ជំនួបដ៏តឹងតែង នៃការ​ដោះស្រាយវិវាត រវាងតំណាងស្ថាប័ននិងអាជ្ញាធរ ជុំវិញខេត្តកំពត និងតំណាង​គណបក្ស​​សម្ព័ន្ធ​ដើម្បីលិទ្ធិ​ប្រជាធិប​តេយ្យ (ដែលហៅខ្លួនឯង ថាបក្សជួង) បានបញ្ចប់ទៅ ដោយ​គ្មានបាន​លទ្ធផល​អ្វី​ជាដុំ​កំភួន​នោះទេ។

នៅក្នុង​ជំនួប ដែលមានរយៈពេល​មួយម៉ោងនោះ ការសួរឆ្លើយ តបទៅតបមក រវាងភាគីទាំងសង បានធ្វើឡើង​ រហូត​​ដល់​តម្លើង​​សម្លេងខ្លាំងៗដាក់គ្នា ដោយចាប់ផ្ដើមពីសំដី របស់តំណាងអាជ្ញាធរ ដែលនិយាយដូចយ៉ាង «ប្អូន​ឯង មិនទាន់ចេះរបៀបពិភាក្សាទេ (អញ្ចឹងហើយ) បានជាបងសួរ» និងបន្ទាប់មក «យើងទាំងអស់គ្នា នៅ​មូលដ្ឋាន ហើយប្អូនមិនជឿ តែប្អូនមកពីភ្នំពេញ ប្អូននិយាយថាត្រូវ (...)» ជាដើម។

តែសម្រាប់​តំណាង​គណបក្សសម្ព័ន្ធ​ដើម្បី​ប្រជាធិបតេយ្យ​វិញ នៅតែសំដែងភាពមិនជឿជាក់ ហើយទាមទារ​ឲ្យ​ក្រុម​អាជ្ញាធរ បង្ហាញ​ភស្ដុតាង និងរហូតដល់អះអាងថា «(ដោយសារតែអត់ជឿ​នេះហើយ) ទើបបានបង្កើត​គណបក្ស​នយោបាយ»។ ជាពិសេស តំណាង​គណបក្ស «ជួង» បានសុំទាមទារឲ្យខាងតែបាន ការដោះ​លែង​ក្រុម​យុវជន សមាជិកគណបក្សទាំង១៣នាក់ ដែលត្រូវ​បាន​អាជ្ញាធរ​ចាប់ខ្លួន កាលពី​រសៀលថ្ងៃទី ៤ ខែកុម្ភៈ ឆ្នាំ​២០១៧​កន្លងមក។ នៅទីបញ្ចប់នៃជំនួប តំណាងគណបក្ស«ជួង» បានប្រកាសថា បើគ្មាន​ការដោះលែង​ក្រុម​គ្នីគ្នា​ទាំង១៣​នាក់​ទេ ពួកគេនឹង​យក​ករណី​នេះ ពង្រីកឲ្យធំ ដោយឆ្លងកាត់តាមការផ្សព្វផ្សាយ រហូតឡើងដល់​ថ្នាក់​នាយក​រដ្ឋមន្ត្រី​។

» អានអត្ថបទដែលទាក់ទង៖ អ្នក​គាំទ្រ​បក្ស​ជួង​ប្រមូល​គ្នា​ធ្វើ​បាតុកម្ម នៅ​ទីរួម​​ខេត្ត​កំពត

ខាងក្រោមនេះ ជាវីដេអូទាំងស្រុង នៃ​ជំនួប​ជាង​​មួយ​ម៉ោង​ កាលពីព្រឹកថ្ងៃទី៥ ខែកុម្ភៈ ឆ្នាំ២០១៧ (វីដេអូ​របស់​ស្នងការ​ដ្ឋាន​ខេត្ត)៖