កូរ៉េខាងជើងបាញ់កាំជ្រួចអន្តរទ្វីបថ្មី ផ្គើនប្រធានាធិបតី ត្រាំ
- ដោយ: កេសរ កូល ([email protected]) - ភ្នំពេញ ថ្ងៃទី១២ កុម្ភៈ ២០១៧
- កែប្រែចុងក្រោយ: February 12, 2017
- ប្រធានបទ: ឧបទ្វីបកូរ៉េ
- អត្ថបទ: មានបញ្ហា?
- មតិ-យោបល់
-
ប្រទេសកូរ៉េខាងជើង បានបាញ់កាំជ្រួចអន្តរទ្វីមួយគ្រាប់ទៀត នៅព្រឹកថ្ងៃអាទិត្យនេះ ចូលទៅក្នុងសមុទ្រជប៉ុន (ឬហៅតាមប្រជាជនកូរ៉េ៖ សមុទ្រខាងកើត)។ នេះ បើតាមការអះអាង របស់ក្រសួងការពារជាតិកូរ៉េខាងត្បូង នៅមុននេះបន្តិច។ កាំជ្រួចត្រូវបានបាញ់ចេញ នៅវេលាម៉ោង ៧ និង៥៥នាទី ព្រឹក (ត្រូវគ្នា នឹងម៉ោងនៅកម្ពុជា តែត្រូវជាម៉ោង ០០ និង៥៥នាទី ម៉ោងនៅបារាំង) ពីបន្ទាយទ័ពអាកាស របស់ប្រទេសកុម្មុយនីស ឈ្មោះ «Banghyon» ដែលស្ថិតនៅភាគខាងលិច នៃប្រទេស។
អ្នកនាំពាក្យរបស់ក្រសួងការពារជាតិកូរ៉េខាងត្បូង បានឲ្យដឹងថា ការបាញ់កាំជ្រួចនេះ មានចម្ងាយប្រមាណ៥០០គីឡូម៉ែត្រ ប៉ុន្តែប្រភេទ នៃកាំជ្រួចរយៈឆ្ងាយមួយគ្រាប់នេះ កំពុងត្រូវបានស្រាវជ្រាវ និងពិនិត្យវិភាគនៅឡើយ។
ទីភ្នាក់ងារព័ត៌មាន «Yonhap» (កូរ៉េខាងត្បូង) បានស្រង់ប្រភព ពីមន្ត្រីយោធាកូរ៉េខាងត្បូងមកបញ្ជាក់ថា របបកុម្មុយនីស ទំនងជាបានសាកល្បង កាំជ្រួចរយៈមធ្យមមួយរបស់ខ្លួន ដែលមានឈ្មោះ «Musudan»។ កាលពីខែតុលា ឆ្នាំទៅម៉ិញ ក្រុងព្យុងយ៉ាង បានបាញ់រួចហើយ នូវកាំជ្រួចប្រភេទនេះ ចំនួនពីរគ្រាប់ផ្ទួនៗគ្នា ចេញពីបន្ទាយទ័ពអាកាសខាងលើ។
នៅក្នុងសារជូនពរឆ្នាំថ្មី របស់មេដឹកនាំកូរ៉េខាងជើង លោក គីម ជុង-អ៊ុន (Kim Jong-un) កាលពីដើមឆ្នាំនេះ បានអះអាងថា របបកុម្មុយនីសរបស់លោក នឹងធ្វើការសាកល្បង កាំជ្រួចអន្តរទ្វីប នៅក្នុងពេល ដ៏ឆាប់ខាងមុខ។ ប្រព័ន្ធផ្សព្វផ្សាយផ្លូវការ របស់របបមួយនេះ ក៏បានបញ្ជាក់បន្ថែមដែរថា ការបាញ់សាកល្បងនេះ អាចនឹងត្រូវធ្វើ នៅគ្រប់វេលាទាំងអស់។
ផ្គើន ឬចង់សាកចិត្ត ប្រធានាធិបតីអាមេរិកថ្មី ...
សម្រាប់ក្រសួងការពារជាតិកូរ៉េខាងត្បូងវិញ បានពន្យល់នៅក្នុងសេចក្ដីប្រកាសព័ត៌មានមួយថា៖ «ការបាញ់សាកល្បងជាថ្មីនេះ មានបំណងពញ៉ាក់សហគមន៍អន្តរជាតិ ឲ្យចាប់អារម្មណ៍ មកលើប្រទេសកូរ៉េខាងជើង នៅក្នុងវិស័យនុយក្លេអ៊ែរ និងសព្វាវុធធុនធ្ងន់»។
សេចក្ដីប្រកាសព័ត៌មាននោះ បានបញ្ជាក់ថា៖ «វាជាការបង្ករឿងផ្នែកយោធាមួយ ដើម្បីចង់ដឹង ពីប្រតិកម្មរបស់រដ្ឋបាលថ្មី របស់សហរដ្ឋអាមេរិក ដែលដឹកនាំដោយប្រធានាធិបតី ទើបចូលកាន់តំណែង លោក ដូណាល់ ត្រាំ (Donald Trump)»។
ការបាញ់កាំជ្រួចមួយគ្រាប់នេះ ជាការសាកល្បងលើកដំបូងបង្អស់ ពីសំណាក់ប្រទេសកូរ៉េខាងជើង រាប់ចាប់តាំងពីលោក ដូណាល់ ត្រាំ បានជាប់ឆ្នោត ជាប្រធានាធិបតីអាមេរិក ក្នុងខែវិច្ឆិកា ឆ្នាំកន្លងទៅ។
កាលពីចុងសប្ដាហ៍មុន លោក ជេម ម៉ាទីស (James Mattis) រដ្ឋមន្ត្រីការពារជាតិអាមេរិកថ្មី បានថ្លែងខ្លាំងៗ នៅក្នុងដំណើរទស្សនកិច្ចរបស់លោក ទៅកាន់ឧបទ្វីបកូរ៉េ ថា ការវាយប្រហារ ដោយអាវុធនុយក្លេអ៊ែរ ពីសំណាក់ប្រទេសកុម្មុយនីស កូរ៉េខាងជើង ប្រឆាំងនឹងសហរដ្ឋអាមេរិក ឬសម្ព័ន្ធមិត្តអាមេរិកណាមួយនោះ នឹងទទួលបានមកវិញ នូវចម្លើយប្រកបដោយ«ប្រសិទ្ធិភាព» និងការបង្ក្រាប ឲ្យ«រាបដល់ដី»៕