រដ្ឋាភិបាលកម្ពុជា បានបញ្ជាអោយចាត់វិធានការថ្មីៗ ជាច្រើន ដើម្បីប្រឆាំងនឹងការកម្រើកឡើងវិញ នៃជម្ងឺផ្ដាសាយបក្សី ក្នុងនោះមានបំបាត់មេរោគ នៅតាមទីកន្លែងចិញ្ចឹមសត្វ និងនៅទីផ្សារ។ នៅក្នុងតួលេខជាផ្លូវការ តាំងពីដើមឆ្នាំមក ជម្ងឺនេះ បានសម្លាប់មនុស្ស ៨នាក់រួចមកហើយ។

នាយករដ្ឋមន្ត្រីកម្ពុជា លោកហ៊ុន សែន បានកំណត់សារាចរ​នេះឡើង ដើម្បីជម្រុញភ្នាក់ងារនគរបាល និងនាយកដ្ឋាន​កសិកម្ម និងសុខភាពសត្វ អោយចាត់វិធានការ ខណៈពេលដែលរាជាណាចក្រ បានរងនូវការរីករាលដាល គួរអោយ​កត់​សម្គាល់ ពីជម្ងឺដ៏ប្រល័យ តាំងពីវាបានកើតដំបូងនៅឆ្នាំ២០០៣ ជាទូទៅក្នុងពិភពលោក។ ក្នុងប្រទេសកម្ពុជា ជម្ងឺនេះ ត្រូវ​បានគេរកឃើញមានកើត ចំនួន៣០ករណី ហើយពីក្នុងចំណោមនេះ​២៧នាក់បានស្លាប់បាត់បង់ជីវិត។

«ទោះជាមានវិធានការការពារ ដោយស្ថាប័នជំនាញពាក់ព័ន្ធក៏ដោយ ក៏ការចម្លងជម្ងឺនេះ និងចំនួនជនរងគ្រោះដល់ជីវិត បានកើនឡើងដល់កម្រិតមួយ គួរអោយព្រួយបារម្ភ» ជាការបញ្ជាក់ នៅក្នុងសារាចរ​លេខ ០២ ស.រ. ចុះ​ថ្ងៃទី ០១ ខែមីនា។ សារាចរ​នោះ បានកំណត់អោយលាងសម្អាត ឬបំបាត់មេរោគជាកំហិត នូវទីកន្លែងចិញ្ចឹមសត្វស្លាប ឬទីផ្សារណាក៏ដោយ ដែលមានទទួលនូវករណីនេះ។ បទបញ្ជាក៏និយាយអោយប្រុងប្រយ័ត្នផងដែរ ទៅលើយានយន្ដទាំងឡាយ ជាពិសេស​យានយន្ដដែលដឹកសត្វស្លាប។

បុគ្គលិកពេទ្យ ឬមន្ត្រីសុខភាពទាំងឡាយ ត្រូវពន្យល់ប្រជាជន ពីសារសំខាន់ ក្នុងការលាងដៃអោយបានញឹកញាប់ ការ​ដាក់កុមារ អោយឆ្ងាយពីសត្វស្លាប និងជៀសវាងការបរិភោគសត្វដែលឆ្លងជម្ងឺ។

ក្នុងសប្ដាហ៍នេះ អង្គការសុខភាពពិភពលោក (OMS) បានជឿជាក់ថា ស្ថានភាពនៃការរីករាលដាល ក្នុងប្រទេសកម្ពុជា នៅ​អាចគ្រប់គ្រងបាននៅឡើយ។ នៅក្នុងពេលបច្ចុប្បន្ន ជម្ងឺនេះ ត្រូវបានគេរកឃើញថា បានចម្លងពីសត្វស្លាប មកមនុស្ស​តែ​ប៉ុណ្ណោះ។ តែអ្នកវិទ្យាសាស្ត្រ និងអ្នកស្រាវជ្រាវ បង្ហាញការព្រួយបារម្ភថា បើវាអាចចម្លងពីមនុស្សទៅមនុស្ស នៅ​ពេលនោះ នឹងបើកយុគ​សម័យ​នៃ​«ជម្ងឺឆ្លងយ៉ាងសាហាវមួយ»៕

--------------------------------------------------------
ដោយ ៖ កេសរកូល - ភ្នំពេញ ថ្ងៃទី ០១ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ