សម្រាប់អាជ្ញាធរកម្ពុជា ការផ្ដល់ដំណឹងមួយ ដែលទទួលបានពីគណបក្សប្រឆាំង គឺជាការ«ផ្សាយព័ត៌មានបំផ្លើស និងបំប៉ោងតួលេខ»។ មូលហេតុអ្វី? ព្រោះអ្នកសារព័ត៌មានពីររូប របស់វិទ្យុអាស៊ីសេរី គឺលោក ហួត វុទ្ធី ហៅ ជុន ច័ន្ទបុត្រ និងលោក ថា កិត្យា (អ្នករាយការណ៍ផ្ទាល់កន្លែង) បានរាយការណ៍បន្ត ពីការលើកឡើង របស់គណបក្សសង្គ្រោះជាតិ ដែលថា សមាជិក និងអ្នកគាំទ្ររបស់គណបក្សនេះ បានចូលរួមដង្ហែ​ក្បួនឃោសនាបញ្ចប់ ក្នុងរាជធានីភ្នំពេញ កាលពីថ្ងៃម្សិលម៉ិញ មានចំនួន៥០ម៉ឺននាក់ (ស្មើនឹងកន្លះលាននាក់)។

ការលើកឡើងខាងលើនេះ ក៏ត្រូវបានអ្នករាយការណ៍ព័ត៌មាន នៅផ្ទាល់កន្លែង របស់ទស្សនាវដ្ដីមនោរម្យ.អាំងហ្វូ បញ្ជាក់អះអាងកាលពីម្សិលម៉ិញដែរ ដូចមានផ្សាយ នៅក្នុងអត្ថបទ៖ «ឃោសនា​បញ្ចប់៖ CPP អះអាង​ពី​ចំនួន​១៥ម៉ឺន ខណៈ CNRP លើក​ឡើង​ពី៥០ម៉ឺន»។

វិទ្យុអាស៊ីសេរីធ្លាប់ផ្ដួលរំលំរដ្ឋាភិបាលភូមា?

តែសេចក្ដីរាយការណ៍ ​​ពីតួលេខខាងលើ ត្រូវបានអ្នកនាំពាក្យក្រសួងមហាផ្ទៃ លោក ខៀវ សុភ័គ ចាត់ទុក ជាការផ្សព្វផ្សាយ​តួលេខ«លំអៀង» និងមានចេតនាចង់«ផ្ដួលរំលំ​រដ្ឋាភិបាលកម្ពុជា» ដោយចេញសារព្រមានមួយ ទៅកាន់លោក ហួត វុទ្ធី ហៅ ជុន ច័ន្ទបុត្រ នៅថ្ងៃទី៣ ខែមិថុនានេះ។

ស្រង់សំដីដោយសារព័ត៌មានក្នុងស្រុកមួយ ដែលគេស្គាល់ថា ជាសារព័ត៌មាននាំពាក្យឲ្យរដ្ឋាភិបាល និងគណបក្សប្រជាជនកម្ពុជា មន្ត្រីក្រសួងមហាផ្ទៃ​ខាងលើ បានថ្លែងឡើងថា៖ «អ្នកទាំងពីរនាក់នេះ (លោក ជុន ច័ន្ទបុត្រ និងលោក ថា កិត្យា) បានផ្សាយព័ត៌មានបំផ្លើស និងបំប៉ោងតួលេខ ដែលថា អ្នកចូលរួមហែរក្បួន CNRP មានជាងកន្លះលាននាក់។ តួលេខនេះ ជាតួលេខលំអៀង ក្នុងចេតនាបំបែកបំបាក់ជាតិខ្មែរ ដើម្បីផលប្រយោជន៍ផ្ទាល់ខ្លួន ដែលគណបក្ស CNRP បានសន្យា​ឱ្យ ជុន ច័ន្ទបុត្រ។ ជុន ច័ន្ទបុត្រ ពិតជាមានចេតនា ចង់ផ្តួលរំលំរាជរដ្ធាភិបាលកម្ពុជា ដូចដែលបក្សពួកខ្លួន​ធ្លាប់បានធ្វើ នៅភូមា។»។

លោក ខៀវ សុភ័គ មិនបានបញ្ជាក់ថា តើផលប្រយោជន៍នោះ ជាអ្វី ហើយលោកមានភស្ដុតាងច្បាស់លាស់ ដើម្បីនិយាយរឿងនេះ ឬយ៉ាងណាទេ? តែលោក នៅបានបន្តព្រមានលោក ហួត វុទ្ធី ដោយភ្ជាប់សេចក្ដីរាយការណ៍​ព័ត៌មា​ន​ខាងលើ​នេះ ទៅនឹងរឿងរ៉ាវ «បន្លំខ្លួនចូលពន្ធនាគារ» ដ៏ប្រទាំងប្រទើស កាលពីខែមេសា​កន្លងមកថា៖ «ឥឡូវថា សំណាងទៅចុះ ដែល ជុន ច័ន្ទបុត្រ មានសញ្ជាតិ២ ច្បាប់កម្ពុជាមិនអាចចងជាប់។ តែទោះយ៉ាងណាក៏ដោយ ជុងនៅតែចាំបុត្រ។»។

«ឆ្កែបម្រើ»

អាជ្ញាធរកម្ពុជា​បានចោទលោក ហួត វុទ្ធី ហៅ ជុន ច័ន្ទបុត្រ ពីបទ​ធ្វើ «សេចក្ដី​ប្រកាស​​ក្លែង​បន្លំ» ដើម្បី​​បាន​ចូល ទៅ​ក្នុង​​ពន្ធនាគារ​​​ព្រៃស កាលពី​​ថ្ងៃ១៩ ខែ​មេសា ​ឆ្នាំ២០១៧កន្លង​​មក ជាមួយ​នឹង​​ក្រុម​​តំណាង​​រាស្ត្រ មក​​ពី​​គណបក្ស​​​សង្គ្រោះ​​​ជាតិ។ ព្រះ​រាជ​​អាជ្ញា​រងសាលា​​ដំបូង​​រាជធានី​​ភ្នំពេញ ​​លោក​ សៀង សុខ បានចេញដីកា​​កោះហៅ​​លោកជុន ច័ន្ទបុត្រ ​ក្នុង​​នាម​​ជា​​«ជន​សង្ស័យ» ឲ្យចូល​ទៅ​បង្ហាញ​ខ្លួន នៅ​ថ្ងៃ​ទី២ ខែឧសភា​ ​ឆ្នាំ២០១៧។

ប៉ុន្តែអ្នកសារព័ត៌មាន​រូបនេះ បានចាកចេញពីប្រទេសកម្ពុជា ទៅសហរដ្ឋអាមេរិក នៅថ្ងៃសុក្រ ទី២៨ ខែមេសា និងមិនបានចូលទៅបង្ហាញខ្លួន តាមការកោះហៅ របស់តុលាកាទេ។ កាលពីពេលកន្លងមក លោកបានបដិសេធ​ការចោទប្រកាន់ និង​អះអាង​ថា លោកមិនបាន​ក្លែង​​ឈ្មោះ​ពិត របស់​​លោក នៅក្នុង​បញ្ជី​កត់​​ឈ្មោះ អ្នកចូល​​ពន្ធនាគារ​​នោះឡើយ។

នៅក្នុងសេចក្ដីថ្លែងការណ៍មួយ ដែលចេញផ្សាយ នៅយប់ថ្ងៃទី១ ខែឧសភា បានឲ្យដឹងថា ស្ថាប័នវិទ្យុអាស៊ីសេរី ពីរដ្ឋធានី វ៉ាស៊ីនតោន សហរដ្ឋអាមេរិក បានសម្រេច មិនឲ្យលោក ហួត វុទ្ធី វិលត្រឡប់​ទៅប្រទេស​កម្ពុជាវិញទេ។ ស្ថាប័នផ្សព្វផ្សាយចម្រុះភាសាមួយនេះ បាន​ចាត់​ទុក ចំណាត់ការ​របស់​អាជ្ញាធរក​ម្ពុជា ប្រឆាំង​លោក ហួត វុទ្ធី គឺជារឿង​នយោបាយ ក្នុងចេតនា​បង្វែង ចំណាប់​អារម្មណ៍​​ប្រជាពលរដ្ឋ​ខ្មែរ ក្នុងរដូវកាល​បោះឆ្នោត និងរឹត​តែ​បង្ហាញ​ឲ្យ​ឃើញ នូវ​ស្ថានភាព​ដ៏អាក្រក់ នៃ​សេរីភាព​សារព័ត៌មាន​ នៅ​កម្ពុជា។

ពេលនោះ លោក ខៀវ សុភ័គ បានហៅលោក ជុន ច័ន្ទបុត្រ ថាជា «ឆ្កែបម្រើ»​ ឲ្យប្រធានវិទ្យុអាស៊ីសេរី តាំងពីដើមរៀងមក «ព្រោះវាស្ដាប់បញ្ជាគេ» ឱ្យចាកចេញពីប្រទេសកម្ពុជា៕