«សូមប្រជាពលរដ្ឋខ្មែរចងចាំថា ខ្ញុំនឹងនៅជាមួយបងប្អូន។ ទោះរូបកាយខ្ញុំ ត្រូវជាប់ឃុំ តែគ្មាននរណាម្នាក់ អាចឃុំឧត្ដមគតិរបស់ខ្ញុំបានឡើយ។ (...) សូមកុំតក់ស្លុត!» នេះ ជាការអះអាងឡើង របស់លោក កឹម សុខា ប្រធានគណបក្សសង្គ្រោះជាតិ ពីពន្ធនាគារត្រពាំងផ្លុង ក្នុងខេត្តត្បូងឃ្មុំ ទីកន្លែងដែលលោកកំពុងជាប់ឃុំ ជាបណ្ដោះអាសន្ន ក្រោមបទចោទ ថាបានប្រព្រឹត្តិទង្វើ «ក្បត់ជាតិ» ឃុបឃិតជាសម្ងាត់ ជាមួយបរទេស ចង់ផ្តួលរំលំរដ្ឋាភិបាល របស់​លោក ហ៊ុន​ សែន។

ប្រធានគណបក្សប្រឆាំងដ៏មានប្រជាប្រិយភាព បានថ្លែងឡើងយ៉ាងដូច្នេះ នៅក្នុងលិខិតចំហរមួយ ដែលត្រូវបានផ្សព្វផ្សាយ ជាសាធារណៈ តាំងពីយប់ថ្ងៃចន្ទទី២ ខែតុលា ខណៈខ្លឹមសារនៅក្នុងលិខិតនោះ បានរៀបរាប់ ពីរយៈពេលនៃការឃុំខ្លួន ទៅលើរូបលោក ដែលចូលដល់ខួបមួយខែ រាប់ពីថ្ងៃទី៣ ខែកញ្ញា មកដល់ថ្ងៃទី៣ ខែតុលា ឆ្នាំ២០១៧នេះ និងបានសរសេរ ច្រានចោលកា​រចោទប្រកាន់ ធ្វើឡើងដោយរដ្ឋាភិបាល ថាជា​ការមួ​លបង្កាច់ធ្ងន់ធ្ងរ។

លោកបានពន្យល់ថា ក្នុងរបបប្រជាធិបតេយ្យ គណបក្សប្រឆាំង មានតួនាទី​ប្រកួតប្រ​ជែង រកកា​រគាំ​ទ្រ​​ពី​ប្រជាពលរដ្ឋ ដើម្បីផ្លាស់ប្តូរគណបក្សកាន់អំណាច និងឈានទៅ​រកការដឹកនាំប្រទេស។

លោក កឹម សុខា បានសរសេរថា៖ «បើគណបក្សប្រឆាំង មិនមានបំណងផ្លាស់ប្តូរគណបក្សកាន់អំណាចទេ គេមិនហៅគណ​ប​ក្សនោះ ថា​ជាគណបក្សប្រឆាំងឡើយ។ កា​​រ​ចូ​​លប្រលូក ក្នុងឆាកនយោបាយ របស់ខ្ញុំ ក៏ដូចជាការបង្កើ​តគណ​បក្ស​សង្គ្រោះជាតិ គឺដើម្បីកា​រផ្លាស់ប្តូ​រ​ ដោ​​​​យអហិង្សា និងជាវិជ្ជមាន មិនមែ​នសម្រាប់លម្អ លទ្ធិ​ប្រជាធិបតេយ្យក្លែងក្លា​យឡើយ។ ដូ​​ច​​នេះ​រាល់​ទង្វើ របស់ខ្ញុំមិនមានភាពខុសច្បាប់ ហើយផ្ទុយទៅវិញគឺជាសិទ្ធិ និងតួនាទីដែល​មានចែងក្នុងរដ្ឋ​ធ​ម្ម​នុញ្ញ»។

«មិនតក់ស្លុត រួបរួមគ្នាការពារយុត្តិធម៌»

ប្រធានគណបក្សសង្គ្រោះជាតិ បានថ្លែងបន្តថា៖ «ខ្ញុំសូមអំពាវនាវ ជូនចំពោះប្រជាពលរដ្ឋខ្មែរ ដែលជាម្ចាស់អំណាច ស្របតាមរដ្ឋធម្មនុញ្ញ មាត្រា៥១ថ្មី "មិនតក់ស្លុត រួបរួមគ្នាការពារយុត្តិធម៌"»។ លោកបានបង្ហាញជំនឿរបស់លោកថា៖ «ការផ្លាស់ប្ដូរមួយ ដែលខ្មែរចង់បាន គឺបានសម្រេចពាក់កណ្ដាលហើយ នោះគឺការផ្លាស់ប្ដូររបត់គំនិត និងការចូលរួមយ៉ាងសកម្ម ក្នុងឆាកនយោបាយ របស់ប្រជាពលរដ្ឋខ្មែរ។ (...) គ្មានអំណាចណា អាចយកឈ្នះ លើអំណាចឆន្ទះ​ប្រជាពលរដ្ឋឡើយ។»។

លោក កឹម សុខា បានសង្កត់ធ្ងន់ថា៖ «សូមជនរួមជាតិ​រួបរួមគ្នា និងទាមទារឲ្យបាន នូវយុត្តិធម៌ សម្រាប់ខ្មែរទាំងអស់គ្នា»៕ 

» ខ្លឹមសារទាំងស្រុង នៃសារលិខិតរបស់លោក កឹម សុខា៖