មតិពលរដ្ឋប៉ែកពាយព្យប្រទេស ជុំវិញការស្លាប់របស់ អៀង សារី
- ដោយ: អ៊ុម វ៉ារី
- កែប្រែចុងក្រោយ: March 20, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
ប្រជាពលរដ្ឋខ្មែរជាទូទៅ នៅតំបន់ប៉ែកពាយព្យនៃប្រទេសកម្ពុជា ពុំបានដឹងពីការស្លាប់ របស់លោក អៀង សារី នោះទេ។ ប៉ុន្តែពលរដ្ឋមួយចំនួន ដែលដឹង បានបញ្ចេញមតិទាក់ទងនឹងភាពយុត្តិធម៌ ថា«មិនទាន់មាន» សម្រាប់ជនរងគ្រោះស្លាប់ជិតពីរលាននាក់ នៅក្នុងរបប ដែលលោកគ្រប់គ្រងនោះនៅឡើយ។ ពួកគាត់បានគិតថាការស្លាប់នេះ ជាផ្នែកមួយធ្វើឲ្យបាត់ នូវ«ភស្តុតាង»ដ៏សំខាន់ ក្នុងការស្វែងរកយុត្តិធម៌ ឲ្យជនរងគ្រោះក្នុងរបបអាវខ្មៅមួយនេះ។
លោកអៀង សារី។
ក្នុងដំណើរទៅធ្វើបទយកការណ៍ នៅក្នុងតំបន់នេះ អ្នកសារព័ត៌មានរបស់មនោរម្យព័ងអាំងហ្វូ បានធ្វើសម្ភាសតាមផ្លូវ ជាហូរហែរ ដើម្បីចង់ដឹងពីប្រតិកម្មរបស់ពលរដ្ឋខ្មែរ ជុំវិញមរណភាពរបស់អតីត លោកអៀង សារី ឧបនាយករដ្ឋមន្ត្រី និងជារដ្ឋមន្ត្រីការបរទេស នៃកម្ពុជាប្រជាធិបតេយ្យ (១៩៧៥-១៩៧៩)។
មរណភាព និងកេរ្តិ៍ឈ្មោះ ក្នុងនាមអ្នកដឹកនាំមួយរូប
អ្នកស្រី សុ ម៉ាវត្តី អាយុ ៤២ឆ្នាំ អ្នកលក់ភេសជ្ជៈ ស្រុកអូជ្រៅ បាននិយយាយថា អ្នកស្រីមិនបានដឹងពីការស្លាប់នេះទេ ជាប់រវល់លក់ដូរ។ អ្នកស្រីក៏បានបាត់បង់ឪពុកម្តាយ ក្នុងរបបប៉ុលពតនេះដែរ «ខ្ញុំរស់នៅបាន ដោយសាឪពុកធំចឹញ្ចិមបីបាច់»។ អ្នកស្រីដកដង្ហើមធំ រួចបន្តថា នេះជាការវិវឌ្ឍន៍របស់សង្គម ជាបញ្ហាអ្នកដឹកនាំនយោបាយ សុខឬទុក្ខ អាស្រ័យលើមេដឹកនាំ។ អ្នកស្រីបានបញ្ចេញ នូវគំនិតរិះគន់មួយចំនួនថា ក្នុងនាមជាមេដឹកនាំនាសម័យនោះ ទោះបីយ៉ាងណា គាត់ត្រូវតែមានការទទួលខុសត្រូវខ្ពស់ មុននឹងគាត់ស្លាប់។ សោកស្តាយដែលគាត់ស្លាប់ ទាំងមិនទាន់បានសម្រេចសេចក្តី រឿង«សម្លាប់សាសន៍ឯងផង»។ តែទោះជាយ៉ាងនេះក្តី គាត់ស្លាប់ទៅ នាំទាំង«កេរ្តិ៍ឈ្មោះអាក្រក់»ទៅជាមួយ។
លោកគ្រូម្នាក់នៃវិទ្យាល័យមួយក្នុងស្រុកអូជ្រៅ ខេត្តបន្ទាយមានជ័យ លោក វីរៈ ប៊ុត លើកឡើងថា លោកក៏មានឪពុកបានស្លាប់ក្នុងសម័យនោះ ដោយការអត់ឃ្លាន ហូបមិនគ្រប់ ធ្វើការធ្ងន់ ឈឺគ្មានថ្នាំព្យាបាលដែរ។ លោកបន្តថា «ចំពោះការស្លាប់នេះ បានធ្វើឲ្យមានការបាត់បង់នូវសាក្សី និងភស្តុតាង ព្រោះគាត់ជាអ្នកដឹកនាំនាសម័យនោះគាត់ដឹង។ វាអយុត្តិធម៌ចំពោះរាស្រ្តហើយ និយាយរួមអយុត្តិធម៌ចំពោះប្រជាជន។ គ្មានសកលលោកណា ដែលជាតិឯងសម្លាប់ជាតិសាសន៍ឯង នោះមិនទាន់មានទេ ទើបមានតែខ្មែរមួយ ដែលមាននយោបាយសម្លាប់ជាតិឯង។»
លោកយាយ ម៉ែន សារី ក្នុងព្រះជន្ម៧០ឆ្នាំ ជាប្រជាពលរដ្ឋ ស្រុកសេរីសោភណ្ឌ័ ខេត្តបន្ទាយមានជ័យ បាននិយាយថា លោកយាយមានកំហឹងចំពោះសម័យនោះ ដែលធ្វើឲ្យលោកយាយព្រាត់ប្រាស់ប្តី បងប្អូន និងកូន។ លោកយាយបន្តថា គំនុំចេះតែមាន ក្នុងនាមលោកយាយជាប្រជារាស្រ្តធម្មតា មិនអាចធ្វើអ្វីកើតនោះទេ។ ម្យ៉ាងទៀតជីវិតត្រូវតែអស់ មនុស្សមួយៗ កាលណាមានកំហុសប៉ុណ្ណា ដល់ពេលគាត់ស្លាប់ចេះតែស្តាយ ធ្វើម៉េចបើគាត់ត្រូវអស់អាយុហើយ។ មិនទាន់កាត់ទោសផងគាត់ ស្លាប់មុនអញ្ចឹង ក៏«ស្រួល»គាត់ដែរ។
រីឯលោក សុធារ៉ា ដែលកំពុងដឹកអ្នកដំណើរ ឆ្ពោះទៅភោជនីយដ្ឋានស្ទឹងសែន បាននិយាយាថា ការស្លាប់របស់លោកនេះ បាននាំទៅជាមួយ«នូវភស្តុតាងដ៏សំខាន់» ក្នុងការផ្តល់នូវ«យុត្តិធម៌»សម្រាប់ជនរងគ្រោះ ដែលមានឪពុក ម្តាយ បងប្អូន បានស្លាប់នាជំនាន់នោះ។ «ពិបាននឹងរកសាក្សីណា ដែលជាក់លាក់ជាងនេះ មកបង្ហាញណាស់»។
«មេខ្លោងធំ» ដែលជា«អ្នកបញ្ជាពិតប្រាកដ»
ប្រជាជនដែលស្គាល់លោកអៀង សារីច្បាស់ និងធ្លាប់រស់នៅ ក្នុងតំបន់ដែលខ្មែរក្រហមកាន់កាប់ នៅតែសម្ដែងនូវការគោរពស្រឡាញ់ អតីតមេដឹកនាំខ្មែរក្រហមរូបនេះ ដោយបានចាត់ទុកលោក ជាអ្នកបានចូលរួមចំណែក ក្នុងការការពារបូរណភាពទឹកដី និងកសាងសង្គមជាតិស្អាតស្អំ។ តែពលរដ្ឋជាទូទៅ បាននិយាយថា លោក អៀង សារី គួរតែមានជីវិតបន្តទៀត ទើបប្រសើរ ដើម្បីបង្ហាញនូវភាពយុត្តិធម៌ ដល់ជនរងគ្រោះជិតពីរលាននាក់ ដែលបានស្លាប់នៅក្រោមការគ្រប់គ្រង របស់ក្រុមរបស់លោក ពីឆ្នាំ១៩៧៥ មកដល់ឆ្នាំ១៩៧៩នោះ។
លោកតា ជា អន កំពុងតែអង្គុយទទួលទានតែ ក្នុងហាងកាហ្វេរមួយ ដែលមើលទៅ ទំនងជាមន្រ្តីរាជការចូលនិវត្តន៍ម្នាក់។ បុរសចំណាស់អាយុ ៦៨ឆ្នាំរូបនេះ បានរំលឹកអនុស្សាវរីយ៍ឡើងវិញថា ក្នុងសម័យនោះលោកតារស់នៅ មិនពិបាកដូចអ្នកឯទៀតទេ ដោយសារលោកតាជាចុងភៅស្រាប់។ តែលោកតា ក៏មានបងប្អូន និងកូន បានស្លាប់ក្នុងជំនាន់នោះអស់ចំនួនប្រាំនាក់ដែរ។ ចំពោះលោកតា និងប្រជាពលរដ្ឋដែលមានបងប្អូន ឪពុកម្តាយ ស្លាប់ក្នុងជំនាន់នោះប្រាកដជាមិនសុខចិត្តទេ ព្រោះមិនទាន់បានផ្តល់នូវភាពយុត្តិធ៌ម ជូនពួកគាត់នៅឡើយ។ ជាពិសេស គាត់នៅមិនទាន់បានប្រាប់ពី«មេខ្លោងធំ» ដែលជា«អ្នកបញ្ជាពិតប្រាកដ» ថាមួយណានៅឡើយ។ លោកតាក៏បានសសើរផងដែរថា ក្នុងរបបគ្រប់គ្រង់របស់គាត់ មិនមានការបាត់បង់ទឹកដីនោះទេ ជាពិសេសក្នុងខេត្តបន្ទាយមានជ័យនេះតែម្តង អ្នកស្រុកម៉ាឡៃ និងអ្នកខេត្តបន្ទាយមានជ័យភាគច្រើន គោរពស្រលាញ់គាត់។
ឯយុវនិស្សិតខាងប្រត្តិសាស្រ្តមួយរូប ឈ្មោះ រ៉ាម វាសនា អាយុ២៥ឆ្នាំ ដែលកំពុងអានសៀវភៅនៅមុខផ្ទះ នាខេត្តបន្ទាយមានជ័យបាននិយាយថា ប្អូនបានដឹងដំណឹងពីការស្លាប់របស់លោកតា អៀង សារី នេះតាមរយៈបណ្តាញផ្សព្វផ្សាយសង្គម ហ្វេសប៊ុក (Facebook)។ ប្អូនបន្តថា តាមការសិក្សា ប្អូនមិនមានកំហឹងចំពោះលោកតាទេ ព្រោះគាត់ក៏ស្ថិតនៅក្រោមបង្គាប់របស់គេដែរ។ «អាចនិយាយថា នៅក្រោមបង្គាប់របស់ បរទេសក៏បាន។ តែថាអ្វីដែលស្តាយនោះ ដោយគាត់មិនបាននិយាយប្រាប់ ពីប្រវត្តិនៃការដឹកនាំក្នុងសម័យនោះ ព្រោះគាត់បានដឹង បានឮ និងបានឃើញច្រើន ទុកសម្រាប់ជាយានយុត្តិធម៌ ក្នុងការសម្រេចសេចក្តី ក្នុងសាលាក្តីខ្មែរក្រហមនៅថ្ងៃខាងមុខ។»
តំបន់តស៊ូចុងក្រោយ ...
លោក អៀង សារី កើតនៅថ្ងៃទី២៤ ខែតុលា ឆ្នាំ ១៩២៥ និងត្រូវបានចាប់ខ្លួននៅថ្ងៃទី១២ ខែវិច្ឆិកា ឆ្នាំ ២០០៧ សម្រាប់វិនិច្ឆ័យទោស ក្នុងតុលាការកូនកាត់ រវាងរដ្ឋាភិបាលខ្មែរ និងអង្គការសហប្រជាជាតិ ដែលគេហៅថា អង្គជំនុំជម្រះវិសាមញ្ញក្នុងតុលាការកម្ពុជា ឬ អ.វ.ក.ត។ ទាក់ទងនឹងដំណើរការក្ដី ពលរដ្ឋភាគច្រើនបានគិតថា ការបាត់បង់ជីវិតរបស់បងធំទីបី លោក អៀង សារី ដែលជាសាក្សី និងជាបណ្តុំឯកសារស្រាវជ្រាវដ៏សំខាន់មួយនោះ ទំនងជានឹងមិនប៉ះពាល់ការសម្រេច លើសំណុំរឿង០០២នោះឡើយ។
អតីតប្រមុខការទូត ក្នុងរបបខ្មែរក្រហមរូបនេះ មានកូនបួននាក់ ប្រុសម្នាក់ និងស្រីបីនាក់ រស់នៅក្នុងខេត្តប៉ៃលិន។ កូនច្បងស្រីឈ្មោះ អៀង ម៉ិញ កូនទីពីស្រីឈ្មោះ អៀង នាថ កូនទីបីជាប្រុសឈ្មោះ អៀង វុធ និងកូនស្រីពៅឈ្មោះ អៀង រ៉ា។ ឯកូនប្រុសបច្ចុប្បន្ន ជាអភិបាលរងខេត្តប៉ៃលិន។
ក្នុងអាយុ ៨៧ឆ្នាំ លោក អៀង សារី គាត់បានស្លាប់ នៅព្រឹកថ្ងៃទី១៤ ខែមីនា វេលាម៉ោង៨ និង៤៥ នាទី ក្រាយពីបានចូលសម្រាក ព្យាបាលជំងឺបេះដូងបានដប់ថ្ងៃ នៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។ សពលោក អឿង សារី នឹងត្រូវបូជានៅថ្ងៃទី២១ ខែមីនា ឆ្នាំ២០១៣ខាងមុខនេះ ស្ថិតនៅភូមិដូង ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ដែលជាផ្ទះ និង«តំបន់តស៊ូ»ចុងក្រោយ របស់លោក ក្នុងនាមជាមេដឹកនាំចលនាទ័ពព្រៃខ្មែរក្រហម៕
---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៩ មីនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ