Posts tagged as "kim jung-un"

វិបត្តិឧបទ្វីបកូរ៉េ៖ អាមេរិក​និង​កូរ៉េ​ខាង​ត្បូង បង្កើន​ការ​ត្រួត​ពិនិត្យ​យោធា​ដល់​«កម្រិត​លេខ​២»

វិបត្តិឧបទ្វីបកូរ៉េ៖ អាមេរិក​និង​កូរ៉េ​ខាង​ត្បូង បង្កើន​ការ​ត្រួត​ពិនិត្យ​យោធា​ដល់​«កម្រិត​លេខ​២»

នៅចំពោះការគម្រាមរបស់កូរ៉េខាងជើង ដែលចេះតែកើនឡើង ប្រទេសកូរ៉េខាងត្បូង និងសហរដ្ឋអាមេរិក បានតម្លើងការ​ត្រួតពិនិត្យយោធា ទៅដល់កម្រិតទីពីរ នៅថ្ងៃពុធទី១០ខែមេសានេះ។ កម្រិតនៃការត្រួតពិនិត្យនេះ ត្រូវបានដាក់ ដើម្បី​ឆ្លើយតបនឹង «ការគម្រាមដល់អាយុជីវិត» នៃប្រទេសផងខ្លួន។ រីឯជប៉ុនវិញ និយាយថា បានដាក់ប្រទេស ក្នុងស្ថានភាព «ប្រកាសសញ្ញា»មួយ ហើយកំពុងត្រៀមខ្លួន ទប់ទល់។


អគ្គមគ្គុទេសវ័យក្មេងកូរ៉េខាងជើងលោក គីម ជុងអ៊ុន ក្នុងពេលទៅជួបកម្លាំងយោធារបស់ខ្លួន។

ទីភ្នាក់ងារព័ត៌មានយ៉ុងហាប់ (Yonhap) បានធ្វើរបាយការណ៍ថា នៅថ្ងៃពុធទី១០ខែមេសានេះ ប្រទេសកូរ៉េខាងត្បូង និង​សហរដ្ឋអាមេរិក បានបានតម្លើងការត្រួតពិនិត្យយោធា ទៅដល់កម្រិតទីពីរ នៅចំពោះការគម្រាម ពីការបាញ់កាំជ្រួច​របស់​កូរ៉េខាងជើង។ ទីភ្នាក់ងារបានពន្យល់ថា កម្រិតនៃការត្រួតពិនិត្យ «លេខ២» ត្រូវបានដាក់អោយអនុវត្តន៍ ដើម្បីឆ្លើយតបនឹង «ការគម្រាមដល់អាយុជីវិត» នៃប្រទេសផងខ្លួន ដោយបានលើកយកប្រភព ជាអ្នកទទូលខុសត្រូវយោធាម្នាក់ តែមិនបាន​បញ្ចេញឈ្មោះមកអះអាងផង។

ក្នុងពេលធម្មតា ឬពេលសន្តិភាព កម្រិតនៃការត្រួតពិនិត្យយោធា មានត្រឹមលេខ៤ ខណៈកម្រិតលេខ៣ ជាកម្រិតត្រូវនឹង​ការគម្រាមណាមួយ ដែលមានលក្ខណៈ«ជាបានការ» តែមិនមានលក្ខណៈ ជាការវាយលុកនោះទេ។

បើតាមភ្នាក់ងារព័ត៌មានរបស់កូរ៉េខាងត្បូងនេះដដែល ទីក្រុងព្យុងយ៉ាងបានត្រៀមខ្លួនរួចជាស្រេច ក្នុងការបាញ់កាំជ្រួច។ ប្រភពពី​ខាងយោធា ដែលយ៉ុងហាប់បានស្រង់សម្ដី បានអះអាងថា «បើគិតពីបញ្ហាបច្ចេកទេស ពួកគេអាចបាញ់ នៅ​ថ្ងៃ​ស្អែក»។

កាំជ្រួចប៉ាទ្រីយ៉ូត នៅកណ្ដាលទីក្រុងតូក្យូ

ចំណែកឯប្រទេសជប៉ុនវិញ រដ្ឋមន្ត្រីក្រសួងការពារជាតិ លោក អ៊ីតស៊ូម៉ូរី អូណូដេរ៉ា (Itsunori Onodera) បានអះអាង​នៅ​ព្រឹកថ្ងៃពុធដដែលថា ប្រទេសលោកកំពុងស្ថិត ក្នុងស្ថានភាព«ប្រកាសសញ្ញា» ដើម្បីទប់ទល់ ប្រសិនបើកាំជ្រួច​កូរ៉េ​ខាង​ជើងណាមួយ ហោះសំដៅមករកខ្លួន។ កម្លាំង«ស្វ័យការពារ» របស់ជប៉ុន បានតម្លើងនៅថ្ងៃអង្គារមួយថ្ងៃមុន នូវកាំជ្រួច​ប៉ាទ្រីយ៉ូត នៅចំកណ្ដាល និងនៅជុំវិញរាជធានីតូក្យូ ដើម្បីទុកប្រឈមនឹង រាល់ការបាញ់កាំជ្រួចទាំងឡាយ របស់ប្រទេស​កូរ៉េខាងជើង។ ប្រព័ន្ធស្វ័យការពារទាំងនេះ ក៏ត្រូវបានតម្លើងរួចជាស្រេចដែរ នៅលើកោះ អូគីណាវ៉ា (Okinawa)។

គណកម្មាធីការសម្រាប់សន្តិភាព នៅអាស៊ីប៉ាស៊ីភិក ដែលជាស្ថាប័នមួយរបស់កូរ៉េខាងជើង បានជម្រុញអោយ បណ្ដា​អង្គការអន្តរជាតិ ក្រុមហ៊ុនឯកជន និងអ្នកទេសចរណ៍ទាំងអស់ អោយត្រៀមរៀបចំ  នូវវិធានការ«ជម្លៀសខ្លួនចេញ»។ កាលពីថ្ងៃសុក្រសប្ដាហ៍មុន ប្រទេសកុម្មុយនីស ក៏បានប្រាប់ទៅស្ថានទូត និងអង្គការអន្តរជាតិ ដែលមានវត្តមាន​នៅទីក្រុង​ព្យុងយ៉ាងថា ខ្លួនលែងធានាសុវត្ថិភាព អោយអ្នកទាំងនោះ ចាប់តាំងពីថ្ងៃ១០ខែមេសានេះទៅ។ ប៉ុន្តែ មិនមានពួកអ្នក​បំពេញបេសកកម្មការទូតណាម្នាក់ គិតថា វាជាការចាំបាច់ ក្នុងការជម្លៀសបុគ្គលិករបស់ផងខ្លួន នោះទេ។ ផ្ទុយទៅវិញ ក្រុមអ្នកការទូត បានចាត់ទុកសេចក្ដីជូនដំណឹងនេះ ថា ជាវិធីសាស្ត្រកូរទឹកអោយល្អក់។

កាលពីថ្ងៃច័ន្ទ ទីក្រុងព្យុងយ៉ាង រងការចោទប្រកាន់ថា កំពុងត្រៀមសាកល្បង នូវកាំជ្រួចអន្តរទ្វីប និងអាវុធនុយក្លេអ៊ែរ​បស់ខ្លួន ក្នុងសប្ដាហ៍ខាងមុខ។ អ្នកទទូលខុសត្រូវជានខ្ពស់ម្នាក់ របស់សហគមន៍អ៊ឺរ៉ុប បានថ្លែងនៅទីក្រុងប៊្រុយស៊ែលថា សហគមន៍អ៊ឺរ៉ុប កំពុងគិតទៅដល់លទ្ធភាពបន្ថែមទណ្ឌកម្មថ្មីទៀត ប្រឆាំងប្រទេសកូរ៉េខាងជើង ប្រសិនបើប្រទេសនេះ បន្តបញ្ឆេះភាពតានតឹង ឬក៏ធ្វើការបាញ់កាំជ្រួច ឬការសាកល្បងនុយក្លេអ៊ែរ។

ដោយឡែកប្រទេសចិន សម្ព័ន្ធមិត្តតែមួយគត់ របស់កូរ៉េខាងជើង បានសាកល្បងជាថ្មីទៀត កាលពីថ្ងៃអង្គារ រំងាប់ភាព​តានតឹង ដោយបានពន្យល់ថា ខ្លួនមិនចង់អោយមាន រឿងជម្លោះ«ទាស់ទែង»​ កើតមាននៅក្បែរទ្វារបងរបសខ្លួនទេ។ សេតវិមាន បានស្វាគមន៍ ការខិតខំប្រឹងប្រែងរបស់ចិន និងរ៉ូស្សី ដើម្បីជួយរំលឹកប្រទេសកូរ៉េខាងជើង អោយគោរព​កតព្វកិច្ចអន្តរជាតិរបស់ប្រទេសនេះ។ មន្ទីរប៉ងតាហ្គោន បានរំពឹងយ៉ាងមុតមាំថា «ចិន អាចមានតួនាទីសំខាន់ ក្នុងការ​និយាយពន្យល់ កូរ៉េខាងជើង» ដើម្បីភាពសាន្ដត្រាណក្នុងតំបន់៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី១០ ខែមេសា ឆ្នាំ២០១៣
ប្រភពយោង៖ AFP
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ