ពាក្យ«វ៉ៃបែកធ្មេញ» ល្បីដល់អ៊ឺរ៉ុប
- ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី០៦ មិថុនា ២០១៧
- កែប្រែចុងក្រោយ: June 07, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
ការបោះឆ្នោត ជ្រើសរើសក្រុមប្រឹក្សាឃុំសង្កាត់ អាណត្តិទី៤ នៅក្នុងប្រទេសកម្ពុជា បានទាក់ទាញចំណាប់អារម្មណ៍ខ្លះៗដែរ ទៅដល់សារព័ត៌មានមួយចំនួន នៅទ្វីបអ៊ឺរ៉ុបខាងលិច។ ចាប់អារម្មណ៍ ដោយហេតុពីសន្ទុះងើបឡើង របស់គណបក្សសង្គ្រោះជាតិ ដែលដណ្ដើមបានជិត៥០០ឃុំសង្កាត់ ចេញពីកំណ្ដាប់ដៃរបស់គណបក្សប្រជាជនកម្ពុជា បើធៀបទៅនឹងអាណត្តិទី៣ ដែលគណបក្សប្រឆាំង រកបានតែ៤០ឃុំសង្កាត់ប៉ុណ្ណោះ។
ប៉ុន្តែសារព័ត៌មាន «Ouest-France» របស់បារាំង បានលើកមកពន្យល់ បែបផ្សេងទៅវិញ ថាយុវជនជំនាន់ក្រោយ គឺជាអ្នកកំណត់នូវជោគវាសនា របស់ពួកគេទៅអនាគត។ ក្រៅពីបានពន្យល់ នូវវិធីសាស្ត្រ ក្នុងការទាក់ទាញយុវវ័យ ពីសំណាក់គណបក្សធំទាំងពីរ សារព័ត៌មានតំបន់ភាគខាងលិច របស់ប្រទេសបារាំងមួយនេះ នៅបានលើកមកបញ្ជាក់ ពីការគម្រាមដ៏ល្បីមួយ របស់លោក ទៀ បាញ់ រដ្ឋមន្ត្រីការពារជាតិ មកពីគណបក្សប្រជាជនកម្ពុជា ដែលបានថ្លែងនៅមុនការបោះឆ្នោត ថានឹង«វ៉ៃបែកធ្មេញ»ក្រុមប្រឆាំង ប្រសិនជាក្រុមនេះងើបឡើងតវ៉ា ប្រឆាំងលទ្ធផលនៃការបោះឆ្នោត។
ម្ចាស់អត្ថបទ អ្នកស្រី «Anne Laure Porée» ដែលជាអ្នកយកព័ត៌មានឲ្យច្រើនស្ថាប័ន ពីប្រទេសកម្ពុជា និងដែលស្គាល់«ស្រុកខ្មែរ»យ៉ាងច្បាស់នោះ បានសរសេរថា ការបោះឆ្នោតជ្រើសរើសក្រុមប្រឹក្សា ឃុំសង្កាត់ អាណត្តិនេះ ជា«ការសាកល្បង»មួយ សម្រាប់គណបក្សធំទាំងពីរ និងជាពិសេសបំផុតនោះ គឺជាការសាកល្បង ពីប្រជាប្រិយភាពរបស់លោក ហ៊ុន សែន នាយករដ្ឋមន្ត្រីដែលមិនរង្គើពីកៅអី តាំងពីជាង៣ទសវត្សន៍មកហើយ។ បន្ទាប់មក អត្ថបទរបស់អ្នកស្រីបានដកស្រង់មកសរសេរ ដោយអក្សរក្រាស់ៗ ដើម្បីឲ្យឆាប់មើលឃើញ នូវពាក្យថា៖
«ធ្មេញក្រុមប្រឆាំង»
អ្នកសារព័ត៌មានបានសរសេរថា៖ «សម្រាប់គណបក្សប្រឆាំង ពេលវេលារបស់ពួកគេ បានមកដល់ហើយ បើទោះជាពួកគេបានប្រឈមមុខ នៅចំពោះការគាបសង្កត់ ដ៏ខ្លាំងក្លា ពីសំណាក់គណបក្សប្រជាជនកម្ពុជា ប្រៀបដូចស្ថិតក្រោម រ៉ូឡូកិនថ្នល់ (Rouleau compresseur) និងនៅចំពោះការគម្រាម "វ៉ៃបែកធ្មេញ"ក្រុមអ្នកហ៊ានតវ៉ា ទល់នឹងលទ្ធផលឆ្នោតក៏ដោយ។ នៅពេលនេះ គណបក្សប្រឆាំង ហាក់លែងខ្វល់ខ្វាយហើយ ពីសំនុំរឿងប្ដឹងផ្ដល់នៅឯតុលាការ និងការគម្រាមកំហែង មិនឈប់មិនឈរ ទៅលើពួកគេនោះ។»។
» គំនូរត្លុក របស់ចៅចេក៖
អ្នកស្រី «Anne Laure Porée» បានស្រង់សំដី របស់យុវតីខ្មែរម្នាក់ ដែលអ្នកស្រីសរសេរឈ្មោះ «សោភា» នៅក្នុងអត្ថបទ មកបញ្ជាក់ថា នាងបានទៅឃោសនា និងដង្ហែក្បួនឃោសនា ឲ្យគណបក្សកាន់អំណាច តាមការ«បង្ខំរបស់អាជ្ញាធរ» ហើយថាវិធីសាស្ត្រ ក្នុងការទាក់ទាញយុវវ័យកម្ពុជា ពីសំណាក់គណបក្ស ដែលមានអតីតភាព ពីគណបក្សកុម្មុយនីសឥណ្ឌូចិនមួយនេះ មានលក្ខណៈជា«ការចាប់ត្រី ឲ្យចូលសំណាញ់នេសាទ» របស់ខ្លួន។
ចំពោះទីភ្នាក់ងារព័ត៌មាន ស្វីស «ATS» វិញបានរាយការណ៍ថា សន្ទុះកើនឡើងរបស់គណបក្សប្រឆាំង នឹងគម្រាមទៅដល់ «រជ្ជកាលដ៏សម្បើម» របស់លោក ហ៊ុន សែន។ មានអាយុ ៦៤ឆ្នាំ នាយករដ្ឋមន្ត្រីរូបនេះ មិនបានឲ្យសញ្ញាថា លោកចង់ចាកចេញ ពីតំណែងនោះទេ។ សម្រាប់គណបក្សប្រឆាំងវិញ បានទទួលបានការគាំទ្រសឹងតែជាទូទៅ ពីសំណាក់យុវវ័យជំនាន់ក្រោយ ដែលមានចំនួនប្រមាណជា ៧០% នៃប្រជាជនទូទាំងប្រទេស។ ពួកគេទាំងនោះ មានការធុញទ្រាន់ណាស់ ទៅនឹងប្រព័ន្ធដឹកនាំដ៏ចាស់គំរិល ដដែលៗ ហើយសម្បូរពោរពេញ ដោយអំពើពុករលួយ៕