នគរបាលច្រើនពាន់នាក់ (៧ពាន់) ត្រូវបានដាក់ពង្រាយ ដើម្បីការពារសន្តិសុខ នៅទីលាន «Times Square» ដ៏ល្បីនៃទីក្រុងញ៉ូយក សហរដ្ឋអាមេរិក ដែលមានការជួបជុំគ្នា របស់មនុស្សរាប់សិបម៉ឺននាក់ ក្នុងយប់ឆ្លងឆ្នាំ ពីថ្ងៃ​ទី៣១ ខែធ្នូ ឆ្នាំ២០១៦ ចូលមកថ្ងៃទី០១ ខែមករា ឆ្នាំ២០១៧។ ប៉ុន្តែកងកម្លាំង​នគរបាលទាំងនោះ មិនបាន​ចាប់​អារម្មណ៍ នឹងចោរគាស់ហាងបីនាក់ ដែលបានធ្វើសកម្មភាព នៅចំងាយមិនឆ្ងាយប៉ុន្មាន ពីទីប្រារព្ធ​បុណ្យ ចូល​ឆ្នាំ​ថ្មី​​នោះ​ឡើយ។

មហាចោរទាំងបី បានធ្វើសកម្មភាព នៅវេលាម៉ោង ២២ យប់ថ្ងៃទី៣១ ខែធ្នូ ដោយបានប្រើដងដែក និងញញួរ ដើម្បីគាស់ទ្វាហាងបោះដុំ នូវគ្រឿង​អលង្កា​ដ៏ល្បីមួយ ឈ្មោះ «KGK Holdings» ដែលស្ថិតនៅជាន់ទី៦ នៃ​អាគារ​មួយ កណ្ដាលក្រុង។ ពួកគេបានគាស់ ទូដែកចំនួនពីរគ្រឿង ដែលមានដាក់ នូវខ្សែដៃ ខ្សែក ចិញ្ចៀន ក្រវិល... ដែលមានតម្លៃប្រមាណជា ៦លានដុល្លារ និងបានចាកចេញទៅវិញ ជាមួយនឹងគ្រឿង​អលង្កា​ទាំង​នេះ នៅ​វេលា​រំលងអាធ្រាត។

ប៉ុន្តែពួកគេបានភ្លេចខ្លួនថា នៅក្នុងពេលធ្វើសកម្មភាពនោះ ពួកគេត្រូវបានថតជាប់ ដោយកាម៉េរា​សុវត្ថិភាព​មួយ នៅពីលើទ្វាហាង។ តាមរយៈរូបភាព ដែល​ផ្សាយដោយ​នគរបាលក្រុងញ៉ូយក កាលពីម្សិលម៉ិញ បាន​បង្ហាញ​ថា ចោរម្នាក់ត្រូវបានថតជាប់ ឃើញមុខយ៉ាងច្បាស់ ខណៈចោរម្នាក់ទៀត បានយក​ញញួរ មក​កំទេច​កាម៉េរា​នោះ បន្ទាប់​ពី​ពួកគេ​ដឹង​ថា ម៉ាស៊ីនចាប់រូបមួយ កំពុងធ្វើសកម្មភាព ថតពួកគេ។

នគរបាលក្រុងញ៉ូយក បានផ្សាយរូបភាពនេះ (វីដេអូខាងក្រោម) និងបានប្រកាសស្វែងរកចាប់ខ្លួន មហាចោរ​ទាំង​បី​នាក់ ឲ្យខាងតែបាន៕

WANTED: 3 males for burglary of a jewelry wholesaler, 70 W. 36 St, Manhattan. Took $6Mil worth of jewelry. Call #800577TIPS w/info. @NYPDMTS pic.twitter.com/px805sw8Sk

— NYPD NEWS (@NYPDnews) 3 janvier 2017