នាយក​ចារកម្ម​អាមេរិក​ប្រាប់ ត្រាំ ឲ្យ​មាន​«វិន័យ»​ក្នុង​ការ​ប្រើ​សំដី

លោក ​ចន ប្រែនណន (John Brennan) នាយកបណ្ដាញចារកម្មអាមេរិក ដែលហៅកាត់​ជា​ភាសា​អង់គ្លេស «CIA» បាន​អំពាវនាវ ទៅ​កាន់​អនាគត​ប្រធានាធិបតីអាមេរិក ឲ្យមាន«មានវិន័យ» ក្នុង​រាល់​ពាក្យ​សំដី​របស់​ខ្លួន ដើម្បី​ជា​«ប្រយោជន៍»​ដ៏​ខ្ពង់ខ្ពស់ របស់​ប្រទេស​ជាតិ។
នាយក​ចារកម្ម​អាមេរិក​ប្រាប់ ត្រាំ ឲ្យ​មាន​«វិន័យ»​ក្នុង​ការ​ប្រើ​សំដី
លោក ដូណាល់ ត្រាំ ប្រធានាធិបតីអាមេរិក ដែលទើបនឹងជាប់ឆ្នោតថ្មីថ្មោង។ (រូបថត Reuters)
Loading...
  • ដោយ: សុបិន្ដ ([email protected]) - ម៉ុងរ៉េអាល់ ថ្ងៃទី ១៦ មករា ២០១៧
  • កែប្រែចុងក្រោយ: January 17, 2017
  • ប្រធានបទ: ចារកម្មអាមេរិក
  • អត្ថបទ: មានបញ្ហា?
  • មតិ-យោបល់

នាយកបណ្ដាញចារកម្មអាមេរិក ហៅកាត់ថា «CIA» លោក ចន ប្រែនណន (John Brennan) បាន​ផ្ដល់​យោបល់​ ទៅ​លោក ដូណាល់ ត្រាំ (Donald Trump) អនាគតប្រធានាធិបតីអាមេរិក ដែលនឹងចូលស្បថ កាន់​តំណែង ​នៅ​ថ្ងៃ​ទី២០ ខែ​មករា​ខាង​មុខ​នេះ ឲ្យធ្វើការ«ប្រុងប្រយ័ត្ន» នូវរាល់ពាក្យសំដី ដែលមហាសេដ្ឋី​​អចលនវត្ថុ​មួយ​នេះ បាន​លើក​ឡើង ជាពិសេស​ជុំវិញអ្វីៗ ដែលទាក់ទង​នឹង​ប្រទេសរ៉ូស្ស៊ី។ លោក ចន ប្រែនណន បាន​សម្ដែង​​ការ​ព្រួយ​បារម្ភ​​របស់​​លោក​​យ៉ាង​​ដូច្នេះ នៅចំពោះប្រតិកម្ម​​ជាញឹកញាប់ របស់លោក ត្រាំ ដែល​បាន​ធ្វើ​ឡើង នៅ​តាម​បណ្ដាញ​សង្គម ទ្វីសធើរ (Twitter)។

ក្នុងកិច្ចសម្ភាស ផ្ដល់ទៅឲ្យទូរទស្សន៍ «Fox News» លោក ប្រែនណន​ បានលើកឡើងថា៖ «អត្តនោម័តិ មិន​មែនជា​រឿង​មួយ ដែល​ជួយ​ការពារ ផលប្រយោជន៍ នៃសន្តិសុខជាតិនោះទេ។ ដូច្នេះ នៅពេល​គាត់​ថ្លែង​ជា​មតិ ឬ​ជាប្រតិកម្ម​ម្ដងៗ ចាំបាច់​ត្រូវឲ្យប្រាកដ ថាគាត់​យល់​ច្បាស់ ពីការចូល​ពាក់ព័ន្ធ និងផលប៉ះពាល់​ដ៏ស៊ីជម្រៅ នៃ​ពាក្យ​សំដី​ទាំង​នេះ ថាវាអាចកើតមាន ទៅលើសហរដ្ឋអាមេរិក។»

នាយកចារកម្ម «CIA» បានធ្វើការអំពាវនាវ ទៅកាន់អនាគតប្រធានាធិបតីអាមេរិក ឲ្យប្រកាន់ភ្ជាប់ នូវ​«វិន័យ» ​ដើម្បី​ជា​ប្រយោជន៍​ដ៏​ខ្ពង់ខ្ពស់ សម្រាប់ប្រទេសជាតិ។ លោក ប្រែនណន បានថ្លែងឡើងថា៖ «លោក ត្រាំ ត្រូវ​យល់​ថា អ្វី​ដែល​ធំ​ជាង​រូប​គាត់ ហើយអាចនឹង​មានបញ្ហានោះ គឺ​ជា​សហរដ្ឋអាមេរិក និង​សន្តិសុខ​ជាតិ។ គាត់​នឹង​មាន​ឱកាស ដើម្បី​ធ្វើវា​ឲ្យ​ចេញ​ជា​រូបរាង ជាជាង​គិតតែ​ពីនិយាយ និងបង្ហោះសារ​តាម​ទ្វីសធើរ។»។

លោក ចន ប្រែនណន បានត្រឡប់មករៀបរាប់ឡើងវិញ ពីរបាយការណ៍មួយចំនួន ដែលត្រូវ​បាន​បែក​ធ្លាយ តាមប្រព័ន្ធ​ផ្សព្វផ្សាយ កាលពីសប្ដាហ៍​កន្លងទៅ និយាយ​ពី​ការចូលជ្រៀតចូល ក្នុងប្រព័ន្ធ​​បោះឆ្នោត​​អាមេរិក ពី​សំណាក់​​ប្រទេស​រ៉ូស្ស៊ី។ របាយការណ៍​នោះ មិនត្រូវបានលោក ដូណាល់ ត្រាំ ស្វាគមន៍​ឡើយ។ ផ្ទុយ​ទៅ​វិញ អនាគត​​ប្រធានាធិបតី​អាមេរិក ថែមទាំងបរិហារ​បាយការណ៍នោះ ថាមិន​ពិត និងជាការប្រឌិត​ឡើង សព្វ​គ្រប់​បែប​យ៉ាង។ លោក ត្រាំ បានចោទ​ភ្នាក់ងារ​ចារកម្ម​អាមេរិក ថាបានអនុវត្តន៍ការងារ ដូចទៅនឹងក្រុម ណាហ្សី​អាល្លឺម៉ង់។

ការ​ប្រៀបធៀប របស់លោក ត្រាំ ទំនងជាមិនធ្វើឲ្យលោក ប្រែនណន សប្បាយចិត្តនោះឡើយ ដោយ​បាន​ហៅប្រតិកម្ម​នោះ ថាបាន​បង្កើត ឲ្យមាន​«ស្រមោល​ដ៏ធំ»។ នាយកចារកម្មអាមេរិក បានថ្លែងចោទ​សួរថា តើវាគួរដែរ​ឬទេ ដែលអានាគត​ប្រធានាធិបតី ប្រកាសជា​សាធារណៈ ថាខ្លួនមិនទុកចិត្ត ទៅលើបណ្ដាញ​ចារកម្ម របស់ប្រទេសខ្លួន យ៉ាងដូច្នេះ?

យ៉ាងណា លោក ចន ប្រែនណន នៅតែ​បាន​ថ្លែងការពារ​​ការងារ របស់​ទីភ្នាក់ងារ​ចារកម្មរ ដែលលោក​​កំពុង​ដឹកនាំ។ លោកថា៖ «វាបង្ហាញ ពីការទទួលខុសត្រូវ របស់ប្រធាន​ផ្នែក​នានា របស់​បណ្ដាញ​ចារកម្ម ដែល​ចាំ​បាច់ ត្រូវ​មាន​ការយក​ចិ​​ត្តទុកដាក់  ក្នុងរឿងនេះ ពីសំណាក់​អនាគតប្រធានាធិបតី​ និង​ប្រធានាធិបតី​​បច្ចុប្បន្ន ​ទើប​មាន​ការ​បែកធ្លាយ ពី​របាយការណ៍​អស់​ទាំង​នេះ»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...