កម្រងរូបភាពក្នុងពិធីឧទ្ទិសសពទាហានមួកខៀវខ្មែរ នៅអាហ្វ្រិកកណ្ដាល
- ដោយ: សេក មនោរកុមារ ([email protected]) - ប៉ារីស ថ្ងៃទី២២ ឧសភា ២០១៧
- កែប្រែចុងក្រោយ: May 22, 2017
- ប្រធានបទ: ពលីកម្ម
- អត្ថបទ: មានបញ្ហា?
- មតិ-យោបល់
-
ខណៈក្នុងប្រទេសកម្ពុជា បានធ្វើពិធីទទួល សពទាហានខ្មែរទាំង៤រូប ក្នុងយប់ថ្ងៃអាទិត្យ ទី២១ ខែឧសភា នៅអាកាសយានដ្ឋានអន្តរជាតិភ្នំពេញ ដោយមានការចូលរួម ពីក្រុមគ្រួសារសព លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់ច្រើននាក់នោះ វីរភាពរបស់ទាហានខ្មែរទាំងនេះ ក៏ត្រូវបានផ្ដល់កិត្តិយស ដោយ «Minusca (បេសកកម្មពហុជំនាញ របស់អង្គការសហប្រជាជាតិ ដើម្បីស្ថិរភាព នៅប្រទេសអាហ្វ្រិកកណ្ដាល)» ក្នុងពិធីរំលឹកវិញ្ញាណក្ខន្ធមួយ កាលពីល្ងាចថ្ងៃសុក្រ ទី១២ ខែឧសភា នៅក្នុងរដ្ឋធានី «Bangui» នៃប្រទេសអាហ្វ្រិកកណ្ដាលដែរ។
ក្នុងពិធីនោះ មានការចូលរួម ពីអគ្គលេខាធិការរង អង្គការសហប្រជាជាតិ លោក ហ្សង់ព្យែ ឡាក្រ័រ (Jean Pierre Lacroix) ព្រមទាំងសមាជិករដ្ឋាភិបាល នៃប្រទេសអាហ្វ្រិកកណ្ដាល មន្ត្រីការទូតបរទេស និងមន្ត្រីទទួលខុសត្រូវ ក្នុង«Minusca» ជាច្រើននាក់។
យុទ្ធជនមួកខៀវកម្ពុជា ទាំងបួនរូប រួមមាន៖ លោកអនុសេនីយឯក គឹម សំ អ្នកបើកបរប៊ុលដូស័រ - លោកអនុសេនីយ៍ត្រី ស៊ាន នរិន្ទ (ព្រិន្ទបាលទោ) ជំនួយការត្រួតពិនិត្យគុណភាព - លោកពលបាលឯក មុំ តុលា (ព្រិន្ទបាលទោ) ជំនួយការបើកបរអ៊ិស្ការវ៉ាទ័រ និងលោកអនុសេនីយ៍ត្រី ម៉ៅ អេង (អនុសេនីយ៍ឯក) បុគ្គលិកពេទ្យ។
ពួកលោកទាំង៤រូប រួមនឹងទាហានមួកខៀវជាតិម៉ារុកម្នាក់ផង បានពលីជីវិត នៅក្នុងការវាយប្រហារ ដោយអាវុធមួយ កាលពីយប់ថ្ងៃចន្ទទី៨ ខែឧសភានេះ បង្កឡើងដោយក្រុមឧទ្ធាម «anti-Balaka» នាតំបន់ភាគខាងកើត ឈៀងខាងត្បូង នៃប្រទេសអាហ្វ្រិកកណ្ដាល។ ការវាយប្រហារនោះ ត្រូវបានអគ្គលេខាធិការអង្គការសហប្រជាជាតិ ចាត់ទុកជាឧក្រិដ្ឋកម្មសង្គ្រាម និងទាមទារ ឲ្យយកឧក្រិដ្ឋជនមកផ្ដន្ទាទោស។
ទស្សនាវដ្ដីមនោរម្យ.អាំងហ្វូ សូមយកទិដ្ឋភាពជារូបថត ពីពិធីរំលឹកវិញ្ញាណក្ខន្ធនោះ មកចុះផ្សាយជូនដូចខាងក្រោម (រូបថតរបស់ «Minusca»)៖
» ទស្សនារូបភាពផ្សេងទៀត សូមចុចនៅលើទំព័របន្ទាប់។