ដុល្លា​ប៉ុណ្ណោះ។

ប៉ុន្តែក្នុង​សេច​ក្តីប្រកាសព័ត៌មាន ចុះ​ថ្ងៃទី​២២ ខែឆ្នាំដដែល ​ក្រសួង​សេដ្ឋ​កិច្ច និង​ហិរញ្ញវត្ថុ ទទួល​ស្គាល់​ថា ​កម្ពុជា​បាន​ជំពាក់​បំណុល​បរទេស ​មាន​ចំនួន​ជិត​មួយ​ម៉ឺនលាន​​ដុល្លាអាមេរិក​មែន តែ​ចំនួន​នេះ​ មិន​មែន​ជា​បំណុល​ ដែល​​រដ្ឋ​​ជំពាក់​ទាំង​ស្រុ​ង​នោះ​ទេ។ ក្រសួង​បាន​ឲ្យ​ដឹង​ថា ក្នុង​ទំហំទឹក​ប្រាក់​ជិត មួយ​ម៉ឹន​លាន​ដុល្លា​អាមេរិក​នោះ រដ្ឋ​ជំពាក់បរទេស​ត្រឹម​ប្រមាណ ៥៦០០លាន​ដុល្លាអាមេរិក​ប៉ុណ្ណោះ ចំណែក​ទឹក​ប្រាក់​ ជិត​៤ពាន់​លាន​ដុល្លារ​ទៀតនោះ ជា​ប្រាក់​បំណុល​ឯក​ជន​ក្រៅ​ប្រទេស៕

រថភ្លើង​ទី​មួយ បានចេញពី​រាជធានី​ឡុងដ៍ មកដល់​​ប្រទេស​ចិន

រថភ្លើង​ទី​មួយ បានចេញពី​រាជធានី​ឡុងដ៍ មកដល់​​ប្រទេស​ចិន

ជាខ្សែរថភ្លើងទីបី ដែលបានធ្វើដំណើរចេញ ពីទឹកដីភាគខាងលិច នៃទ្វីបអ៊ឺរ៉ុប មកកាន់ទឹកដីភាគ​ខាងកើត នៃ​ទ្វីប​អាស៊ី និង​ជាខ្សែរថភ្លើងទីមួយ ដែលភ្ជាប់រាជធានី ឡុងដ៍ នៃចក្រភពអង់គ្លេស មកកាន់ក្រុង យីវូ (Yiwu) ស្ថិត​នៅ​​ភាគ​ខាង​ត្បូង នៃក្រុងសៀងហៃ ប្រទេសចិន។

ចេញដំណើរពីរាជធានី ឡុងដ៍ តាំងពីថ្ងៃទី១០ ខែមេសា (៣សប្ដាហ៍មុន) រថភ្លើងនេះ​ទើបនឹង​ចូលមក​ចត ក្នុង​ស្ថានីយ៍​អាយស្ម័យាន នៃ​ក្រុង«យីវូ» នៅវេលាម៉ោង ១ និង៣០នាទី ព្រឹកព្រហាមថ្ងៃសៅរ៍ ទី២៩ ខែ​មេសា​នេះ​ ដោយ​ឆ្លងកាត់​តាមផ្លូវដែក នៃប្រទេសជាច្រើន មានចំងាយសរុបប្រមាណជាង ១២ ០០០គីឡូម៉ែត្រ។ នេះ បើ​តាម​ការ​ប្រកាស​ឲ្យដឹង របស់​សហគ្រាសចិន ដែលទទួលបន្ទុក ទៅលើការដឹកជញ្ជូននេះ។

ប្រទេស ដែលរថភ្លើងបាន​ឆ្លងកាត់ មានប្រទេសបារាំង ប៊ែលហ្សិក អាល្លឺម៉ង់ ប៉ូឡូញ ប៊ីយ៉េឡូរ៉ូស្ស៊ី រ៉ូស្ស៊ី និង​ប្រទេស​កាហ្សាកស្ដង់។ ផ្លូវដែក​ពីរខ្សែមុន ដែលភ្ជាប់អ៊ឺរ៉ុប​ខាងលិច ទៅកាន់ប្រទេសចិន មាន៖ ខ្សែទីមួយ ​ចេញ​ពី​រាជធានី ម៉ាឌ្រីត ប្រទេសអេស្ប៉ាញ ដែលដាក់​ឲ្យដំណើរការ នៅឆ្នាំ២០១៤ និងខ្សែទីពីរ ចេញ​ពីក្រុង លីយ៉ុង ប្រទេស​បារាំង ដែលដាក់​ឲ្យរត់ នៅឆ្នាំទៅម៉ិញ។

រថភ្លើងនេះ បានដឹកទំនិញជាច្រើនមុខ តែនៅមិនទាន់​ជាទំនិញធំដុំ ដែលមាន​តម្លៃខ្ពស់ៗ នោះនៅ​ឡើយ។ ទំនិញ​ទាំង​នោះ មានទិសដៅ​សម្រាប់​ទីផ្សា នៃប្រទេសចិន មានជាអាទិ៍ ស្រាវីស្គី ភេសជ្ជៈ​គ្មាន​ជាតិ​ស្រវឹង ​ផលិតផល​សម្រាប់​កុមារ និងថ្នាំពេទ្យ។

«ផ្លូវជំនួញសូត្រ» ភ្ជាប់ចិននិងពិភពលោក...

ការបើកផ្លូវដឹកជញ្ជូនថ្មីនេះ ជាផ្នែកមួយ នៃនយោបាយថ្មី របស់ចិន។ នយោបាយនោះ ឈ្មោះ «ផ្លូវ​ជំនួញ​សូត្រ» ទើប​ត្រូវ​បាន​បង្កើត​ឡើង នៅឆ្នាំ២០១៣ ដោយប្រធានាធិបតីចិន លោក ស៊ី ជីនពីង (Xi Jinping) ដើម្បី​ពង្រឹង​ទំនាក់​ទំនង​ពាណិជ្ជកម្ម រវាង​ប្រទេស​ចិន និងបណ្ដាប្រទេស​ទាំងឡាយ នៅជុំវិញ​ផែនដី ជា​ពិសេស ជាមួយ​បណ្ដា​ប្រទេស នៅ​អ៊ឺរ៉ុប​ខាងលិច។

សម្រាប់ប្រទេសអង់គ្លេស ខ្សែផ្លូវដែក «ឡុងដ៍-យីវូ» មួយនេះ បានបង្ហាញពីសក្ដានុពលថ្មី សម្រាប់​ទីផ្សារ​ពាណិជ្ជកម្ម «អង់គ្លេស-អាស៊ី» នៅក្រោយ​ការចាកចេញ របស់ប្រទេស​នេះ ពីសហភាពអ៊ឺរ៉ុប (Brexit)។ ការ​ដឹក​ជញ្ជូន​ទំនិញ តាមរយៈ​រថភ្លើង ត្រូវបានគេ​គណនាថា មានតម្លៃថោក​ជាង ការដឹកជញ្ជូន ដោយប្រើ​មធ្យោបាយ​យន្ដហោះ និងមានល្បឿន​លឿន ជាងការដឹក​ជញ្ជូន តាមផ្លូវសមុទ្រ (ប្រើរយៈពេល​១៨ថ្ងៃ ទល់​នឹង៣០ថ្ងៃ​ជាង នៅ​តាម​ផ្លូវសមុទ្រ)។

ផ្ទុយទៅវិញ អាជ្ញាធរក្រុង «Yiwu» បានប្រកាស​ឲ្យដឹងថា ខ្សែរថភ្លើងនេះ ផ្ទុកបាន​តែ៨៨​កុងទឺន័រប៉ុណ្ណោះ ដែល​ខុស​គ្នា​ឆ្ងាយ ពីការដឹកជញ្ជូន​តាមផ្លូវសមុទ្រ ដែល​នាវាមួយ អាចទទួល​បាន​ពី ១០ ០០០ ទៅ ២០ ០០០ ​កុងទឺន័រ។

មិនទាន់ស្រួលប៉ុន្មានទេ...

យ៉ាងណា បញ្ហាដែលកើតឡើង ពីខ្សែរថភ្លើងថ្មីនេះ និងដែលទាមទារ ឲ្យមានការធ្វើវិនិយោគទុន​ដ៏​សម្បើម​នោះ ​គឺ​ហេដ្ឋារចនា​សម្ព័ន្ធផ្លូវដែក ដែលត្រូវដាក់ឲ្យមានទម្រង់ «Standard» ដូចគ្នា រវាង​ផ្លូវដែក នៃ​បណ្ដា​ប្រទេស​នៅ​អ៊ឺរ៉ុប​ខាង​លិច និងបណ្ដាប្រទេស ដែលធ្លាប់ស្ថិត​​ក្រោម​​ការគ្រប់គ្រង របស់អតីត​សហភាព​សូវៀត។ នៅ​ពេល​នេះ បណ្ដា​កុងទឺន័រ​ទាំងឡាយ ដែល​ផ្ទុកនៅ​លើ​ខ្សែរថភ្លើង ចេញ​ពីរាជធានី​ឡុង ត្រូវបាន​លើក​ចេញ យក​ទៅ​ដាក់​លើ​​ខ្សែរថភ្លើង​មួយទៀត បន្ទាប់ពី​ការដឹកជញ្ជូន បានមក​ដល់​ប្រទេស ប៊ីយ៉េឡូរ៉ូស្ស៊ី ដោយ​ហេតុថា ផ្លូវ​ដែក​នៅ​ទីនោះ មានទំហំ​ទូលាយជាង ផ្លូវដែក​នៅអ៊ឺរ៉ុប​ខាងលិច៕

សួន សេរីរដ្ឋា៖ ថវិកា​សង់​មហាវិថី​«សម្ដេច​តេជោ» ពុក​រលួយ​លើ​គោក

សួន សេរីរដ្ឋា៖ ថវិកា​សង់​មហាវិថី​«សម្ដេច​តេជោ» ពុក​រលួយ​លើ​គោក

«វាជាអំពើពុករលួយលើគោក» ជាប្រយោគមួយឃ្លា ដែលប្រធានគណបក្សអំណាចខ្មែរ លោក សួន សេរីរដ្ឋា បាន​ឧទាន​ឡើង​នៅ​មុន​នេះបន្តិច បន្ទាប់ពីលោកបានអានអត្ថបទមួយ របស់សារព័ត៌មានក្នុងស្រុក ដែល​ដាក់​ចំណង​ជើង​ថា «ផ្លូវ​៦០​ម៉ែត្រ តម្លៃ ៧៦​លាន​ដុល្លារ ត្រូវបាន​សម្ពោធ​ឲ្យ​ប្រើប្រាស់»។ ផ្លូវនោះ មាន​ឈ្មោះ «មហា​វិថី​សម្ដេច​តេជោ ហ៊ុន សែន» មានទទឹង៦០ម៉ែត្រ និងបណ្ដោយ៩១៦០ម៉ែត្រ តភ្ជាប់ពីផ្លូវ២៧១ (ត្រង់​​ច្រមុះ​ជ្រូក​ក្បាល​ថ្នល់) ទៅកាន់ផ្លូវជាតិលេខ២ (ត្រង់ចំណុច​ព្រែកកំពឹស) ដោយកាត់តាមតំបន់អភិវឌ្ឍន៍ ទីក្រុង​រណប ​របស់​ក្រុមហ៊ុន «ING Holding»។

អត្ថបទ ទាក់ទងនឹងការសម្ពោធ ដាក់ឲ្យប្រើប្រាស់ នូវមហាវិថីនេះជាផ្លូវការ ត្រូវបានចេញផ្សាយ តាំង​ពី​ថ្ងៃ​ទី៣ ​ខែ​មេសា​កន្លង​មក តែលោក សួន សេរីរដ្ឋា បានសំដែងការភ្ញាក់ផ្អើល នៅថ្ងៃទី៦ ខែមេសានេះ ដោយ​ទំនង​ជាទើប​នឹង​បាន​គណនា ទឹកប្រាក់ជាមធ្យម ដែលត្រូវបានយកមកចំណាយ ក្នុងការធ្វើផ្លូវនេះ និង​ដែល​ប្រកាស​ដោយ លោក​នាយក​រដ្ឋមន្ត្រី ហ៊ុន សែន នៅក្នុង​ពិធី​សម្ពោធនោះ។ ផ្លូវដែលមានចំងាយ ៩១៦០ម៉ែត្រ បាន​ចាយ​អស់​ថវិកា ៧៦លាន​ដុល្លារ​​អាមេរិក ត្រូវនឹង ៨ ២៩២ដុល្លារ ក្នុងមួយ​ម៉ែត្រ (យក ៧៦ ០០០ ០០០ ដុល្លារ ចែក​នឹង​៩១៦០ ម៉ែត្រ)។

នៅទំព័រហ្វេសប៊ុកផ្លូវការ ប្រធានគណបក្សអំណាចខ្មែរ បានសរសេររៀបរាប់ថា៖ «សង់ផ្លូវ​ប្រវែង​តែ ៩១៦០ ​ម៉ែត្រ (៩ គីឡូ និង ១៦០ ម៉ែត្រ) សម្រាប់ដាក់ឈ្មោះ​លោក ហ៊ុន សែន ត្រូវចំណាយ​លុយ​រហូត​ដល់ ៧២ [៧៦] លាន​ដុល្លារ សហរដ្ឋអាមេរិក ! ដែល​នេះ​ប្រវែងផ្លូវ ១ ម៉ែត្រ ចំណាយ​អស់​លុយ​រហូត​ដល់ ៧,៨៦០.៣ [៨ ២៩២] ដុល្លារ​សហរដ្ឋ។»។

លោក សួន សេរីរដ្ឋា បានសួរឡើងថា៖ «តើពលរដ្ឋខ្មែរ យើងទាំងអស់គ្នា អាចទទួលយកបាន [ឬ]ទេ?»។

«មហាវិថីសម្ដេចតេជោ ហ៊ុន សែន» ត្រូវបានគេអះអាងថា ជាផ្លូវដែលធំជាងគេ នៅក្នុងរាជធានី​ភ្នំពេញ ដែល​មាន​ទទឹង​អ៊ុត​កៅស៊ូ ៣០ម៉ែត្រ និងទទឺង​ចិញ្ចើមផ្លូវ ១៥ម៉ែត្រសងខាង។ ផ្លូវថ្នល់មួយខ្សែនេះ សង់​ឡើង​ដោយ​ក្រុមហ៊ុន «ING Holding» ដែលជាម្ចាស់​គម្រោង​ទីក្រុង​រណប​ខាងលើ ហើយត្រូវការរយៈពេល​សាងសង់​ផ្លូវ​នេះ​ រហូត​ដល់​ទៅ​៦ឆ្នាំ ដោយចាប់ផ្ដើម​សង់ នៅឆ្នាំ២០១១។

អំពើពុករលួយនៅក្នុងប្រទេសកម្ពុជា ត្រូវបានអង្គការតម្លាភាពអន្តរជាតិ (Transparency International ) ចាត់​ចំណាត់​ថ្នាក់ នៅលេខរៀងទី១៥៦ ដែលជាចំណាត់ថ្នាក់​ដ៏អន់មួយ ពីក្នុងចំណោម​បញ្ជី​ប្រទេស ទាំង​១៧៦ ​សម្រាប់​ឆ្នាំ​២០១៦​កន្លង​មក។ ចំណាត់ថ្នាក់នេះ បានបន្ទាប​ប្រទេស​កម្ពុជា ឲ្យក្លាយ​ជាប្រទេស ដែល​សម្បូរ​ទៅ​ដោយ​អំពើ​ពុករលួយ ជាង​បណ្ដា​ប្រទេស​ទាំង១០ នៅក្នុងសមាគម​ប្រជាជាតិ​អាស៊ីអាគ្នេយ៍ (ASEAN) និង​ជាង​បណ្ដា​ប្រទេស នៅ​ទ្វីប​អាស៊ី​ខាងកើត បន្ទាប់ពីប្រទេសកូរ៉េខាងជើង។ អង្គការតម្លាភាព​អន្តរជាតិ ដែល​មាន​ទី​ស្នាក់​ការ​ធំ នៅក្នុង​ប្រទេស​អាល្លឺម៉ង់ បានរកឃើញថា មន្ត្រីតុលាការ ប៉ូលីស­­­­­­­­­­ និងមន្រ្តី​រដ្ឋាភិបាល គឺ​ជា​ជន​ ដែល​ប្រព្រឹត្តិ​អំពើ​ពុករលួយ ខ្លាំងជាងគេ។

ប៉ុន្តែរបាយការណ៍​ខាងលើ របស់អង្គការតម្លាភាពអន្តរជាតិ ត្រូវបានមន្ត្រីរដ្ឋាភិបាលច្រានចោល ដោយ​ចាត់​ទុក​របាយការណ៍​នោះ​ ថា​ជា​ផ្នែក​មួយ នៃយុទ្ធនាការ​បន្តុះ​បង្អាប់​កម្ពុជា ហើយ​ថា​រដ្ឋាភិបាល​កម្ពុជា កំពុង​ធ្វើការ​លប់​បំបាត់ បាន​ជា​ច្រើន​ករណី និងជាបន្តបន្ទាប់ នូវ​អំពើពុក​រលួយ៕