មេដឹកនាំប្រឆាំងធំជាងគេ លោក សម រង្ស៊ី បានទម្លាយជាសាធារណៈ ក្នុងថ្ងៃនេះ នូវឯកសារស្ទង់មតិមួយ ដែល​ទំព័រហ្វេសប៊ុករបស់លោក​អះអាងថា ត្រូវបានគណបក្សប្រជាជនកម្ពុជា ធ្វើឡើងយ៉ាងសម្ងាត់ ដោយបញ្ជា​ទៅ​ក្រុមហ៊ុនអន្តរជាតិមួយ ជាអ្នកទទួលបន្ទុក។ ទំព័រហ្វេសប៊ុក របស់អតីតប្រធាន​គណបក្សប្រឆាំង បានសរសេរ​ថា ការ​ស្ទង់​មតិ​នេះត្រូវបានធ្វើឡើង រវាងពីខែឧសភា មកទល់នឹងខែកញ្ញា ឆ្នាំទៅម៉ិញ ហើយបានបង្ហាញថា៖ «គណបក្ស​​ប្រជាជន​កម្ពុជា នឹងចាញ់គណបក្សសង្គ្រោះជាតិ ក្នុងការបោះឆ្នោតជ្រើសរើសតំណាងរាស្ត្រ ដែល​ត្រូវ​រៀបចំ​ឡើង ក្នុងខែកក្កដា ឆ្នាំ ២០១៨»។

ឯកសារស្ទង់មតិ ដែលមានកម្រាស់៥០ទំព័រ និងដែលទស្សនាវដ្ដីមនោរម្យ.អាំងហ្វូ ទទួលបានមួយ​ច្បាប់​ដែរ​នោះ បានបង្ហាញឲ្យដឹង ពីលទ្ធផលនៃ​ការស្ទាបស្ទង់ជាច្រើន ស្ដីពីការស្រឡាញ់ ស្អប់ ខឹង ការជឿជាក់​របស់​ពលរដ្ឋ​ខ្មែរ ធ្វើឡើង​ទៅលើ​ច្រើន​វិស័យ មានដូចជាក្នុងនោះមាន វិស័យសិទ្ធិមនុស្ស ការប្រយុទ្ធប្រឆាំង នឹង​អំពើ​ពុករលួយ ការទប់ស្កាត់ការកាប់បំផ្លាញព្រៃឈើជាដើម។

ការស្ទាបស្ទង់ទាំងនោះ បានប្រៀបធៀបរវាងលោក ហ៊ុន សែន លោក សម រង្ស៊ី និងលោក កឹម សុខា ហើយ​ក៏​បានប្រៀបធៀបដែរ រវាងគណបក្ស​ប្រជាជនកម្ពុជា ទៅនឹង​គណបក្ស​សង្គ្រោះជាតិ ឬគណបក្សហ្វុនស៊ីនប៉ិច។ ការស្ទង់មតិបានបង្ហាញថា លោក ហ៊ុន សែន បានធ្លាក់ប្រជាប្រិយភាព ពីតួលេខ២៦ ក្នុងខែឧសភា មកនៅ​ត្រឹម​២៣ ក្នុងខែកញ្ញា ខណៈលោក សម រង្ស៊ី កើនពី១៦ ទៅដល់៣៨។ រីឯលោក កឹម សុខា ទទួលបានតួលេខ​តែ​មួយ នៅក្នុង​ខែកញ្ញា គឺពិន្ទុ ២៤។

ដូចជាសំនួរ ដែលលើកឡើងថា តើអ្នកជឿជាក់ទៅលើអ្នកនយោបាយណា និងគណបក្សនយោបាយណា ដែល​អាចគ្រប់គ្រង លើចំណង​មេត្រីភាព​រវាងកម្ពុជា និងវៀតណាម? ចម្លើយរកឃើញថា លោក ហ៊ុន សែន ទទួល​បានពិន្ទុ៤២ និងលោក សម រង្ស៊ី ទទួលបាន៥០ ខណៈ​គណបក្សប្រជាជនកម្ពុជា ទទួលបានពិន្ទុ៤០ និង​គណបក្ស​សង្គ្រោះជាតិ ទទួលបានពិន្ទុ៥៣។

សំនួរដូចគ្នាទាក់ទងនឹងសេដ្ឋកិច្ច៖ លោក ហ៊ុន សែន ទទួលបានពិន្ទុ៤២ និងលោក សម រង្ស៊ី ទទួលបាន៥១ ខណៈ​​គណបក្សប្រជាជនកម្ពុជា ទទួលបាន​ពិន្ទុ៤២ និងគណបក្សសង្គ្រោះជាតិ ទទួលបានពិន្ទុ៥២។ សម្រាប់​សំនួរដែលទាក់ទង នឹងការប្រឆាំងអំពើពុករលួយវិញ៖ លោក ហ៊ុន សែន ទទួលបាន​ពិន្ទុ៣១ និងលោក សម រង្ស៊ី ទទួល​បាន៦៩ ខណៈ​គណបក្សប្រជាជនកម្ពុជា ទទួលបានពិន្ទុ៣២ និងគណបក្សសង្គ្រោះជាតិ ទទួល​បាន​ពិន្ទុ​៦០។

ចំពោះសំនួរ តើឃាតកម្មបាញ់សម្លាប់លោក កែម ឡី បានធ្វើឲ្យអ្នកខ្វល់ខ្វាយ ពីនីតិរដ្ឋនៅកម្ពុជាដូចម្ដេចខ្លះ? ចម្លើយ៖ អ្នកជឿជាក់​លើប្រព័ន្ធ​យុត្តិធម៌​សព្វថ្ងៃ ទទួលបានពិន្ទុ១៨ ខណៈអ្នកមិនជឿជាក់ ទទួលបានពិន្ទុ ដល់​ទៅ ៦៦។

ប៉ុន្តែវិស័យផ្សេងទៀតជាច្រើន បានបង្ហាញថាលោក ហ៊ុន សែន និងគណបក្សប្រជាជនកម្ពុជា ទទួលពិន្ទុបាន​ល្អជាងលោក សម រង្ស៊ី និងគណបក្ស​សង្គ្រោះជាតិ។ វិស័យទាំងនោះ មានដូចជាការសាងសង់ ហេដ្ឋារចនា​សម្ព័ន្ធ ស្ពានថ្នល់ និងវិស័យអប់រំជាដើម។

គេមិនដឹងថា ការស្ទង់មតិនេះ ត្រូវបានធ្វើឡើងរបៀបណាទេ។ តែរូបសញ្ញា (Logo) មួយ ដែលស្ថិត​នៅផ្នែក​ខាង​ក្រោម​​រាល់​សន្លឹកលទ្ធផល នៃការ​ស្ទង់​មតិនេះ បាន​ធ្វើឲ្យគេគិតថា កិច្ចការខាងលើ ជាសមិទ្ធផល​របស់​ក្រុមហ៊ុន «Shaviv Strategy and Campaigns» ដែលមានជំនាញខាងយុទ្ធសាស្ត្រ និង​ការ​ឃោសនា ដើម្បីស្វែងរក​ជ័យ​ជំនះ នៅក្នុង​ការបោះឆ្នោត។ នៅលើគេហទំព័រ «strategyandcampaigns.com» របស់ក្រុមហ៊ុននេះ ដែល​ទស្សនាវដ្ដី​​មនោរម្យ.អាំងហ្វូ បានចូល​ទៅពិគ្រោះ គេឃើញមានគម្រោងស្រាវជ្រាវ ជាយុទ្ធសាស្ត្រ សម្រាប់​ការ​បោះឆ្នោត នៅក្នុងប្រទេសជាច្រើន នៅលើពិភពលោក ក្នុងនោះ​ក៏មាន​ប្រទេស​កម្ពុជា​​មួយដែរ។

ដូច្នេះ ការធ្វើកិច្ចការស្ទង់មតិ នៅក្នុងប្រទេសកម្ពុជា ដោយក្រុមហ៊ុនខាងលើ ពិតជាមានរូបរាងប្រាកដ តែ​ត្រង់​ថា​នរណា​ជាអ្នកបញ្ជាឲ្យធ្វើ វាស្ថិតនៅជា​អាថ៌កំបាំង​នៅឡើយ ខណៈកម្ពុជា ជាប្រទេសដ៏«ចម្លែក»មួយ ដែល​បាន​ហាម​ឃាត់ មិនឲ្យធ្វើការ​ស្ទង់មតិ​អ្វីទាំងអស់ កាលពីពេល​កន្លងមក៕