ធី សុវណ្ណថា៖ សម រង្ស៊ី «មុខ​ក្រាស់»​មិន​ដក​រូប​ឡាន​នាង​ចេញ

ការយករូបថត កាលពីការឃោសនាបោះឆ្នោតមុនៗ មកបង្ហោះនៅថ្ងៃនេះ ដោយមានជាប់ទាំងរូបថត របស់រថយន្ដមួយមកជាមួយផង មិនបានធ្វើឲ្យអតីតតារាហ្វេសប៊ុក កញ្ញា ធី សុវណ្ណថា រីករាយទេ ជាពិសេសបើសិនជាអ្នកបង្ហោះនោះ ជាលោក សម រង្ស៊ី អតីតប្រធាន​​គណបក្ស​សង្គ្រោះជាតិ។ នាងបានទាមទារ ឲ្យលុបរូបថតនោះចេញ ដោយសំអាងពីច្បាប់«កម្មសិទ្ធិឯកជន» មុននឹងវាយតម្លៃលោក សម រង្ស៊ី ថាមុខក្រាស់ ដែលមិនបាន​ធ្វើតាមការទាមទារ​របស់នាង។
ធី សុវណ្ណថា៖ សម រង្ស៊ី «មុខ​ក្រាស់»​មិន​ដក​រូប​ឡាន​នាង​ចេញ
ពីឆ្វេងទៅស្ដាំ៖ កញ្ញា ធី សុវណ្ណថា អតីតអ្នកគាំទ្រ និងលោក សម រង្ស៊ី អតីតប្រធាន របស់គណបក្សសង្គ្រោះជាតិ។ (រូបថតលើហ្វេសប៊ុក)
Loading...
  • ដោយ: កេសរ កូល ([email protected]) - ភ្នំពេញ ថ្ងៃទី២០ ឧសភា ២០១៧
  • កែប្រែចុងក្រោយ: May 20, 2017
  • ប្រធានបទ: នយោបាយ
  • អត្ថបទ: មានបញ្ហា?
  • មតិ-យោបល់

«សម រង្សី ពិតជាមុខក្រាសណាស់ [ដែល]រហូតមកដល់ពេលនេះ [នៅ]មិនទាន់លុបរូបឡានរបស់ខ្ញុំ» នេះ ជាសំណេររបស់កញ្ញា ធី សុវណ្ណថា ដើម្បីរំលឹកជាថ្មី ទៅលោក សម រង្ស៊ី អតីតប្រធានគណបក្សសង្គ្រោះជាតិ បន្ទាប់ពីកញ្ញា បានសរសេរទាមទារ កាលពីប៉ុន្មានម៉ោងមុន ឲ្យដករូបថតមួយសន្លឹក ដែលបានថតជាប់រថយន្ដមួយគ្រឿង ហើយដែលអតីតតារាហ្វេសប៊ុករូបនេះ បានអះអាងថា ជារថយន្ដរបស់នាង។

ហេតុអ្វីបានជាទាមទារ ឲ្យដក? ព្រោះអតីតអ្នកគាំទ្រគណបក្សប្រឆាំងរូបនេះ គិតថា រូបរថយន្ដនោះ ជារូបរថយន្ដរបស់នាង ហើយនាងយោង «តាមច្បាប់កម្មសិទ្ធិឯកជន» និងយោង​មូលហេតុថា កញ្ញា«មិនពេញចិត្ត ឈប់គាំទ្រ CNRP» ទៀតហើយ។ ដោយសារតែបែបនេះ ទើបអតីតតារាបានសរសេរឡើង​ថា៖ «ស្នើលោក សម រង្សី លុបរូបឡាន ដែលជាកម្មសិទ្ធនាងខ្ញុំ ចេញពីកាឃោសនា CNRP ដែលបានផ្សាយ [កាលពី]ម្សិលម៉ិញ»។

អតីតអ្នកគាំទ្រគណបក្សប្រឆាំង បានឆ្លៀតឱកាស ដើម្បីបន្ថែម«ផ្លែផ្កា» ឲ្យគណបក្សសង្គ្រោះជាតិថា៖ «CNRP មានមេដឹកនាំកំសាក កុហកបោករាស្រ្ត ល្មោភស្រី ញៀនល្បែង ពុករលួយ បក្សពួកនិយម.. »។

កាលពីថ្ងៃម្សិលម៉ិញ នៅលើទំព័រហ្វេសប៊ុក​ របស់អតីតប្រធានគណបក្សសង្គ្រោះជាតិ មានបង្ហោះរូបថតមួយសន្លឹក ប្លង់ក្បួនឃោសនា​ក្នុងរាជធានីមួយសន្លឹក និងសេចក្ដីប្រកាស​ព័ត៌មានមួយសន្លឹក ដែលបញ្ជាក់ថា គណបក្សសង្គ្រោះជាតិ នឹងដង្ហែក្បួនឃោសនាបោះឆ្នោត ជ្រើសរើសក្រុមប្រឹក្សា ឃុំ-សង្កាត់ នៅរាជធានីភ្នំពេញ នាថ្ងៃទី ២០ ឧសភា ២០១៧នេះ។ រូបថតមួយសន្លឹកនោះហើយ ដែលកញ្ញា ធី សុវណ្ណថា ចោទថាមានរូបរថយន្ដរបស់នាង៖

ច្បាប់អី និងមាត្រាត្រង់ណា? អ្នកច្បាប់ម្នាក់ ឆ្លើយប្រាប់ទស្សនាវដ្ដីមនោរម្យ.អាំងហ្វូថា «រកមិនឃើញទេ»! តែបើមាន គឺកម្ពុជាមានច្បាប់រក្សាសិទ្ធិ ឬហៅថាច្បាប់កម្មសិទ្ធិបញ្ញា។ តែបើតាមច្បាប់នេះ កញ្ញា ធី សុវណ្ណថា គ្មានសិទ្ធិអ្វី ទៅធ្វើការទាមទារ​ដូច្នេះឡើយ ក្រៅតែពីសុំ ឲ្យបិតបាំង​​ស្លាកលេខរថយន្ដ ដែលបញ្ជាក់ ពីឯកជនភាព​របស់នាងប៉ុណ្ណោះ។ ជាឧទាហរណ៍សាមញ្ញ៖ បន្ទាប់ពីបានចាកចេញ ពីផលិតកម្ម«សាន់ដេ» កញ្ញា មាស សុខសោភា គ្មានសិទ្ធិស្របច្បាប់ណាមួយ ទៅទាមទារ ឲ្យផលិតកម្មសាន់ដេ ដករូបនាង និងលុប​សម្លេងនាង ចេញពីវីដេអូ ឬចម្រៀង ដែលនាងបានធ្វើ និងថត​ឲ្យផលិតកម្ម​«សាន់ដេ» ពីមុនមកទេ។

ចុះបើអញ្ចឹង តើកញ្ញា ធី សុវណ្ណថា ទាមទារឲ្យ​ដករូប​រថយន្ដខ្លួន ដើម្បីអ្វី? មិនពិបាករកចម្លើយទេ បើគេគ្រាន់តែ​ក្រឡេកភ្នែកមួយគ្រវាស ទៅលើការបញ្ចេញមតិយោបល់ របស់ប្រិយមិត្តហ្វេសប៊ុក ដែលបានធ្វើ នៅក្រោមការទាមទារ របស់អតីតតារាហ្វេសប៊ុករូបនេះ។ មតិយោបល់ ដែលគ្មានការជេរប្រទេច និងដែលខ្លី​សមសួនជាងគេ មានសរសេរដូច្នេះថា៖ «ចង់ល្បីឡើងវិញឬ? ឬចង់ឲ្យលោកតាឆាប់មើលឃើញ?»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...