ហ៊ុន សែន៖ សន្តិភាព​បាន​មក​ពី​កិច្ច​ព្រម​ព្រៀង​ក្រុង​ប៉ារីស ឆ្នាំ១៩៩១

នៅថ្ងៃទី២៣ ខែតុលានេះ ដែលជាថ្ងៃខួបលើកទី២៦ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ លោកនាយករដ្ឋមន្ត្រីបានរំលឹកមកជាថ្មី ពីសន្តិភាពសម្រាប់ប្រទេសកម្ពុជា ដែលបានមកពីកិច្ចព្រមព្រៀងនេះ និងពីស្នាព្រះហស្ថ របស់ព្រះមហាវរក្សត្រ សម្ដេចព្រះ នរោត្ដម សីហនុ។ ប៉ុន្តែលោក នៅឆ្លៀតអួតអាងបន្ថែមថា សន្តិភាពនេះត្រូវផ្សាភ្ជាប់ ជាមួយនយោបាយ«ឈ្នះ-ឈ្នះ»របស់លោក ទើបធ្វើឲ្យខ្មែរឈ្នះទាំងអស់។
ហ៊ុន សែន៖ សន្តិភាព​បាន​មក​ពី​កិច្ច​ព្រម​ព្រៀង​ក្រុង​ប៉ារីស ឆ្នាំ១៩៩១
លោក ហ៊ុន សែន ជជែកជាមួយទាហាន និងជំនាញការវៀតណាម នៅក្នុងអំឡុងឆ្នាំ១៩៨៣។ (រូបថត ឯកសារ)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី២៣ តុលា ២០១៧
  • កែប្រែចុងក្រោយ: October 23, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

ក្រោយពីលើកឡើងកាលពីសប្ដាហ៍មុន ដែលថា កិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ បានស្លាប់ទៅហើយ លោកនាយករដ្ឋមន្ត្រី ហ៊ុន សែន បានរំលឹកជាថ្មីនៅថ្ងៃនេះ ថ្ងៃទី២៣ ខែតុលា ឆ្នាំ២០១៧ ដែលជាថ្ងៃខួបលើកទី២៦ នៃការចុះហត្ថលេខាលើកិច្ចព្រមព្រៀងនេះ កាលពីថ្ងៃទី២៣ ខែតុលា ឆ្នាំ១៩៩១ ដើម្បីបញ្ចប់ជម្លោះរវាងភាគីខ្មែរ និងនាំមកឲ្យប្រទេសកម្ពុជាវិញ នូវលិទ្ធិប្រជាធិបតេយ្យ សេរីពហុបក្ស។

ដោយភ្ជាប់មកជាមួយវីដេអូមួយផង លោក ហ៊ុន សែន បានសរសេរដូច្នេះ នៅមុននេះបន្តិច នៅលើទំព័រ​ហ្វេសប៊ុក​របស់​លោក។ លោកសរសេរថា៖ «ថ្ងៃនេះ គឺជាខួបលើកទី ២៦ នៃកិច្ចព្រមព្រៀង​ទីក្រុងប៉ារីស (២៣ តុលា ១៩៩១-២៣ តុលា ២០១៧) ដែលបាននាំមកនូវសន្តិភាព សម្រាប់កម្ពុជា។ ពិតប្រាកដណាស់ គឺកម្ពុជា​ចងចាំ និងដឹងគុណ​យ៉ាង​ជ្រាលជ្រៅ ចំពោះ ព្រះបិតាឯករាជ្យជាតិខ្មែរ ព្រះបាទសម្តេចព្រះ នរោត្ដម សីហនុ ព្រះបរមរតនកោដ្ឋ ដែលព្រះអង្គបានតស៊ូលះបង់ និងបូជាគ្រប់យ៉ាង ដើម្បីសន្តិភាពជាតិខ្មែរ។»។

តែបុរសខ្លាំងកម្ពុជា ដែលអង្គុយនៅក្នុងតំណែង តាំងពីជាង៣ទសវត្សន៍មកនោះ មិនបានភ្លេចពីនយោបាយ «ឈ្នះ-ឈ្នះ» របស់លោក ដែលលោកធ្លាប់អះអាងថា បានធ្វើឲ្យក្រុមខ្មែរក្រហម ដែលជាភាគី​ចលនា​តស៊ូ​ខ្មែរ​ចុង​ក្រោយ​បង្អស់ ទម្លាក់អាវុធ និងរំលាយខ្លួន បាត់រូបរហូតមក។ លោកបាន​សរសេរ​ថា៖ «ទន្ទឹមនឹងដំណោះស្រាយសន្តិភាព ដែលផ្សាភ្ជាប់​ជាមួយនយោបាយ ឈ្នះ-ឈ្នះ គឺបានបញ្ចប់សង្រ្គាមស៊ីវិលទាំងស្រុង ដែលធ្វើឲ្យខ្មែរគ្រប់និន្នការ ឈ្នះទាំងអស់គ្នា។ ដោយសារសន្តិភាព និងនយោបាយ ឈ្នះ-ឈ្នះ នេះហើយដែលបានផ្តល់ឱកាសឲ្យកម្ពុជាបានកសាងសង្គមគ្រួសារ និងប្រទេសជាតិរីកចម្រើន មកទល់សព្វថ្ងៃនេះ។»។

ការលើកឡើងរបស់​នាយករដ្ឋមន្ត្រី​កម្ពុជា បានធ្វើឡើងយ៉ាងហោចពីរដងហើយ នៅលើទំព័រ​ហ្វេសប៊ុក​របស់​លោក ដើម្បីរំលឹកខួប​ក្នុងឆ្នាំនេះ នៃកិច្ចព្រមព្រៀងសន្តិភាព​ទីក្រុង​ប៉ារីស ឆ្នាំ១៩៩១ ដែលខុសប្លែក​ពីរាល់ឆ្នាំកន្លងទៅ។ ក្នុងបណ្ដាឆ្នាំមុនៗ រាល់មន្ត្រីរដ្ឋាភិបាល និងមន្ត្រីមកពីគណបក្សប្រជាជន​កម្ពុជា ដឹកនាំដោយ​លោក ហ៊ុន សែន មិនត្រឹមតែមិន​ចង់ឮ​ចង់និយាយ ពីសន្ធិសញ្ញាអន្តរជាតិមួយនេះទេ តែថែមទាំងលើកឡើងបែបផ្សេងថា គឺថ្ងៃ៧មករា ឆ្នាំ១៩៧៩នោះទេ ដែលជាថ្ងៃនាំសន្តិភាព​ពិតប្រាកដ មកឲ្យប្រទេសកម្ពុជា។

សម្រាប់ការលើកឡើង​ ពីនយោបាយ «ឈ្នះ-ឈ្នះ» ដើម្បីធ្វើក្រុមខ្មែរក្រហមទម្លាក់អាវុធចុះ មិនត្រូវបានក្រុមអ្នកស្រាវជ្រាវឯករាជ្យ យល់ស្របជាមួយលោក ហ៊ុន សែន នោះទេ។ អ្នកស្រាវជ្រាវ និងសរសេរសៀវភៅ «ជីវប្រវត្តិមហាបុរសខ្មែរ» លោក ស.គ.ស.ម បានថ្លែងក្នុងកិច្ចសម្ភាសមួយ ជាមួយទស្សនាវដ្ដីមនោរម្យ.អាំងហ្វូ កាលពីពេលកន្លងមកថា៖ «នយោបាយឈ្នះៗ របស់​លោក ហ៊ុន សែន អាចយកឈ្នះ សម្រាប់អ្នកមិនដឹងរឿង។ ព្រោះចរន្ដនយោបាយខ្មែរក្រហម បានថមថយ​កម្លាំង ឈានទៅរកការរលំរលាយជាបណ្ដើរៗ ចាប់ពីក្រោយការបោះឆ្នោត ឆ្នាំ១៩៩៣មក។ »។

អ្នកស្រាវជ្រាវ​រូបនេះ បានពន្យល់ពីមូលហេតុថា៖ «វា​ជា​កត្តា​សត្យានុម័ត្រ របស់ធម្មជាតិ ដែលមានកើតហើយ តែងតែត្រូវស្លាប់ទៅវិញ ហើយម្យ៉ាងទៀត អន្តរជាតិ​លែង​ទទួល​ស្គាល់ និងលែងគាំទ្រ ពីបុព្វហេតុរបស់ក្រុមខ្មែរក្រហមនេះ តទៅទៀត។ (...) លោក ហ៊ុន សែន ខ្លួនលោកដឹង​ច្បាស់​ណាស់ តើជម្លោះផ្ទៃក្នុង របស់កម្លាំងខ្មែរក្រហម នៅអំឡុងឆ្នាំ១៩៩៧ មកទល់ឆ្នាំ១៩៩៩ បានកើត​ចេញ​ពីអ្វី? មិន​ជាល្បិចបំបែកបំបាក់ របស់លោក ហ៊ុន សែន ទេឬ?»។

លោក ស.គ.ស.ម បានបន្តទៀតថា គណបក្សប្រជាជនកម្ពុជា​បានកាន់អំណាច តាំងពីឆ្នាំ១៩៧៩មក ឆ្លងកាត់​ថ្ងៃ​ទី២៣ តុលា និងការបោះឆ្នោតឆ្នាំ១៩៩៣ ដែលខ្លួនឯងចាញ់ឆ្នោតនោះហើយក៏ដោយ តែរហូតមកដល់​ថ្ងៃ​នេះ ក៏​នៅ​តែបង្ខំឲ្យគេឯងត្រូវតែស្តាប់ និងធ្វើតាមខ្លួន។ នយោបាយ«ឈ្នះ-ឈ្នះ» មិនមានន័យថា ឈ្នះទាំងសង​ខាង​ទេ។ តែផ្ទុយទៅវិញ ជានយោបាយ ដើម្បីតែខ្លួនលោក ហ៊ុន សែន ឈ្នះ និងជានយោបាយគាប​សង្កត់​ប៉ុណ្ណោះ៕

 
Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...