នាវាសង្គ្រាម​បារាំង​​ផ្ទុក​ឧទ្ធម្ភាគចក្រ ទៅ​ដល់​ជប៉ុន​ដើម្បី​សមយុទ្ធ

នាវាសង្គ្រាម​ផ្ទុក​ឧទ្ធម្ភាគចក្រ របស់ប្រទេសបារាំង ដែលមានឈ្មោះ «Mistral» បានមកដល់​​ឆក​សមុទ្រ នៃ​ប្រទេស​ជប៉ុន​​ហើយ កាលពីថ្ងៃសៅរ៍ ដើម្បីចូលរួមធ្វើ​សមយុទ្ធ​ដ៏ធំ​មួយ ជាមួយ​ប្រទេស​ជា​ច្រើន​នៅ​ក្នុង​តំបន់។ ជាសមយុទ្ធ ដែលគ្រោងធ្វើ នៅចំពេល​ដែលស្ថានការណ៍​តានតឹង កំពុង​កើតមាន​យ៉ាង​ខ្លាំងក្លា ជាមួយ​ប្រទេស​កូរ៉េ​ខាង​ជើង។
នាវាសង្គ្រាម​បារាំង​​ផ្ទុក​ឧទ្ធម្ភាគចក្រ ទៅ​ដល់​ជប៉ុន​ដើម្បី​សមយុទ្ធ
នាវាសង្គ្រាម​ផ្ទុក​ឧទ្ធម្ភាគចក្រ របស់ប្រទេសបារាំង ដែលមានឈ្មោះ «Mistral»។ (រូបថតឯកសារ)
Loading...
  • ដោយ: សេក មនោរកុមារ ([email protected]) - ប៉ារីស ថ្ងៃទី២៩ មេសា ២០១៧
  • កែប្រែចុងក្រោយ: April 30, 2017
  • ប្រធានបទ: ឧបទ្វីបកូរ៉េ
  • អត្ថបទ: មានបញ្ហា?
  • មតិ-យោបល់

នាវាសង្គ្រាមផ្ទុកឧទ្ធម្ភាគចក្រ របស់ប្រទេសបារាំង ដែលមានឈ្មោះ «Mistral» នឹងចូលធ្វើសមយុទ្ធរួមគ្នា​ដ៏​ធំ រវាង​កង​ទ័ព មកពីប្រទេសមហាយក្សចំនួនបួន គឺបារាំង ជប៉ុន អង់គ្លេស និងអាមេរិក។ ជាសមយុទ្ធ​យោធា​ដែល​បានគ្រោង​ធ្វើ ជួនចំពេល ជាមួយនឹងស្ថានភាពក្នុងតំបន់ កំពុងកើនកម្ដៅឡើងយ៉ាងខ្លាំងក្លា ជា​មួយ​ប្រទេស​​កុម្មុយនីសកូរ៉េ។

នាវា «Mistral» បានចូលចត កាលពីថ្ងៃសៅរ៍ នៅក្នុងឆកសមុទ្រ «Sasebo» នៃក្រុង «Nagasaki» ស្ថិត​នៅ​ភាគ​នារតី នៃ​ប្រទេស​ជប៉ុន។ នេះ បើតាមការប្រកាសឲ្យដឹង របស់កងទ័ពជប៉ុន និងអាជ្ញាធរបារាំង។ នាវា​មួយ​គ្រឿង​នេះ មាន​លក្ខណៈ​ជា​មន្ទីរពេទ្យ​ចល័ត នៅលើផ្ទៃសមុទ្រផង និងមាន​សមត្ថភាព ក្នុង​ការ​ដឹក​ជញ្ជូន​សម្ភារៈ សឹក និង​​កង​កម្លាំង​ផង។ វាមានផ្ទុក នូវទូកតូចៗជាច្រើន ដើម្បីដឹកពល​ទាហាន យក​ទៅដាក់ចុះ ​នៅ​លើ​ដី​គោក​ បាន​ភ្លាមៗ។

» រូបភាពពន្យល់ ពីសមត្ថភាពដ៏លំអិត នៃនាវាសង្គ្រាម «Mistral» របស់បារាំង៖

ការមកដល់របស់នាវាចម្បាំងបារាំង មិនត្រឹមតែជួនចំពេល ដែលស្ថានការណ៍ក្នុងតំបន់ កំពុង​តាន​តឹង​នោះ​ទេ ​តែ​ថែម​ទាំង​ជួន​ចំពេល នៃការបាញ់សាកល្បង កាំជ្រួចអន្តរទ្វីបមួយគ្រាប់ មិនបានជោគជ័យ របស់​​ប្រទេស​​កូរ៉េ​ខាង​​ជើង កាល​​ពីព្រឹក​ព្រហាម​ ថ្ងៃសៅរ៍ នោះ​ផង។ ការបាញ់សាកល្បងនេះ ត្រូវបានគេគេគិតថា ជា​​​សកម្មភាព​​​មួយ «ផ្គើន» ទៅ​នឹង​ការ​ទាមទារ​​​របស់​សហរដ្ឋ​អាមេរិក ក្នុងការ​ស្នើ​​ឲ្យកោះប្រជុំជា​បន្ទាន់ កាលពីថ្ងៃសុក្រ នូវក្រុម​ប្រឹក្សា​សន្តិសុខ របស់​​​អង្គការ​​​សហប្រជាជាតិ ដើម្បី​ប្រឆាំងនឹង «ការគម្រាម​ផ្នែកនុយក្លេអ៊ែរ ពីសំណាក់​របប​ក្រុង ព្យុងយ៉ាង។

» អានអត្ថបទដែលទាក់ទង៖ កូរ៉េ​ខាង​ជើង​បាញ់​កាំជ្រួច​ជា​ថ្មី តែ​ជួប​បរាជ័យ

ក្រៅពីសភាពតានតឹង ជាមួយប្រទេសកូរ៉េខាងជើង គេក៏មិនត្រូវបំភ្លេចដែរ  ពីជម្លោះដែនសមុទ្រ រវាង​ប្រទេស​ចិន និងប្រទេសជិតខាងជាច្រើន (រាប់តាំងពីប្រទេសជប៉ុន ចុះមកដល់បណ្ដាប្រទេស នៅក្នុង​សមាគម​អាស៊ាន) ដើម្បី​ទាមទារ​បូរណភាព​ទឹកដី ទៅលើទីប្រជុំកោះជាច្រើន នៅក្នុងសមុទ្រ​ចិន​ខាង​កើត។

សមយុទ្ធយោធា នៅលើផ្ទៃសមុទ្រ របស់ប្រទេសមហាអំណាច ទាំង៤នេះ នឹងត្រូវគ្រោងធ្វើ ចាប់ពី​ថ្ងៃទី៣ ខែ​ឧសភា រហូត​ដល់​ថ្ងៃទី២២ ខែឧសភា នៅក្នុងដែនទឹក ជិតប្រទេសជប៉ុន នៅកោះ «Guam» និង​នៅ​ក្នុង​ប្រជុំ​កោះ «Northern Mariana» (ប្រជុំកោះទាំងនេះ ស្ថិតនៅកណ្ដាល​មហាសមុទ្រ ប៉ាស៊ីភិក ភាគខាងជើង)។ នេះ​បើ​តាម​សេចក្ដី​ប្រកាស​ព័ត៌មាន របស់កងទ័ពស្វ័យការពារ នៃប្រទេស ជប៉ុន។

អ្នកនាំពាក្យមេបញ្ជាការ​​កងទ័ព​បារាំង លោក «Patrik Steiger» បានថ្លែងឲ្យដឹងថា៖ «នាវា​បារាំង​ទាំង​នេះ នឹង​ធ្វើ​សកម្មភាព​ជា​ពហុភាគី ដើម្បីធ្វើឲ្យមាន​ការរីកចំរើន​ទៅមុខ នូវកិច្ចសហប្រតិបត្តិការ នៅ​ក្នុង​តំបន់ និង​ដើម្បី​បង្ហាញ​ពី​វត្តមាន របស់​កងទ័ព​បារាំង នៅក្នុង​លំហ​សមុទ្រ​ផ្សេង​ទៀត»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...