សំដីចុងក្រោយរបស់អ្នកបើកយន្ដហោះរ៉ូស្ស៊ី មុនធ្លាក់ចូលសមុទ្រខ្មៅ
- ដោយ: សេក មនោរកុមារ ([email protected]) - បារីស ថ្ងៃទី៣០ ធ្នូ ២០១៦
- កែប្រែចុងក្រោយ: December 30, 2016
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
ទិន្នន័យហោះហើរ និងសម្លេងថតទុក នៅក្នុងប្រអប់ខ្មៅ របស់យន្ដហោះយោធា ប្រភេទ «Tupolev Tu-154» ដែលបានជួបគ្រោះថ្នាក់ ធ្លាក់ចូលសមុទ្រ កាលពីថ្ងៃទី២៥ ខែធ្នូកន្លងមកនេះ បានប្រាប់ឲ្យដឹង ពីបញ្ហាបច្ចេកទេស នៅនឹងស្លាបយន្ដហោះ ដែលបានកើតឡើង នៅពេលយន្ដហោះបានហោះងើបខ្លួន ចេញពីព្រលានយន្ដហោះ។ នេះបើតាមរបាយការណ៍ ដែលសារព័ត៌មានរ៉ូស្ស៊ីជាច្រើន បានផ្សាយឲ្យដឹង។
ហើយសម្លេង ក្នុងប្រអប់ខ្មៅនោះ ក៏បានឲ្យដឹង ពីការជជែកគ្នាចុងក្រោយ របស់អ្នកបើកបរ យន្ដហោះទាំងពីរនាក់ និងការប្រឈមមុខរបស់ពួកគេ នៅចំពោះស្ថានការណ៍ មុនពេលយន្ដហោះ ធ្លាក់ចូលទឹកសមុទ្រនោះដែរ។ សារព័ត៌មាន «Life News» បានស្រង់ប្រភព ពីក្រុមអ្នកស៊ើបអង្កេត មកសរសេរថា ម្នាក់ពីក្នុងចំណោម អ្នកបើកបរទាំងពីរនាក់ បានស្រែកឡើងថា៖ «អាស្លាបយន្ដហោះចង្រៃវាយក៍!» បន្ទាប់មក អ្នកបើកបរដដែល ដែលជាជំនួយការបើកបរ បានស្រែកទៅកាន់ មេបញ្ជាការបើកបររបស់ខ្លួនថា៖ «លោកមេបញ្ជាការ... យើងកំពុងធ្លាក់ហើយ!»។
បើទោះជាព័ត៌មានខាងលើនេះ នៅមិនទាន់បានអះអាង ជាផ្លូវការក៏ដោយ តែវាដូចទៅនឹងការលើកឡើង របស់ការិយាល័យសហព័ន្ធ ទទួលបន្ទុកខាងសុវត្ថិភាពផ្លូវអាកាស របស់ប្រទេសរ៉ូស្ស៊ី ដែលបានអះអាង ក្នុងជំហានដំបូងថា ស្លាបយន្ដហោះ មិនបានបិទចូលទៅវិញ តាមការបញ្ជាឲ្យទាន់ពេល ហើយបានបង្កឲ្យមានគ្រោះថ្នាក់នេះឡើង។
អ្នកជំនាញមួយរូប មកពីការិយាល័យសហព័ន្ធខាងលើ បានថ្លែងឡើងថា៖ «នៅនាទីទីពីរ បន្ទាប់ពីយន្ដហោះ បានហោះងើបខ្លួនចេញពីព្រលាន យើងត្រូវបិទស្លាបយន្ដហោះ ទាំងសងខាងចូលទៅវិញ ប៉ុន្តែដោយសារបញ្ហាបច្ចេកទេស ស្លាបយន្ដហោះមួយ បានគាំងហើយនៅតែបើកដដែល។ ស្លាបមួយចំហៀង ដែលគាំងនេះ បានបង្កការរំខាន ដល់ការធាក់ខ្យល់ហោះទៅមុខ របស់យន្ដហោះ។ យើងអាចបញ្ជៀសគ្រោះថ្នាក់នេះបាន តែអ្នកបើកបរ (នៅក្នុងយន្ដហោះដែលធ្លាក់) មិនអាចធ្វើអ្វីបានទាន់ពេលទេ ដោយសារតែយន្ដហោះ ហោះនៅកំពសទាបនៅឡើយ។»។
សូមបញ្ជាក់ដែរថា យន្ដហោះធុន «Tu-154» របស់កងទ័ពរ៉ូស្ស៊ី បានហោះងើបខ្លួន នៅម៉ោង៥និង៤០នាទី ហើយភ្លាមៗក្រោយមក យន្ដហោះបានបាត់ខ្លួន ពីប្រព័ន្ធត្រួតពិនិត្យផ្លូវអាកាស។ ដំណឹងអកុសលបានធ្លាក់មកដល់ នៅពេលបន្ទាប់មកទៀត ថាយន្ដហោះបានធ្លាក់បោកខ្លួន ចូលក្នុងសមុទ្រ នៅខាងមុខក្រុង «Sotchi (ភាគខាងត្បូង នៃប្រទេសរ៉ូស្ស៊ី)»។
ពីក្នុងចំណោមអ្នកដំណើរ ទាំង៩២នាក់ ដែលជិះនៅក្នុងយន្ដហោះ មាន៨នាក់ជាបុគ្គលិកបម្រើការ របស់យន្ដហោះ និង៦៤នាក់ គឺជាកងសិល្បៈ ផ្នែកចម្រៀងជាពួក នៃកងទ័ពក្រហមរ៉ូស្ស៊ី។ កងសិល្បៈទាំងនេះ ត្រូវទៅចូលរួមប្រារព្ធពិធីអបអរសាទរឆ្នាំថ្មី របស់កងទ័ពរ៉ូស្ស៊ី នៅក្នុងប្រទេសស៊ីរី ដែលនឹងប្រព្រឹត្តិទៅ ក្នុងប៉ុន្មានថ្ងៃខាងមុខនេះ៕