Posts tagged as "SEA Games"

ម្ចាស់​មេ​ដាយ​មាស ស៊ន សៀវម៉ី ប្រតិកម្ម​​តប​​គេហទំព័រ​​«មមិះ​​មាន់»

ម្ចាស់​មេ​ដាយ​មាស ស៊ន សៀវម៉ី ប្រតិកម្ម​​តប​​គេហទំព័រ​​«មមិះ​​មាន់»

ខ្មែរជំនាន់មុនៗ ហៅសារព័ត៌មានបោះពុម្ភ ដែលចុះផ្សាយតែពាស ផ្ដេសផ្ដាស នៅលើទំព័រក្រដាសរបស់ខ្លួន ថា​ជា​សារព័ត៌មាន​ខ្ចប់​«មមិះមាន់»។ ចុះ​សព្វថ្ងៃ ដែល​សម្បូរ​ទៅ​ដោយ​គេហទំព័ររ ដែល​ដើរ​ឈ្ងោក​រ​ក​រូបថត​អ្នក​នេះ ​ឬ​ពី​អ្នក​នោះ និង​ឮ​ដំណឹង​ពីនេះ ឬពីនោះ ទាំងគ្មាន​ការអះអាង ពី​ម្ចាស់ខ្លួន ច្បាស់លាស់ ឬ​ពី​ប្រភព​យក​ជា​ការ​បាន យក​មក​ចុះ​ផ្សាយ ពេញទឹក​ពេញដីនោះ តើគេគប្បី​ហៅ​គេហទំព័រ​នោះ ជាអ្វី​ទៅ​វិញ?

យ៉ាងណា ក៏អ្នកដើរឈ្ងោករករូបថត ឬគេហទំព័រទាំងនោះមានសំណាងខ្លះដែរ ដែល​ត្រូវបាន​ម្ចាស់​ខ្លួន ដូច​យ៉ាង​កញ្ញា ស៊ន សៀវម៉ី កីឡាការិនី​​ម្ចាស់​មេដាយ​មាស ឆ្នាំ២០១៤ ផ្នែក​កីឡា​តៃក្វាន់ដូ របស់​ប្រទេស​កម្ពុជា ចាត់​ទុក​ថា​ជា​អ្នកសារព័ត៌មាន ឬជា​គេហទំព័រ​សារព័ត៌មាន។ តែការ​ហៅ​នេះ ទំនង​ជា​មិន​បង្ក​ការ​សប្បាយ​ចិត្ត ទៅ​ដល់​អ្នក​សារព័ត៌មាន «ពិតប្រាកដ» ឬជាអ្នកសារព័ត៌មាន «អាជីព» ទាំងឡាយនោះទេ។

នៅមុននេះ​បន្តិច កញ្ញា ស៊ន សៀវម៉ី រាងខ្ពស់ស្រឡះ ដែលមានសន្ទុះជើងទាត់​គ្មានមេត្តា បានចេញ​វីដេអូ «ផ្សាយ​ផ្ទាល់» មួយ បង្ហោះ​នៅលើ​ទំព័រ​ហ្វេសប៊ុក របស់កញ្ញា ដើម្បីប្រតិកម្ម​ទៅ​គេហទំព័រ​ទាំង​នោះ ដែល​បាន​យក​រូបថត​មួយ​សន្លឹក​ពីរ របស់កញ្ញា ដែល​កញ្ញា​អះអាងថា បានថត​តាំងពី​ច្រើន​ឆ្នាំ​មុន មក​បង្ហោះ​ធ្វើ​បច្ចុប្បន្ន​ភាព ជា​មួយ​នឹង​ចំណង​ជើង​អត្ថបទ របស់​គេហទំព័រ​ទាំង​នោះ​ថា «អីយ៉ា…! ស៊ន សៀវមុី ប្រាប់គ្រូ​បង្វឹក​ថា​នាង​​ឈឺ មិន​អាច​ហាត់​បាន តែការពិត​ គឺចឹង…(មានរូប) ជួយស៊ែ»។

កញ្ញាបញ្ជាក់នៅក្នុងវីដេអូថា គ្មានរឿងបែបនេះទេ ព្រោះគ្រូបង្វឹករបស់កញ្ញា ជាជនជាតិកូរ៉េ ហើយ​ក្នុង​ពេល​នេះ​ លោក​កំពុង​ស្នាក់នៅ​ឯ​ប្រទេស​កូរ៉េឯណោះ ខណៈការចេញដើរកំសាន្ដ ទៅកាន់​ទីណា​ក៏ដោយ វា​ជា​សិទ្ធិ​ឯកជន​របស់​កញ្ញា ដែលកញ្ញា​បាន​ធ្វើ នៅ​ក្រៅ​ម៉ោងហាត់ ឬនៅវេលា​ចុងសប្ដាហ៍ និង​មិន​​ត្រូវ​បាន​នរណា រួម​ទាំង​ក្រុម​ឈ្ងោក​រក​រូប​ថត​ទាំង​នោះ​ផង មក​លូកលាន់ ឬយកទៅ​ចុះផ្សាយឡើយ។

ដោយឡែក​ កីឡាការិនី​ដ៏ល្បីរបស់កម្ពុជារូបនេះ នៅបានលើកយក​បញ្ជាក់​ជាថ្មី ថាកញ្ញា​​ពិត​ជា​​ឈឺជើង ហ្វឹក​​ហាត់​​មិន​​កើត ត្រូវ​ការ​សម្រាក និង​មាន​លិខិត​បញ្ជាក់ ពី​មន្ទីរ​ពេទ្យ​នោះ​ផង។ កញ្ញាទទួល​ស្គាល់​បន្តថា មាន​រឿង​​រកាំរកួស​​​បន្តិច​​បន្តួច ​ជា​មួយ​នឹង​សហព័ន្ធ​តៃក្វាន់ដូ​កម្ពុជា មុននឹង​កែសំដី​មក​វិញ ថាជាការ​យល់​ច្រឡំ ជា​មួយ​​នឹង​​បុគ្គល​​មួយ​​ចំនួន នៅ​​ទី​នោះ​​ទៅ​វិញ៕

សូមទស្សនាវីដេអូ ប្រតិកម្មរបស់កញ្ញា ស៊ន សៀវម៉ី ទាំងស្រុងដូចខាងក្រោម៖

ម្ចាស់​មេ​ដាយ​មាស ស៊ន សៀវមុី ទម្លាយរឿង​ថ្នាក់​លើ«ទើស»

ម្ចាស់​មេ​ដាយ​មាស ស៊ន សៀវមុី ទម្លាយរឿង​ថ្នាក់​លើ«ទើស»

«ពេលកាត់លុយ មិនឃើញទើស» តែបែរជា«មកទើសជ្រុលហួសហេតុ នៅពេលនាងឈឺ»ទៅវិញ។ នេះ ជា​អត្ថន័យចំៗ​ ដែល​កីឡាការិនី​តៃក្វាន់ដូ ម្ចាស់​មេ​ដៃ​មាស កញ្ញា ស៊ន សៀវម៉ី បាន​ទម្លាយ​ឲ្យគេឯង​បាន​ដឹង នៅ​លើ​បណ្ដាញ​សង្គម ពី​រឿងរ៉ាវ​អាក់អន់​ស្រពន់ចិត្ត របស់​នាង ដែលទំនង​ជានាង ចង់ចង្អុល​ទៅកាន់​អ្នក​គ្រប់គ្រង​របស់​នាង។ សារ​ដែល​នាង​បាន​បង្ហោះ នៅលើ​គណនេយ្យ​​ហ្វេសប៊ុក​របស់​នាង​នោះ ត្រូវបាន​លប់​ចេញ​ទៅ​វិញ នៅ​ប៉ុន្មាន​នាទី​ក្រោយ​មក។

តែនៅលើបណ្ដាញសង្គម អ្វីៗដែលបានកើតឡើង ចំពោះតារា ឬជនល្បីៗ មិនអាច​លាក់បាំង ពីការ​ឃ្លាំ​មើល​របស់​ប្រិយ​មិត្ត​ទាំងឡាយ​នោះ​បាន​ឡើយ។ ហើយជា​ពិសេស ពាក្យសំដី​របស់​កីឡាការិនីរូប​នេះ ក៏​ត្រូវ​បានគេ​ថត​ចម្លង យក​មក​ផ្សាយ​បន្ត យ៉ាង​ព្រោងព្រាត​ដូចគ្នាដែរ។ ពាក្យសំដី​នោះ​​ចាប់​ផ្ដើម​ឡើង ដោយឃ្លា​មួយ​នេះ​ថា៖ «ធ្វើ​ជា​មេគេ ហេតុអី​ក៏ចូលចិត្ត​ទើស នឹងកូនចៅម្លេះ?» មុននឹង​បន្ត​ថា៖ «អត់យល់​សោះ​ហ្មង! ពេល​កាត់​លុយ​ខ្ញុំ ដូច​មិន​ឃើញ​ទើស​សោះ។»?

សៀវម៉ី ដែលមានកំពស់​ខ្ពស់ស្រឡះ បាន​ត្អូញត្អែរ ពីខ្លួននាង​ដែល​ថា កំពុងមាន​ជំងឺ មិនអាច​ធ្វើការ​ហ្វឹក​ហាត់ ​សម្រាប់​វិញ្ញាសារ ដែល​ជា​ជំនាញ​របស់​នាង​បាន​ទេ។ ម្ចាស់​មេដាយ​មាស ពី​កីឡា​ស៊ីហ្គេម ក្នុង​ឆ្នាំ២០១៤ បាន​សរសេរ​ថា៖ «ឥឡូវ ខ្ញុំហាត់​មិនសូវ​កើត ខ្ញុំដឹង។ តែខ្ញុំមាន​ក្រដាស​ចេញ​ពីពេទ្យ ថាខ្ញុំឈឺ​មែន ហើយ​លុយ​ទៅ​ពេទ្យ ក៏[ជា]លុយ​ខ្ញុំ​ទាំងអស់​ដែរ។» ហើយបានបន្ត​ពាក្យ​គម្រាម​ថា៖ «បើចង់ដកខ្ញុំ​ចេញ​ពី​តៃក្វាន់ដូ ក៏​ធ្វើ​ក្រដាស​ដក​ទៅ កុំ​នៅ​ទើស​ច្រើន​ពេក ព្រោះខ្ញុំហត់​នឹងការហាត់​ហើយ មិនចង់ហត់​នឹង​មេទើស​ទេ!»។

នៅក្នុងការទម្លាយដ៏ខ្លីនោះ នាងនៅបានបង្ហើបឲ្យដឹង ពីក្រិត្យក្រមខ្លះៗ នៃជីវិត​ក្នុងក្រុមកីឡា​ដែល​ថា មាន​រឿង​អ្វី​ក៏​ដោយ កីឡាកររួមក្រុម​គប្បី​ជួបជជែកគ្នា ដើម្បី​ដោះ​ស្រាយ​បញ្ហា។ ស៊ន សៀវម៉ី បានរៀបរាប់​បន្ត​ថា៖ «[មេ]​ប្រាប់​កូនចៅថា មាន​រឿងអី​ឲ្យនិយាយ​ទល់មុខគ្នា តែ[មេ]ខ្លួន​ឯង​វិញ និយាយ​តែ​[ពី]ក្រោយ​ខ្នង​កូនចៅ។ ដក​ខ្ញុំ​ចេញ​ពី "Teakwondo" ទៅ បើ​គិតថា​ខ្ញុំហាត់​លែង​កើត។»។

គេមិនដឹងថា តើការអាក់អន់ស្រពន់ចិត្តនេះ កើតឡើងរវាងត្រឹមតែក្លឹបហ្វឹកហាត់ ឬរហូតដល់ថ្នាក់ គណៈ​កម្មា​ធិការ​​អូឡាំពិក​​កម្ពុជា​​នោះ​ទេ។ តែបើ​តាម​ការលើកឡើង​របស់​កីឡាការិនី ដែលព្រមាន​ឲ្យ​ដក​នាង ចេញ​ពី​បញ្ជី​កីឡាករ​តៃក្វាន់ដូ​នោះ វា​ទំនង​ជា​មាន​ទាក់ទង ដល់​គណៈកម្មាធិការ​អូឡាំពិក​កម្ពុជា​ច្រើន​ជាង។ យ៉ាង​ណា​ក៏​ដោយ ក៏​មក​ដល់​ម៉ោង​នេះ គេមិនឃើញប្រតិកម្ម ចេញពី​គណៈកម្មាធិការ​អូឡាំពិក​កម្ពុជា និង​ពី​ក្លឹប​តៃក្វាន់ដូ ដែល​កីឡាការិនី​ខ្មែររូប​នេះ ហាត់​ជាមួយ​នោះ​នៅ​ឡើយ៕

RIO២០១៦៖ ស៊ន សៀវម៉ី ចាញ់​កីឡាការិនីហូឡង់ ១-៧

RIO២០១៦៖ ស៊ន សៀវម៉ី ចាញ់​កីឡាការិនីហូឡង់ ១-៧

បើសិនជាកីឡាករកម្ពុជា បានឡើងមកដល់វគ្គ១ភាគ៨ ឬវគ្គ១៦នាក់ នៃវិញ្ញាសារតៃក្វាន់ដូ​ស្ត្រី សម្រាប់​ប្រភេទ​ទម្ងន់​លើសពី៦៧គីឡក្រាម ក៏មិនមែនជារឿងចៃដន្យនោះដែរ។ ប៉ុន្តែគឺ​លទ្ធផល ​ចេញ​ពី​ការ​ប្រកួត​ក្នុង​យប់ថ្ងៃទី ២០ ខែសីហានេះ (ព្រឹកនៅក្រុង រីយ៉ូ ប្រទេសប្រេស៊ីល) ដែល​ធ្វើ​ឲ្យ​កីឡាការិនី ស៊ន សៀវម៉ី ម្ចាស់​មេដាយ​មាស​របស់​កម្ពុជា ក្នុងអាស៊ានហ្គេមឆ្នាំ២០១៤ ត្រូវ​បាន​ជម្រុះ​ចេញ​ជា​«បណ្ដោះអាសន្ន» ក្រោយពីការប្រកួត ជាមួយ​កីឡាការិនី​​ជាតិ​ហូឡង់ ឈ្មោះ រេស៊ីមី អូហ្គីង (Reshimie Oogink) ដោយលទ្ធផល១ទល់នឹង៧។

នៅចុងបញ្ចប់ការប្រកួត កញ្ញា ស៊ន សៀវម៉ី បានសំដែងការសោកស្ដាយ និងប្រកាស​សុំ​អភ័យ​ទោស ពីសំណាក់​បណ្ដាជនខ្មែរ ដោយនិយាយថា នាងប្រកួតមិនបានល្អទេ។ ប៉ុន្តែនៅមុន​ការ​ប្រកួត កីឡាការិនី​កម្ពុជា បាន​អះអាង​ក្នុង​នាម ជាកីឡាករថា៖ «គេក៏ចង់ឈ្នះ (រីឯ)យើងវិញ​កាន់​តែ​ចង់​ឈ្នះ។ តែទោះយ៉ាងណា នាងខ្ញំុនឹងប្រឹង​​ឲ្យអស់​ពី​លទ្ឋភាព ដើម្បី​ជាតិ​យើង។»

អគ្គលេខាធិការ​គណៈកម្មាធិការ​ជាតិ​អូឡាំពិក​កម្ពុជា លោក វ៉ាត់ ចំរើន ដែលកំពុងដឹកនាំ ក្រុមកីឡាករកម្ពុជា​នៅ​ក្នុង​​ប្រទេស​ប្រេស៊ីល បានអះអាងថា កីឡាការិនី ស៊ន សៀវម៉ី នៅមិនទាន់អស់សង្ឃឹមនៅឡើយ ដោយត្រូវ​រង់ចាំ​ពិនិត្យ​មើល​លទ្ធផល​ប្រកួតបន្ត របស់កីឡាការិនីហូឡង់នេះ នៅពេលខាងមុខជាមុនសិន។ ប្រសិនជាកីឡាការិនី រេស៊ីមី អូហ្គីង ឡើងទៅដល់វគ្គផ្ដាច់ព្រ័ត្រ នោះកីឡាការិនីកម្ពុជា អាចមានសង្ឃឹម នឹងប្រកួតដណ្ដើមយក​មេដាយ​សំរិត​បាន។ ក្នុងលក្ខខណ្ឌនេះ កញ្ញា ស៊ន សៀវម៉ី នឹងត្រូវឆ្លងកាត់ការប្រកួត ចំនួនពីរដងទៀត៕


ស៊ន សៀវម៉ី និង​ការ​តស៊ូ ក្នុង​វិស័យ​កីឡា​«តៃក្វាន់ដូ»កម្ពុជា

ស៊ន សៀវម៉ី និង​ការ​តស៊ូ ក្នុង​វិស័យ​កីឡា​«តៃក្វាន់ដូ»កម្ពុជា

មានស្រុកកំណើត ក្នុង​ស្រុក​ដងទង់ ខេត្ដ​កោះកុង កញ្ញា ស៊ន សៀវម៉ី កើត​នៅ​ថ្ងៃ​ទី១៤ ខែ​កញ្ញា ឆ្នាំ១៩៩៥។ កញ្ញា​ធ្លាប់​ទទួល​បាន​មេដាយ​សំរឹទ្ធ ជា​លើក​ដំបូង សម្រាប់​កម្ពុជា​ក្នុង​ការ​ចូលរួម​ប្រកួត​កីឡា តៃក្វាន់ដូ នៅ​រដ្ឋធានី​ហូជីមិញ ប្រទេស​វៀតណាម ក្នុង​ព្រឹត្តិការណ៍​«ជើងឯក​អាស៊ី» កាល​ពី​ថ្ងៃ​ទី០២ ខែ​ឧសភា ឆ្នាំ២០១៤​ថ្មីៗ​នេះ។ ក្នុង​ពេល​នោះ កីឡាការិនី​រូប​នេះ​បាន​ប្រកួត​ឈ្នះ កីឡាការិនី​វៀតណាម ក្នុង​ពិន្ទុ​១៥​ទល់​០ តែ​នាង​បាន​ចាញ់ កីឡាការិនី​មក​ពី​ប្រទេស​កូរ៉េ ៩​ទល់​១១​វិញ។ កញ្ញា​ក៏​ធ្លាប់​បាន​ទទួល​មេដាយ​សំរិទ្ធិ ពី​កីឡា​អាស៊ាន​លើក​ទី​២៦ នៅ​ប្រទេស​ឥណ្ឌូនេស៊ី ផ្នែក​« តៃខ្វាន់ដូ»​នេះ ក្នុង​ឆ្នាំ​២០១១​កន្លង​មក​ដែរ។

ការដណ្ដើមបានមេដាយមាស ក្នុងប្រទេសកូរ៉េនេះ ចាត់ទុកថាជាការសងសិក របស់កញ្ញា ស៊ន សៀវម៉ី ទៅ​នឹងព្រឹត្តិការណ៍«ជើងឯកអាស៊ី» កាលពីថ្ងៃទី០២ ខែឧសភា ដែលកញ្ញាបានប្រកួតចាញ់កីឡាការិនី មកពី​ប្រទេសកូរ៉េ។

កីឡាការិនី ស៊ន សៀវម៉ី ទទួលមេដាយមាស សម្រាប់ទំងន់ ៧៣ គីឡូក្រាម ផ្នែកតៃក្វាន់ដូស្ត្រី ក្នុងការប្រកួត​អាស៊ីហ្គេម (Asian Games) ឆ្នាំ២០១៤ កញ្ញាបានបញ្ជាក់ថា ត្រូវឆ្លងកាត់ការប្រកួតចំនួនបួនវគ្គ។ ក្នុងវគ្គទី១ នាងបានឈ្នេះដោយស្វ័យប្រវត្តិ ដោយគូប្រគួតបានបោះបង់ចោលការប្រកួត (មិនមានគូប្រកួត)។ ក្នុងវគ្គ​ទី២ នាងជួបប្រកួតជាមួយកីឡាការិនី មកពីប្រទេសអ៊ូបេហ្គីស្ថាន ដោយឈ្នះពិន្ទុ២៩ទល់នឹង៧។ ក្នុងវគ្គទីបី ជួប​ជា​មួយកីឡាការិនី មកពីប្រទេសហ្វីលីពីន ដោយឈ្នះពិន្ទុ ៦ទល់នឹង៥។ និងក្នុងវគ្គផ្តាច់ព្រ័ត្រ ជួប​ប្រកួត​ជា​មួយ កីឡាការិនីមកពីប្រទេសអ៊ីរ៉ង់ ឈ្នះពិន្ទុ ៧ទល់នឹង ៤។ កញ្ញាបន្តថាពេលនោះហើយ ទើបធ្វើឲ្យនាង​ទទួល​បាន «មេដាយមាស» ។

បច្ចុប្បន្នកញ្ញាស្នាក់នៅ ផ្ទះលេខ ៣៣៧ ផ្លូវជាតិលេខ៥ ភូមិមិត្ដភាព សង្កាត់ឫស្សីកែវ ខណ្ឌឫស្សីកែវ។ កញ្ញា ជាសិស្សថ្នាក់ទី១២D2 នៃវិទ្យាល័យឫស្សីកែវ ហើយដោយមមាញឹក នឹងការសម ដើម្បីចូលរួមការប្រគួតនេះ បានធ្វើឲ្យកញ្ញាប្រឡងធ្លាក់ សញ្ញាបត្រទុតិយភូមិលើកទី១ កាលពីពេលថ្មីៗនេះ។ កញ្ញាជាកីឡាការិនី​ជម្រើស​ជាតិ ផ្នែក«តៃខ្វាន់ដូ»ក្នុងឆ្នាំ២០១០ មកដល់បច្ចុប្បន្ននេះ បន្ទាប់ពីបងស្រីកញ្ញាឈ្មោះ ស៊ន ដាវីន។

ក្រោយការទទួលមរណភាព របស់ឪពុកឈ្មោះ ស៊ន ម៉េងហៀង កញ្ញារស់នៅជាមួយ ម្ដាយឈ្មោះ សួន ចាន់ធី ជាមេផ្ទះ និងបងប្អូនប្រុសបីនាក់ និងស្រីបីនាក់។ ក្នុងនាមជាកូនស្រីពៅ កញ្ញា​បានហ្វឹកហាត់ក្នុង​វិស័យ​កីឡា តៃក្វាន់ដូនេះក្នុងឆ្នាំ២០១០ ជាមួយក្រុមជម្រើសជាតិកម្ពុជា។

- ឆ្នាំ២០១១ - មេដាយសំរឹទ្ធ - ស៊ីហ្គេមលើកទី២៦ ក្នុងប្រទេសឥណ្ឌូនេស៊ី
- ឆ្នាំ២០១១ - មេដាយសំរឹទ្ធ - ជើងឯក«តៃខ្វាន់ដូអាស៊ីអាគ្នេយ៍»លើកទី១០ ក្នុងប្រទេសកម្ពុជា។
- ឆ្នាំ២០១២ - មេដាយសំរឹទ្ធ - ជើងឯកតៃខ្វាន់ដូ យុវជនអាស៊ីអាគ្នេយ៍លើកទី១១ ក្នុងប្រទេសវៀតណាម
- ឆ្នាំ២០១២ - មេដាយសំរឹទ្ធ - ជើងឯកកីឡាតៃខ្វាន់ដូយុវជនអាស៊ី ក្នុងប្រទេសឡាវ។
- ឆ្នាំ២០១៣ - មេដាយមាសមួយ - ស៊ីហ្គេមលើកទី២៧ ក្នុងប្រទេសមីយ៉ាន់ម៉ា។
- និងឆ្នាំ ២០១៤ នេះ - មេដាយមាស - អាស៊ីហ្គេមលើកទី១៧ ក្នុងទីក្រុងអ៊ីឈួន នៃសាធារណរដ្ឋកូរ៉េ។

កញ្ញា ស៊ន សៀវម៉ី កីឡាការិនីតៃក្វាន់ដូ ត្រូវបានប្រមុខរដ្ឋាភិបាលកម្ពុជាលោកនាយករដ្ឋមន្រ្តី ហ៊ុន សែន បាន​បំពាក់គ្រឿងឥស្សរយស ថ្នាក់«មហាសិរីវឌ្ឍន៍» និងចាត់ទុកថាជា«វីរនារីរបស់កម្ពុជា» ក្រោយទទួល​បាន​មេដាយ​មាស ពីអាស៊ីហ្គេមលើកទី១៧នេះ។

ក្រៅពីនេះ កញ្ញាក៏ត្រូវបាននាយករដ្ឋមន្រ្តីកម្ពុជា បានផ្តល់នូវអំណោយជាច្រើនដូចជា ឲ្យជាប់សញ្ញាបត្រ​ទុតិយភូមិ ដោយស្វ័យប្រវត្តិ ជាមួយនិងអាហារូបករណ៍ នៃសកលវិទ្យាល័យរដ្ឋមួយក្នុងប្រទេសកម្ពុជា។ កញ្ញា​ទទួលបាននូវប្រាក់ឧបត្ថមប្រចាំខែ ចំនួន១០០ដុល្លារក្នុងមួយខែ រហូតដល់បញ្ចប់ថ្នាក់បរិញ្ញាបត្រ។ ក្រៅ​ពីនេះ លោកនាយករដ្ឋមន្រ្តីក៏បាន ផ្តល់នូវម៉ូតូហុងដាស្កុបពីមួយគ្រឿង, កុំព្យូទ័រយួរដៃម៉ាកApple មួយ​គ្រឿង, Ipaid មួយគ្រឿង ជាមួយនិងថវិកាចំនួន មួយម៉ឺនដុល្លារអាមេរិក ពីលើប្រាក់រង្វាន់របស់រាជរដ្ឋាភិបាល ចំនួនពីរ​ម៉ឺន​ដុល្លារ​អាមេរិក ជាមួយនឹង ប្រាក់ឧបត្ថម្ភដល់ម្ដាយកញ្ញា ចំនួនប្រាំលានរៀលថែមទៀត។ នេះ គេ​នៅ​មិន​ទាន់​រាប់ ពី​ការ​ឧបត្ថម​ជាច្រើនទៀត របស់បណ្តាសប្បុរេសធម៌ផ្សេងទៀតនៅឡើយ។

ក្នុងសន្និសីទការសែត កាលពីថ្ងៃទី០៦ ខែតុលា ឆ្នាំ២០១៤ កញ្ញាបានបញ្ជាក់ថា ថវិកាដែលទទួលបាន​ទាំង​អស់ នឹង​ដាក់ចូលប្រាក់ឧបត្ថម្ភ ដល់មន្ទីរពេទ្យគន្ធបុបា្ជចំនួន២០ភាគរយ កាកបាទក្រហមកម្ពុជា​ចំនួន២០​ភាគរយ​ដែរ ដើម្បីជួយសង្គ្រោះកុមារ និងប្រជាពលរដ្ឋក្រីក្រនៅកម្ពុជា៕

ឃើញ​រូបថត លង់​ស្នេហ៍ ស៊ន សៀវម៉ី... (pic)

ឃើញ​រូបថត លង់​ស្នេហ៍ ស៊ន សៀវម៉ី... (pic)

ពាក្យសម្ដីអបអរសាទរ គាំទ្រ សរសើរ ... មាន​ច្រើន​រាប់​មិន​អស់ ហើយ​រូបភាព​ជា​ច្រើន ក៏​ត្រូវ​បាន​ផ្សព្វផ្សាយ​យ៉ាង​ព្រោងព្រាត ពេញ​ទាំង​បណ្ដាញ​សង្គម។ វីដេអូ​ស្ដី​ពី​រូប​នាង ក៏​ត្រូវ​បាន​បង្ហោះ​ចេញ​យ៉ាង​សន្ធឹក ដោយ​មិន​បាន​ភ្លេច​ផង​ទេ ពី​ការ​សរសេរ​ដាក់​មក​ជា​មួយ នូវ​ឈ្មោះ ស៊ន សៀវម៉ី ឬ​ជា​ភាសា​ឡាតាំង SORN Seavmey របស់​កញ្ញា​ម្ចាស់​មេដាយ​មាស។

កេរ្ដ៍ឈ្មោះរបស់នាងនៅពេលនេះ មិន​មែន​មាន​តែ​នៅ​ក្នុង​ប្រទេស​កម្ពុជា​ប៉ុណ្ណោះ​ទេ តែ​បាន​ខ្ទរខ្ទារ​មក​ដល់​ក្រៅ​ប្រទេស​យ៉ាង​សម្បើម​ដែរ ជា​ពិសេស​នៅ​ក្នុង​ប្រទេស​បារាំង ដែល​សម្បូរ​ទៅ​ដោយ​ពលរដ្ឋ​ដើម​កំណើត​ខ្មែរ​រស់នៅ។ ឆ្លើយតប​នឹង​ការ​សាកសួរ​របស់​ទស្សនាវដ្ដី មនោរម្យ.អាំងហ្វូ កញ្ញា មេត្តា ដែល​ជា​និស្សិត​ខ្មែរ​នៅ​ក្នុង​រដ្ឋធានី ប៉ារីស បាន​និយាយ​ថា កញ្ញា​មាន​ការ​រំភើប​ខ្លាំង​ណាស់ ជាមួយ​នឹង​សមិទ្ធិផល​ដែល​យុវជន​ខ្មែរ ដូច​កញ្ញា​សម្រេច​បាន។ កញ្ញា​និយាយ​ថា៖ «បើខ្ញុំមានលទ្ធភាព ខ្ញុំចង់ធ្វើដូចសៀវម៉ីអញ្ចឹងដែរ»។

ចំណែក វិសុទ្ធ យុវនិស្សិតខាងច្បាប់ដែលឈរនៅក្បែរនោះ បាននិយាយថា៖ «សៀវម៉ី មុខដូចតួកុន។ បើ​មិន​ទទួលបានមេដាយ ក៏មិនអីដែរ ស្អាតប៉ុណ្ណេះនោះ...» អ្នកសារព័ត៌មានយើងបានសួរបន្ត៖ «ហេតុអី? ប្អូន​អាច​បញ្ចប់ឃ្លាបានឬទេ?» វិសុទ្ធ បានឆ្លើយមកវិញ ទាំងសើចក្អាកក្អាយថា៖ «ទាស់តែកំពស់ខ្ញុំ​ទាប​ដាច់!»។

ពិតមែនហើយ រូបសម្ផស្សស្អាតបាតរបស់កញ្ញា សៀវម៉ី បានទាក់កញ្ឆក់បេះដូងមនុស្សប្រុសមិនតិចទេ។ ទោះ​ជា​កញ្ញា សៀវម៉ី ជាអ្នកហាត់ក្បាច់គុន លោតហក់ទាត់ (កុំភ្លេចថា នាងឈ្នះមេដាយមាស ខាងវិញ្ញាសារ តៃក្វាន់ដូ) ប្រកបដោយសន្ទុះជើង«គ្មានស្រមោល»យ៉ាងណាក៏ដោយ តែរូបភាពនិងវីដេអូជាច្រើន បាន​បង្ហោះ​បង្ហាញ​ពី​ភាព​ស្រគត់ស្រគុំរបស់នាង។

អ៊ំស្រី ចន្ថា រស់នៅក្នុងក្រុង ឡូញ (Lognes) តំបន់ជាយរដ្ឋធានីបារីស បានសរសើរនាងថា មានចរយា​សម្បត្តិ​សមសួន បើទោះជានាងមានឈ្មោះជាកូនចិនក្ដី។ អ៊ំស្រីនិយាយថា៖ «មុខមាត់ស្អាតណាស់ ម៉េចជាទៅ​ពូកែ​ខាងលោតវ៉ៃទៅវិញ? តែអានេះមើលទៅ ប្រហែលជាជំនាញ និងចំណូលចិត្តរបស់នាងតែម្ដង។»

ចំណែកលោក វេង លី ម្ចាស់ភោជនីយដ្ឋានមួយ នៅក្រុង ត័ស៊ី (Torcy) ជាតំបន់ជាយរដ្ឋធានីដែរនោះ បាន​មើលរូបថតកញ្ញា សៀវម៉ី ហើយ បានកេះហៅកូនប្រុសរបស់គាត់ អាយុជិត៣០ឆ្នាំ ដែលកំពុងរៀបចំបោស​ជូតភោជនីយដ្ឋាន ឲ្យមកមើលជាមួយ។ លោកចំអន់ឲ្យកូនថា៖ «ប្រពន្ធហ្អែង ទាល់តែបានប្រហែលនាង ទើប​អាចទប់ឈ្នះ។ តែហ្អែងខូចទៅរកស្រីបារាំង ច្បាស់ជាជង្គង់ហោះ ពេលចូលផ្ទះវិញមិនខាន។»

ប៉ុន្តែកូនប្រុសលោក វេង លី មិនបានខ្វល់ខ្វាយនឹងពាក្យចំអន់របស់ឪពុកទេ តែបែរជាមកសួរអ្នក​សារព័ត៌មាន របស់ទស្សនាវដ្ដី ជាភាសាបារាំងវិញថា៖ «ធ្វើម៉េច ទើបអាចស្គាល់នាង? (On fait comment pour la connaitre?)»៕

ទស្សនាវដ្ដី សូមអញ្ជើញប្រិយមិត្តទស្សនារូបភាពរបស់កញ្ញា ស៊ុន សៀវម៉ី មួយចំនួន ដែលនាងខ្លួនឯង និង​មិត្តភ័ក្ដ បានបង្ហោះនៅក្នុងបណ្ដាញសង្គម៖