តម្លៃរថយន្តដែលប្រើចរន្តអគ្គីសនី មានការធ្លាក់ចុះ ដោយសារតែបញ្ហាបញ្ចូលចរន្ត មិនទទួលបានដំណោះស្រាយល្អ។ កន្លែង​សាកចរន្តនៅមានចំនួនតិច និងមានចម្ងាយឆ្ងាយ ម្យ៉ាងវិញទៀតវាត្រូវការពេលវេលាច្រើន ក្នុងការបញ្ចូល​ចរន្ត​នោះ មុននឹងរថយន្ដ អាចមានដំណើរការឡើងវិញ។

រថយន្តដែលប្រើចរន្តអគ្គីសនី ត្រូវការមានកន្លែងសាកបញ្ចូលថាមពល។ ដូច្នេះគេត្រូវការបច្ចេកវិទ្យាមួយ ដើម្បីបញ្ចូលវាពីចម្ងាយ។

លោក ស្វិន បេគឺ (Sven Beiker) នាយកប្រតិបត្តិនៃមជ្ឈមណ្ឌលស្រាវជ្រាវស្វ័យយន្ត នៅឯសាកលវិទ្យាល័យ ស្តេមហ្វដ (Stanford University) ក្នុងរដ្ឋកាលីហ្វញ៉ា (California) បាននិយាយថា «យានយន្តដែលប្រើប្រាស់ចរន្តអគ្គីសនីនេះ មិន​ទាន់មានស្ថានីយសាកចរន្តច្រើននៅឡើយទេ ហើយបើអ្នករកឃើញស្ថានីយហើយ ក៏អ្នកត្រូវចំណាយពេលច្រើន ក្នុង​ការ​សាកវាឲ្យពេញដែរ។ ដូច្នេះវាពិតជាខាតពេល ដល់ការធ្វើដំណើររបស់អ្នក។»

ក្នុងរដ្ឋកាលីហ្វញ៉ា ក្រុមអ្នកស្រាវជ្រាវមួយក្រុម នៅឯសាកលវិទ្យាល័យ ស្តេមហ្វដ បានបង្កើត ប្រព័ន្ធសាកចរន្ត​ដោយ​ប្រើ​ប្រាស់ ម៉ាញ៉េទិច ដើម្បីបញ្ជូនចរន្តទៅកាន់អាគុយរថយន្ត ដោយប្រព័ន្ធមិនប្រើខ្សែរ (វ៉ាយអឺឡេស wireless)។ មហិច្ឆិតារបស់ពួកគេ គឺដើម្បីអភិវឌ្ឍន៏គ្រប់ផ្លួវទាំងអស់ ឲ្យមានចរន្តអគ្គីសនី ដែលអាចបញ្ចូលចរន្តដោយស្វ័យប្រវត្តិ នៅពេលដែលពួកគេ​ធ្វើ​ដំណើរតាមដងផ្លូវ។

លោក ស្វិន បេគឺ បានពន្យល់ថា «ប្រសើរណាស់ ប្រព័ន្ធសាកចរន្តដោយមិនប្រើខ្សែរ គឺជាអ្វីដែលពិភពលោកត្រូវការ។ អ្នក​អាច​សាកចរន្តដោយមិនចាំបាច់ ប្រើប្រាស់ខ្សែអ្វីទាំងអស់ រវាងឧបករណ៏សាក និងរថយន្ត។ នេះមានន័យថា អ្នកអាចបញ្ជូន​ថាមពល ពីចម្ងាយ ដោយមិន ចាំបាច់ទៅដល់ស្ថានីយតែម្តងក៏បាន។»

តាមការស្ទង់មើលរបស់អ្នកវិទ្យាសាស្រ្តបានឲ្យដឹងថា តម្លៃរថយន្ត ដែលប្រើប្រាស់ដោយចរន្តអគ្គីសនីនេះ គឺថ្លៃជាងរថយន្ត ដែលប្រើប្រាស់ប្រេងសាំង ឬម៉ាស៊ូត ដល់ទៅពាក់កណ្តាល។ ប៉ុន្តែពួកវា មានភាពប្រសើរចំពោះបរិដ្ឋាន ហើយពួកវា​មិន​ត្រឹមតែជាអ្នកសំអាតបរិដ្ឋានទេ គឺថែមទាំងគ្មានសំលេងរំខាន ថែមទៀត។ ប៉ុន្តែនៅតែមានបញ្ហាចោទជាសំនួរថា តើរថយន្ត​ដែលប្រើប្រាស់ចរន្តអគ្គីសនីនេះ អាចធ្វើដំណើរបានចម្ងាយឆ្ងាយប៉ុន្មាន មុនពេលដែលត្រូវអស់ថាមពលពីអាគុយ។ ទាំង​នេះគឺជាមូលហេតុមួយ ដែលធ្វើឲ្យអតិថិជន មានការព្រួយបារម្មណ៏ និងពិបាកសម្រេចចិត្តក្នុងការទិញ។

ប៉ុន្តែប្រព័ន្ធសាកចរន្តមិនប្រើខ្សែរ អាចជាចម្លើយ និងជាដំណោះស្រាយចំពោះបញ្ហានេះ។ វាមិនចាំបាច់ខិតខំច្រើន ហើយ​អាចជួយដោះស្រាយបញ្ហានៃការរង់ចាំ ការសាកចរន្តអាគុយរថយន្តរបស់អ្នកជាច្រើនម៉ោង ដោយគ្រាន់តែ​ចំណាយ​ពេលវេលា បន្តិចបន្តួចប៉ុណ្ណោះជាការស្រេច៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៩ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ