រដ្ឋាភិបាលក្រុងព្យុងយ៉ាង បានចោទភ្នាក់ងារចារកម្មអាមេរិក ហៅកាត់ថា «CIA» ថាបានរៀបចំល្បិចកល់ ដើម្បីសម្លាប់លោក គីម ជុង-អ៊ុន (Kim Jong-Un) ប្រមុខដឹកនាំវ័យក្មេង របស់របបកុម្មុយនីស។ នេះ បើតាមរបាយការណ៍ របស់ទីភ្នាក់ងារ​ព័ត៌មាន​ផ្លូវការ «KCNA» របស់​កូរ៉េខាងជើង ដែលបានស្រង់សេចក្ដីប្រកាសព័ត៌មានមួយ មកចុះផ្សាយ។

សេចក្ដីប្រកាសព័ត៌មាន របស់ក្រសួងសន្តិសុខរដ្ឋ របស់ប្រទេសកូរ៉េខាងជើង បានអះអាងថា ភ្នាក់ងារចារកម្មអាមេរិក ដោយមានកិច្ចសហការ«ស្អិតរមួត» ជាមួយភ្នាក់ងារចារកម្ម កូរ៉េខាងត្បូង បានរៀបចំដំណើររឿងមួយឡើង ដោយមានទាំងការប្រើប្រាស់ នូវជាតិគីមីបំពុលផង ដើម្បីសម្លាប់លោក គីម ជុង-អ៊ុន នៅក្នុងពិធីបុណ្យជាតិមួយ ក្នុងរដ្ឋធានីព្យុងយ៉ាង។

អត្ថបទរបស់ក្រសួងសន្ដិសុខរដ្ឋ បានលើកឡើងថា សារជាតិវិទ្យុសកម្ម ឬសារជាតិបំពុលគ្មានក្លិន ដែលមានកម្លាំងពុលខ្លាំងបំផុត គឺជាមធ្យោបាយ​ដ៏ប្រសើរ​ជាងគេ ដើម្បីយក​មកធ្វើឃាត ដោយហេតុថា គេមិនចាំបាច់ ចូលទៅជិត​មុខសញ្ញា ដើម្បីប្រើប្រាស់​សារជាតិ​ទាំងនេះ ហើយថែម​ទាំងធ្វើ​ឲ្យ​មុខសញ្ញាស្លាប់​ រវាងពី៦ខែ ទៅ១២ខែ ដោយមិនដឹងខ្លួន ថែមទៀត។

ការចោទប្រកាន់ ពីគម្រោងធ្វើឃាតនេះ បានធ្វើឡើងស្របពេល នឹងសេចក្ដីប្រកាសជាច្រើនផ្សេងទៀត របស់របបក្រុងព្យុងយ៉ាង ប្រឆាំងប្រទេសកូរ៉េខាងត្បូង និងសហរដ្ឋអាមេរិក ដើម្បីឆ្លើយតប​ទៅនឹងការលើកឡើងជាហូរហែ របស់ប្រធានាធិបតីអាមេរិក លោក ដូណាល់ ត្រាំ (Donald Trump) ដែលថាបានត្រៀមខ្លួនរួចជាស្រេច ក្នុងការ«ដោះស្រាយ»បញ្ហាកូរ៉េខាងជើង តែម្នាក់ឯង (និងជាមួយសម្ព័ន្ធមិត្តអាមេរិក នៅក្នុងតំបន់) រួមទាំងការដោះស្រាយ តាមផ្លូវយោធានោះផង។

«ការប្រកាសសង្គ្រាម»

ភាពតានតឹងនៅលើឧបទ្វីបកូរ៉េ បានឡើងដល់កម្រិតកំពូល រាប់ចាប់តាំង ពីការសាកល្បងបាញ់កាំជ្រួចអន្តរទ្វីបថ្មីៗបំផុត ពីសំណាក់ប្រទេសកូរ៉េខាងជើង ដោយរំលោភទៅលើការហាមឃាត់ របស់ក្រុមប្រឹក្សាសន្តិសុខអង្គការសហប្រជាជាតិ។ ក្រុមអ្នកជំនាញលើបញ្ហាកូរ៉េ បានជឿថា ប្រទេសកុម្មុយនីសមួយនេះ ដែលនៅ​តែបន្តអភិវឌ្ឍន៍ គម្រោង​សព្វាវុធប្រល័យលោក​របស់​ខ្លួន កំពុងត្រៀមរៀបចំ ការសាកល្បង​គ្រាប់បែកនុយក្លេអ៊ែរ ជាលើកទី៦ទៀត។

សេចក្ដីប្រកាសព័ត៌មាន របស់ក្រសួងសន្តិសុខរដ្ឋកូរ៉េខាងជើង បានចាត់ទុកគម្រោងធ្វើឃាតនេះ គឺជា«ការប្រកាសសង្គ្រាម» ពីសំណាក់សហរដ្ឋអាមេរិក និង«បរិវា» ប្រឆាំង«សាធារណរដ្ឋប្រជាមានិត និងប្រជាធិបតេយ្យកូរ៉េ (ឈ្មោះជាផ្លូវការ របសប្រទេសកូរ៉េខាងជើង)»។ អត្ថបទនោះ បានសរសេរបន្តថា៖ «ភ្នាក់ងារចារកម្ម "CIA" និងចារកម្ម "IS" (កូរ៉េខាងត្បូង) បានពង្វក់ស្មារតី និងបានឲ្យប្រាក់ ទៅឲ្យបុគ្គលម្នាក់ ដែលគេស្គាល់ឈ្មោះ "Kim"។ យើងនឹងបើកមុខជាសាធារណៈ ហើយកំទេចចោល ដោយគ្មានមេត្តា នូវបុគ្គល​ម្នាក់នេះ ដែលជាភេរវជន​ចុងក្រោយ​បង្អស់ នៃភ្នាក់ងារ "CIA" និងភ្នាក់ងារចារកម្មអាយ៉ង (កូរ៉េខាងត្បូង)។»។

រហូតមកដល់ម៉ោងនេះ មិនមានប្រភពណាផ្សេង អះអាងពីគម្រោងធ្វើឃាត ដូចការលើកឡើង របស់របបកុម្មុយនីសទេ។ ភ្នាក់ងារចារកម្ម «CIA» របស់អាមេរិក និង «IS» របស់កូរ៉េខាងត្បូង ក៏មិនមានប្រតិកម្មអ្វីជាផ្លូវការ ទាក់ទងនឹងការចោទប្រកាន់ខាងលើដែរ៕