យន្ដហោះ​យោធា​រ៉ូស្ស៊ី​ធ្លាក់​ចូល​សមុទ្រ ជាមួយ​កង​សិល្បៈ​​៦៤នាក់

យន្ដហោះយោធាមួយគ្រឿង របស់ប្រទេសរ៉ូស្ស៊ី បានធ្លាក់បោកខ្លួន ចូល​ក្នុង​សមុទ្រខ្មៅ កាលពីព្រឹកម៉ិញនេះ ជា​មួយ​មនុស្ស​៩២នាក់ ដែលជិះ​នៅក្នុង​យន្ដហោះ។ ពីក្នុងចំណោម​ជនរងគ្រោះទាំងនេះ មានអ្នកដំណើរ​ជាង​៦០នាក់ គឺ​ជា​កង​​សិល្បៈ ខាង​ចម្រៀង​ជាពួក របស់​កងទ័ព​ក្រហមរ៉ូស្ស៊ី។
យន្ដហោះ​យោធា​រ៉ូស្ស៊ី​ធ្លាក់​ចូល​សមុទ្រ ជាមួយ​កង​សិល្បៈ​​៦៤នាក់
យន្ដហោះប្រភេទ «Tupolev-154» របស់ក្រុមហ៊ុនអាកាសចរណ៍ «AEROFLOT» នៃ​ប្រទេសរ៉ុស្ស៊ី។
Loading...
  • ដោយ: សេក មនោរកុមារ ([email protected]) - បារីស ថ្ងៃទី២៥ ធ្នូ ២០១៦
  • កែប្រែចុងក្រោយ: December 25, 2016
  • ប្រធានបទ: គ្រោះអាកាស
  • អត្ថបទ: មានបញ្ហា?
  • មតិ-យោបល់

ជាមួយនឹង​សារសំដែង​មរណទុក្ខ លោក វ្លាឌីមៀរ ពូទីន (Vladimir Poutine) ប្រធានាធិបតីនៃប្រទេសរ៉ូស្ស៊ី បាន​បញ្ជាឲ្យបង្កើតឡើងភ្លាម នូវគណៈកម្មាការ​ស៊ើប​អង្កេត​មួយ ដឹកនាំដោយលោកនាយករដ្ឋមន្ត្រី ឌមីទ្រី ម៉េដវេដេវ (Dmitri Medvedev) ដើម្បីស្វែងយល់ ពីមូលហេតុពិតប្រាកដ ដែល​ធ្វើឲ្យ​យន្ដហោះយោធា​មួយ​គ្រឿង ធ្លាក់ចូលទៅក្នុងសមុទ្រខ្មៅ កាលពីព្រឹកថ្ងៃអាទិត្យនេះ នៅពេលដែលយន្ដហោះនេះ ហោះឆ្ពោះ​ទៅ​កាន់​ប្រទេស​ស៊ីរី។

យន្ដហោះធុន «Tu-154» បានហោះងើបខ្លួន នៅម៉ោង៥និង៤០នាទី ហើយភ្លាមៗក្រោយមក យន្ដហោះ​បាន​បាត់​ខ្លួន ពីប្រព័ន្ធត្រួតពិនិត្យផ្លូវអាកាស មុននឹង​ដំណឹងអកុសល​បានធ្លាក់មកដល់ នៅ​ពេល​បន្ទាប់​មកទៀត ថា​យន្ដហោះ​បាន​ធ្លាក់​បោកខ្លួន ចូលក្នុងសមុទ្រ នៅខាងមុខក្រុង «Sotchi (ភាគខាងត្បូង នៃ​ប្រទេស​រ៉ូស្ស៊ី)»។

ពីក្នុងចំណោមអ្នកដំណើរ ទាំង៩២នាក់ ដែលជិះនៅក្នុងយន្ដហោះ មាន៨នាក់ជាបុគ្គលិកបម្រើការ របស់​យន្ដហោះ និង៦៤នាក់ គឺជាកងសិល្បៈ ផ្នែក​ចម្រៀង​ជាពួក នៃកងទ័ពក្រហមរ៉ូស្ស៊ី។ កងសិល្បៈទាំងនេះ ត្រូវ​ទៅ​ចូលរួម​ប្រារព្ធ​ពិធី​អបអរសាទរ​ឆ្នាំថ្មី របស់កងទ័ពរ៉ូស្ស៊ី នៅក្នុងប្រទេសស៊ីរី ដែលនឹងប្រព្រឹត្តិទៅ ក្នុងប៉ុន្មាន​​ថ្ងៃ​​ខាង​​មុខ​នេះ។

នៅនឹងកន្លែង ដែលយន្ដហោះធ្លាក់ ក្រុមអ្នកជួយសង្គ្រោះ បានស្រង់បានសាកសពដំបូងគេ ដែលស្ថិត​នៅ​ចំងាយ​ប្រមាណជា ៦គីឡូម៉ែត្រ ពីដីជ្រោយ នៃក្រុង «Sotchi»។ នេះបើតាមការអះអាង របស់លោក «Igor Konashenkov» អ្នក​នាំ​ពាក្យ របស់ក្រសួងការពារជាតិរ៉ូស្ស៊ី។ ខាងក្រោមនេះ ជារូបភាពដំបូងគេ ពីកន្លែង​ដែល​យន្ដហោះ​បានធ្លាក់៖

មិនគោរពក្រិត្យក្រមសុវត្ថិភាព នៃការហោះហើរ?

ការស៊ើបអង្កេតព្រហ្មទណ្ឌ ទំនងជាកំពុងធ្វើ នៅក្នុងហេតុការណ៍ធ្លាក់យន្ដហោះនេះ។ គណៈកម្មការ​ស៊ើប​អង្កេត​រ៉ូស្ស៊ី បានអះអាង នៅក្នុងសេចក្ដីប្រកាស​ព័ត៌មាន​របស់ខ្លួន នៅវេលាថ្ងៃត្រង់ ថ្ងៃអាទិត្យនេះ ថាតើ​គ្រោះ​ថ្នាក់​​នេះ បង្កឡើងពីការមិនគោរព​ក្រិត្យក្រមសុវត្ថិភាព នៃការហោះហើរ ឬយ៉ាងណា។ ប្រភព​ពីមន្ត្រី​នៅ​ក្នុង​គណៈកម្មការ បានបង្ហើបឲ្យដឹងថា ក្រុមអ្នកស៊ើបអង្កេត កំពុងសាកសួរមន្ត្រី ខាងបច្ចេកទេស​មួយចំនួន ដែល​ទទួល​ខុស​ត្រូវ ការរៀបចំឲ្យ​យន្ដហោះ​ខាងលើហោះឡើង។

យន្ដហោះប្រភេទ «Tupolev-154» ដែលជាផលិតផល របស់ប្រទេសរ៉ូស្ស៊ី បានជួបគ្រោះថ្នាក់ ជាច្រើន​លើក​ច្រើន​សារ​មក​ហើយ ក្នុងពេលកន្លងមក។ កាលពីខែ​មេសា ឆ្នាំ២០១០ យន្ដហោះ​ប្រភេទនេះ ដែលមាន​ដឹក​លោក «Lech Kaczynski» ប្រធានាធិបតីប៉ូឡូញ និងមនុស្ស៩៥នាក់​ផ្សេងទៀត បានធ្លាក់បោកខ្លួន នៅ​ខណៈ​ពេល​​ដែល​​យន្ដហោះ ព្យាយាមចុះចត​ក្រៅព្រលាន ក្បែរនឹងក្រុង «Smolensk (ភាគខាងលិច នៃ​ប្រទេស​រ៉ូស្ស៊ី)»។ នៅក្នុងគ្រោះថ្នាក់នោះ គ្មានអ្នកដំណើរ ឬបុគ្គលិក​បម្រើការ នៅលើយន្ដហោះណាម្នាក់ នៅ​រស់រាន​មាន​ជីវិត​នោះទេ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...