តុលាការ​ខ្មែរ ជា​កន្លែង​លេង​«បាយ​ឡុក​បាយ​ឡ​របស់​ក្មេង​អវិជ្ជា»

ស្ថាប័នយុត្តិធម៌របស់ប្រទេស​ទាំងមូល ជា (ឬក្លាយជា) កន្លែងលេង​«បាយឡុកបាយឡរបស់ក្មេងអវិជ្ជា»។ លោក សួន សេរីរដ្ឋា ប្រធានគណបក្សអំណាចខ្មែរ បានលើកឡើងដូច្នេះ ដោយហេតុថា តុលាការក្នុងប្រទេសកម្ពុជា មិនបានយកចិត្តទុកដាក់ ក្នុងការជួយដោះស្រាយ រកយុត្តិធម៌ឲ្យពលរដ្ឋរងគ្រោះទេ តែបែរជាបណ្ដោយឲ្យ«ក្មេងៗអវិជ្ជា»ប្រើប្រាស់ សម្រាប់«ប្ដឹងលេង ជាល្បែងកែកំសាន្ដ»។
តុលាការ​ខ្មែរ ជា​កន្លែង​លេង​«បាយ​ឡុក​បាយ​ឡ​របស់​ក្មេង​អវិជ្ជា»
ពីឆ្វេងទៅស្ដាំ៖ កញ្ញា ធី សុវណ្ណថា អ្នកគាំទ្រគណបក្សកាន់អំណាច ដែលជាដើមបណ្ដឹង នៃសំនុំរឿងជាច្រើន និងនាង តាត ម៉ារីណា ជនរងគ្រោះមួយរូប ដែលមិនដែលទទួលបានយុត្តិធម៌ សូម្បីម្ដងសោះ ពីប្រព័ន្ធយុត្តិធម៌ នៅកម្ពុជា។

ជាប្រតិកម្មដោយមិនផ្ទាល់មួយ ធ្វើឡើងដោយប្រធានគណបក្សអំណាចខ្មែរ បន្ទាប់ពីពាក្យបណ្ដឹងមួយ របស់អ្នកគាំទ្រចេញមុខម្នាក់ របស់គណបក្សប្រជាជនកម្ពុជា ប្ដឹងលោក សាន្ដ ប៊ុនធឿន អ្នកសារព័ត៌មានតាមបណ្ដាញសង្គម ត្រូវបានដាក់ ទៅកាន់សាលាដំបូងរាជធានីភ្នំពេញ កាលពីម្សិលម៉ិញ ក្រោមបទ«ញុះញង់ឲ្យប្រព្រឹត្តិបទឧក្រិដ្ឋជាអាទិ៍»។ ដើមបណ្ដឹង ដែលគេស្គាល់ថា ជាកញ្ញា ធី សុវណ្ណថា «ចៅតា» និងជាម្ចាស់បណ្ដឹងជាច្រើនផ្សេងទៀត ដែលបណ្ដាលឲ្យមានការចាប់ចងមនុស្សជាច្រើន នៅក្នុងរយៈកាលកន្លងមក។

លោក សួន សេរីរដ្ឋា បានពន្យល់ថា៖ «តុលាការស្រុកខ្មែរ វាអស់ប្រសិទ្ធិភាព ក្លាយទៅជាកន្លែងលេងបាយឡុកបាយឡ របស់ក្មេងអវិជ្ជា ដោយសារ​តែ​ស្ថាប័ននេះ មិនបានយកចិត្តទុកដាក់ ជួយដោះស្រាយរកយុត្តិធម៌ ឲ្យពលរដ្ឋរងគ្រោះទេ បែជាបណ្តោយ ឲ្យក្មេងៗអវិជ្ជាប្រើប្រាស់ សម្រាប់ដាក់​ពាក្យប្តឹង​លេង ជាល្បែងកែកំសាន្ត»។

ប៉ុន្តែមិនមែន តែករណីបណ្ដឹងរបស់កញ្ញា ធី សុវណ្ណថា តែមួយនោះទេ តែនៅមានករណីរឿងរ៉ាវចាប់ផ្សឹក និងឃុំព្រះកាយ របស់ព្រះសង្ឃមួយអង្គ នៅក្នុងខេត្តបាត់ដំបងនោះផង។ ព្រះភិក្ខុ ហន សុផាន្នី សមាជិកបណ្ដាញ​ព្រះសង្ឃ​ឯករាជ្យ​មួយអង្គ ព្រះជន្ម២៤វស្សា ត្រូវ​បាន​លោក លី សុខា ចៅក្រមស៊ើបអង្កេត នៃសាលាដំបូងខេត្តបាត់ដំបង ចេញដីកា​ឃុំខ្លួន​ជា​បណ្ដោះ​អាសន្ន នៅក្នុងពន្ធនាគារខេត្ត នៅរសៀលថ្ងៃទី២២ ខែមិថុនាកន្លងមក បន្ទាប់ពីព្រះអង្គត្រូវបានចាប់ផ្សឹក ដោយបង្ខំ កាលពីមួយថ្ងៃមុនរួច។

ការឃុំ​ព្រះ​កាយ​ព្រះ​សង្ឃ បានធ្វើឡើង ក្រោម​ការ​ចោទប្រកាន់ ពីបទដឹកជញ្ជូន - កាន់អាវុធដោយខុសច្បាប់ និងញុះញង់ឲ្យប្រព្រឹត្តិបទឧក្រិដ្ឋ ដែលទំនងជាប់ទាក់ទង ទៅនឹងការបង្ហោះរូបថត និងសារចំអកលេងសើច របស់ព្រះភិក្ខុ នៅលើបណ្ដាញសង្គម កាលពីប៉ុន្មានខែមកហើយ។

ប្រធានគណបក្សអំណាចខ្មែរ បានសរសេរបន្តថា៖ «ដោយគ្រាន់តែលេងហ្វេសបុក ឌឺដងគ្នា លើសខ្វះពាក្យសំដី និងលេងកាំភ្លើងជ័រ ក៏ប្តឹងផ្តល់គ្នានៅតុលាការ ធ្វើដូចរឿងហ្នឹង វាធំដុំប៉ះពាល់អាយុជីវិត​មនុស្សរាប់រយនាក់។ តែដល់ដល់រឿងឧក្រិដ្ឋកម្ម ដល់ជីវិតមនុស្ស ដូចជាករណីបាញ់សម្លាប់ នៅផ្លូវវេងស្រេង ក្រោយព្រឹត្តិការណ៍បោះឆ្នោត ២០១៣ ករណីបាញ់សម្លាប់សកម្មជនសង្គម អ្នកវិភាគ មេដឹកនាំកម្មករ ដែល[ត្រូវបាន]បាញ់សម្លាប់ កណ្តាលក្រុងភ្នំពេញស្រស់ៗ គឺអូសបន្លាយពេលវេលា កាយកប់ ស្ទើរគ្រប់ករណី។»។

លោក សួន សេរីរដ្ឋា បានហៅតុលាការស្រុកខ្មែរ ថាជា«តុលាការក្បាលដែកគោល» ដែលចង់ធ្វើអ្វី ឬសម្រេចអ្វី ត្រូវរង់ចាំ«ញញួរនយោបាយ ពីមនុស្សអ្នកកាន់អំណាចសំពង ទើបហ៊ានកម្រើក»៕


Loading...

អត្ថបទទាក់ទង


មតិ-យោបល់