អាមេរិកហៅការចោទស្ថានទូតខ្លួន ពីការលូកដៃចូលកិច្ចការផ្ទៃក្នុងកម្ពុជា ថា«គ្មានមូលដ្ឋាន»
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី១៤ វិច្ឆិកា ២០១៧
- កែប្រែចុងក្រោយ: November 14, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
«ភាគីសហរដ្ឋអាមេរិក បានគូសបញ្ជាក់ថា ការចោទប្រកាន់ និងការរិះគន់ ដោយគ្មានមូលដ្ឋាន ទៅលើសហរដ្ឋអាមេរិក ក៏ដូចជាទៅលើមន្ត្រីការទូតអាមេរិក នៅក្នុងប្រទេសកម្ពុជា បានធ្វើឡើងផ្ទុយនឹងស្មារតី នៃទំនាក់ទំនងទ្វេភាគី ប្រកបដោយផ្លែផ្កា ដែលកំពុងតែល្អប្រសើរឡើង រវាងប្រទេសទាំងពីរ»។
ខាងលើនេះ ជាការដកស្រង់មួយ ពីក្នុងសេចក្ដីថ្លែងការណ៍ របស់ស្ថានបេសកកម្មសហរដ្ឋអាមេរិក ប្រចាំនៅសមាគមអាស៊ាន បន្ទាប់ពីជំនួបមួយ ក្នុងថ្ងៃនេះ រវាងលោក ប្រាក់ សុខុន រដ្ឋមន្ត្រីការបរទេសកម្ពុជា ជាមួយនឹងលោក «Matt Pottinger» ជំនួយការរង របស់លោកប្រធានាធិបតី ដូណាល់ ត្រាំ និងលោក «Patrick Murphy» ឧបការីរងរដ្ឋមន្ត្រីក្រសួងការបរទេសសហរដ្ឋអាមេរិក ទទួលបន្ទុកកិច្ចការអាស៊ីអាគ្នេយ៍ ដែលបានប្រព្រឹត្តិទៅ ក្នុងរដ្ឋធានីម៉ានីល ប្រទេសហ្វីលីពីន។
ការលើកឡើងខាងលើ គឺជាការឆ្លើយតប ពីសំណាក់ភាគីអាមេរិក ជាពិសេសពីសំណាក់ លោកប្រធានាធិបតី ដូណាល់ ត្រាំ (Donald Trump) ទៅនឹងការថ្លែងមួយរបស់លោក ហ៊ុន សែន ដែលបានអះអាងទៅកាន់លោក ដូណាល់ ត្រាំ កាលពីថ្ងៃចន្ទ ទី១៣ ខែវិច្ឆិកាម្សិលម៉ិញ នៅក្នុងកិច្ចប្រជុំកំពូល រវាងសហរដ្ឋអាមេរិក និងអាស៊ាន ថាកម្ពុជាបាន និងកំពុងរងគ្រោះម្តងហើយម្តងទៀត ដោយសារសកម្មភាពរបស់ស្ថានទូតអាមេរិក ប្រចាំក្នុងប្រទេសកម្ពុជា បានងាកចេញ ឬដើរខុសពីបន្ទាត់នយោបាយរបស់លោក ដូណាល់ ត្រាំ។ នយោបាយរបស់លោក ត្រាំ ដែលលោក ហ៊ុន សែន យកមកបញ្ជាក់ថា មិនជ្រៀតជ្រែកចូលកិច្ចការផ្ទៃក្នុង របស់ប្រទេសដទៃ។
នៅចំពោះមុខមេដឹកនាំ នៃប្រទេសជាច្រើន ក្នុងកិច្ចប្រជុំកំពូលអាស៊ាននោះ លោក ហ៊ុន សែន បានស្នើចំៗ ទៅកាន់លោក ដូណាល់ ត្រាំ ថា៖ «នយោបាយរបស់ឯកឧត្តម (ដូណាល់ ត្រាំ) កំពុងតែធ្វើការកែប្រែ ប៉ុន្តែស្ថានទូត [អាមេរិក] នៅទីក្រុងភ្នំពេញ មិនទាន់បានធ្វើការកែប្រែទេ។ យើងខ្ញុំត្រូវការកសាងច្បាប់ គេមករារាំងការកសាងច្បាប់ យើងខ្ញុំអនុវត្តនូវការអនុវត្តច្បាប់របស់ប្រទេស ត្រូវបានគេរារាំង។ ចំណុចនេះ ខ្ញុំគិតថាប្រហែលជាឯកឧត្តមត្រូវមានភារកិច្ច ដើម្បីដាស់តឿន ជាមួយនឹងមន្ត្រីទាំងឡាយ ព្រោះរឿងនេះជាគោលការណ៍ធំណាស់ ទាក់ទងការមិនជ្រៀតជ្រែក ចូលកិច្ចការផ្ទៃក្នុងគេ។»។
ជាចម្លើយតបវិញ ពីសំណាក់ប្រធានាធិបតីអាមេរិក លោក ដូណាល់ ត្រាំ តាមរយៈមន្ត្រីជាន់ខ្ពស់របស់លោក បានលើកឡើងថា រដ្ឋបាលរបស់លោកប្រធានាធិបតី មិនបានចាត់ទុក សកម្មភាពកន្លងមកពីសំណាក់សហរដ្ឋអាមេរិក ឬពីសំនាក់ស្ថានទូតអាមេរិក ប្រចាំកម្ពុជា ថាជាការជ្រៀតជ្រែក ចូលកិច្ចការផ្ទៃក្នុង របស់កម្ពុជានោះឡើយ។ ការបដិសេធខាងលើ ត្រូវបានធ្វើឡើងទៅកាន់រដ្ឋមន្ត្រីការបរទេសកម្ពុជា ហើយបានធ្លាក់មកដល់ដៃអ្នកសារព័ត៌មាន នៅល្ងាចថ្ងៃដដែល តាមរយៈសេចក្តីថ្លែងការណ៍ របស់ស្ថានបេសកកម្មសហរដ្ឋអាមេរិក ប្រចាំនៅសមាគមអាស៊ាន។
បន្ថែមពីលើនោះ សេចក្ដីថ្លែងការណ៍ដដែល នៅបានលើកឡើង ពីការព្រួយបារម្ភ របស់អាមេរិក ចំពោះការវិវត្តថ្មីៗ នៃស្ថានការណ៍នយោបាយនៅកម្ពុជា ដែលអាចធ្វើឲ្យប៉ះពាល់ដល់លទ្ធិប្រជាធិបតេយ្យ រាប់បញ្ចូលទាំងការរឹតត្បិត លើសេរីភាពរបស់សារព័ត៌មាន អង្គការសង្គមស៊ីវិល និងគណបក្សប្រឆាំង។ អត្ថបទបានបន្តថា៖ «ប្រតិភូសហរដ្ឋអាមេរិក ក៏បានគូសបញ្ជាក់ដែរ អំពីការខ្វាយខ្វល់ដ៏ជ្រាលជ្រៅ របស់សហរដ្ឋអាមេរិក ចំពោះការបន្តឃុំខ្លួន លោក កឹម សុខា ប្រធានគណបក្សប្រឆាំង»។
សេចក្ដីថ្លែងការណ៍ បានសរសេរទៀតថា៖ «តំណាងមកពីសហរដ្ឋអាមេរិក បានសម្តែងក្តីសង្ឃឹមថា ប្រទេសកម្ពុជានឹងឱ្យតម្លៃខ្ពស់ ដល់ការរីកចម្រើនដែលទទួលបានដោយលំបាក ដែលកម្ពុជាសម្រេចបាន ក្នុងរយៈពេលប៉ុន្មានទសវត្សរ៍ថ្មីៗនេះ ក្នុងនោះរួមមានការកសាងប្រព័ន្ធប្រជាធិបតេយ្យ និងការរីកចម្រើនផ្នែកវិបុលភាព សន្តិភាព និងការបង្រួមបង្រួមជាតិ ព្រមទាំងបានគូសបញ្ជាក់ដូចគ្នា ពីជំនួយដ៏សំខាន់របស់សហរដ្ឋអាមេរិក លើផ្នែកទាំងនេះ»៕
US Deputy Assistant to the President and Senior Director for Asian Affairs, Matt Pottinger, and Deputy Assistant Secretary of State for Southeast Asia, W. Patrick Murphy, met #Cambodia Foreign Minister Prak Sokhonn in Manila today. pic.twitter.com/Gyi9ScIY3a
— Steve Herman (@W7VOA) 14 novembre 2017