«សាលា​ក្តី​ខ្មែរ​ក្រហម មិន​បាន​ពន្យឺត​សំណុំ​រឿង​០០២ទេ»

នៅចំពោះការស្នើសុំ ពីសំណាក់តំណាងជនរងគ្រោះ ឲ្យតុលាការសាលាក្ដី ដែលកាត់ទោសខ្មែរក្រហម ពន្លឿន​នីតិវិធី លើសំនុំរឿង០០២នោះ អ្នកនាំពាក្យសាលាក្ដី បានបកស្រាយថា តុលាការកំពុងធ្វើការងារ​របស់ខ្លួន​យ៉ាង​​យក​​ចិត្ត​ទុក​ដាក់ និង​មិន​មានចេតនា ធ្វើឲ្យកិច្ចការទាំងនេះ​យឺត​យូរ​នោះ​ឡើយ។
«សាលា​ក្តី​ខ្មែរ​ក្រហម មិន​បាន​ពន្យឺត​សំណុំ​រឿង​០០២ទេ»
លោក នួន ជា អតីតប្រធានសភា និងជាបងធំទីពីរ នៃរបបកម្ពុជាប្រជាធិបតេយ្យ។ (រូបថតសាលាក្ដី)
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី២៦ ខែមិនា ២០១៣
  • កែប្រែចុងក្រោយ: March 26, 2013
  • ប្រធានបទ: ខ្មែរក្រហម
  • អត្ថបទ: មានបញ្ហា?
  • មតិ-យោបល់

លោកនេត្រ ភក្ត្រា អ្នកនាំពាក្យសាលាក្តីខ្មែរក្រហម បានប្រាប់ទស្សនាវដ្ដី​មនោរម្យ.អាំងហ្វូថា អ្វីដែល​តុលាការ​កំពុងតែធ្វើមិនមានចេតនាណាមួយ ក្នុងការពន្យាពេល និងធ្វើឲ្យយឺតយ៉ាវទេ។ នេះជាដំណើរការនីតិវិធីមួយ មាន​ប្រសិទ្ធិភាព ផ្តល់នូវយុត្តិធម៌ ឆ្លើយតបទៅនឹង​ផលប្រយោជន៍​គ្រប់ភាគីទាំងអស់ ដែលអាចទទួលយកបាន (ទាំង​ជនរងគ្រោះ ទាំងជនជាប់ចោទ)។

ការថ្លែងរបស់អ្នកនាំពាក្យសាលាក្ដី បានធ្វើឡើង បន្ទាប់ពីជនរងគ្រោះ និងដើមបណ្តឹងរដ្ឋប្បវេណី ចំនួន​ដប់​បី​នាក់ ដែលមកពីដប់មួយខេត្តក្រុង បានធ្វើសន្និសិទកាសែតមួយ កាលពីថ្ងៃទី២៥ ខែមីនានេះ ​ទាមទារ​ឲ្យ​សាលា​ក្តី​ខ្មែរ​ក្រហមពន្លឿន ក្នុងការបញ្ចប់សុំណុំរឿង០០២។ ការស្នើសុំនេះ បន្ទាប់ពីការស្លាប់របស់លោក អៀង សារី កាល​ពីថ្ងៃទី១២ ខែមីនា ដែលជាជនជាប់ចោទម្នាក់ ក្នុងចំណោម​ជនជាប់ចោទពីរនាក់ផ្សេងទៀត គឺលោក នួន ជា អតីតប្រធានរដ្ឋសភា នៃរបបកម្ពុជាប្រជាធិបតេយ្យ និងជាអនុលេខាបក្សកុម្មុយនីស្តកម្ពុជា និងលោក ខៀវ សំផន អតីតប្រមុខរដ្ឋ នៃរបបកម្ពុជាប្រជាធិបតេយ្យ។ ពួកគាត់បន្តថា ដោយសារតែបច្ចប្បន្ននេះ ជនជាប់​ចោទ​ពីរ​នាក់​នេះ មានវ័យកាន់តែ«ជរា»ទៅហើយ និងមានជំងឺប្រចាំកាយទៀត ខ្លាចមិនអាទ្រាំទ្រ រហូត​ដល់​មាន​សវនាការ​មួយចប់ ដែលអាចផ្តល់នូវយុត្តិធម៌ សម្រាប់ជនរងគ្រោះបាន។

ប៉ុន្តែសម្រាប់អ្នកនាំពាក្យ របស់សាលាក្ដី បានឆ្លើយបញ្ជាក់បន្ថែមថា សាលាក្តីបានគិតគូរ ចំពោះការ​ទាមទារ​របស់​ប្រជា​ពលរដ្ឋ ហើយអង្គជំនុំជំរះ នៃសាលាដំបូងនេះ ក៏កំពុងស្វែងរកពីវិធីសាស្រ្ត យ៉ាងណា ដើម្បីពន្លឿន​ការ​ជំនុំ​ជំរះក្តី ឲ្យបានឆាប់រហ័ស។ លោកបន្តថា៖ «យើងយល់ពីការទន្ទឹងរងចាំ របស់បងប្អូនប្រជាពលរដ្ឋ ដែល​ជា​ជន​រង​គ្រោះ។ អ្វីដែលសំខាន់ តុលាការបាននឹងកំពុងបំពេញការងារនេះ ដើម្បីឆ្លើយតប ទៅនឹងការ​ទន្ទឹង​រងចាំ របស់​ជន​រងគ្រោះ ដែលចង់បានយុត្តិធម៌។»។

ចំពោះលោក អ៊ឹង ហ្សឺឌី មន្ត្រីកម្មវិធី នៃគណៈកម្មាធិការប្រព្រឹត្តិកម្ម ដើម្បីសិទ្ធិមនុស្សនៅកម្ពុជា បានលើក​ឡើង​ថា ទាំងនេះជាការព្រួយបារម្មណ៍ និងជាការលើកឡើងរួមគ្នា របស់ដើមបណ្តឹងរដ្ឋប្បវេណី ក៍ដូចជាជនរងគ្រោះ ក្នុងសម័យនោះ។ លោក ហ្សឺឌី បន្តថា រាល់ការលើកឡើងទាំងអស់នេះ វាត្រឹមត្រូវ និងសមស្រប ព្រោះថា ជន​ជាប់​ចោទ​កាន់​តែជរា មានសុខភាពកាន់តែទ្រុទទ្រោម ដូច្នេះពួកគាត់ចង់មើលឃើញ ដំណើរការក្តីនេះទៅមុខ បាន​ដោយ​រលូន និងឆាប់រហ័ស។ ម្យ៉ាងទៀត បញ្ហាថវិការរបស់តុលាការ ក៏ជាកង្វល់មួយ ដែលគិតថា តើ​តុលាការ​អាច​​បន្តដំណើ​របស់ខ្លួនយូរ ដល់ពេលណានោះទេ។

សេចក្ដីប្រកាសព័តមានរួម របស់វិទ្យាស្ថានស្រាវជ្រាវបញ្ហាសង្គម (ASRIC) គណៈកម្មាធិការប្រព្រឹត្តិកម្ម ដើម្បី​សិទ្ធិ​មនុស្ស​នៅកម្ពុជា(CHRAC) និងសមាគមក្សេមក្សាន្ត (KSAEM KSAN) ក៏បានទទូច ឲ្យសាលាក្ដី​ខ្មែរ​ក្រហម ចាប់ផ្ដើមលើកយកបទចោទធំៗ រួមមានបទប្រល័យពូជសាសន៍ និងអាពាហ៍ពិពាហ៍ចាប់បង្ខំជាដើម នៅ​ក្នុង​សំណុំ​រឿង​០០២ មកបើកសវនាការកាត់សេចក្ដីដែរ។

ចំពោះករណីនេះ លោក នេត្រ ភក្ត្រា បានបញ្ជាក់ថា ការទាមទារនេះ ជាការទាមទាមួយស្របច្បាប់ របស់​ពួក​គាត់។ អ្វីដែលសំខាន់ តុលាការកំពុងធ្វើការ ទៅលើការងារទាំងអស់នះហើយ ការសម្រេច ការបំបែកនីតិវីធី របស់​សាលាដំបូង និងការបន្តសំណុំរឿង និងការបញ្ចូលអង្គហេតុ យ៉ាងណានោះ ជានីតិវិធីនៃអង្គជំនុំជំរះ​សាលា​ដំបូង ដែលលោកបំពេញតាមកាតព្វកិច្ច ស្របតាមនីតិវិធីច្បាប់ និងវិធានផ្ទៃក្នុងដែលមានចែង។ លោក​បន្ត​ថា នៅថ្ងែទី២៩ ខែមីនា ខាងមុខនេះ អង្គជំនុំជំរះនឹងប្រកាស ពីការសម្រេចដ៏សំខាន់ចំនួនពីរ ដោយ​«ផ្ទាល់​មាត់»។ អ្នកនាំពាក្យបានបញ្ជាក់ថា៖ «ទីមួយកិច្ចបំបែក​ដំណើរការនីតិវីធី និងទីពីរ ការទាមទារបស់​ជន​ជាប់​ចោទ នួន ជា មុននឹងឈានដល់ថា តើដំណាក់ការអ្វី វិធីសាស្រ្តអ្វី និងនីតិវីធីអ្វីខ្លះ ដែលអង្គជំនុំជំរះ​ត្រូវ​ចាត់​វិធានការ ដើម្បីពន្លឿននីតិវិធីនេះ»។

ឯលោក អ៊ឹង ហ្សឺឌី បានបញ្ជាក់ថា ការដែលអង្គការលោក ចេញនូវសេចក្ដីប្រកាសព័តមានរួមគ្នា ដោយ​បញ្ចូល​បទប្រល័យពូជសាសន៍ និងអាពាហ៍ពិពាហ៍ចាប់បង្ខំ ក្នុងសំនុំរឿង០០២នេះ ព្រោះតែ ចង់ពន្លឿនរឿងក្តីនេះ ឲ្យ​បានឆាប់ចប់ ដោយយកករណីទាំងពីនេះ មកសម្រេចក្នុងសំនុំរឿង០០២​តែម្តង។ លោកបន្តថា ដូចករណី​ទី​មួយ ឧក្រិដ្ឋកម្មប្រឆាំងមនុស្សជាតិ ករណីទីពីរឧក្រិដ្ឋកម្មសង្គ្រាម និងករណីទីបី ឧក្រិដ្ឋកម្មប្រល័យពូជសាសន៍ ដែល​ត្រូវ​ចំណាយ​ពេល ដោយឡែកពីគ្នាច្រើន ដូច្នេះអង្គការទាំងបី មិនចង់ឲ្យមានការបំបែកសំណុំរឿង ដោយ​ឡែក​គ្នានោះទេ។ លោកបន្ថែមថា ការធ្វើដូចនេះ វាអាចពន្លឿននីតិវិធី និងស្របតាមបំណងប្រាថ្នា របស់ជន​រងគ្រោះ ក៏ដូចជាជនជាប់ចោទ។

ឥឡូវនេះសាលាជំនុំជំរះសាលាក្តីខ្មែរក្រហម មានជនជាប់ចោទ​តែពីរនាក់ប៉ុណ្ណោះ ដែលស្ថិតក្នុងភាពចាស់ជរា និងមានជំងឺប្រចាំកាយ៖ លោក នួន ជា អតីតប្រធានរដ្ឋសភានៃរបបកម្ពុជាប្រជាធិបតេយ្យ និងអនុលេខា​បក្ស​កុម្មុយនីស្ត​កម្ពុជា និងលោក ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យ ដែលកំពុងត្រូវបាន​ជំនុំ​ជម្រះ​ក្តី ពាក់ពន្ធ័នឹងបទឧក្រិដ្ឋកម្មប្រឆាំងមនុស្សជាតិ ការរំលោភបំពានធ្ងន់ធ្ងរ លើអនុសញ្ញា ទីក្រុង​ហ្សឺណែវ​ឆ្នាំ១៩៤៩ និងឧក្រិដ្ឋកម្មប្រល័យពូជសាសន៍។

ដោយឡែកសំនុំរឿង របស់លោក អៀង សារី ដែលជនជាប់ចោទរួម នៅក្នុងសំណុំរឿង០០២នេះ ត្រូវបាន​បញ្ចប់​ហើយ កាលពីថ្ងៃទី១៤ ខែមីនា ឆ្នាំ ២០១៣ ក្រោយពីលោក បានទទួលមរណភាព។ រីឯលោកស្រី អៀង ធីរិទ្ធ អតីត​រដ្ឋមន្ត្រីសង្គមកិច្ច នៃរបបកម្ពុជាប្រជាធិបតេយ្យ ត្រូវជាប្រពន្ធលោក អៀង សារី ក៏ត្រូវបានចោទ​ប្រកាន់​ដូចគ្នាដែរ។ តែដោយកាយសម្បទា និងបញ្ញាស្មារតី មិនគ្រប់គ្រាន់ ក្នុងការចូលរួមការជំនុំជម្រះក្តី ដោយ​សារ​គាត់​មាន​ជំងឺបាត់ការចងចាំ អ្នកស្រី អៀង ធីរិទ្ធ ត្រូវបានបំបែកចេញ ពីសំណុំរឿងនេះ នៅខែវិច្ឆិកា ឆ្នាំ​២០១១​កន្លងមក៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...