Posts tagged as "Montréal"

កាណាដា៖ អគ្គិភ័យ​ឆាប​ឆេះ​សន្ធោ​សន្ធៅ បន្ទាប់​ពី​ទូរ​រថភ្លើង​ដឹក​ប្រេង​ផ្ទុះ (VDO)

កាណាដា៖ អគ្គិភ័យ​ឆាប​ឆេះ​សន្ធោ​សន្ធៅ បន្ទាប់​ពី​ទូរ​រថភ្លើង​ដឹក​ប្រេង​ផ្ទុះ (VDO)

រថភ្លើងមួយដែលដឹកប្រេង បានងាកចេញពីផ្លូវដែករបស់ខ្លួន នៅក្នុងទីប្រជុំជនដ៏តូចមួយ ជាប់នឹងទីក្រុងកេប៊ិច (Québec) ប្រទេស​កាណាដា បង្កឲ្យមានអគ្គិភ័យបានឆាបឆេះឡើងយ៉ាងសន្ធោសន្ធៅ។


ភ្នក់ភ្លើងដ៏សន្ធោសន្ធៅ នៅពេលការផ្ទុះបានចាប់ផ្ដើមវាតអំណាចរបស់ខ្លួន។

យ៉ាងហោចណាស់ទូររថភ្លើងចំនួន៤ ដែលដឹកស៊ីទែនប្រេងឆៅ បានផ្ទុះឡើងនៅថ្ងៃសៅរ៍នេះ នៅចំកណ្ដាលទីប្រជុំជនតូច​មួយនៃទីក្រុងកេប៊ិច បន្ទាប់ពីរថភ្លើងនេះបានងាកចេញពីផ្លូវដែក ហើយបាននាំយកទៅជាមួយ នូវអាគារប្រមាណ​ជាជាង​៣០ខ្នងធ្វើជាចំណីព្រះអគ្គិ និងបង្កឲ្យមានភាពខ្វាយខ្វល់យ៉ាងខ្លាំងសម្បើម សម្រាប់បណ្ដាជនដែលនឹងអាច​ទទួលផល​ប៉ះពាល់ពីអគ្គិភ័យនេះ។

មន្ត្រីជាន់ខ្ពស់នៃទីក្រុងកេប៊ិចទទួលបន្ទុកខាងសុខភាព បានថ្លែងឲ្យដឹងថា «គេនៅមិនទាន់ដឹងអ្វីទាំងអស់ ស្ដីពីជនរងគ្រោះ និងថាមានចំនួនប៉ុន្មាននោះ»។ តែទូរទស្សន៍រដ្ឋរបស់ប្រទេសកាណាដា បានរាយការណ៍ពីជនរងគ្រោះ​ថាមាន​ចំនួនជាង​៦០នាក់ នៅក្នុងទីប្រជុំជន ឡាក់ម៉េហ្គង់ទីក (Lac-Mégantic) ស្ថិតនៅចំងាយ២៥០គីឡូម៉ែត្រ ខាងកើតនៃទីក្រុងម៉ុងរ៉េអាល់ (Montréal)។

បណ្ដាជនរស់នៅទីនោះ យ៉ាងហោច១០០០នាក់ ត្រូវបានជម្លៀសចេញ

តំបន់ជម្លៀសចេញដែលមានទំហំ១គីឡូម៉ែត្រជុំវិញ ត្រូវបានគេបង្កើតឡើង ហើយយ៉ាងហោចណាស់បណ្ដាជន​ពី​១ពាន់​ទៅ៦ពាន់នាក់ នៅទីប្រជុំជនឡាក់ ម៉េហ្គង់ទីក ត្រូវបានជម្លៀសចេញពីលំនៅដ្ឋានរបស់ពួកគេ។ ក្រុមអ្នកជួយសង្គ្រោះ​ដំបូងគេ នៅតែមិនអាចចូលទៅធ្វើអន្តរាគមន៍ នៅក្នុងតំបន់ដែលបង្កឲ្យមានការផ្ទុះដូចគ្នា នៅក្រោយពីព្រឹត្តិការណ៍ផ្ទុះមុន ដែលបានកើតឡើងនៅវេលាម៉ោងប្រមាណជា០១និង២០នាទី ដោយសារនឹងមានការផ្ទុះបន្ថែមថ្មីទៀត។

ក្បួនរថភ្លើងដឹកប្រេងរបស់ក្រុមហ៊ុន ឌឺម៉ុងរ៉េអាល់ មេនអេនអាត្លង់ទីក (The Montreal Maine & Atlantic) ដែលមានប្រាំ​ខ្សែរ និងចំនួនទូររថភ្លើងសរុប៧៧ទូរនេះ បានដឹកប្រេងមកពីរដ្ឋដាកូតា (Dakota) ផ្នែកខាងជើងនៃសហរដ្ឋអាមេរិក។ តែអ្វី​ដែលគេគិតស្មានមិនដល់ ក្បួនរថភ្លើងនេះមិនមានអ្នកបើកបរទេ ហើយមិនមានអ្នកបម្រើការណាម្នាក់​នៅលើទូរដឹក​ស៊ីទែន​ប្រេងទាំងនោះដែរ ព្រោះរថភ្លើងមានដំណើរការទៅមុខដោយការបញ្ជាជាលក្ខណៈស្វ័យប្រវត្តិ។ នេះបើតាមការថ្លែងឲ្យដឹង របស់អ្នកនាំពាក្យរបស់ក្រុមហ៊ុន លោក គ្រឹស្តូហ្វ ជួរនេត (Christophe Journet) ទៅកាន់ប្រព័ន្ធផ្សព្វផ្សាយក្នុងស្រុក៕

សូមទស្សនារូបភាព និងវីដេអូដូចខាងក្រោម៖

វីដេអូ៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី០៧ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

ឥន្ទ្រី​ហោះ​ឆាប​ឆក់​យក​ទារក​ម្នាក់ ក្នុងសួននៅ​ទីក្រុង​ម៉ុងរ៉េអាល់

ឥន្ទ្រី​ហោះ​ឆាប​ឆក់​យក​ទារក​ម្នាក់ ក្នុងសួននៅ​ទីក្រុង​ម៉ុងរ៉េអាល់

អាចជាខ្សែវីដេអូដ៏ខ្លីមួយ ដែលធ្វើអោយពិភពអាំងធើណែតរំជួយ នៅពេលចុងឆ្នាំនេះ។ ឥន្ទ្រីមួយក្បាល បានសាកល្បងនឹង​ឆាប​ឆក់​យកទៅជាមួយខ្លួន នូវទារកម្នាក់ ក្នុងសួនកំសាន្តមួយ នៅទីក្រុងម៉ុងរ៉េអាល់ ប្រទេសកាណាដា។ ទាំងខាងឪពុកម្ដាយទារក និង​ខាង​អ្នកការពារសត្វ បានដកដង្ហើមបន្ធូរទ្រូង៖ ព្រោះទាំងទារក ទាំងសត្វឥន្ទ្រីនោះ មិនមានគ្រោះថ្នាក់អ្វីឡើយ។


រូបថតពីអេក្រង់វីដេអូនេះ បង្ហាញពេលឥន្ទ្រីឆក់ទារក។

វីដេអូនោះថតជាធម្មតាដំបូង នូវសត្វបក្សីនេះ ដែលកំពុងតែហោះហើរនៅលើវេហា។ តែភ្លាមៗនោះ «រាជបក្សី»បានបន្ទាបខ្លួន រួច​ចូលមកឆក់យកទារក ដោយបានខ្ញាំទាញពីលើអាវ បានបន្តិច មុននឹងទម្លាក់ទារកចោលនៅលើស្មៅវិញ។ គេបានស្ដាប់លឺ បុរស​ម្ចាស់វីដេរអូនេះ ដែលស្បថពីការពិតនៃហេតុការណ៍ បានរត់យ៉ាងលឿនសំដៅ ទៅជួយសង្គ្រោះកុមារ ដែលទំនងមិនមានរបួស​អ្វីឡើយ។

គ្រាន់តែដាក់នៅលើ គេហទំព័រចែកផ្សាយវីដេអូ យូធូបភ្លាម មានមនុស្សប្រមាណជា ៨០០ ០០០នាក់បានចូលមកចុចទស្សនា តែ​ប៉ុន្មានម៉ោងក្រោយប៉ុណ្ណោះ នៅថ្ងៃអង្គារទី១៨ធ្នូនេះ។ អ្នកកាសែតបារាំងខ្លះ បានវិន្និច្ឆ័យថាវីដេអូនេះ មិនពិត។ មានអ្នកកាសែតខ្លះ​ទៀត សរសើរថា «តែបើទោះវាមិនពិត ក៏វាបានបង្ហាញថា អ្នកផលិតវីដេអូនេះ មានទេពកោសល្យយ៉ាងខ្ពស់»។

រាជបក្សី «ឥន្ទ្រី» ជាប្រភេទសត្វស្លាប់ធំជាងគេ នៅទ្វីបអាមេរិកខាងជើង។ តាម ណាទ្យុងណល ជេអូហ្គ្រាហ្វី សូសៃអេធី អាមេរិក (US National Geographic Society) បាននិយាយថា សត្វស្លាបនេះ អាចហោះឆាប ចាប់ចំណីរបស់វាយ៉ាងលឿន ក្នុងល្បឿន ២៤០គម ក្នុង​មួយ​ម៉ោង៕

តែបើនិយាយពី ហេតុការណ៍ក្នុងខ្សែរវីដេអូនេះវិញ គេបានឃើញទារកនោះនៅតែឯង ដោយទុកអោយឥន្ទ្រី មានឱកាសឆាបឆក់​យកទៅ គ្មានការការពារអ្វីពីឪពុកម្ដាយវាឡើយ។ បើវីដេអូនេះជាការពិត តើគេគួរទុកអោយទារករបស់ខ្លួន នៅតែម្នាក់ឯងយ៉ាង​ដូច្នេះ ឬយ៉ាងណា? សូម​បង្កើនស្មារតី ប្រុង​ប្រយ័ត្ន អោយបានខ្លាំងជាងនេះបន្តិចឡើង នៅពេលលោកអ្នកមានបុត្រតូច ហើយធ្វើ​ដំណើរ ទៅលេងកំសាន្ត​ក្នុងធម្មជាតិផងនោះ។

សូមអញ្ជើញមើលរូបវីដេអូនេះ៖

------------------------------------------------
ដោយ៖ សេក មនោរកុមារ - ប៉ារីស ថ្ងៃទី១៩ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ