អេង ឆៃអ៊ាង៖ «មនុស្សមានរោគចិត្តក្នុងខ្លួន អញ្ចឹងឯង»
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី១៨ មិថុនា ២០១៧
- កែប្រែចុងក្រោយ: June 18, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
រលកប្រតិកម្ម តបនឹងការលើកឡើង របស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ កំពុងបន្តមានកម្លាំងទៅមុខ។ ហើយភាពស្ងប់ស្ងាត់ របស់មេដឹកនាំគណបក្សសង្គ្រោះជាតិ ដែលកន្លងមកមិនឃើញតបតរអ្វី ទៅនឹងសំដីចោទប្រកាន់ជាច្រើន របស់ប្រមុខទ័ព«ជួង»នោះ ទំនងជាត្រូវបានបិតបញ្ចប់នៅថ្ងៃនេះ បន្ទាប់ពីអនុប្រធានគណបក្សប្រឆាំង លោក អេង ឆៃអ៊ាង បានបង្ហោះឃ្លាមួយហៅលោក ខឹម វាសនា ថាជា«មនុស្សមានរោគចិត្ត»។
លោក អេង ឆៃអ៊ាង បានសរសេរដូច្នេះ នៅក្នុងផ្នែកដាក់យោបល់ នៃការចែករំលែកមួយ របស់លោក មឿង តុលា នាយកមជ្ឈមណ្ឌលសម្ព័ន្ធការងារ និងសិទ្ធិមនុស្ស (ហៅកាត់ថា Central) ដែលជាការបង្ហោះរូប «ScreenShot» របស់លោក អ៊ូ វីរៈ អ្នកវិភាគផ្នែកសង្គម-នយោបាយ កាលពីប៉ុន្មានម៉ោងមុន។
» ខាងក្រោមនេះ ជាការចែករំលែករបស់លោក មឿង តុលា៖
នៅពីក្រោមការចែករំលែកនោះ អនុប្រធានគណបក្សប្រឆាំង លោក អេង ឆៃអ៊ាង បានបង្ហើសំណេររបស់លោកមួយឃ្លាថា៖ «មនុស្សមានរោគចិត្តក្នុងខ្លួន អញ្ចឹងឯង»។
កាលពីថ្ងៃទី១៥ ខែមិថុនា លោក អ៊ូ វីរៈ ដែលជាប្រធានអង្គការវេទិកាអនាគតមួយរូបផង បានសរសេរនៅលើទំព័រហ្វេសប៊ុក សំដែងក្ដីអាណិតរបស់លោក ទៅកាន់លោក ខឹម វាសនា និងបានចាត់ទុកប្រធានគណបក្សសម្ព័ន្ធ ដើម្បីប្រជាធិបតេយ្យរូបនេះ ថាមាន«បញ្ហាផ្លូវចិត្ត» ដែលបណ្ដាលមកពី «កំហឹង និងការតឹងទ្រូង»។
» អត្ថបទដែលទាក់ទង៖ អ៊ូ វីរៈ ថា ខឹម វាសនា មានបញ្ហាផ្លូវចិត្ត
«អាសំគិស» សំដីប្រចាំត្រកូល!
តែការលើកឡើង របស់លោក អ៊ូ វីរៈ ត្រូវបានប្រធានបក្ស«ជួង» ឆ្លើយតបទៅវិញយ៉ាងជូរចត់។ លោក ខឹម វាសនា បានថ្លែងថា៖ «ខ្ញុំមានអារម្មណ៍អាសូរមនុស្ស (លោក អ៊ូ វីរៈ) នេះណាស់ រស់មួយជីវិត មិនដែលបានភ្ញាក់ពីដេក បានមើលឃើញពិភពលោកនឹងគេ ឲ្យបានម្តង គឺដេកលក់រហូត ដល់ថ្ងៃស្លាប់។ សង្វេកនឹងមនុស្សធុននេះណាស់។»។
មុនការលើកឡើងនេះបន្តិច លោក ខឹម វាសនា បានហៅលោក យ៉ង់ គីមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព ថាជាមនុស្ស«សំគិស» និងក្រុមអ្នករិះគន់ប្រឆាំងលោក ថាជាក្រុម«អាខូច» ដែល«ផ្ដុំក្បាលគ្នាកំចាត់ LDP»។ ចម្រៀងមួយបទនេះ ជាពិសេស ការហៅគេឯង ថា«សំគិស» មិនមែនទើបត្រូវបាន«ប្រមុខបក្សជួង» យកមកប្រើជាលើកទី១ទេ។ កាលពីចុងឆ្នាំ២០១៤ លោក ព្រាប កុល នាយកប្រតិបត្តិអង្គការតម្លាភាព ប្រចាំនៅកម្ពុជា ក៏បានទទួលមេរៀនដ៏ចាស់ដៃដូចនេះ ពីលោក ខឹម វាសនា ដែរ៕
» អត្ថបទដែលទាក់ទង៖ ខឹម វាសនា ហៅ ព្រាប កុល ថា«អាសំគិស»