ប្លន់​យន្ដហោះ​ពី​លីប៊ី​ ទៅ​កោះ​ម៉ាលត៍៖ អ្នក​ដំណើរ​ត្រូវ​បាន​ដោះ​លែង ខណៈ​ចោរ​ប្លន់​បាន​ប្រគល់​ខ្លួន

អ្នកដំណើរទាំងអស់ នៅលើយន្ដហោះ ដែលត្រូវបានចោរប្លន់ ចេញ​ពី​ប្រទេស​លីប៊ី ទៅកាន់កោះ ម៉ាលត៍ (ខាង​ត្បូង​​ប្រទេស​អ៊ីតាលី) ត្រូវបានដោះលែង​ទាំង​ស្រុង​ហើយ។ ដំណឹងចុងក្រោយ បានឲ្យដឹងថា ចោរប្លន់ទាំងពីរ ដែល​ជា​អ្នកស្មោះស្ម័គ្រ នឹងអតីត​ប្រធានាធិបតី​លីប៊ី លោក កាដាហ្វី បានប្រគល់ខ្លួន​ឲ្យអាជ្ញាធរហើយ បន្ទាប់​ពីស្ថិត​ក្រោម​​ការ​​ឡោម​​​ព័ទ្ធ របស់​​កងកម្លាំង​នៃប្រទេស​ម៉ាលត៍ អស់ជាច្រើនម៉ោង។
ប្លន់​យន្ដហោះ​ពី​លីប៊ី​ ទៅ​កោះ​ម៉ាលត៍៖ អ្នក​ដំណើរ​ត្រូវ​បាន​ដោះ​លែង ខណៈ​ចោរ​ប្លន់​បាន​ប្រគល់​ខ្លួន
យន្ដហោះ ប្រភេទអ៊ែរប៊ូស របស់ក្រុមហ៊ុន «Afriqiyah Airways» ដែលត្រូវចោរប្លន់ ចេញពីប្រទេសលីប៊ី មកចុះចតនៅលើកោះ ម៉ាលត៍។ (រូបថតលើទ្វីសធើរ)
Loading...
  • ដោយ: ឈូករ័ត្ន ([email protected]) - ភ្នំពេញ ថ្ងៃទី២៣ ធ្នូ ២០១៦
  • កែប្រែចុងក្រោយ: December 23, 2016
  • ប្រធានបទ: គ្រោះអាកាស
  • អត្ថបទ: មានបញ្ហា?
  • មតិ-យោបល់

ចោរមួយក្រុម ដែលមានគ្នា២នាក់ បានប្លន់យន្ដហោះ ប្រភេទអ៊ែរប៊ូស (Airbus A320) ចេញពីប្រទេសលីប៊ី មក​ចុះចតនៅលើកោះ ម៉ាលត៍ (Malte) ដែល​ស្ថិតនៅ​កណ្ដាលសមុទ្រ មេឌីទែរ៉ាណេ។ យន្ដហោះ​របស់ក្រុមហ៊ុន «Afriqiyah Airways» ខាងលើ មានដឹកអ្នកដំណើរចំនួន ១១៨នាក់ ហើយ​ត្រូវ​ហោះ ភ្ជាប់ជើងហោះហើរក្នុងស្រុក ពីខេត្តសេបា (Sebha - ភាគខាងត្បូងលីប៊ី) ឆ្ពោះមកកាន់​រដ្ឋធានី ទ្រីប៉ូលី (Tripoli - របស់​ប្រទេស​លីប៊ី)។

សារព័ត៌មាន «Times of Malta» របស់ប្រទេសម៉ាលត៍ បានរាយការណ៍នៅមុននេះថា អ្នកដំណើរទាំងអស់ រួម​នឹងក្រុមបុគ្គលិកបម្រើ នៅលើយន្ដហោះ ត្រូវ​បាន​ដោះ​លែង​ជាស្ថាពរហើយ។ អ្នកតំណាងម្នាក់ របស់​ក្រុមហ៊ុន​អាកាសចរណ៍ ក៏បានអះអាង​ដែរថា ក្រុមចោរប្លន់មានបំណងជាមុន ថាចង់ដោះលែង​រាល់អ្នកដំណើរ​ទាំង​អស់។ ប៉ុន្តែមក​ដល់ពេលនេះ ពួកគេបានចាប់​អ្នកបើកបរ​យន្ដហោះ ទុកធ្វើជាចំណាត់ខ្មាំង។

លោក «Joseph Muscat»​ នាយករដ្ឋមន្ត្រីរបស់ប្រទេសម៉ាលត៍ បានសរសេរនៅលើទំព័រទ្វីសធើរថា៖ «កង​កម្លាំង​រក្សាសន្តិសុខ កំពុងចាត់ការ លើករណី​ចាប់​ពង្រត់​យន្ដហោះនេះ»។ ខណៈប្រភពផ្លូវការ ពីប្រទេសលីប៊ី បាន​បញ្ជាក់​ថា៖ «ការចរចាកំពុងប្រព្រឹត្តិទៅ ដើម្បីធានាឲ្យបាន នូវសុវត្ថិភាព​របស់​អ្នក​ដំណើរ​ទាំងអស់»។ ប៉ុន្តែ​ប្រភព​នេះ មិនបានរៀបរាប់ថា ការចរចានេះធ្វើឡើង រវាងនរណា និងនរណានោះទេ។

យ៉ាងណាក៏ដោយ កងទ័ពរបស់ប្រទេសម៉ាលត៍ កំពុងត្រៀមជើងការរួចជាស្រេច នៅចំងាយប្រមាណ​ជាង​១០០ម៉ែត្រ ពីយន្ដហោះ។ គ្រប់ជើង​ហោះ​ហើរ​ទាំងអស់ ដែលត្រូវហោះចេញ និងត្រូវចុះចត នៅព្រលាន​យន្ដហោះ​មួយ​នេះ ត្រូវបានលប់ចោលទាំងអស់។

សារព័ត៌មាន «Times of Malta» ដដែលបាននិយាយថា ម្នាក់ពីក្នុងចំណោមចោរប្លន់យន្ដហោះនោះ បាន​អះអាង​ថា ខ្លួនជាស្មោះស្ម័គ្រ នឹងអតីត​ប្រធានាធិបតី​​​លីប៊ី លោក មូអាម៉ា កាដាហ្វី (Mouammar Kadhafi)។ ជន​មានគ្រាប់បែកមួយគ្រាប់ នៅជាប់នឹងខ្លួន ហើយបានគម្រាម ថានឹងបំផ្ទុះ​គ្រាប់​បែក​​នេះ​ឡើង ប្រសិន​ជា​អ្នក​បើកបរ​យន្ដហោះ មិនធ្វើតាមខ្លួន។ ដំណឹងចុងក្រោយ បានឲ្យដឹងថា ជននេះបានទាមទារ សុំសិទ្ធ​ជ្រកកោន​ផ្នែក​នយោបាយ នៅក្នុងប្រទេសមួយ នៃសហគមន៍អ៊ឺរ៉ុប។

តាំងពីបដិវត្តន៍អារ៉ាប់ ទម្លាក់លោក កាដាហ្វី ចេញពីតំណែង ក្នុងឆ្នាំ២០១១នោះរួច សហគមន៍អ៊ឺរ៉ុបបានហាម មិនឲ្យក្រុមហ៊ុន​អាកាសចរណ៍​ណា​មួយ របស់​ប្រទេសលីប៊ី បង្ហោះយន្ដហោះរបស់ពួកគេ ចូលមកលំហ​មេឃ​របស់​ខ្លួន​ឡើយ ក្រោមហេតុផល​«សន្តិសុខ»។ រហូតមកដល់ថ្ងៃនេះ ក្រុមហ៊ុន​អាកាសចរណ៍​ទាំង​នោះ គ្រាន់​តែ​អាច​ភ្ជាប់​ជើង​ហោះហើរ​មួយចំនួន នៅក្នុងស្រុក និងទៅកាន់ប្រទេសមួយចំនួន ដែលស្ថិតនៅជាប់ព្រំដែន នៃ​ប្រទេស​លីប៊ី​ប៉ុណ្ណោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...