CNRP ថា​មាន​ជន​ខិល​ខូច​កាត់​ត​សម្លេង រឿង​បញ្ឈប់​មន្ត្រី​រាជការ កង​កម្លាំង​ប្រដាប់​អាវុធ

ប្រធានគណបក្សសង្គ្រោះជាតិ បានបរិហារទង្វើនោះ ថាត្រូវបានធ្វើឡើង ដោយជនខិលខូច ដែលយកសម្លេងរបស់លោក ទៅកាត់ត ដើម្បី«បំភ្លៃការពិត»។
CNRP ថា​មាន​ជន​ខិល​ខូច​កាត់​ត​សម្លេង រឿង​បញ្ឈប់​មន្ត្រី​រាជការ កង​កម្លាំង​ប្រដាប់​អាវុធ
លោក កឹម សុខា ប្រធានគណបក្សសង្គ្រោះជាតិ។ (រូបថត MONOROOM.info)
Loading...
  • ដោយ: ដារា រិទ្ធ ([email protected]) - ភ្នំពេញ ថ្ងៃទី២៦ ឧសភា ២០១៧
  • កែប្រែចុងក្រោយ: May 26, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

នៅថ្ងៃសុក្រទី២៦ ខែឧសភានេះ គណបក្សសង្រ្គោះជាតិ ដែលជាគណបក្សប្រឆាំងធំជាងគេ បានចេញមកធ្វើសេចក្ដីបដិសេធ និងមិនទទួលខុសត្រូវ ចំពោះការផ្សព្វផ្សាយព័ត៌មានមិនពិត និងមានការកាត់តសម្លេង របស់ថ្នាក់ដឹកនាំគណបក្ស ដោយមូលបង្កាច់ថា មានការដក ឬបញ្ឈប់ មន្រ្តីរាជការ កងកម្លាំងប្រដាប់អាវុធ នៅពេលដែលគណបក្សសង្រ្គោះជាតិឈ្នះឆ្នោត ដឹកនាំរដ្ឋាភិបាល។ នេះ បើតាមសេចក្តីថ្លែងការណ័ ដែលទើបនឹង​ចេញផ្សាយ ដោយគណបក្ស នៅមុននេះបន្តិច។

ដូចគ្នា នឹងសេចក្ដីថ្លែងការណ៍នេះដែរ លោក កឹម សុខា ប្រធានគណបក្សសង្គ្រោះជាតិ បានសរសេរមុននេះ នៅលើទំព័រហ្វេសប៊ុក​របស់លោកថា៖ «ថ្មីៗនេះ មានជនខិលខូច កាត់តសម្លេងខ្ញុំ ដើម្បីបំភ្លៃការពិត។ ហេតុនេះហើយ ខ្ញុំសូមបញ្ជាក់សារជាថ្មីម្ដងទៀតថា [បើ]គណបក្សសង្គ្រោះជាតិឈ្នះ ដឹកនាំរាជរដ្ឋាភិបាល យើងគ្មានគោលនយោបាយ ដកកងកម្លាំងប្រដាប់អាវុធ ចេញពីតំណែងនោះទេ។»។

ប្រធានគណបក្សប្រឆាំង ដែលមានវត្តមាន នៅឯក្រុងសំរោង ខេត្តឧត្ដរមានជ័យ នៅក្នុងយុទ្ធនាការឃោសនាបោះឆ្នោត ក្រុមប្រឹក្សា ឃុំ-សង្កាត់នោះ បានថ្លែងបន្តថា៖ «ផ្ទុយទៅវិញ មានតែផ្ដល់ប្រាក់បៀវត្សឲ្យសមរម្យ សម្រាប់លើកកម្ពស់ជីវភាព​មន្ដ្រីរាជការ កងកម្លាំងប្រដាប់អាវុធ ក្នុងគោលបំណង បម្រើជាតិប្រជាពលរដ្ឋខ្មែរ ដោយមិនប្រកាន់ និងមិនរើសអើង»។

កាលពីប៉ុន្មានថ្ងៃមុន មេដឹកនាំគណបក្សរូបនេះ បានថ្លែងថា គណបក្សរបស់លោក គ្រោងនឹងលុបក្រសួង​អភិវឌ្ឍន៍ជនបទ​ចោល នៅពេលទទួលបានសម្លេងឆ្នោតឈ្នះ ដើម្បីដឹកនាំរដ្ឋាភិបាល។ ការលើកឡើងរបស់លោក បានបង្កការព្រួយបារម្ភ ទៅដល់សាធារណមតិមួយចំនួន ដែលគិតថា ការលុបចោលស្ថាប័នរដ្ឋមួយនេះ មានន័យស្មើរនឹងការបាត់បង់ការងារ សម្រាប់មន្ត្រីរាជការជាច្រើនរយពាន់នាក់ ដែលបម្រើការ នៅក្នុងស្ថាប័ននេះ។

នៅចំពោះការបារម្ភនោះ លោក កឹម សុខា បានចេញមកបកស្រាយវិញថា គោលនយោបាយវិមជ្ឈការ (ការផ្ដល់អំណាចទៅថ្នាក់ក្រោម) របស់គណបក្សលោក គឺជាមូលហេតុចំបង នៃការលុបចោលក្រសួងមួយនេះ ហើយគោលនយោបាយនេះ នឹងធ្វើឲ្យថ្នាក់ក្រោមជាតិ (ឃុំ-សង្កាត់) ទាំងនោះ មានការងារធ្វើច្រើន និងចុះជាប់ផ្ទាល់ នៅនឹងមូលដ្ឋាន ជាជាងមានស្ថាប័នជាតិធំមួយ ដែលគ្រប់គ្រងពីចម្ងាយ និងចំណាយ មិនចំតម្រូវការ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...