គុកដាក់បានតែរូបកាយប៉ុណ្ណោះ! តែទំនួញស្រែកយំយែក លាយឡំនឹងការជូនពរ ក្នុងថ្ងៃទិវាលោកឪពុក (Father's Day) របស់កូនស្រីទាំងបីនាក់ បានហោះរំលងជញ្ជាំងគុក និងពិតជាបានឮ ទៅដល់លោក មាជ សុវណ្ណារ៉ា សកម្មជនគណបក្សសង្គ្រោះជាតិ ដែលបានជាប់ក្នុងពន្ធនាគារព្រៃស តាំងពីច្រើនឆ្នាំមកហើយ។

កូនស្រីទាំងបីនាក់ ជាពិសេសយុវតី មាជ សុជាតា ជាកូនច្បង បានថ្លែងពាក្យជូនពរ និងការនឹក​រលឹក​ឪពុក​របស់​ពួកនាង កាលពីម្សិលម៉ិញ នៅក្នុងវីដេអូផ្សាយផ្ទាល់មួយ ដែលមានចែករំលែករាប់ពាន់នាក់ នៅលើបណ្ដាញ​សង្គម។

ជាមួយនឹងភាពរលីងរលោងទឹកភ្នែកផង សុជាតា ដែលទើបនឹងពេញវ័យ ដ៏ស្រស់សោភា បានថ្លែងថា៖ «រាល់​ឆ្នាំ​ឃើញគេធ្វើពិធី ទិវាលោកឪពុក ទាំងអស់គ្នាជាមួយឪពុកគេ តែយើងឯណេះអត់ឪពុកបីឆ្នាំហើយ វាសោក​សង្រេង​ណាស់។ ប៉ុន្តែចង់ឲ្យប៉ាដឹងថា អរគុណប៉ាដែលបង្កើតកូន ហើយនាំកូនមករៀននៅស្រុកអាមេរិក ឲ្យ​ចំណេះ​កូន ចិញ្ចឹមកូនដល់ធំ ហើយនឹងស្អាត។ ប៉ាដឹងថា កូននឹងមិនភ្លេចប៉ាទេ ប៉ានៅក្នុងបេះដូងយើង ហើយ​សូម​ឲ្យ​ប៉ា​ឆាប់​ចេញមក ដើម្បីបានឃើញកូនរៀនចប់។»។ 

មនុស្សទាំងឡាយ ដែលមានបេះដូង នៅក្នុងលោក ត្រូវតែរំជួលចិត្ត ហើយដោយសារតែហេតុនេះ ទើបលោក​ឪពុក មាជ សុវណ្ណារ៉ា បានផ្ដាំផ្ញើរត្រឡប់មកវិញ តាមរយៈជំនួយការរបស់លោក ពីពន្ធនាគារមក ដោយ​សូម​អរគុណ​កូនស្រីទាំងបី និងសុំឲ្យកូនៗទាំងនេះ ខិតខំរៀនសូត្រ ដើម្បីយកចំណេះមកបម្រើសង្គម។ លោកបាន​សំដែង​ការ​រំភើប​ចិត្ត ដោយសារដឹងថា កូនៗរបស់លោក រៀនសូត្របានពូកែ មានលទ្ធផលល្អ។

លោក សុវណ្ណារ៉ា បាននិយាយថា៖ «ប៉ាមិនអីទេ ទាំងសុខភាព និងផ្នែកស្មារតីរបស់ប៉ា គឺនៅល្អប្រសើរទេ ដោយ​មានការយកចិត្តទុកដាក់ ពីក្រុមគ្រូពេទ្យ របស់អង្គការលីកាដូ ដែលបានទៅមើល ពិនិត្យសុខភាពប៉ា និង​អ្នក​ទោស​នយោបាយដទៃទៀត ជារៀងរាល់សប្តាហ៍»។

ជំនួយការរបស់លោក មាជ សុវណ្ណារ៉ា បានស្រង់សំដីមកបញ្ជាក់បន្តថា៖ «ប៉ាជាប់គុក ដើម្បីបុព្វហេតុជាតិ និង​ពលរដ្ឋ ទោះបីប៉ាស្លាប់ ឬរស់ ពីការលះបង់របស់ប៉ា មិនជាសំខាន់ទេ ព្រោះប៉ាបានជួយសង្គម ឲ្យមនុស្ស​បាន​យល់​ពីសិទ្ធិសេរីភាព និងតម្លៃតស៊ូជីវិត នៅក្នុងរបបលទ្ធិប្រជាធិបតេយ្យ ដែលគ្មានការគំរាមកំហែង បំភិត​បំភ័យ»។

​លោក មាជ សុវណ្ណារ៉ា បានថ្លែងទៀតថា៖ «បើកូនៗអាណិតស្រឡាញ់ប៉ា សូមកូនខិតខំរៀនសូត្រ យក​ចំណេះ​ដឹង​ទៅ​ជួយសង្គមជាតិ តាមផ្លូវគុណធម៌ និងក្តីសុចរិត ប្រកបដោយមេត្តាធម៌ ដែលមិនបៀតបៀន និងធ្វើឲ្យ​អ្នក​ដទៃ​ឈឺចាប់ ដោយប៉ាផ្តាំជាចុងក្រោយថា "បើទៅថ្ងៃមុខ កូនមានកិត្តិយសអំណាច សូមកូនកុំមាន​គំនិត​សង​សឹក ដល់អ្នកដែលបាន និងកំពុងធ្វើបាបប៉ាអោយសោះ កូន! ព្រោះពារ រំងាប់ដោយការមិនចងពារ ណាកូន​ណា! ការ​ជួស​ជុល​ផ្លូវហិង្សា គឺការតបត​ដោយ​សេចក្តីល្អណាកូន។»៕

» វីដេអូទាំងស្រុង បង្ហោះដោយកូនស្រីទាំងបី របស់លោក មាជ សុវណ្ណារ៉ា៖