វិបត្តិ​នៅ​ឧបទ្វីប​កូរ៉េ៖ អ្នកណា​ចំណាយ​ច្រើន​ជាង ក្នុង​ល្បែង​ដ៏​គ្រោះថ្នាក់​នេះ

Loading...
  • ដោយ: កេសរ កូល
  • កែប្រែចុងក្រោយ: April 01, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ការគម្រាមកាន់តែខ្លាំងទៅៗ របស់កូរ៉េខាងជើង បានបង្ហាញធ្មុងមកជាបន្តបន្ទាប់ តែក៏ទទួលបាននូវចម្លើយឆ្លើយតបវិញ យ៉ាងម៉ឺងម៉ាត់ពីសំណាក់សហរដ្ឋអាមេរិកនោះដែរ។ ម្ខាងៗ បានតម្លើងកម្លាំងសព្វាវុធតែរៀងៗខ្លួន ធ្វើអោយឧបទ្វីបកូរ៉េ កំពុងក្លាយជាល្បែងដ៏គ្រោះថ្នាក់មួយ។ «ល្បែង» ដែលអ្នកចូលរួមលេង អាចនឹងមានការចំណាយខុសៗគ្នា។


ជនជាតិកូរ៉េខាងត្បូង កំពុងសម្លឹងមើលក្បួនកងទ័ពរបស់ កូរ៉េខាងជើង។

ការបង្ហាញជាសាធារណៈ នៃការហោះសាកល្បង របស់យន្ដហោះផ្ទុកគ្រាប់បែកនុយក្លេអ៊ែរ B-2 និងយន្ដហោះប្រដេញ​ផ្សេង នៅក្នុងលំហមេឃរបស់ប្រទេសកូរ៉េខាត្បូង ទីក្រុងវ៉ាស៊ីនតោន ទំនងដូចជាចង់ពន្យុះបន្ថែមដាក់ប្រទេសកុម្មុយនីស ដែលកំពុងតែប្រើពាក្យសម្ដីទាំងក្ដៅក្រហាយស្រាប់។

លោកផូល ខារ៉ូល (Paul Carroll) មកពីមជ្ឈមណ្ឌលសិក្សានិងស្រាវជ្រាវ ផ្លូងស៊ែរ​ ហ្វាន់ (Ploughshares Fund) របស់​អាមេរិក បានថ្លែងថា «មានចម្លើយទំនងដូចជា៖ យើងបង្ហាញអោយឃើញថា ពួកយើងកំពុងត្រៀមខ្លួនប្រយុទ្ធ»។

នៅថ្ងៃសៅរ៍ទី៣០ខែមិនា ទីក្រុងព្យុងយ៉ាង បានប្រកាសដាក់ប្រទេសក្នុង«ស្ថានភាពសង្គ្រាម» ទល់នឹងកូរ៉េខាងត្បូង។ ប្រទេសបងប្អូនសត្រូវទាំងពីរនេះ មិនដែលមើលមុខគ្នាចំទេ ដោយហេតុថាសង្គ្រាមកូរ៉េរវាងឆ្នាំ១៩៥០-៥៣ បាន​បញ្ចប់​ទៅដោយ «ការឈប់បាញ់» តែមិនមែនដោយសារ «កិច្ចព្រមព្រៀង»បញ្ចប់សង្គ្រាមនោះទេ។ បន្ទាប់ពីពេលនោះមក រហូតមកដល់សព្វថ្ងៃនេះ ស្ថានភាពសន្តិភាពនៅឧបទ្វីបកូរ៉េ តែងតែរង្គោះរង្គើរជាញ៉យដង និងនៅក្នុងទម្រង់តែមួយ៖ ការគម្រាមខ្លាំងទៅៗ របស់កូរ៉េខាងជើង ហើយបន្តិចម្ដងៗ ត្រឡប់មកធម្មតាវិញ។

អាចជាការគម្រាមដូចមុន តែខុសដំណើរដើមទង

ស្ថាបនិកនៃរបបកុម្មុយនីស គីម អ៊ីល-ស៊ុង (Kim Il-Sung) និងកូនរបស់គាត់ គីម ជុង-អ៊ីល (Kim Jong-Il) ធ្លាប់លេង​ល្បែង ដែលបង្កអោយមានគ្រោះថ្នាក់ខាងវិស័យការទូតនេះ ជាច្រើនដងរួចមកហើយ ដូចជាបានបំផ្ទុះយន្ដហោះ ដឹកអ្នក​ដំណើររបស់ប្រទេសកូរ៉េខាងត្បូង​ កាលពីឆ្នាំ១៩៨៧ ឬក៏បាញ់ផ្លោងគ្រាប់ ដាក់កោះរបស់ប្រទេសកូរ៉េខាងត្បូង កាលពី​ឆ្នាំ២០១០នោះជាដើម។

ខណៈដែលកូរ៉េខាងជើង បានសម្ដែងប្រតិកម្មក្ដៅក្រហាយ នៅបន្ទាប់ពីទណ្ឌកម្មរបស់អង្គការសហប្រជាជាតិ និងការ​សម្ដែងរិទ្ធប្រចាំឆ្នាំរបស់អាមេរិក-កូរ៉េខាងត្បូងនោះ ដំណើរដើមទងនៃជម្លោះបច្ចុប្បន្ន និងអ្នកចូលរួមក្នុងវិបត្តិ មាន​ភាព​ខុសប្លែកពីពេលមុនៗ។ ក្នុងអំឡុងពេលតែបួនខែចុងក្រោយនេះប៉ុណ្ណោះ ទីក្រុងព្យុងយ៉ាងបានធ្វើសម្រេច នូវការ​សាក​ល្បងបាញ់កាំជ្រួច ផ្ទុកផ្កាយរណបទៅក្នុងលំហអវកាស។ តែសម្រាប់អាមេរិក និងសម្ព័ន្ធមិត្ត វាជាការសាកល្បងកាំជ្រួច ដែលមានភ្ជាប់ក្បាលអាវុធនុយក្លេអ៊ែរទៅជាមួយ។

ដូច្នេះទាំងសងខាង សុទ្ធតែបានគិតឃើញដូចគ្នា ថាគ្រោះថ្នាក់នឹងអាចកើតមានខ្លាំង សម្រាប់ប្រទេសផងខ្លួន ប្រសិន​ណាជាខ្លួននៅស្ងៀម មិនហ៊ានធ្វើអ្វីនោះ។ លោកផូល ខែរ៉ូលបានបញ្ជាក់ថា «សង្គ្រាមពាក្យសម្ដី ជារឿងមួយ។ តែរឿង​បាញ់កាំជ្រួច និងការសាកល្បងនុយក្លេអ៊ែរ ជារឿងមួយទៀត»។

មេដឹកនាំវ័យក្មេង និងគ្មានបទពិសោធន៍

សូមបញ្ចាក់ថា មេដឹកនាំរបស់ប្រទេសកូរ៉េទាំងពីរ ទើបនឹងឡើងមកកាន់អំណាចដូចគ្នា ដូច្នេះបទពិសោធន៍​ក្នុងការ​ដឹកនាំ​ប្រទេស ពេលមានវិបត្តិ អាចនិយាយថា មិនមានដូចគ្នា។ តែសម្រាប់លោក ប៊្រូស គ្លីនន័រ (Bruce Klingner) មកពីមូលនិធី​កេរដំណែល នៅទីក្រុងវ៉ាស៊ីនតោន បាននិយាយថា គ្រោះថ្នាក់ដែលមកពីការ«គណនាខុស» មានកម្រិតខ្លាំងជាង នៅ​ខាងអគ្គមគ្គុទេសវ័យក្មេង គីម ជុង អ៊ុន (Kim Jong-Un) ដែលមានអាយុមិនទាំងដល់៣០ឆ្នាំស្រួលបួលផងនេះ។

លោក គ្លីនន័របានបន្ថែមថា គីមជុងអ៊ុន មិនគ្រាន់តែសប្បាយចិត្តនឹងជោគជ័យ ក្នុងការបាញ់សាកល្បងកាំជ្រួចប៉ុណ្ណោះទេ តែមេដឹកនាំវ័យក្មេងរូបនេះ ក៏មិនដែលឃើញ ទីក្រុងសេអ៊ូល និងទីក្រុងវ៉ាស៊ីនតោន សម្ដែងប្រតិកម្មតបតរ យ៉ាងម៉ឺងម៉ាត់​ណា​មួយ ប្រឆាំងនឹងការវាយប្រហារមុនៗ របស់ទីក្រុងព្យុងយ៉ាងនោះដែរ។

តែលើកនេះ ទីក្រុងសេអ៊ូល បានអះអាងថា ខ្លួននឹងវាយតបវិញ។ យន្ដហោះចម្បាំងរបស់អាមេរិក នៅក្នុងលំហមេឃ បង្ហាញថា ប្រទេសកូរ៉េខាងត្បូង អាចជឿជាក់បានលើ ការគាំទ្ររ​បស់សម្ព័ន្ធមិត្តរបស់ខ្លួន។ ហើយបើទីក្រុងព្យុងយ៉ាង ចង់លេងល្បែងនៅលើកនេះមែននោះ មេដឹកនាំវ័យក្មេង លោកគីម ជុង អ៊ុន ប្រាកដជាត្រូវចំណាយដើមទុន ច្រើនជាង​អ្នកលេងផ្សេងទៀត ដើម្បីទប់នឹងការវាយត្រឡប់វិញខាងយោធាផង និងអាចពីខាងកម្លាំងផ្ទៃក្នុងផង។ ចំណែក​វិស័យ​ការទូតសោត គេពិបាកនឹងពន្យល់ណាស់ថា តើប្រទេសកូរ៉េខាងជើងនៅមានទីពំនាក់អ្វីទៀត បើសូម្បីតែចិន និងរ៉ូស្សី ក៏ទំនងជា«មិនចង់»យកខ្លួន ទៅកៀកនឹងប្រទេសកុម្មុយនីសទៀតដែរនោះ៕

--------------------------------------------------------
ដោយ កេសរកូល - ភ្នំពេញ ថ្ងៃទី៣១ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...