ហ៊ុន សែន មាន​ងារ​ថ្មី​ថា​ជា​នាយក​រដ្ឋមន្ត្រី​ជំនាញ... ខាង​ផ្លូវ​ភេទ

នៅចំពោះការចំណាយពេល ចំណាយកម្លាំង របស់លោកនាយករដ្ឋមន្ត្រី ហ៊ុន សែន ក្នុងការលើកយក រឿង​ផ្លូវ​ភេទ​ផ្ទាល់​ខ្លួន របស់​អ្នក​ដទៃ មកប្រកាស ឬសរសេរ​បង្ហាញជាសាធារណៈ ក្រុមអ្នកប្រើប្រាស់ហ្វេសប៊ុក យ៉ាង​សន្ធឹក​សន្ធាប់ បាន​ធ្វើ​ប្រតិកម្ម​ត្រឡប់​មកវិញ ដោយបានដាក់ងារថ្មីមួយ ឲ្យលោក ហ៊ុន សែន ថាជា​នាយក​រដ្ឋមន្ត្រី​ជំនាញ... ខាង​«ផ្លូវភេទ»។
ហ៊ុន សែន មាន​ងារ​ថ្មី​ថា​ជា​នាយក​រដ្ឋមន្ត្រី​ជំនាញ... ខាង​ផ្លូវ​ភេទ
លោក ហ៊ុន សែន ថតរូប «Selfie» ជាមួយភរិយារបស់លោក នៅលើស្ពានក្រុងតាខ្មៅ។ (រូបថតលើហ្វេសប៊ុក)
Loading...
  • ដោយ: ដារា រិទ្ធ ([email protected]) - ភ្នំពេញ ថ្ងៃទី២១ មករា ២០១៧
  • កែប្រែចុងក្រោយ: January 21, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

«នាយករដ្ឋមន្ត្រីជំនាញ ខាងស៊ើបរឿងផ្លូវភេទ» ទំនងក្លាយជាងារថ្មីមួយ សម្រាប់លោក ហ៊ុន សែន បន្ទាប់​ពី​លោក បាន​សរសេរ​ទម្លាយ នៅលើទំព័រ​ហ្វេសប៊ុក​របស់លោក នូវអាថ៌កំបាំងស្ត្រីយកប្ដីគេម្នាក់ ដែល​លោក​អះអាង​ថា ជារឿងអាស្រូវផ្លូវភេទ របស់មន្ត្រីស្រីខ្មែរកាត់បារាំង របស់អង្គការ​ឃ្លាំមើល​ពិភពលោក ដែល​ហៅ​ជា​ភាសា​អង់គ្លេស «Global Witness»។

នាយក​រដ្ឋមន្ត្រី​កម្ពុជា បានសរសេររឿងរ៉ាវអាថ៌កំបាំងនេះ នៅក្នុងផ្នែក​ដាក់​​មតិ​យោបល់ នៃទំព័រហ្វេសប៊ុក​ ដូច្នេះ​ថា៖ «រឿង Global Witness ចាប់​ផ្តើម​ពីបុគ្គលិក​ស្រីម្នាក់ ខ្មែរកាត់​បារាំង ទៅធ្វើការ​នៅ​កម្ពុជា ទៅលួច​សាហាយ​ជាមួយប្តីគេ ដល់ប្រពន្ធគេ​ទៅតាមរករឿង​ដល់ផ្ទះ បែជាចោទថា អ្នករក​សុីកាប់​ឈើ ទៅ​រក​រឿង»។

លោក ហ៊ុន សែន នៅបានពន្យល់ថា បុគ្គលិកស្ត្រីរូបនោះ មានម្ដាយជាតិខ្មែរ និងឪពុកជាតិបារាំង។ លោក​បាន​​សរសេរ​​បញ្ជាក់ទៀតថា៖ «ពេលនោះ ទូតអង់គ្លេសក៏ដឹងរឿងនេះ។ រឿងអាស្រូវ​ផ្លូវ​ភេទ គេបង្វែរ​ទៅ​ជា​រឿង​ផ្សេង ពិត​ជា​​ថោកទាប​​មែន។»។

ការទម្លាយចេញ នូវរឿងរ៉ាវអាថ៌កំបាំងនេះ បានធ្វើឡើង បន្ថែមពីលើប្រតិកម្ម របស់លោកហ៊ុន សែន តប​ទៅ​អង្គការ​ឃ្លាំមើលពិភពលោក ដែលបាន​រិះគន់​លោក​នាយករដ្ឋមន្ត្រី និងរបប​​ដឹកនាំ​​របស់​លោក ជាច្រើន​ដង​ថា ​ពោរ​ពេញ​​ដោយអាថ៌កំបាំង ការបំផ្លិចបំផ្លាញធនធានធម្មជាតិ អំពើពុករលួយ បក្ខពួក​និយម ជាមួយ​នឹង​ការ​ក្ដោប​​​ក្ដាប់ នៅក្នុងដៃនៃសមាជិកគ្រួសារត្រកូល «ហ៊ុន» នូវសរសៃឈាមសេដ្ឋកិច្ចជាតិកម្ពុជា។

សម្រាប់អ្នកប្រើប្រាស់​​បណ្ដាញ​សង្គមមួយផ្នែក ដែលមានជំហរគាំទ្ររដ្ឋាភិបាល និងគណបក្ស​ប្រជាជនកម្ពុជា បានគិតថា ការទម្លាយចេញ ជាសាធារណៈ របស់លោក ហ៊ុន សែន នូវ​«អាថ៌កំបាំង​ផ្លូវភេទ»នេះ គឺ​ជា​ពន្លឺ​មួយ សម្រាប់ក្រុម​ប្រឆាំង«ផ្កាប់មុខ»ទាំងអស់ កុំឲ្យ«បរទេសនិយម» ជាជាងនិយម​«មេដឹកនាំ​ជាតិឯង» ដែល​កំពុង​​ដឹកនាំ​ប្រទេស ពោរពេញ​ដោយ​«គតិបណ្ឌិត»។

ប៉ុន្តែមួយផ្នែក​ទៀត បានគិតថា លោក ហ៊ុន សែន កំពុងយក​រឿងជាតិ ប្រព័ន្ធគ្រប់គ្រង និងការដឹកនាំប្រទេស មក​លាយឡំ នឹងរឿងឯកជនតូចមួយ។ អ្នក​ប្រើប្រាស់​បណ្ដាញសង្គមមួយរូប បានសរសេរថា៖ «រឿងជីវិត​ឯកជន​របស់​គេទេ ដូចអត់មានពាក់ព័ន្ធ រឿងគុណភាពកាងារ។ នាយករដ្ផមន្រ្តី មិនគួរ​ហែកហួរ​​រឿង​​អាស្រូវ​ផ្លូវ​ភេទ​របស់​អ្នក​ដ៏ទៃ​ឡើយ វាប៉ះពាល់កិត្តិយសគាត់ ទៅវិញទេ។»។

នាយករដ្ឋមន្ត្រីកម្ពុជា ធ្លាប់បានថ្លែង ជាសាធារណៈ ពីរឿងរ៉ាវ«ផ្លូវភេទ»ដូច្នេះ ជាច្រើនដងរួចមកហើយ ជា​ពិសេស​ករណី ដែលគេជឿថា បានជាប់​ទាក់ទង​នឹងលោក កឹម សុខា អនុប្រធានគណបក្សសង្គ្រោះជាតិ កាល​ពីប៉ុន្មានខែមុន បន្ទាប់ពីខ្សែអាត់សម្លេង ពោរពេញដោយមន្ទិលជាច្រើន ត្រូវបាន​យក​មក​បង្ហោះ នៅលើ​បណ្ដាញ​សង្គម។

ទំនងជាដោយសារ បានដឹងនូវរឿង«អាស្រូវផ្លូវភេទ» ដ៏ប្លែកៗជាច្រើនដូច្នេះហើយ ទើបក្រុមអ្នកប្រើប្រាស់​បណ្ដាញ​សង្គម បាននាំគ្នាដាក់ងារ​ឲ្យលោក ហ៊ុន សែន ដែលពូកែ«ទម្លាយ»រឿងទាំងអស់ ចេញជា​សាធារណៈ ថាជា​នាយករដ្ឋមន្ត្រី ដែលមានជំនាញ​​ខាង​ផ្លូវ​ភេទ ឬនាយករដ្ឋមន្ត្រី តាមដានផ្លូវភេទ។ ខ្លះ​ទៀត បាន​ហៅ​លោក​ថា ជា​«លោកគ្រូផ្លូវភេទ»។

ម្ចាស់គណនេយ្យហ្វេសប៊ុក ឈ្មោះ «Hang Sambopiphoas » បានសរសេរចំអកថា៖ «គ្មានអ្វីនិយាយ នឹង​តប​តរ មានតែយករឿងកេរ្តិ័ខ្មាសគេ មកវាយ​បក... ប្រុសអន់ចរឹត តិចគេដាក់ឈ្មោះថ្មីឲ្យថា នាយករដ្ឋមន្ត្រី​តាម​ដាន​ផ្លូវភេទ»។ ខណៈលោក «Puth Noeun» បានសរសរថា៖ «មនុស្សយើង (បើ)​ចូលចិត្ត​អី (គឺ)និយាយ​តែ​អាហ្នុង គេ​និយាយ​រឿងជាតិ ឯង​គ្មាន​អ្វីក្រៅ ពីបុគ្គល រឿងផ្លូវ​ភេទទេ!»។

ខ្លះទៀត បានសួរចូលស៊ីជម្រៅថា រួចចុះលោក ហ៊ុន សែន ខ្លួនលោក មិនដែលមាន​រឿងអាស្រូវ​«ផ្លូវភេទ»​ទេ​ឬ? ម្ចាស់​គណនេយ្យ ឈ្មោះ «Hourtleng Heng» បាន​ដាក់ជាសំនួរ ​តាម​បែប​​បញ្ឆិត​បញ្ឆៀង​ថា៖ «បង​ប្អូន​​ស្គាល់​អ្នកស្រី ពិសិដ្ឋ ពីលិការ ឬ​អត់?​»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...