នៅក្នុងសវនាការ លើនីតិវិធី «សួរតទល់» របស់សភាព្រហ្មទណ្ឌនៃសាលាឧទ្ឌណ៍ ក្នុងថ្ងៃទីពីរនេះ បានបំពេញអស់​រយៈ​ពេលពេញមួយព្រឹក នាថ្ងៃទី៦ ខែមីនានេះ។ ការសួរដេញដោលលើដើមបណ្តឹងបីនាក់ និងការអានកំណត់ហេតុ របស់​ជន​ជាប់ចោទប្រាំនាក់ ដែលត្រូវបានគេបង្វិលឲ្យធ្វើជាសាក្សី សម្រាប់ដាក់បន្ទុកលើលោក ម៉ម សូណង់ដូ។

រូបលើកបង្ហាញ សុំអោយដោះលែង លោកម៉ម សូណង់ដូ នៅក្រៅសាលាឧទ្ទរណ៍។

ទិដ្ឋភាពក្នុងសវនាការថ្ងៃនេះ មានការសួរឆ្លើយដោយ សហចៅក្រម អគ្គព្រះរាជអាជ្ញា មេធាវីលោកម៉ម សូណង់ដូ និងមេធាវី របស់ជនជាប់ចោទពីរនាក់ផ្សេងទៀត ព្រមទាំងម្ចាស់បណ្តឹងរដ្ឋប្បវេណី បួននាក់ ដែលក្លាយជា​ជាសាក្សី ។

តាមការសង្កេតរបស់ក្រុមអ្នកឃ្លាំមើល ក្នុងសវនាការនៃសាលាឧទ្ធណ៍ជា«សាធារណៈ»នេះ បានបង្ហាញថា រាល់ចម្លើយ​ប្រជាពលរដ្ឋ ភូមិប្រម៉ា និងកំណត់ហេតុ របស់ជនជាប់ចោទទាំងប្រាំនាក់ ដែលបានអានក្នុងបន្ទប់សវនាការ នាព្រឹកថ្ងៃ​ដដែល មិនមានអ្វីជា«បន្ទុកខ្លាំង»ដាក់ទៅលើលោក ម៉ម សូណង់ដូ ក្នុងរឿងបង្កើតតំបន់អបគមន៍ ប្រឆាំងរដ្ឋាភិបាលនោះ​ទេ។

លោក ជា ជីន ជាមេភូមិប្រម៉ា តាំងពីឆ្នាំ១៩៧៩ មកដល់បច្ចុប្បន្ន ក្រោយពីបញ្ចប់ការសួរតទល់ ដោយសភាព្រហ្មទណ្ឌ បាន​ប្រាប់មនោរម្យព័ងអាំងហ្វូនៅក្រៅបន្ទប់សវនាការថា លោកមានគ្នាបួននាក់ដូចជា លោក ឆេង កាត់ ក្រុមប្រឹក្សាឃុំ លោក គល់ ពន្លឺ ជាសមត្ថកិច្ច និងលោក ឃុន ណារ៉េត ជាអនុភូមិប្រម៉ា។ លោកបន្តថា ពួកលោកជាដើមបណ្តឹងរដ្ឋវេណី ដែលប្តឹង​ពីលោក ប៊ុនរដ្ឋា «មិនមែនប្តឹង»លោក ម៉ម សូណង់ដូ ទេ។ «ខ្ញុំអត់មានស្គាល់គាត់ទេ គាត់ក៏មិនដែលទៅ(ភូមិ)ប្រម៉ាដែរ ទើបតែស្គាល់ម៉ិញ»។

ដូចគ្នានេះដែរ អនុភូមិប្រម៉ាដែលទើបកាន់ដំណែងបានបីឆ្នាំ លោក ឃុន ណារ៉េត បានបញ្ជាក់ថា ពួកលោកទាំងបួននាក់ ជា​ដើមបណ្តឹងរដ្ឋប្បវេណី ហើយបានក្លាយជាសាក្សី ក្នុងសវនាការនាំថ្ងៃនេះ។ អនុភូមិរូបនេះបន្តថា «ខ្ញុំមិនដែលស្គាល់លោក ម៉ម សូណង់ដូទេ ហើយនៅក្នុងពាក្យបណ្តឹង ក៏គ្មានជាប់ពាក់ពន្ធ័នឹងលោក(ម៉ម សូណង់ដូទេ)ដែរ ព្រោះក្នុងពាក្យបណ្តឹង​នោះបានប្តឹងតែ ប៊ុន រដ្ឋា ក្នុងករណីដែលពួកគេបានដាក់កុងត្រូលក្នុងភូមិ បីទៅបួនកន្លែង ហើយបង្ខំឲ្យប្រជាពលរដ្ឋ​ឆ្លង​កាត់​ត្រូវចុះបណ្តើរ បើមិនបណ្តើរ ពួកគេបានវាយប្រជាពលរដ្ឋទាំងនោះ។ ចំណែកឯអ្នកដទៃវិញ បើចង់ឆ្លងកាត់​ត្រូវចុះ​ឈ្មោះ និងផ្តិតមេដៃរទើបអាចឆ្លងកាត់បាន។»

អ្នកវិភាគឯករាជ្យ លោក ឡៅ ម៉ុង ហៃ ដែលបានតាមតានសវនាការនាព្រឹកនេះ បង្ហាញថាមានសាក្សី ជាប្រជាពលរដ្ឋ​បាន​ឆ្លើយថា «មានរយៈតែដប់ដប់នាទីប៉ុណ្ណោះ ដែលប្រជាពលរដ្ឋ បានជួបលោកម៉មសូណង់ នៅក្នុងភូមិប្រម៉ា។ តើរយៈពេល​នេះអាចបង្កើតតំបន់អបគមន៍ ប្រឆាំងនឹងរដ្ឋាភិបាល បានដែរឬទេ?។»

លោក ម៉ម សូណង់ដូ អាយុ ៧១ ឆ្នាំ ត្រូវបានតុលាការក្រុងភ្នំពេញ ផ្តន្ទាទោសដាក់ពន្ធនាគារម្ភៃឆ្នាំ និងពិន័យជាប្រាក់​ដប់​លានរៀលកាលពីថ្ងៃទី១ ខែតុលា ឆ្នាំ២០១២។ បន្ទាប់ពីបានចាប់ឃុំខ្លួនលោក(ម៉ម សូណង់ដូ) កាលពីថ្ងៃទី១៥ ខែកក្កដា ឆ្នាំ២០១២ ក្រោយពីរដ្ឋាភិបាល ប្រើកម្លាំងបង្ក្រាបលើក្រុមអ្នកភូមិ ដែលអាជ្ញាធរបានអះអាងថា «ចាប់ដីដោយខុសច្បាប់» នៅក្នុងភូមិប្រម៉ា។ ក្នុងការបង្គាបនោះអាជ្ញាធរបានបាញ់ បណ្តាលឲ្យ កុមារីម្នាក់អាយុ១៤ឆ្នាំស្លាប់ កាលពីថ្ងៃទី១៦ ខែ​ឧសភា ឆ្នាំ២០១២។

សំណុំរឿងនេះ មានជនជាប់ចោទដប់បួននាក់ ដែលត្រូវបានសាលាដំបូងរាជធានីភ្នំពេញ ផ្តន្ទាទោសប៉ុន្តែមាន​ជនជាប់​ចោទ​បួននាក់ប៉ុណ្ណោះ ដែលបានជាប់ពន្ធនាគារ រាប់ទាំងលោក ម៉ម សូណង់ដូផង។

សូមរម្លឹកថា តាំងពីព្រឹកថ្ងៃទី៥ ខែមីនា សភានៃសាលាឧទ្ធរណ៍ បានលើកយកសំណុំរឿងក្តី ក្នុងការបង្កើតតំបន់អបគមន៍ ដោយបានចោទប្រកាន់លោក ម៉ម សូណង់ដូ ជាមេក្លោងប្រឆាំងនឹងរដ្ឋាភិបាល។ សាលដីកា ដែលចេញពីសវនាការ​ចំនួន​ពីរថ្ងៃនេះ  នឹងត្រូវប្រកាស នៅថ្ងៃបន្ទាប់ ដែលជាថ្ងៃចុងក្រោយ៕

--------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៦ មីនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ