អនុប្រធាន CNRP ថា ញឹក ប៊ុនឆៃ ទូរស័ព្ទមកលោក
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី១៣ មិថុនា ២០១៧
- កែប្រែចុងក្រោយ: June 13, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
ព័ត៌មានដែលលេចឭ បានក្លាយជាការពិត។ តែការពិតនោះ ត្រូវបានលោក ញឹក ប៊ុនឆៃ អតីតមេទ័ពរាជានិយមដ៏ល្បីឈ្មោះ និងជាប្រធានគណបក្សខ្មែររួបរួមជាតិ ច្រានចោល ដោយបកស្រាយថា រឿងដែលលើកឡើងនោះ ជាការយល់ច្រឡំ ហើយលោកបានពន្យល់រឿងនេះ ជូនទៅលោក ហ៊ុន សែន នាយករដ្ឋមន្ត្រី-ប្រធានគណបក្សប្រជាជនកម្ពុជា រួចហើយ។
រឿងវ៉ាវដែលបានកើតឡើង នៅត្រង់ថា លោក ញឹក ប៊ុនឆៃ ពិតជាបានទូរស័ព្ទ ទៅលោក អេង ឆៃអ៊ាង អនុប្រធានគណបក្សសង្គ្រោះជាតិ កាលពីមុនការបោះឆ្នោត ជ្រើសរើសក្រុមប្រឹក្សាឃុំសង្កាត់ អាណត្តិទី៤ ជុំវិញការស្នើឲ្យអ្នកគាំទ្រ របស់គណបក្សខ្មែររួបរួមជាតិ បោះឆ្នោតឲ្យគណបក្សសង្គ្រោះជាតិ នៅក្នុងឃុំដែលគណបក្សខ្មែររួបរួមជាតិ មិនមានលទ្ធភាព ដាក់បេក្ខជនឲ្យឈរឈ្មោះ។ នេះបើតាមការអះអាង របស់លោក អេង ឆៃអ៊ាង នៅក្នុងកិច្ចសម្ភាសមួយ ជាមួយវិទ្យុសម្លេងសហរដ្ឋអាមេរិក កាលពីម្សិលម៉ិញ។
លោក អេង ឆៃអ៊ាង បានឲ្យដឹងថា៖ «គាត់គ្រាន់តែនិយាយជាមួយខ្ញុំ គាត់ថា គាត់ឲ្យឃុំណា ដែលអត់មានបេក្ខជនគាត់ហ្នឹង អ្នកដែលគាំទ្រគាត់ហ្នឹង ឲ្យបោះឆ្នោតឲ្យសង្គ្រោះជាតិហ្នឹងហើយ ព្រោះខ្ញុំវាមិនចាប់អារម្មណ៍ ព្រោះដោយសារបើគាត់មានអ្នកគាំទ្រ គាត់ដាក់បេក្ខជនបានហើយ។ ខ្ញុំវាមានទៅស្អី អាហ្នឹង ហ្នឹង។ បើគាត់ដាក់បេក្ខជនរបស់គាត់អត់បានផង តើគាត់មានអ្នកគាំទ្រឯណា អាហ្នឹងនិយាយឲ្យស្រួលស្តាប់។»។
«មិនស្មោះស្ម័គ្រជាមួយរដ្ឋាភិបាល»
នៅក្នុងបទសម្ភាស ជាមួយវិទ្យុសម្លេងសហរដ្ឋអាមេរិក កាលពីសប្ដាហ៍មុន លោក ញឹក ប៊ុនឆៃ បានលើកឡើងថា មានការដាក់ពង្រាយកម្លាំងប្រដាប់អាវុធ យ៉ាងសន្ធឹកសន្ទាប់ មានទាំងកម្លាំងប៉ូលិស កងរាជអាវុធហត្ថ និងទាហាន មកព័ទ្ធផ្ទះលោកក្នុងសង្កាត់ជ្រោយចង្វារ អស់រយៈពេល៤ថ្ងៃ ចាប់តាំងពីថ្ងៃសៅរ៍ទី៣ រហូតដល់ល្ងាចថ្ងៃទី៦ ខែមិថុនា ពោលគឺនៅមុន និងក្រោយពេលបោះឆ្នោត។ នៅក្នុងរយៈពេលនេះ គឺនៅថ្ងៃទី៤ ខែមិថុនា លោក ញឹក ប៊ុនឆៃ ត្រូវបានដកមុខតំណែង ចេញពីទីប្រឹក្សារដ្ឋាភិបាល ដែលមានថានៈស្មើនឹងឧបនាយករដ្ឋមន្ត្រី ដោយព្រះរាជក្រឹត្យមួយរបស់ព្រះមហាក្សត្រ តាមការស្នើសុំរបស់លោក ហ៊ុន សែន។
បន្ទាប់ពីការដកមុខតំណែង អាវុធនិងអង្គរក្សការពារ ដែលលោក ញឹក ប៊ុនឆៃ មាន ក៏ត្រូវបានដកហូតចេញទាំងអស់ដែរ។ លិខិតកោះហៅមួយ របស់ស្នងការរាជធានី លោក ជួន សុវណ្ណ ចុះថ្ងៃទី៧ ខែមិថុនា បានបញ្ជាក់ថា លោក ញឹក ប៊ុនឆៃ បានបំភ្លឺនៅសាលាខេត្តបន្ទាយមានជ័យថា លោកមានអាវុធខ្លីចំនួន ១០ដើម និងអាវុធវែងចំនួន១៦ដើម។ លិខិតដែលធ្លាក់មកដល់ដៃអ្នកសារព័ត៌មាន បានបន្តថា អតីតមេទ័ពរាជានិយមរូបនេះ បានប្រគល់អាវុធ (ខ្លី) ១០ដើម ជូនលោក អាត់ ខែម ស្នងការដ្ឋាននគរបាលខេត្តបន្ទាយមានជ័យ និងអាវុធវែង១ដើមទៀត ជូនលោក ចៅ ភិរុណ អគ្គនាយកនៃអគ្គនាយកដ្ឋានសម្ភារៈបច្ចេកទេស ក្រសួងការពារជាតិរួចហើយ។ តែលោក ញឹក ប៊ុនឆៃ ត្រូវប្រគល់អាវុធ ចំនួន១៥ដើមផ្សេងទៀត នៅពេលលោកមកកាន់ស្នងការដ្ឋាន នគរបាលរាជធានីភ្នំពេញ។
លោក ទៀ បាញ់ រដ្ឋមន្ត្រីការពារជាតិ និងជាមន្ត្រីជិតដិតរបស់លោក ហ៊ុន សែន បានពន្យល់ការដកហូតអាវុធ និងអង្គរក្សពីលោក ញឹក ប៊ុនឆៃ ថាត្រូវបានធ្វើឡើង ក្រោមហេតុផល «មិនស្មោះស្ម័គ្រជាមួយរដ្ឋាភិបាល»។ លោករដ្ឋមន្ត្រីបានថ្លែងប្រាប់សារព័ត៌មាន ភ្នំពេញប៉ុស្ដ៍ កាលពីចុងសប្ដាហ៍កន្លងមកថា៖ «កាលគាត់នៅជាមួយរាជរដ្ឋាភិបាល តួនាទីរបស់គាត់ក៏ខ្ពស់ដែរ ដូច្នេះគេចាត់ឲ្យមានអង្គរក្ស...ពេលដែលគាត់មិនស្មោះស្ម័គ្រ ជាមួយរដ្ឋាភិបាល ដូច្នេះ រដ្ឋាភិបាលត្រូវដកយកវិញ ទាំងអង្គរក្ស និងអាវុធ។ (...) ចាំបាច់អីទៅរករឿង? គេចុះចូលយ៉ាងណា និងយ៉ាងណី គ្រាន់តែគាត់មិនមានភាពស្មោះស្ម័គ្រ [នឹង]រដ្ឋាភិបាល ហើយយើងដឹងស្រាប់ហើយ គាត់មានកន្លែងទៅរបស់គាត់។»។
រវាង អេង ឆៃអ៊ាង និង អ៊ី គឹមអៀង...
យ៉ាងណាក៏ដោយ ក៏ការលើកឡើងខាងលើ ត្រូវបានលោក ញឹក ប៊ុនឆៃ ច្រានចោល ក្នុងថ្ងៃទី១៣ ខែមិថុនានេះ និងបកស្រាយថា រឿងរ៉ាវបានកើតចេញ ពីការយល់ច្រឡំ។ លោកថា លោកមិនបានក្បត់លោក ហ៊ុន សែន ទេ។
ក្នុងកិច្ចសម្ផាសផ្ទាល់មួយ ជាមួយវិទ្យុអាស៊ីសេរី ពីគេហដ្ឋានរបស់លោក ក្នុងសង្កាត់ជ្រោយចង្វា រាជធានីភ្នំពេញ ប្រធានគណបក្សខ្មែររួបរួមជាតិ បានពន្យល់ថា លោកបានច្រឡំលោក អេង ឆៃអ៊ាង ជាមួយលោក អ៊ី គឹមអៀង មិត្តភ័ក្ដិលោក និងជាមន្ត្រីគណបក្សខ្មែររួបរួមជាតិ នៅស្រុកបារាយណ៍ ខេត្តកំពង់ធំ ហើយថាកិច្ចសន្ទាតាមទូរស័ព្ទនោះ មានខ្លឹមសារប្រហាក់ប្រហែល នឹងការអះអាងខាងលើ របស់លោក អេង ឆៃអ៊ាង ដែរ។ លោកថា លោកប្រាប់ឲ្យអ្នកគាំទ្ររបស់លោក នៅស្រុកបារាយណ៍ បោះឆ្នោតឲ្យក្រុមលោក អ៊ី គឹមអៀង។
អន្ទាក់លោក ហ៊ុន សែន...
ការអះអាងរបស់លោក ទៀ បាញ់ ពីការ«ចុះចូល»របស់លោក ញឹក ប៊ុនឆៃ ក៏បានធ្វើឡើងស្រប នឹងព័ត៌មានជាច្រើន ដែលបានភ្ជាប់ព្រឹត្តិការណ៍ នៃការដកតំណែងរបស់លោក ញឹក ប៊ុនឆៃ ទៅនឹងការ«ច្របាច់បញ្ចូលគ្នា» ជាយថាហេតុណាមួយ រវាងគណបក្សខ្មែររួបរួមជាតិ និងគណបក្សសង្គ្រោះជាតិ។ អនុប្រធានគណបក្ប្រឆាំង លោក អេង ឆៃអ៊ាង មិនបានអះអាងពីករណីនេះទេ តែលោកបានថ្លែងស្វាគមន៍ ការរួបរួមណាក៏ដោយ ដែលអាចធ្វើឡើង រវាងខ្មែរអ្នកស្នេហាជាតិ និងអ្នកប្រជាធិបតេយ្យទាំងអស់។ លោកថា៖ «យើងអត់មានបដិសេធទេ ដែលថា គណបក្សណាក៏ដោយ ដែលចង់មកចូលរួម ជាមួយគណបក្សសង្គ្រោះជាតិ គឺយើងស្វាគមន៍»។
តែសម្រាប់អ្នកវិភាគវិញ បានប្រាប់គណបក្សសង្គ្រោះជាតិ គប្បីមានការប្រយ័ត្នប្រយែង ជាជាងចូលអន្ទាក់របស់លោក ហ៊ុន សែន ខណៈបុរសខ្លាំងដែលស្ថិតនៅក្នុងតំណែង តាំងពីជាង៣ទសវត្សន៍មកនេះ តែងគម្រាមជាញឹកញាប់ ពីលទ្ធភាពផ្ទុះសង្គ្រាម ប្រសិនជាគណបក្សប្រជាជនកម្ពុជារបស់លោក ចាញ់ឆ្នោត។
លោក មាស នី អ្នកសិក្សាស្រាវជ្រាវកិច្ចអភិវឌ្ឍសង្គម បានពន្យល់ថា ការទទួលលោក ញឺក ប៊ុនឆៃ មករួមរស់ ជាមួយគណបក្សសង្គ្រោះជាតិ អាចជួយបង្កើនសម្លេង ឲ្យគណបក្សសង្គ្រោះជាតិ ប្រសិនជាលោក ញឹក ប៊ុនឆៃ នៅក្នុងគណបក្សប្រឆាំង ក្នុងនាមជាបុគ្គលឯករាជ្យម្នាក់។ តែអ្នកវិភាគបានបន្តថា អតីតមេទ័ព លោក ញឹក ប៊ុនឆៃ នៅតែត្រូវបានចាត់ទុក ជាមន្ត្រីយោធាដដែល បើទោះជាលោក បានក្លាយជាជនសមញ្ញម្នាក់ក៏ដោយ ហើយលោក ហ៊ុន សែន អាចយកលេសថាគណបក្សសង្គ្រោះជាតិ ព្យាយាមគៀងគរកម្លាំងទ័ពនេះ ដើម្បីផ្ទុះអាវុធ ដូចក្នុងព្រឹត្តិការណ៍ឆ្នាំ១៩៩៧៕