ចាប់ពីឆ្នាំ២០២៦ ប្រទេសចូលរួមដណ្ដើមពានបាល់ទាត់ពិភពលោក នឹងកើនដល់ចំនួន៤៨
- ដោយ: ជ័យវិបុល ([email protected]) - ប៉ារីស ថ្ងៃទី១០ មករា ២០១៧
- កែប្រែចុងក្រោយ: January 10, 2017
- ប្រធានបទ: បាល់ទាត់
- អត្ថបទ: មានបញ្ហា?
- មតិ-យោបល់
-
ជាការផ្លាស់ប្ដូរជាប្រវត្តិសាស្ត្រ ដែលអនុញ្ញាតឲ្យមានប្រទេស មកចូលរួមក្នុងព្រឹត្តិការណ៍៤ឆ្នាំម្ដង នៃការប្រកួតបាល់ទាត់ពិភពលោក មានចំនួនច្រើន និងមានក្ដីសង្ឃឹមច្រើនជាងមុន។ ក្រុមប្រឹក្សាភិបាល នៃសមាគមបាល់ទាត់ពិភពលោក (ហៅកាត់ថា FIFA) ដែលជាស្ថាប័នគ្រប់គ្រងបាល់ទាត់ ដ៏ធំជាងបង្អស់នៅលើផែនដី ទើបនឹងបោះឆ្នោតជាឯកច្ឆ័ន្ទ សម្រេចយកការកំណត់ថ្មីនេះ កាលពីព្រឹកថ្ងៃទី១០ ខែមករានេះ នៅក្នុងក្រុង ហ្សីរីស (Zurich) ប្រទេសស្វីស ដោយបន្ថែមចំនួនក្រុមបាល់ទាត់ជម្រើសជាតិ ពីចំនួន៣២ សព្វថ្ងៃ ឲ្យឡើងដល់ចំនួន៤៨ក្រុម ចាប់ពីឆ្នាំ២០២៦ខាងមុខ។ ក្រុមទាំង៤៧នេះ នឹងមកជួបទាត់ នៅក្នុងវគ្គជម្រុះដំបូង ដោយបែងចែក ជា១៦ពូល (Poule) ក្នុងមួយពូល មាន៣ក្រុម។
ការតម្លើងចំនួនក្រុមជម្រើសជាតិ នៅក្នុងជំនួបដ៏ធំ បួនឆ្នាំម្ដងនេះ ត្រូវបានធ្វើឡើង ក្រោមមូលហេតុ នៃការរីកចម្រើនទៅមុខ នៃកីឡាបាល់ទាត់ និងការវិវត្តន៍ នៃសង្គមមនុស្ស ជុំវិញការប្រាស្រ័យទាក់ទងគ្នា និងការទទួលផលពីកីឡាមួយនេះ។ ការផ្លាស់ប្ដូរចំនួនចូលរួម នៃក្រុមកីឡាករនេះ មិនមែនទើបតែធ្វើឡើង ជាលើកទីមួយនោះទេ។
ក្រុមបាល់ទាត់ជម្រើសជាតិ ដែលមកចូលរួមប្រកួត ដណ្ដើមពានរង្វាន់ពិភពលោកដំបូងគេ នៅឆ្នាំ១៩៣០ ក្នុងប្រទេសអ៊ុយរូហ្គាយ (ទ្វីបអាមេរិកខាងត្បូង) មានចំនួនត្រឹមតែ១៦ ប្រទេសប៉ុណ្ណោះ។ រហូតមកដល់ឆ្នាំ១៩៨២ ដែលកាលនោះ ការប្រកួតធំនេះ ធ្វើឡើងនៅក្នុងប្រទេសអេស្ប៉ាញ ចំនួនក្រុមកីឡាករបានកើន ពី១៦ ទៅដល់២៤។ ហើយនៅឆ្នាំ១៩៩៨ (ការប្រកួត ធ្វើឡើងនៅក្នុងប្រទេសបារាំង) ចំនួននេះ បានឡើងពី២៤ ដល់ចំនួន៣២។ ចំនួននេះ នឹងរក្សាទុកដដែល សម្រាប់ជំនួបបាល់ទាត់ពិភពលោកនេះ នៅឆ្នាំ២០២២ខាងមុខ ដែលនឹងប្រព្រឹត្តិទៅ ក្នុងប្រទេសកាតា៕